Luuka 17

Ɨmanyizyo hu nongwa yɨ mbiibhi na‑akhobhoshele

(Mataayo 18:6-7, 21-22; Maalʉko 9:42)

1Ɨpo ʉYeesu ahabhabhʉʉzya abhasundwe bhaakwe ahaga, “Ɨnjelo zya zihubhabhɨɨha abhantu abhombe ɨmbiibhi zilɨɨho ɨnsiku zyonti. Leelo, lwakwe ʉmuntu wa‑aleeta ɨnjelo! 2Yahali hwashi ʉmuntu ʉyo akʉngwe ʉlwala mu nsingo na hunʼdumbushizye mu nsʉmbi, ashile amalabha ga gahayihumʼmwaga, nkashele amʼmwalangɨɨnye weeka mwa bhadoodo ɨbha huje abhombe ɨmbiibhi! 3Ɨshi, mubhe maaso mugandi abhombe ɨsho!

Ʉholo waaho nkashele aʼbhombɨɨye ɨmbiibhi, ʉnʼsunde. Nkashele alamba, ʉnʼkhobhoshele. 4Hwope nkashele ahubhombela shibhiibhi hahinji hwi‑isiku lyeka, nkashele aweela huliiwe hahinji ayiga, ‘Nalamba,’ aawe ʉnʼkhobhoshele!”

Ikhone lyɨ lwɨtɨho

(Mataayo 17:20)

5Ɨpo abhasontwa bhahamʼmʉʉzya ʉMwɨnɨ ʉYeesu bhahaga, “Tilaabha, ʉtonjeelezye ʉlwɨtɨho!” 6Wope ʉMwɨnɨ ahabhaamula ahaga, “Nkashele muli nʉ lwɨtɨho ʉludoodo nanshi ɨmbeyu ɨyi‑ihaladaali yɨ‑ɨli ndoodo tee, mwɨnzaga hulibhʉʉzye ikʉ ɨli huje, ‘Kumpuha, na‑abhale ahwitote mu nsʉmbi,’ lyope lyɨnzaga hubhatinishe.”

Ɨmbombo ya mʼmomvi

7ɄYeesu ahonjela ayanje ahaga, “Tije ʉmo muuhati yeenyu ali nʉ mʼmomvi wa‑alima nɨ ngʼombe awe wa‑adiima ɨngoole. Weenu wa‑abhajiiye humʼmʉʉzye ʉmʼmomvi, lwa‑aweela afume hu mbombo huje, ‘Ɨnza lubhilo, khala, ʉlye ɨshalye’? 8Nʉʉmo! Lyoli ahayiga, ‘Ndɨngaanyizye ɨshalye, nantele ʉhwilɨngaanye humbombele afishe lwa naamala alye na‑amwele. Lwa naamala, ɨpo nawe ʉlye na‑amwele.’ 9Bhʉlɨ, ʉbhajiiye hunʼsalifye ʉmʼmomvi hu nongwa ya‑aje, abhombile nanshi sha wahalajiziizye? 10Ɨsho sha zilɨɨho na huliimwɨ, lwa mwamala abhombe zyonti ɨzyo ʉNgʉlʉbhɨ zya‑ahalajiziizye, ɨpo mugaje, ‘Atɨ tili bhabhomvi lwene bha saga tikhondɨɨye, tibhombile zya tihwanziwa abhombe.’ ”

ɄYeesu ahubhaponia abhɨ makete ishʉmi

11ɄYeesu lwa‑abhala hwi‑ibooma ɨlyɨ Yelusaleemu, ahashilaga idala lya lishila paahati yɨ mpaho yɨ mukowa ʉgwɨ Samaliya nʉ gwɨ Galilaaya. 12Lwa‑atʉʉha mu shipanga shimo, ahakhomaana na bhantu ishʉmi abhɨ mpʉngo ɨyɨ makete#17:12 abhɨ mpʉngo ɨyɨ makete Abhɨ makete saga bhahanziwaaga asangaane na bhantu abhanjɨ bha bhahali bhinza lwene. Saga bhahanziwaaga atʉʉshe pa lupuuto, pɨpo alɨngaane nɨ ndajizyo zya Moose, abhɨ makete bhahali bhaavu. ɄYeesu lwa wabhaponia abhɨ makete ɨbho, bhahabhabhaziziizye huje, bhasangalusu nantele. Ʉmuntu wowonti ʉyo ahali aponile amakete, ahabhalaga ahwilolesye hwa bhasayi huje aponile. Ahabhombile ɨsho huje bhamʼmwɨtɨshɨle asangaane na bhantu abhanjɨ nantele. Bhaazya ɨMbombo ɨzya Bhalaawi 13:45-46; 14:1-32. bha bhahɨmɨlɨɨye sha hutali nʉ mwene. 13Bhahanʼkwizya hwi‑izwi igoosi bhahaga, “Wee Yeesu, wee Mwɨnɨ, ʉtilolele ɨnkʉmbʉ!” 14ɄYeesu lwa wabhalola, ahabhabhʉʉzya ahaga, “Bhalaji muhwilolesye hwa bhasayi bha Ngʉlʉbhɨ.” Lwa bhali mwi‑idala bhabhala, bhahapona na‑asangalushe.

15Weeka mu bhaala lwa waalola huje, aponile, ahaweela hwa Yeesu, ʉhwu ahumʼmwamiha tee ʉNgʉlʉbhɨ hwi‑izwi igoosi. 16Lwa waafiha, ahagwa kupama pitagaalila pa manama ga Yeesu na hunʼsalifye. Ʉmuntu ʉyo ahali Nʼsamaliya. 17ɄYeesu ahaga, “Saga bhahasangaluushe abhantu bhonti ishʉmi? Abhamo fundihandwɨmo (9) bhali hwi? 18Nʉʉmo wa‑aweelile humʼmwamishe ʉNgʉlʉbhɨ, leelo yʉʉnʉ ʉnʼjenu mwene?” 19Ɨpo ʉYeesu ahamʼmʉʉzya ahaga, “Ɨmɨɨlɨla, ʉbhale. Ʉponile hu nongwa yɨ lwɨtɨho lwaho!”

Ahwɨnze hu wumwɨnɨ ʉwa Ngʉlʉbhɨ

(Mataayo 24:23-28, 37-41)

20Isiku limo, aBhafalisaayo bhahamʼmʉzɨɨlɨzya ʉYeesu bhahaga, “Ʉwumwɨnɨ ʉwa Ngʉlʉbhɨ wahayɨnza ndi?” ɄYeesu ahabhaamula ahaga, “Ʉwumwɨnɨ ʉwa Ngʉlʉbhɨ saga wuhwɨnza hwi‑idala lya liloleha na maaso. 21Abhantu saga bhanza‑ayanje aje, ‘Enya! Wuli ɨpa!’, awe aje, ‘Wuli paala!’ Amwɨ enyi, ʉwumwɨnɨ ʉwa Ngʉlʉbhɨ wuli muuhati yeenyu.”

22Ɨpo ʉYeesu ahabhabhʉʉzya abhasundwe bhaakwe ahaga, “Zyahayɨnza ɨnsiku ɨzyo mwahayinyonywa abhe naanɨ nɨMwana wa Muntu nka lisiku limo, leelo saga mwahayihundola. 23Abhantu bhahayihubhabhʉzyaga huje, ‘Enya! Ali paala!’, awe aje, ‘Ʉnʉ ɨpa!’ Musahasheele hubhɨɨtɨshe hwope na hubhabhɨnjɨɨlɨle. 24Ɨnjanjile ɨsho hu nongwa ya‑aje, lwɨ‑ɨweela anɨ nɨMwana wa Muntu, nahayɨnza nanshi ɨntalala lwɨ‑ɨhwɨnza nalinaali na‑akhozye ɨnshɨnjɨ zyonti ɨzyɨ mwanya. 25Leelo ɨgo lwa gasɨɨle afumile, anɨ nɨMwana wa Muntu ɨhwanziwa nasʉʉti alabhe hu minji na‑akhaanwe na bhantu abhɨ habhaazyo ɨha.

26Nanshi sha zyahali mu nsiku zya Noowa lwa‑ahalembaga, sha zyahayibha hu habhaazyo lwa nahayiweela anɨ nɨMwana wa Muntu. 27Ɨnsiku ɨzya Noowa, abhantu bhahalyanga na‑amwele, bhaheegaga abhashɨ na hwegwe afishe isiku liila ʉNoowa lwa watʉʉha mu safina. Ɨpo ɨmvula ɨngoosi yahatoonya, yahabhayazya abhantu bhonti.

28Yahayibha nanshi sha zyahafumiiye hu habhaazyo ha Looti. Abhantu bhahalyanga na‑amwele, bhahakalaga na‑akazye, bhahatotaga na‑azenje. 29Leelo, isiku liila ʉLooti lwa wasogola hwi‑ibooma ɨlyɨ Sodoma, ʉmwoto ʉnʼkhali tee afume hu mwanya gwahiishile nanshi ɨmvula, gwahabhayazya abhantu bhonti.#Bhaazya ʉWandilo 19:24-25. 30Ɨsho sha shɨɨsho yahayibha isiku liila, anɨ nɨMwana wa Muntu lwa nahayifumila.

31Isiku ɨlyo, ʉmuntu wa‑ali pa mwanya pa nyumba, asahasheele ahwishe pa nsi ahweje ɨvintu vyakwe vya vili mu nyumba. Wope wa‑ali hu nʼgʉnda, asahasheele aweele hu khaaya. 32Mwizuhaje zya zyahafumiiye hwa nʼshɨ wa Looti.#17:32 Ʉnʼshɨ wa Looti ahagaluhɨɨne abhe libanya li‑ibheeya, pɨpo ahazisyonshɨɨye ɨndajizyo zya Ngʉlʉbhɨ lwa‑ahanzaga aweele hu Sodoma, ibooma ɨlyo ʉNgʉlʉbhɨ ahajile liyaziwe. Bhaazya ʉWandilo 19:26. 33Ʉmuntu wowonti wa‑ahwanza ahwifyʉle ʉwʉʉmi waakwe, ahayihuwuteezya. Lyoli ʉla wa‑ahayihuwuteezya ʉwʉʉmi waakwe hu nongwa yaanɨ, ahayihuwufyʉla.

34Ɨhubhabhʉʉzya huje, isiku ɨlyo abhantu bhabhɨɨlɨ bhahayibha bhagonile ɨshitala sheeka, weeka ahayinyeetulwa, weeka ahayisagala. 35Isiku ɨlyo, abhashɨ bhabhɨɨlɨ bhahayibha peeka asye, weeka ahayinyeetulwa, weeka ahayisagala. 36Abhalume bhabhɨɨlɨ bhahayibha abhombe ɨmbombo mu nʼgʉnda, weeka ahayinyeetulwa, weeka ahayisagala.”#17:36 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.

37Abhasundwe bhahamʼmʉzɨɨlɨzya bhahaga, “Mwɨnɨ, ɨgo gahayibhombeha hwi?” Ahabhaamula hu njango ahaga, “Pa pali nʉ mʼbɨlɨ ʉmʼvunzu, ɨpo pa zibhʉngaana ɨnsimula.”#17:37 Enya Mataayo 24:28, ɨshifwani ɨshɨ nsimula ɨzyo zilya ʉmʼbɨlɨ ʉmʼvunzu.

Valgt i Øjeblikket:

Luuka 17: SBK

Markering

Del

Kopiér