Luuka 14

ɄYeesu ahumʼponia ʉmʼminu pi‑isiku ɨlyɨ Sabaato

1Isiku limo ɨlyɨ Sabaato, ʉYeesu ahabhalile hu khaaya ya nʼgoosi ʉmo ʉwa Bhafalisaayo wa‑ahamʼmwanile alye ɨshalye. Ɨshi hu habhaazyo lwa bhahali muula, aBhafalisaayo na bhantu abhanjɨ bhahamʼmwʉbhɨlaga ʉYeesu huje, bhalole sha‑abhala‑abhombe pi‑isiku ɨlyɨ Sabaato.

2Pitagaalila lya Yeesu, hwahali nʉ muntu ʉmo wa‑ahali nʉ bhinu ʉwa‑atutubhe ʉmʼbɨlɨ. 3Ɨpo ʉYeesu ahabhabhʉzɨɨlɨzya aBhafalisaayo na bhamanyizyi abhɨ ndajizyo zya Moose, ahaga, “Wɨlɨ, ɨndajizyo zyetu zihutɨtɨshɨla hubhaponie abhantu pi‑isiku ɨlyɨ Sabaato?” 4Abheene bhahapʉʉma myɨ! Ɨpo ʉYeesu ahanʼkhata ʉnʼkhono ʉmʼminu ʉla, ahamʼponia. Ahamʼmwɨtɨshɨla huje abhalaje.

5Ɨpo ʉYeesu ahabhabhʉzɨɨlɨzya ahaga, “Yʉ naanu huliimwɨ, nkashele ʉmwana waakwe wadumbushila awe ɨngʼombe yaakwe yadumbushila mwi‑iliina itali lya lili na mɨnzɨ pi‑isiku ɨlyɨ Sabaato, saga ahɨnzaga humʼmwefwe awe huyeefwe pi‑isiku ɨlyo?” 6Bhope bhahagaya ɨlya humʼmwamule.

Ɨmpyana na hwiyiisye

7ɄYeesu ahenyaaga abhaanwa bha Mʼfalisaayo ʉla, sha bhahasalulaga amatengo aga hwilongolela, hwa bhɨ nshɨnshɨ. Ɨpo ahabhabhʉʉzya ɨshifwani ahaga, 8“Ʉmuntu nkashele ahwanile hu weeji, ʉgandi atale akhale hu matengo agɨ bhɨ nshɨnshɨ. Ɨnjanjile ɨsho hu nongwa ya‑aje, ʉnʼkhaaya lumo amʼmwanile ʉmuntu ʉwɨnjɨ ʉwɨ nshɨnshɨ ɨngoosi tee ashile aawe. 9Nkashele waafiha wa‑abhaanile amwɨ mwenti, na hubhʉʉzye aawe huje, ‘Nʼsegushile ʉnʉ pʉ‑ʉkhɨɨye!’, lwʉ‑ʉsogola abhale akhale hwisinda hwa bhantu abha pa nsi, ɨpo ʉnza‑abhe nɨ nsoni tee.

10Leelo, nkashele ʉyaniilwe, ʉtalaje akhale hu matengo aga hwisinda hwa bhantu abha pa nsi. Ɨnjanjile ɨsho hu nongwa ya‑aje, lwa wɨnza ya‑abhaanile, nka‑aʼbhʉzyaje huje, ‘Wee mʼmanyani waanɨ, ɨnza, ʉkhale apinza ɨpa, apa bhɨ nshɨnshɨ!’ Ɨpo pa pɨɨpo ɨnshɨnshɨ yaaho pɨ‑ɨnza‑aloleshe pitagaalila lya bhonti bha bhaniilwe. 11Ʉmuntu wowonti wa‑ahwizʉvya, ʉNgʉlʉbhɨ ahayihumʼmwisya. Wope wa‑ahwiyiisya, ʉNgʉlʉbhɨ ahayihunʼzʉvya.”

12Ɨpo ʉYeesu ahamʼmʉʉzya wa‑ahamʼmwanile, ahaga, “Lwʉ‑ʉhubhaana abhantu alye ɨshalye ɨsha nʉsanya, awe ɨsha lyabheela, ʉgandi hubhaane abhamanyani bhaaho lwene, awe abhaholo bhaaho, awe abhantu abha mu shikholo shaaho, awe abhapalamani bhaaho bha bhali bhatabhazi. Nkashele wabhaana abhantu nanshi ɨbho, bhope bhahayɨnza huhwane huje, bhaʼweezezye hu gaala ga wahabhabhombɨɨye. 13Lyoli, lwʉ‑ʉbhɨɨha ɨshikulukulu, ʉbhaanaje abhapɨɨna, bha bhafwiye hundwɨmo, abhalemazu na bhantonko. 14Ɨpo wahayisayiwa hu nongwa ya‑aje, ɨbho saga bhali nɨ vintu ɨvya huweezezye. ɄNgʉlʉbhɨ wa‑ahayihusomba aawe ahabhaazyo haala lwa‑ahubhazyʉsya abhagolosu.”

Ɨshifwani ɨsha bhaanwa abhɨ shikulukulu ɨshigoosi

(Mataayo 22:1-10)

15Ɨshi, ʉmo mwa bhaala bha bhahakhɨɨye peeka nʉ Yeesu alye ɨshalye, lwa wʉmvwa, ahaga, “Asayiiwe ʉmuntu ʉla ahayilya ɨshikulukulu mu wumwɨnɨ ʉwa Ngʉlʉbhɨ!” 16ɄYeesu ahamʼmwamula hu shifwani ahaga, “Hwahali nʉ muntu ʉmo wa‑ahabhɨɨshɨle ɨshikulukulu ɨshigoosi, ahabhaanile abhantu abhinji. 17Ahabhaazyo ahɨ shikulukulu lwa haafiha, ahanʼsonteelezya ʉmʼmomvi waakwe huje, abhakwizye bha bhahaniilwe aje, ‘Ɨnzaji, ɨvintu vyonti vilɨngɨɨnywe!’

18Leelo bhonti bha bhahaniilwe, shila muntu ahaga, ‘Saga ɨhwɨnza.’ Ʉwa hwande ahaga, ‘Ɨnkalile ʉnʼgʉnda, ɨhwanziwa aje, ɨmbale hugwenye. Ɨshi, ʉnsaajile, saga ɨhwɨnza.’ 19Ʉwa bhɨɨlɨ ahaga, ‘Ɨnkalile ɨhambakʉ ishʉmi ɨzya‑alimile, ɨmbala huzijele. Ʉnsaajile, saga ɨhwɨnza.’ 20Ʉwa taatu wope ahaga, ‘Ɨneejile ʉnʼshɨ shɨɨshi lwene. Hu nongwa ɨyo saga ɨhwɨnza.’

21Ʉmʼmomvi ʉla ahaweela, ahamʼmamila zyonti ʉmwɨnɨ waakwe. Ɨpo ʉnʼgoosi ʉla ahaviitwa, ahamʼmʉʉzya ʉmʼmomvi waakwe ahaga, ‘Bhalaga lubhilo mu madala na mu tudala ʉtwa mwi‑ibooma, ʉbhaleete ɨpa abhapɨɨna, bha bhafwiye hundwɨmo, abhantonko na bhalemazu.’

22Pamandɨ ʉmʼmomvi ʉla ahaweela, ahamʼmʉʉzya ahaga, ‘Mwɨnɨ, zyʉ‑ʉndajiziizye, ɨmbombile, leelo apa‑akhale pali sha palɨɨho.’

23Ʉmwɨnɨ waakwe ahamʼmʉʉzya ahaga, ‘Ɨshi! Bhalaga hwʉnzɨ yi‑ibooma, mwi‑idala igoosi na mu tudala twa tubhala mu nyumba zya bhantu na mu vipanga, ʉbhabijiilizye abhantu huje bhɨnze, ɨnyumba yaanɨ ɨmeme. 24Ɨhubhabhʉʉzya amwɨ huje, mu bhaala bha bhahaniilwe hu wandilo, saga alɨɨho nkʉ‑ʉmo wa‑ahayilya ɨshikulukulu shɨ‑ɨndɨngɨɨnye anɨ!’ ”

Ʉkhome ʉwa‑abhe nʼsundwe wa Yeesu

(Mataayo 10:37-38)

25Ɨpo ɨmpʉga ɨngoosi ɨya bhantu yahashʉʉlaga peeka nʉ Yeesu. Ɨshi, ahagaluha, ahabheenya, ahabhabhʉʉzya ahaga, 26“Ʉmuntu wowonti wa‑ahwanza humbɨnjɨɨlɨle anɨ na‑abhe nʼsundwe waanɨ, ahwanziwa hungane anɨ ashile ʉyise waakwe nʉ nyina waakwe, ʉnʼshɨ waakwe na bhaana bhaakwe, abhaholo bhaakwe na bhayɨlʉmbʉ bhaakwe. Nantele ahwanziwa hungane anɨ ashile sha‑ahuwugana ʉwʉʉmi waakwe. 27Ʉmuntu wowonti wa‑ahwanza humbɨnjɨɨlɨle anɨ, lyoli ahwifumyaje anyeemule ɨshikhobheehanyo shaakwe. Nkashele saga ahwifumya hwɨ‑ɨgo, saga abhajiiye abhe nʼsundwe waanɨ.

28Tije, yʉ naanu huliimwɨ nkashele ahwanza azenje ɨshidunku, saga ahwanda asɨɨbhe ɨvintu vyonti vya vihwanziwa azenjele? Ɨpo anza‑asɨɨbhe nkashele ali nɨ mpɨɨya ɨzya‑amalɨɨzɨzye azenje. 29Sinta abhombe ɨsho, agazenga lwʉ lwalo lwene, na‑apootwe amalɨɨzɨzye azenje. Ɨpo abhantu bhonti lwa bhashila mwi‑idala, bhanza hunʼseshe 30aje, ‘Ʉmuntu ʉnʉ ahandile azenje, leelo apotiilwe amalɨɨzɨzye!’

31Nantele, weenu ʉmwɨnɨ lwa‑ahwanza alwe nʉ mwɨnɨ ʉwɨnjɨ, saga asɨɨbha nasʉʉti huje, agamenwa lwa‑ali na bhalwi ɨelufu ishʉmi lwene, wope ʉnʼnʉgʉ waakwe ali nabho ɨelufu amashʉmi gabhɨɨlɨ? 32Nkashele waalola huje anza‑amenwe, ahubhasonteelezya abhabhomvi bhaakwe bhabhale hwa mwɨnɨ ʉla sha‑ali hutali huje, bhʉmvwanwe.

33Ɨsho sha zilɨɨho na huliimwɨ. Saga alɨɨho nkʉ‑ʉmo wa‑akhondɨɨye abhe nʼsundwe waanɨ, nkashele saga ahuvileha vyonti vya‑ali navyo.”

Ɨshifwani ɨshi‑ibheeya

(Mataayo 5:13; Maalʉko 9:50)

34ɄYeesu ahajendeelela ayanje ahaga, “Ibheeya linza, leelo nkashele linanjiishe ʉwinza waakwe, ʉgalʉnga hantu heenu huje likhole nantele? 35Ibheeya nanshi ɨlyo saga lili nɨ mbombo hwope na hu longo ahwonjele ɨmboto. Lyoli lihwanziwa ataagwe lwene. Ʉmuntu wowonti wa‑ahwʉmvwa, azyaganyaaje na‑alembe mwɨ‑ɨgo ga nabhamanyizya!”

Valgt i Øjeblikket:

Luuka 14: SBK

Markering

Del

Kopiér