यूहन्ना 8

व्यबिचारिणी जनानीके माफी

1मगर येशू आपन चेलासिके संगे जैतुन पहाडपर चल गेलै। 2फेर अगला दिन भोरे-भोर येशू परमेश्वरके मन्दिरमे गेलै, आर बहुते आदमी परमेश्वरके मन्दिरके ऐगनमे ओकरलगत जमा भेलै तब ऊ बैठ्लै आर ओकरासिके शिक्षा दिए लाग्लै। 3जब ऊ बोल्तहैं रहै ते, यहूदी धरमशास्त्रके पण्डितसब आर फरिसी समूहके आदमीसब मिलिके एकटा जनानीके पक्डीके आनल्कै, जकरा व्यबिचार करैके आरोपमे पकड्ल गेलै रहे। ऊसब मिलिके ऊ जनानीके भीडके समनामे खडा करिदेल्कै। ऊसब येशूके कहैल्कै, 4“गुरुजी, यी जनानी व्यबिचार कर्ते पक्डा पड्लै छे। 5परमेश्वरके वक्ता मूसाके विधि-विधानके मुताबिक एरंको व्यक्तिके पत्थल मारि-मारिके जान मारि देना चाही। ते तुहें कि कहैछ हमरासिके कि करना चाही?” 6यी बात ऊसब येशूके फसाबैके लिए कहैल्कै रहे, ताकी येशू कुछु एरंको बात बोलै जकर आधारपर ओकरा फसैल ज्या सकै। मगर येशू खाली आपन मुडा निच्चा झुक्याके आङगुरसे जमिनमे लिखे लाग्लै। 7मगर जब ऊसब लगातार पुछतहै रहलै, तब येशू मुडा उठ्याके ओकरासिके कहैल्कै, “तोरसिके बिच्चेमे जे कोय कहियो कोनो तरहके पाप नैकैल्कै छे, उहे सबसे पहेला यी जनानीके पत्थल ल्याके मार।” 8यी बात कहिके येशू फेर आपन मुडा झुक्याके जमिनमे आङगुर ल्याके कुछु लिखे लाग्लै। 9जब भीडमे जमा भेल आदमीसब येशूके बात सुनल्कै, तब बडका आदमीसे ल्याके छोटका आदमीसब सभेको पाप कैल्कै छे कहिके जानीके, ऊसब ओत्तेसे चल गेलै। खाली येशू आर ऊ जनानी ओत्ते रहि गेलै। 10येशू खडा भेलै आर ऊ जनानीसे कहैल्कै, “बहिन, तोरापर दोष लगाबेवाला आदमीसब कते चल गेलै? कि कोय तोरा सजाय नैदेल्कौ?” 11ऊ जनानी जबाब देल्कै, “नै मालिक, कोय सजाय नैदेल्कै।” येशू कहैल्कै, “हम्हुँ तोरा सजाय नैदेबौ। आब घर चल जो, आर आबसे फेर पापमे जीवन नैजिहैं।”

येशू संसारके उजेत छै

12जब येशू फेर आदमीसिसे बात कर्ते रहै, तब ऊ कहैल्कै, “हमे संसारके उजेत छियै। जे कोय हमर पाछु चल्तै, ऊ अनहारमे कहियो नैचल्तै, मगर उटा उजेतके पैतै जे कहियो खतम नैहुएवाला जीवन दैछै।” 13यी बात सुनिके फरिसी समूहके आदमीसब ओकरा कहैल्कै, “तुहें आपनहैं खाली आपन बारेमे गवाही दैछ, तोर गवाही सच्चा नैछै।” 14येशू जबाब देल्कै, “हमे आपन बारेमे खुद ही कहैछियै, तैय्योपर हमर कहेल बात सच छै, कहिनेकी हमे जानैछियै, हमे कतेसे ऐलियै छे, आर हमे कते जैछियै। मगर तोरासिके यी बात मालुम नैछौ। 15तुहेंसब बाहारसे दिखाई देल बातके आधारमे फैसला करैछैं, मगर हमे ते ककरो फैसला नैकरैछियै। 16हमे फैसला कर्बै ते हमर कैल फैसला, सच्चा ठहर्तै। कहिनेकी न्याय करेवाला हमे असकल्ला नैछियै, मगर हमे छियै आर हमरा भेजेवाला पिता छै। 17मूसाके विधि-विधानमे भी लिख्ल छै कि एक्केसंगे दीटा आदमीके बोल्ल बात सच हैछै। 18आपन बारेमे हमे आपनहैं कहैछियै, आर हमरा भेजेवाला पिता हमर बारेमे खुद ही बोलैछै।” 19तब ऊसब येशूके पुछल्कै, “तोर पिता कते छौ?” येशू जबाब देल्कै, “तुहेंसब नैते हमरा चिन्हैछैं, नैते हमर पिताके चिन्हैछैं, अगर तुहेंसब हमरा चिन्तिहैं ते, हमर पिताके भी चिन्तिहैं।” 20यी सभे बात येशू परमेश्वरके मन्दिरके दान-पात्र राख्ल जगहमे शिक्षा दियै बखत कहैल्कै रहे। आर कोय ओकरा गिरफ्तार नैकैल्कै, कहिनेकी ओकर दुःख सहैके आर मरैके समय एखनतक नैऐलै रहे।

21येशू फेर ओकरासिके कहैल्कै, “हमे जैछियौ आर तुहेंसब हमरा खोज्भैं आर तुहेंसब आपन पापके माफी पैले बिना ही मरि जैभैं। जते हमे जैछियै, ओत्ते तुहेंसब नैआबे सक्भैं।” 22यी बात सुनिके यहूदी आदमीसिके अगुवासब कहैल्कै, “यी आत्महत्या कर्तै कि केरं? कहिनेकी यी कहैछै ऊ जते जैछै ओत्ते हमेसब नै ज्या सक्बै” 23ऊ ओकरासिके कहैल्कै, “तुहेंसब एत्ते यी संसारमे जनमलहैं रहे, मगर हमे स्वर्गसे ऐलियै छे, तुहेंसब इहे संसारके छैं, मगर हमे यी संसारके नैछियै। 24सेल्याके हमे तोरासिके कहैलियौ कि, ‘तुहेंसब आपन पापके माफी पैले बिना ही मरि जैभैं।’ यदि तुहेंसब हमरापर विश्वास नैकरैछैं कि हमे के छियै ते, तुहेंसब मरि जैभैं, आर तोरसिके पापसिके माफ कैल नैजैतौ।” 25यहूदी अगुवासब ओकरा पुछल्कै, “तुहें के छह ते?” येशू ओकरासिके कहैल्कै, “हमे उहे छियै जे हमे तोरासिके शुरुसे कहैछियौ। 26तोरसिके बारेमे हमरा बहुते कुछु कहना छै आर तोरसिके न्याय करैके लिए हमरलगत बहुते कुछु कहैले छै। मगर जे हमरा भेजल्कै छै, ऊ सच्चा छै, आर जे बात हमे ओकरासे सुन्लियै छे, उहे बातसब हमे संसारके आदमीसिके बताबैछियै।” 27येशू स्वर्गमे रहेवाला परमेश्वर पिताके बारेमे कहैछै कहिके ऊसब नैबुझल्कै। 28तब येशू ओकरासिके कहैल्कै, “जहिया तुहेंसब हमे, आदमीके बेटाके एकटा क्रूसमे काँटी ठोकिके लटक्या देभैं, तब तुहेंसब जानी जैभैं कि हमे उहे छियै जे हुऐके दावा हमे करैछियै, आर तब तुहेंसब इहो भी जान्भैं कि हमे आपन तरफसे कुछु नैकरैछियै, मगर उहे कहैछियै, जे पिता हमरा सिखैल्कै छे। 29हमरा भेजेवाला हमर संगमे छै। ऊ हमरा असकल्ले नैछोडल्कै छे, कहिनेकी हमे हरदम पिताके खुशी बनाबेवाला काम करैछियै।” 30येशूके कहेल यी बातसब सुनिके बहुते आदमीसब येशूपर विश्वास कैल्कै।

सच्चाईके शक्ति

31येशू अपनापर विश्वास करेवाला यहूदी आदमीसिके कहैल्कै, “तुहेंसब हमर वचनमे दृढ रहभैं ते तुहेंसब सच्चे हमर चेला छैं। 32तब तुहेंसब सच्चाईके जान्भैं, आर सच्चाई तोरासिके आजाद करि देतौ।” 33ऊसब येशूके कहैल्कै, “हमेसब अब्राहमके सन्तान छियै, आर एखनतक ककरो दास नैभेलियै छे। ते तुहें केरंके कहैछैं कि हमरासिके आजाद करि देल जैतै?” 34येशू ओकरासिके जबाब देल्कै, “हमे तोरासिके सच कहैछियौ, जे कोय भी पाप कर्ते रहैछै, ऊ पापके वशमे छै। 35नोकर सभे दिन घरमे नैरहैछै, मगर हमे, आदमीके बेटा सभे दिन घरमे रहैछियै। 36सेल्याके हमे, आदमीके बेटा तोरासिके आजाद करिदेबौ ते तुहेंसब सच्चेमे पापसिके बन्धनसे आजाद भ्या जैभैं। 37हमे जानैछियै कि, तुहेंसब अब्राहमके वंशसे छैं। तैय्योपर तुहेंसब हमर जान मारैले चाहैछैं, एकर कारण यी छै कि तुहेंसब हमर शिक्षाके पालन नैकरैछैं। 38हमे उटा बातसब बताबैछियौ जेटा हमे देख्लियै जब हमे आपन पिता परमेश्वरके साथमे रहियै, आर तुहेंसब उहे करैछैं जे तुहेंसब आपन बाबुसे सुन्लहैं छे।” 39ऊसब जबाब देल्कै, “हमरसिके पुर्खा ते अब्राहम छै।” येशू ओकरासिके कहैल्कै, “यदि तुहेंसब अब्राहमके सन्तान हैतिहैं ते, जे काम अब्राहमके कैल्कै रहे, उहे काम तहुँसब कर्तिहैं। 40मगर एखन तुहेंसब हमरा मारैले खोजैछैं कहिनेकी हमे तोरासिके उटा सच बात बतैलियौ छे जे हमे परमेश्वरसे सुन्लियै छे। एरंको काम ते अब्राहम नैकैल्कै रहे। 41तोरसिके बाबु जे काम कैल्कौ, तहुँसब उहे काम करैछैं।” ऊसब येशूके कहैल्कै, “हमेसब नाजायज औलाद नैछियै। हमरसिके खाली एक्केटा पिता छै, आर ऊ परमेश्वर छै।” 42येशू ओकरासिके कहैल्कै, “यदि परमेश्वर तोरसिके पिता हैतियौ ते तुहेंसब हमरासे प्रेम कर्तिहैं, कहिनेकी हमे परमेश्वरके तरफसे ऐलियै छे। हमे आपने तरफसे नै ऐलियै छे, मगर परमेश्वर पिता हमरा भेजल्कै छे। 43हमे जे बात कहैछियौ उटा बात तुहेंसब कहिने नैबुझैछैं? कहिनेकी तुहेंसब हमर सन्देश स्वीकार करैसे इन्कार करैछैं। 44तुहेंसब आपन बाबु शैतानके सन्तान छैं, आर तुहेंसब ओकरे इच्छा पुरा करैले चाहैछैं। ऊ ते शुरुहैसे हत्यारा छै, आर ओकरा सच्चाईसे कुछु लेना देना नैछै, कहिनेकी ओकरामे सच्चाई छैबे नैकरै। ऊ जब झुठ बोलैछै ते ऊ आपन स्वभावके अनुसार ही बोलैछै, कहिनेकी ऊ झुट्ठा छै आर झुठके बाबु छै। 45हमे सच बोलैछियै, सेल्याके तुहेंसब हमरापर विश्वास नैकरैछैं। 46तोरसिमेसे के हमरा पाप करैके दोष लगाबे सक्भैं? अगर हमे सच बोलैछियै ते, कहिने तुहेंसब हमरा विश्वास नैकरैछैं? 47जे कोय भी परमेश्वरसे सम्बन्ध राखैछै, ऊ परमेश्वरके आवाज सुनैछै। तुहेंसब परमेश्वरसे सम्बन्धित नैछैं, सेल्याके तुहेंसब ओकर बात नैसुनैछैं।”

अपने आपके बारेमे येशूके दावा

48यहूदी आदमीसिके अगुवासब ओकरा जबाब देल्कै, “हमेसब यी बात कहैमे ठीक रहियै कि तुहें एकटा सामरी आदमी छह आर तोरामे एकटा भूत लाग्ल छौं।” 49येशू जबाब देल्कै, “हमरा भूत लाग्ल नैछै। हमे आपन परमेश्वर पिताके आदर करैछियै, मगर तुहेंसब हमर अनादर करैछैं। 50हमे आपन सम्मान नैचाहैछियै, मगर एकझन छै जे चाहैछै कि हमरा सम्मानित कैल जै, आर ऊ उहे छै जे न्याय भी करैछै। 51हमे तोरासिके सच कहैछियौ, अगर कोय आदमी हमर वचनके पालन कर्तै ते, ऊ कहियो नैमर्तै।” 52यहूदी आदमीसिके अगुवासब ओकरा कहैल्कै, “आब हमरासिके पक्का मालुम भेलै, तोरा भूत लाग्ल छौ। अब्राहम मर्लै, परमेश्वरके वक्तासब भी मर्लै, मगर तुहें कहैछैं कोय तोर वचन पालन कर्तै ते ऊ कहियो नैमर्तै। 53कि तुहें हमरसिके पुर्खा अब्राहमसे बडका छैं? ऊ ते मर्लै, आर बाँकी सभे परमेश्वरके वक्तासब भी मर्लै। तुहें अपने आपके कि सम्झैछैं?” 54येशू जबाब देल्कै, “अगर हमे आपने सम्मान कर्तियै ते उटा सम्मानके कोय महत्व नैहैतियै। मगर जे हमरा सम्मान दैछै, ऊ हमर परमेश्वर पिता छै, आर तुहेंसब कहैछैं कि ऊ तोरसिके परमेश्वर छौ। 55तुहेंसब ओकरा नैचिन्हैछैं, मगर हमे ओकरा चिन्हैछियै। यदि हमे ओकरा नैचिन्हैछियै कहतियै ते हम्हुँ तोरेसिके जुगुर झुट्ठा हैतियै। मगर हमे ओकरा चिन्हैछियै आर ओकर आज्ञा मानैछियै। 56तोरसिके पुर्खा अब्राहम हमर आबैके दिन देखैले बहुते इच्छा कैल्कै रहे। आर ऊ पहलहैसे हमरा ऐते देखल्कै आर बहुते खुश भेलै।” 57सेल्याके यहूदी आदमीसिके अगुवासब ओकरा कहैल्कै, “तुहें एखनतक पचासो साल नैपुग्लहैं छे ते, कि तुहें अब्राहमके देख्लहैं छे?” 58येशू ओकरासिके कहैल्कै, “हमे तोरासिके सच कहैछियौ, अब्राहम जनमैसे पहलहैसे हमे छियै।” 59यी बात पर आदमीसब येशूके जान मारैके लिए पत्थल उठैल्कै, मगर येशू ओकरसिके नजरीसे छिपीके परमेश्वरके मन्दिरसे बाहार चल गेलै।

Valgt i Øjeblikket:

यूहन्ना 8: KYVNT

Markering

Del

Kopiér