Luuka 15

Ɨshifwani ɨshɨ ngoole ya yahateejile

(Mataayo 18:12-14)

1Ɨshi, abhasomvya sonko na bhabhomba mbiibhi abhanjɨ abhinji bhahabhalaga hwa Yeesu hunʼtejeelezye. 2Ɨpo aBhafalisaayo na bhamanyizyi abhɨ ndajizyo zya Moose bhahanda ahwibhunanzye bhahagaga, “Enyi ʉmuntu ʉnʉ! Ahubhambɨɨlɨla abhabhomba mbiibhi na‑alye peeka nabho!”

3Isiku limo ʉYeesu ahabhabhʉʉzya ɨshifwani ahaga, 4“Tije, ʉmuntu ʉmo hwaliimwɨ ali nɨ ngoole ɨmya yeeka. Nkashele yateega yeeka, anza‑abhombe wɨlɨ? Anza huzileshe ɨzyamwabho ziila amashʉmi fundihandwɨmo na fundihandwɨmo (99) mwi‑igona, na‑abhale huyanze ɨla yɨ‑ɨteejile, afishe ayaaje. 5Lwa wayaaga, anza huyibhʉʉsye pa vipʉngo vyakwe hu luseshelo. 6Ɨshi, lwa waafiha hu khaaya, ɨpo ahubhakwizya abhamanyani na bhapalamani bhaakwe na hubhabhʉʉzye huje, ‘Seshelaji peeka naanɨ hu nongwa ya‑aje, ɨngoole yaanɨ ya yahateejile, ɨnjaajile!’ ”

7ɄYeesu ahonjela ayanje ahaga, “Ɨhubhabhʉʉzya huje, shɨnɨɨsho sha hwahayibha nʉ luseshelo hu mwanya, ʉmʼmomba mbiibhi weeka lwa‑alamba hu mbiibhi zyakwe. Ʉluseshelo ʉlwo lubhala‑abhe lugoosi tee ashile ʉlwa‑abhe na bhantu amashʉmi fundihandwɨmo na fundihandwɨmo (99) bha bhahwilola bhagolosu, nantele saga bhalola aje, bhahwanziwa alambe.”#15:7 bhantu amashʉmi fundihandwɨmo na fundihandwɨmo (99) bha bhahwilola bhagolosu, nantele saga bhalola aje, bhahwanziwa alambe Mu njango ɨyɨ Shiyunaani ɨsimbwilwe huje, bhantu bhagolosu amashʉmi fundihandwɨmo na fundihandwɨmo bha saga bhahwanziwa alambe.

Ɨshifwani ɨshɨ mpɨɨya ya yahateejile

8ɄYeesu ahabhabhʉʉzya ɨshifwani ɨshamwabho ahaga, “Tije, ʉnʼshɨ ʉmo ali nɨ mpɨɨya ɨnsabhaazya ishʉmi. Leelo nkashele ɨnsabhaazya yeeka mwɨ‑ɨzyo yateega, anza‑abhombe wɨlɨ? Anza‑akhozye ʉlukhozyo, na hwʉse ɨnyumba yonti huyanze, afishe ayaaje. 9Lwa wayaaga, ahubhakwizya abhamanyani na bhapalamani bhaakwe na hubhabhʉʉzye huje, ‘Seshelaji peeka naanɨ hu nongwa ya‑aje, ɨnsabhaazya yaanɨ ya yahateejile, ɨnjaajile!’ ”

10ɄYeesu ahonjela ayanje ahaga, “Ɨhubhabhʉʉzya huje, shɨnɨɨsho abhantumi bha Ngʉlʉbhɨ bhabha nʉ luseshelo ʉlugoosi, ʉmʼmomba mbiibhi weeka lwa‑alamba hu mbiibhi zyakwe.”

Ɨshifwani ɨsha mwana wa‑ahateejile

11ɄYeesu ahabhabhʉʉzya ɨshifwani ɨshamwabho ahaga, “Hwahali nʉ muntu ʉmo wa‑ahali na bhaana bhabhɨɨlɨ abhasahaala. 12Isiku limo ʉmwana waakwe ʉnʼdoodo ahabhala hwa yise, ahamʼmʉʉzya ahaga, ‘Wee daada, ɨhulaabha ʉmpeele ɨvyɨ gaali waanɨ.’ Ɨpo ʉyise waakwe ahabhagabhila abhaana bhaakwe ɨvyɨ gaali waabho.

13Ɨnsiku ɨndoodo lwa zyashila, ʉnʼdoodo ʉla ahabhʉngaanya ɨvintu vyakwe vyonti, ahasogola ahabhala hu nsi ɨya hutali. Lwa waafiha ʉhwo, ahanda alye ɨshʉʉma shaakwe shaaha shaaha afishe lwa waamala shonti. 14Ɨshi, lwa waamala ɨshʉʉma shonti, ɨnzala ɨngoosi yahagwa mu nsi ɨla, wope saga ahali na hantu nka hamo. 15Ɨpo ahabhala hwa muntu ʉmo ʉnʼkhaaya ʉwɨ nsi ɨla, ahalaabha ɨmbombo. Ʉmuntu ʉla ahanʼtwala hu nʼgʉnda gwakwe azʉbhɨle ɨngʉlʉbhɨ#15:15 ɨngʉlʉbhɨ ABhayahuudi bhahazisyonshelaga ɨngʉlʉbhɨ tee. Ɨndajizyo ɨzya Bhayahuudi zyahali ziyanga huje, ɨngʉlʉbhɨ vyʉma vyɨ waavu. Hu nongwa yɨ ndajizyo ɨzi, aBhayahuudi saga bhahɨtɨshɨlwaga alye ɨnyama yɨ ngʉlʉbhɨ. Bhaazya ɨMbombo ɨzya Bhalaawi 11:7. Ɨsho aBhayahuudi bhahazisyonshɨɨye ɨngʉlʉbhɨ na bhantu ɨbho bhahali bhahuzidiima. zyakwe. 16Ʉnʼsahaala ʉla ahali nɨ nzala tee, ahanyonywaga nka hulye amakhambɨlɨ ga zyahalyanga ɨngʉlʉbhɨ. Leelo saga ahalɨɨho ʉmuntu nka weeka ʉwa humʼpeele ahantu hohonti aha‑alye.

17Pamandɨ ahiizuha, ahahwiyanjila mu mwoyo gwakwe ahaga, ‘Abhabhomvi bha yise waanɨ bhonti bhalya na‑asagazye. Ɨshi yeenu anɨ ɨfwa nɨ nzala ɨpa? 18Ɨmbala‑aweele hwa yise waanɨ na humʼmʉʉzye huje, “Wee daada, ɨntulile ɨmbiibhi hwa Ngʉlʉbhɨ na huliiwe. 19Ɨshi, saga ɨhondɨɨye abhe mwana waaho. Ɨhulaabha ʉmbɨɨshe ɨmbe ʉmo mwa bhabhomvi bhaaho.” ’

20Ɨpo ahanda asogole, aweele hwa yise waakwe. Lwa wapalamila afishe pa khaaya, ʉyise waakwe ahanʼnola sha hutali, ahanʼnolela ɨnkʉmbʉ. Ahanʼshɨmbɨɨlɨla, ahanʼnyaayila na hunʼnunile. 21Ɨpo ʉmwana ʉla ahamʼmʉʉzya ʉyise waakwe ahaga, ‘Wee daada, ɨntulile ɨmbiibhi hwa Ngʉlʉbhɨ na huliiwe. Ɨshi, saga ɨhondɨɨye abhe mwana waaho.’

22Leelo ʉyise waakwe ahabhabhʉʉzya abhabhomvi bhaakwe huje, ‘Leeti lubhilo amenda aminza, munʼkwatizye! Munʼkwatizye nɨ peete mu hayoobhe haakwe, nɨ ndaatʉ mu manama gaakwe. 23Mweje ɨngʼombe ɨnyinza, mubhoole, tilye, na‑ashe! 24Ʉmwana waanɨ ʉnʉ ahali nkati ahafwiye, ɨshi mwʉmi, nantele ahateejile, ɨshi waloleha!’ Ɨpo abhantu bhonti bhahanda ahwanje na‑ashe.

25Ɨshi ahabhaazyo ɨho, ʉmwana waakwe ʉnʼgoosi ahali hu nʼgʉnda. Lwa‑aweela afume hu nʼgʉnda na‑apalamile afishe pa khaaya, ahʉmvwa abhantu bhateela na hwanje. 26Ahanʼkwizya ʉmʼmomvi ʉmo, ahamʼmʉzɨɨlɨzya ahaga, ‘Huli yeenu?’ 27Ahamʼmwamula ahaga, ‘Ʉnʼdoodo waaho aweelile. Ʉyise waaho anʼgojɨɨye ɨngʼombe yɨ‑ɨtupile huje, tibhe nʉ luseshelo hu nongwa ya‑aje, ʉmwana waakwe aweelile sha‑ali mwʉmi, nantele mwinza lwene.’ 28Ʉmwana ʉla ʉnʼgoosi ahaviitwa, ahakhaana atʉʉshe mu nyumba. Ɨpo ʉyise waakwe ahafuma hwʉnzɨ, ahanda hunʼkʉndɨɨlɨzye atʉʉshe mu nyumba. 29Leelo ʉmwene ahamʼmwamula ʉyise waakwe ahaga, ‘Enya! Amaaha gonti ɨga ɨmbombile ɨmbombo pa khaaya ɨpa, saga ɨndɨnjɨle asyonshele zyʉ‑ʉhundajizya! Leelo saga ʉmpiiye nka lumo hwope nkamba habhuzi huje, ɨnshe peeka na bhamanyani bhaanɨ. 30Leelo lwa wɨnza ʉmwana waaho ʉnʉ, wa‑ahaliiye shibhiibhi ɨshʉʉma shaaho peeka na bheegu, ʉnʼgojɨɨye ɨngʼombe yɨ‑ɨtupile!’

31Ʉyise waakwe ahamʼmʉʉzya ahaga, ‘Wee mwana waanɨ, aawe ʉli naanɨ ɨnsiku zyonti, ɨvintu vyonti vyɨ‑ɨndi navyo, vyaliiwe. 32Ɨshi, tihwanziwa aseshele na hwanje hu nongwa ya‑aje, ʉnʼdoodo waaho ahali nkati ahafwiye, ɨshi mwʉmi, nantele ahateejile, ɨshi waloleha!’ ”

Valgt i Øjeblikket:

Luuka 15: SBK

Markering

Del

Kopiér