Luuka 18

Hunʼnaabhe ʉNgʉlʉbhɨ sinta alite

1ɄYeesu ahabhabhʉʉzya abhasundwe bhaakwe ɨshifwani hubhamanyizye aje, bhahwanziwa hunʼnaabhe ʉNgʉlʉbhɨ hu habhaazyo honti, sinta atengushe ʉmwoyo. 2Ahabhabhʉʉzya ahaga, “Hwahali nʉ nʼnonzi ʉmo mwi‑ibooma limo. Ʉnʼnonzi ʉyo saga ahanʼtinihaga ʉNgʉlʉbhɨ, nantele saga ahabhasajilaga abhantu abhanjɨ. 3Nantele mwi‑ibooma ɨlyo, mwahali nʉ nʼshɨ ʉmo ʉmʼfwɨle. Ʉnʼshɨ ʉyo ahamʼmalilaga hahinji hahinji hunʼnaabhe, ahagaga, ‘Ɨhulaabha ʉlonje shinza ɨnongwa yaanɨ nʉ nʼnʉgʉ waanɨ.’

4Ɨnsiku nyinji zyahashila, ʉnʼnonzi ʉyo ahajendelelaga akhaane humʼmwavwe ʉmʼfwɨle ʉla. Leelo pamandɨ, ahahwiyanjila mu mwoyo gwakwe ahaga, ‘Peeka na‑aje, saga ɨhunʼtiniha ʉNgʉlʉbhɨ awe hubhasaajile abhantu, 5leelo hu nongwa ya‑aje, ʉmʼfwɨle ʉnʉ ajendeelela huntaamye, ɨshi ɨmbala‑afumye ʉlugamulo lwakwe shinza huje, agandi hundisye tee!’ ”

6Ɨpo ʉMwɨnɨ ʉYeesu ahaga, “Mumanyilaje hwa nʼnonzi ʉmʼmiibhi ʉla, sha‑ahamuuye abhombe! 7Ɨshi, ʉNgʉlʉbhɨ saga abhajiiye alonje ɨnongwa zyabho shinza abhasalulwe bhaakwe bha bhahunʼnaabha pasanya na nʉsiku? Agakhaabha hubhaavwe? 8Ɨhubhabhʉʉzya aje, ʉNgʉlʉbhɨ anza‑afumye ʉlugamulo lwabho shinza nalinaali. Ɨshi, anɨ nɨMwana wa Muntu lwa nahayiweela mu nsi, nahayihubhaaga abhantu bha bhahunɨɨtɨha?”

Ɨshifwani ɨsha Mʼfalisaayo nʉ nʼsomvya sonko

9Ɨpo ʉYeesu ahabhabhʉʉzya abhantu bha bhahahwilolaga bhagolosu na hubhasyonshele abhamwabho bhonti hu shifwani ahaga, 10“Abhantu bhabhɨɨlɨ bhahabhalile apuute mu lubhaga lwɨ nyumba ɨmfinjile ɨya Ngʉlʉbhɨ. Weeka ahali Mʼfalisaayo, ʉwamwabho ahali nʼsomvya sonko. 11ɄMʼfalisaayo ʉla ahɨmɨɨlɨla apuute. Ahapuuta mu mwoyo gwakwe ahaga, ‘Wee Ngʉlʉbhɨ, ɨhusalifya hu nongwa ya‑aje, anɨ saga ɨndi nanshi abhantu abhanjɨ bha bhafyʉla, abhabhomba mbiibhi, abheegu awe nanshi ʉnʼsomvya sonko ʉnʉ! 12Anɨ ɨhwiyiima alye habhɨɨlɨ hu lʉngʉ gweka hu nongwa ya‑apuute. Nantele, ɨfumya ɨshilʉndɨlo sheeka mu vilʉndɨlo ishʉmi mu vintu vyanɨ vyonti.’ 13Leelo ʉnʼsomvya sonko ʉla ahɨmɨlɨɨye sha hutali, saga ahalɨnjɨle nka hubhʉʉsye amaaso gaakwe hu mwanya, ʉhwu ahwikhoma‑khoma ɨshifubha shaakwe abhonesye huje, azugumiiye, ahaga, ‘Wee Ngʉlʉbhɨ, ʉnsaajile, anɨ ɨndi wɨ mbiibhi!’ ” 14Ɨpo ʉYeesu ahaga, “Ɨhubhabhʉʉzya huje, ʉnʼsomvya sonko ahaweelile hu khaaya, abhaziziiwe huje nʼgolosu. Leelo ʉMʼfalisaayo ʉla, ndaadi! Ɨmbabhʉzɨɨzye ɨsho hu nongwa ya‑aje, ʉmuntu wowonti wa‑ahwizʉvya, ʉNgʉlʉbhɨ ahayihumʼmwisya. Leelo ʉmuntu wa‑ahwiyiisya, ʉNgʉlʉbhɨ ahayihunʼzʉvya.”

ɄYeesu ahubhasaya abhaana abhadoodo

(Mataayo 19:13-15; Maalʉko 10:13-16)

15Isiku limo abhantu bhahanʼnetelaga ʉYeesu abhaana abhadoodo huje, abhabhɨɨshɨle ɨnyoobhe zyakwe hubhasaye. Leelo abhasundwe bhaakwe lwa bhaalola ɨsho, bhahanda hubhadaamile abhantu ɨbho. 16Ɨpo ʉYeesu ahabhakwizya abhaana huje bhɨnze hwa mwene, ahaga, “Bhaleshi abhaana abhadoodo bhɨnzaje huliinɨ, mugandi hubhakhaane. Abhantu bha bhali nanshi abhaana abhadoodo ɨbha, bha bhatʉʉha hu wumwɨnɨ ʉwa Ngʉlʉbhɨ. 17Lyoli ɨhubhabhʉʉzya huje, ʉmuntu ʉyo saga ahwɨtɨha ʉlongozi wa Ngʉlʉbhɨ nanshi ʉmwana ʉnʼdoodo sha‑ahubhasʉʉbhɨla abhapaafi bhaakwe, saga agatʉʉha nka lumo mu wumwɨnɨ ʉwa Ngʉlʉbhɨ.”

Ʉpala wa nʼtabhazi atʉʉshe hu wumwɨnɨ ʉwa Ngʉlʉbhɨ

(Mataayo 19:16-30; Maalʉko 10:17-31)

18Ʉnʼgoosi ʉmo ahamʼmʉzɨɨlɨzya ʉYeesu ahaga, “Mʼmanyizyi wʉ‑ʉli mwinza, ɨshi ɨmbombe wɨlɨ huje, ɨmbwaje ʉwʉʉmi ʉwa wiila?” 19ɄYeesu ahamʼmwamula ahaga, “Yeenu ʉhunkwizya mwinza? Saga alɨɨho ya‑ali mwinza, lyoli yʉ Ngʉlʉbhɨ mwene! 20Ʉzimɨɨnye ɨndajizyo zya Moose zya ziyiga, ‘Ʉgandi abhembushe, ʉgandi agoje, ʉgandi ahwibhe, ʉgandi afumye ʉsimishizi ʉwi‑ilenga, ʉnʼtinihaje ʉso nʉ bhɨɨnyu.’ ”#Bhaazya Afume 20:12-16; ɨNyiizuho 5:16-20. 21Ʉmwene ahaga, “Ɨndajizyo ɨzyo zyonti, ɨnzikhɨɨte afume hu waana waanɨ.”

22ɄYeesu lwa wʉmvwa ɨgo, ahamʼmʉʉzya ahaga, “Ahantu heeka habhuliiye huliiwe. Bhalaga ʉkazye ɨvintu vyonti vyʉ‑ʉli navyo, ɨmpɨɨya ɨzyo ʉbhapeele abhapɨɨna, nawe wahayibha nɨ mfuha hu mwanya hwa Ngʉlʉbhɨ. Ɨpo nkʉ‑ʉyɨnzaje, ʉmbɨnjɨlɨzyaje anɨ na‑abhe nʼsundwe waanɨ.” 23Ʉnʼgoosi ʉla lwa wʉmvwa ɨsho, ahazugumila tee hu nongwa ya‑aje, ahali nʼtabhazi tee. 24ɄYeesu lwa waalola huje, azugumiiye, ahaga, “Hupala tee hwa bhatabhazi atʉʉshe mu wumwɨnɨ ʉwa Ngʉlʉbhɨ! 25Lyoli hupʉpʉʉsu tee ɨngamiya ashile mwa hadobhooli hɨ nsenelo, ashile ʉmuntu ʉnʼtabhazi atʉʉshe mu wumwɨnɨ ʉwa Ngʉlʉbhɨ!”

26Abhantu bha bhahʉmvwɨzye ɨgo, bhahaga, “Ɨshi, nkashele sha zili, weenu wa‑agafyʉlwa?” 27ɄYeesu ahabhabhʉʉzya ahaga, “Ɨzi saga zigabhombwa na bhantu, leelo hwa Ngʉlʉbhɨ zigabhombeha.” 28Ɨpo ʉPeeteli ahamʼmʉʉzya ʉYeesu ahaga, “Wee Mwɨnɨ, enya atɨ tivileshile ɨvintu vyonti vya tili navyo, tiʼbhɨnjɨlɨzɨɨzye aawe na‑abhe bhasundwe bhaaho!” 29ɄYeesu ahaga, “Lyoli ɨhubhabhʉʉzya huje, ʉmuntu wowonti ʉyo aleshile ɨnyumba yaakwe, awe ʉnʼshɨ waakwe, awe ʉholo waakwe, awe abhapaafi bhaakwe, awe abhaana bhaakwe hu nongwa yɨ wumwɨnɨ ʉwa Ngʉlʉbhɨ, 30ʉyo ahwambɨɨlɨla vinji ashile vya‑avileshile hu habhaazyo ɨha lwa‑ali mu nsi ʉmu. Nantele hu habhaazyo ha hahwɨnza, ahayambɨɨlɨla ʉwʉʉmi ʉwa wiila.”

ɄYeesu akuwa afwe na‑azyʉshe hwakwe ʉlwa taatu

(Mataayo 20:17-19; Maalʉko 10:32-34)

31ɄYeesu ahabheega abhasundwe bhaakwe ishʉmi na bhabhɨɨlɨ, ahabhala nabho panshɨnjɨ. Ɨpo ahabhabhʉʉzya ahaga, “Enya, tizʉbha abhale hwi‑ibooma ɨlyɨ Yelusaleemu. Ʉhwo, gonti ga gahasimbwilwe na bhakuwi bha Ngʉlʉbhɨ hu nongwa yaanɨ nɨMwana wa Muntu, gahayibhombeha. 32Nahayibhɨɨhwa mu makhono ga bhantu bha saga Bhayahuudi. Ɨbho bhahayihunsyonshela, hundije na hunswɨlɨle amatɨ. 33Nantele, bhahayihuhoma nʉ chapo na hungoje. Leelo isiku ɨlya taatu afume afwe hwanɨ, nahayizyʉha.”

34Abhasundwe bhaakwe saga bhahazyagɨɨnye ɨnongwa ɨzi hu nongwa ya‑aje, zyahafisiilwe hwa bheene. Bhope saga bhahamanyaga huje, ʉYeesu ayanga hantu heenu.

ɄYeesu ahumʼponia ʉnʼtonko

(Mataayo 20:29-34; Maalʉko 10:46-52)

35ɄYeesu na bhasundwe bhaakwe lwa bhali pa pɨɨpɨ ni‑ibooma ɨlyɨ Yeeliko, ʉmuntu ʉmo ʉnʼtonko ahakhalaga panshɨnjɨ pi‑idala, ahalaabhaga ɨvintu. 36Lwa‑ahwʉmvwa ɨmpʉga ya bhantu ɨshila, ahabhʉzɨɨlɨzya ahaga, “Huli yeenu?” 37Bhahamʼmʉʉzya bhahaga, “ɄYeesu ʉwa hwi‑ibooma ɨlyɨ Nazaleeti ashila.” 38Ɨpo ʉnʼtonko ʉla ahanʼkwizya hwi‑izwi igoosi ahaga, “Wee Yeesu, Mwana wa Daudi,#18:38 Mwana wa Daudi ABhayahuudi bhahasʉbhɨlaga huje, ʉMʼfyʉli ʉKilisiti ahayifumila mu shikholo ɨsha Daudi. Bhaazya izwi Mwana wa Daudi hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, bhaazya ɨNsalifyo 89:3-37; Yelemiya 23:5-6; Ezekiyeeli 34:23-24. ɨhulaabha ndolele ɨnkʉmbʉ!” 39Abhantu bha bhahali hwitagaalila hwa Yeesu, bhahabha bhahunʼdaamila huje, apʉʉme. Leelo ʉmwene ahonjelaga hunʼkwizye hwi‑izwi igoosi tee, ahaga, “Wee Mwana wa Daudi, ndolele ɨnkʉmbʉ!”

40ɄYeesu ahɨmɨɨlɨla, ahalajizya huje, bhanʼneete hwa mwene. Ʉnʼtonko ʉla lwa wasejeela pitagaalila lyakwe, ʉYeesu ahamʼmʉzɨɨlɨzya ahaga, 41“Ʉhwanza huje, ɨʼbhombele yeenu?” Ahaga, “Wee Mwɨnɨ! Ɨhulaabha huje, amaaso gaanɨ geenye.” 42ɄYeesu ahamʼmʉʉzya ahaga, “Ɨshi, ʉyande alole! Ʉponile hu nongwa yɨ lwɨtɨho lwaho.” 43Hu habhaazyo hɨnɨɨho ʉmuntu ʉla ahanda alole. Ɨpo ahanda humʼmɨnjɨɨlɨle ʉYeesu ʉhwu ahumʼmwamiha ʉNgʉlʉbhɨ. Abhantu bhonti lwa bhaalola ɨgo, bhope bhahamʼmwamiha ʉNgʉlʉbhɨ.

Valgt i Øjeblikket:

Luuka 18: SBK

Markering

Del

Kopiér