Markus 8
8
Jesu hengen gan me ansu mahabou.
1Bersi su ndramed mabosanged su da ndro i, gan ansu bui, Jesu i loh su lao aden su me ndro i, i boi: 2Goloisden su, su da ndro io madolo, malabo gan ansu bui, 3gle io gbien su, su iao la sal, su la mad, gor asu holel manan. 4Su lao aden su bode: Du gal bo ansu gan gle oho, gorda aga marboga ge. 5I ndemani su: Suslong ademu masehe? Su bode: Manondrdolo. 6I boi le asu, su masi su lugdo im boan, hedi suslong manondrdolo i bo lodu leri, i iendri me asu lao aden, su lao aden su hengen su. 7Ni mandehe i da, i bo lodu leri me asu. 8Su ian, mosesu, nogden i dandon le ndob manondrdulhad. 9Su ian gan su mahabou, boen i bien su su iao. 10Jesu i ndre le ndol ma su lao aden su iao me le gor asu Dalmanuda.
Heb nongen le ndro su Pharisi.
11Su Pharisi su me ndemani i, su le seslaini i, i hinen gelman ber lang manden be su ge lele. 12Ndrnen i reng su, i boi: Su ai lengi gelman ber lang ge? Ndangen, io boi me ndro mu, io de hinen gelman me asu bui. 13I bien su i ndre ndol aden i iao le horo. 14Su lao aden golsu i ndud gan ansu, suslong ge si i da ndol. 15Jesu i vong le ndro su i bodeie: Hian mu do da bogulue le longu asu Pharisi ma longu ad Herodes. 16Su hanguruen nongen aden, su vong le goure su bodeie: Aga i boii du, du de hur gan adu bui. 17Jesu i hirong nongen asu i bode: Desa uomu dang anemu gan? Danmu longu ordo bui, mu ma de hirong nongen? Golmu ndoun ge? 18Begmarmu gorbo mu de so lele bui? Delengamu i da, mu de hirong bui? Mu de hanguruen heb longu bui? 19A io gin iendri suslong malima me le gan ansu malibou, ma ndob sehe mu nhui lie le nogden? Su bode: Mandobsungolerhed. 20Boen io iendri suslong manondrdolo me ansu mahabou, ma ndob sehe mu nhui lie le nogden? Su bode: Manondrdulhad. 21Boen Jesu i boi le ndro su: Derbe uomu ma de danmu longu ordo?
Jesu sobani homo begmarn bui.
22Su me Betsaida su hur hom ndramed begmarn bui me ndro Jesu, su ndemani i, i regurdueni le hian. 23Jesu i rui ndramed marn bui le nemen, sor landi; sor bien gor, i rogumbunhi le marn, nemen Jesu i le balen, boen i ndemani i, i bode: Uo da lele? 24I lele i boi: Io dilingi su ndramed su dogi, io bode na gei. 25Nemen Jesu le begmarn lie, boen i lele, begmarn horuan i ilndri longu masi monen. 26Jesu i rendegien i le um aden lie, i boi: Mbue de al gor ogo, mbue abui gle ndro su.
Petrus boharni Jesu i sie.
27Boen Jesu e su lao aden su girgai le gor asu Sesaria Philipi, su do da sal i ndemani su lao aden i boi: Su ndramed su bode sa, io sie? 28Su boi: Su holel su bode, uo Johanes Ndremda Surhi su, su holel su boi, uo Elias, su holel lie su boi, uo hom lao ad Jehova ber goru. 29Boen i ndemani su i boi: Uomu bode sa io sie? Petrus i boi: Uo Kristo! 30Jesu sendraini su, i boi: Mbue mu gabui gle ndro homo.
Heb nongen le ngendian ad Jesu.
31Muren Jesu i boharni me ndro su, Ndurndramed bersi su labenen, su ndurhian asu, su ndremda bohernou, su hinen i momen, boen su bieni i, su garii i na gmed, madolo muren i gedne lie. 32I boharni me ndro su, i de bai loldi bui. Petrus hedi i, sor la heb lendi, i boii i. 33Jesu i rebulueni i lele le ndro su lao aden i boi me ndro Petrus: Alndi, Satan: Uo de hanguruen longu ad Jehova bui, uo hanguruen longu asu ndramed ge. 34Boen i loh su ndramed masi e su lao lie i boi: Be hom gorndrbo, hian i ghirong nongen ordo ge, ghinen longu ordo ge, de hanguruen longu aden bui. 35Homo ie lengi longu aden ge, na gmed: Homo i bieni longu aden, me ndrbo, e hirong nongen helian, i da hian ge. 36Hom ndramed hedi memrad masigane e bieni meluan me ad Sadan, i hian derbe? 37Ndramed i regunha meluan le sa? 38Homo bombulen i mesi nongen ordo le ndro su ndramed momen ge, muren a Ndurndramed gme lie ma su Angelo aden egerang dege Damen, i mbueren aden, i girge.
Valgt i Øjeblikket:
Markus 8: LLENT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Published by the British and Foreign Bible Society 1956
