Dzwan 3
3
Yesù ə tyi də̀ àyiə â Nikə̀dəmə̀
1Wê Falə̀sî ùlìy wìy kə də ŋwô ghu twoŋə izəd iwe yiy nə̀ à də̀ Nikə̀dəmə̀ u də̀ sòʼo wù ùsaʼà wìy anə dzəŋə kə aghě Dzû. 2Abù nə̀ nyiŋkwubì tìy, u kway bə̀ Yesù bəb â we nə. “A àtyi dè, ghè kwu mà təŋ ŋwô nə̀ à wò twum bə̀ Kə̀zə̀ nə̀ wò bû tyi dê bə̂ ghə̀d nə̀ àyiə yiy.”
3Yesù ə bə̀lì kə we nə, “Mə ndzəmə̀ dzìy bə̀ ŋwò â wò nə̀, à mày kə nə̀ ghu mə wù byi kwùnì â wù ani kòʼ loʼo kə Zə̀kìy saʼa nəniy aghee we yiy ate.”
4Nikə̀dəmə̀ ə dzày yə̀ a we nə, “Nə̀ìndiə? Dzwən kə wû kìy də mə̀yə ani nyi kwo dzwoŋi yə̀ anə unìə̀ u zə̂ tə̀ ghu byi kwùnì bə̂ we ə?”
5Yesù ə bə̀lì yə̀ we nə, “Mə ndzəmə̀ dzìy bə̀ ŋwò nə̀ wù lìy wày ani tsìy nyi kwoʼ yə̀ dzə̀ a loʼo kə Zə̀kìy saʼa nəniy aghee we yiy ate nə̀ ghu kə̀ byi we anə mwi nə̀ Zwàykə̀zwekiy. 6À wù fə anə mbyi byikə nia bə̀ tè we nə̀ zə̂ we. À mày kə Zwày k-a-zə̀ kə zəŋə tsə nəniy wù nə̀ ù dòʼò wà Kə̀zə̀. 7Kəə idzwə yiy nə̀ zwumə wô anə ayiə yə mə dzîy nəniy â wò nə̀ Ghu kwu ani byi kwùnì wù. 8Ŋkwùŋì kiy fyebə zè a bə̀d kə̀ kə liə nəniy, anə yəə wò màŋə̀ zuw yə̂ nəniy yə kə tsîy nəniy ate. Wò way ani ba dzày dzə̀ loʼo kə kə ŋwò bə̀ nəniy ate, moo loʼo kə kə zê nəniy ate. À də ighəd wò də wày ani zuw kəli ayiə yə Zwàykə̀zwekiy zəŋə tsə nəniy nə̀ wù kəli imuə̀ ifyiə yiy.”
9Nikə̀dəmə̀ ə bəb yə̀ a we nə, “Ayiə yəə kiy kaʼa tsə mə̀yə ani bwìy yə?”
10Yesù ə dzày yə̀ a we nə, “Wò mbaŋ də̌ àtyi dè àghě Dzû ùsòŋə̀ wìy, wò də kamə zuw kyilə way anə wokə mə kaʼ ani dzày ayiə yə â wò. 11Mə ndzəmə̀ dzìy bə̀ ŋwò â ghà nə̀ ghè dzîy bə̀ àyiə yə ghě kwu nəniy ghè mə kòʼ sòʼò, wò twe ani kwuni bɛmə ayiə ghələ à dziy yiy. 12Abu wò də kə̀ kwuni bɛmə kə ayiə yə mə dzîy bə̂ awò kùmə̀ yə̀ nə̀ àyiə yə a də nəniy fə anə mbyi, wò kì fə̀ zə̀àŋì byemə kə à yu mə kî dzîy bə̂ â wò kwùmə̀ yə̀ nə̀ Vələ kiy yə? 13Wè ù lìy wìy kamə kwoʼ kôʼ dzə̂ an-a-vələ à mày kə Wà Wù ù kwuni ŋwò tswi bə̀ nəniy an-a-vələ. Ù mùə̀ anə mbyi nyiə.”
14Anə yiə yə Musîs kə nîy na kwoʼ kə zwə an-a-nyə̀lə a mbvən ə̀ kə̀sisi, à də̀ ighəd ghà nî nìy nia kwoʼə kə soʼò Wà Wù ate. 15Nə̀ bâ də kə ndiə ù tsəb bɛmə nyiə̀ dzə̂ â we, wù ùghà wə̀ kì kyilə ŋwò ìmuə̀ itsà yìy. 16À də bòʼ ìliə yə Zə̀kìy kə ŋge kwu awò àghě mbyi yiy, ù nyə̀ bə̀ kə̀lə̀kə̀lə̀ kə Wà we, nə̀ bəə à də kə ndiə ù tsəb bɛmə dzə̂ â we, wù ùghà wə̀ nì mòŋ này dzə̀ wày an-a-nsə̀àŋì, ù nì kwuni kyilə imuə̀ itsà. 17Zə̀kìy kə kə̀ twum bə̂ dzə̂ Wà we fə anə mbyi nə̀ ù bù saʼ wiy aghee mbyi, Zə̀kìy kə twum bə̀ we aŋwòə ù liə ani bii fyi aghee mbyi yə abidzəmə̀ Wà we wə.
18Isaʼ ì liy kâm wày dzə anə tuw kə wù wə̀ ù bɛmə nyiə̀ dzə̂ awò we, a kwuni bû wù wə̀ ù də kamə bɛmə dzə̂ nəway â we, ghu mə saʼ wiy we, aŋwòə wù ghè wə̀ kamə bɛmə dzə̂ â kə̀lə̀kə̀lə̀ kə Wà Kə̀zə̀. 19Isaʼ i ghè yə də təŋ ŋwô aŋwòə asə ə̀ zwe ə Kə̀zə̀ maa bû anə mbyi aghe twe màʼà, aŋwòə ghu kwuni liə kə ani mùə̀ a təŋə kələm anə yiə bɛbə yə ghu zəŋə nəniy tsìy fyi asə ə̀ zwe yiy. 20Aghû yə̀ àdzə̀m ghu zəŋə nəniy ayiə àbɛbə, ghu dzwə nə̀ asə ə̀ zwe ghè yə̀, ghu nê kə ani zəŋi bə̀ anə asə ə̀ zwe nə̀ aghê fə̂ nə̀ kôʼ ayiə àbɛbə yə ghu zəŋə nəniy. 21Abû àghû yə̀ ghu zəŋə nəniy ayiə yə a də nəniy àsoŋə̀ yìy, ghu zəŋə təŋə bə̀ anə asə ə̀ zwe yiy nə̀ aghê si koʼo bə nə̀ ghu zəŋə àyiə yə Zə̀kìy liə nəniy.
Dzwan kə dzày ayiə kwùmə̀ yə̀ nə̀ Yesù
22Abù ayiə yə̀ tsìy ŋwò tsə nəniy, Yesù nə̀ tsə̀təndii tə we tiy, ŋwò tsə a Yèlusalèm zù a mbwòʼ ə̀ Dzudiyà. U dzə̀ dòʼò tsə awote nə̀ ghu, nyə̀ tsə ghu nə̀ mwi m-à-zə̀mìy anə dzwî. 23A soŋə fə ghà fə̀ Dzwan wə̀ ù kə nyə̀ nəniy mwi m-à-zə̀ mìy, ù nyə̀ aghè nə mwi m-a-zə̀ mìy anə inaʼ i Enòn, akə̀lə̀ ìnaʼi Salìm, aŋwòə dzwì kə dəŋə dùw awote. Aghee tsə̀ŋə̀ tyìŋə̀ bə̀ kə ŋwò nə̀ ù nyə̀ ghu nə̀ mwi m-à-zə̀ mìy. 24À kə də nə̀ ghu kamə kwi kwe dzə̂ nəway Dzwan a ndàw ntsaʼ.
25Tsə̀təndii tə Dzwan tə̀liy tiy kaʼ ani bə̀d ayiə nə̀ wè Dzû ù lìy kwùmə̀ yə̀ nə̀ byiə kə̀ suw kiy, ani zwu dòʼò tsə akə̀lə̀ Kə̀zə̀. 26Tsə̀təndii tə Dzwan tiy zù akə̀lə̀ we, dzày yə̀ awe nə, “A àtyi dè, wù wə̀ ù kə kway bə̂ wô fiy a ŋgùŋə̀ dzwì Dzudà ì lìy yə̀ toŋə wù wə̀ wò kə dzîy nəniy ayiə yiy â ghə̀d kùmə̀ yə̀ nə̀ we. U nyiə̀ mwi m-à-zə̀ mìy â ghù yìy Aghê nyiə lwe təŋə yiə kə akə̀lə̀ we kàmə bè wày fə akə̀lə̀ ŋgàŋ.”
27Dzwan ə bə̀lì kə aghu nə, “Wù lìy wày dzə ani kəli kə fyiə à mày kə nə̀ à nyə̀ Kə̀zə̀. 28Ghà mgbaŋ kwu təŋ ŋwô nə̀ mə maa dzày nə̀ mə wày dzə wù wə̀ Zə̀kìy sûw kyili naa nəniy. Zə̀kìy mə kwuni twum miə nə̀ mə byay tsə dzə̀d awò we. 29À də̀ tsə̌ ŋə̀mə̀ wìyəŋi ù kwu nəniy wìyəŋi. Fə̀lə̀ we ù tâw wìy kwuni màŋ də̀ kə ani bù zuw ayiə yə ù dziy nyi məŋkà ate nə̀ wìy we. I nyiə̀ we nə̀ dwiʼi kiy abu ù kwuni zuw tsə nəniy dzə̀ ə̀ ŋə̀mə̀ wìyəŋi. À yù də̌ dzəd mə kyilə nəniy dwiʼi kiy ate inaʼ ìdzə̀m. 30Ŋkwiʼi mə̀ we miy kwu ani dùw kwoʼo yəə, mə̀ mâm mìy ki tɛbə tswi tsə.”
Wù wə̀ ù ŋwò bə̂ nəniy an-a-vələ
31Wù wə̀ ù ŋwò tswi bə̀ nəniy idoŋ, ù tsìy fyi ŋwô àghê àdzə̀m. Wù wə̀ ù də nəniy wè kə̀mbvə̀dintsə, ù də̌ wè mbyi. Akwuni bû wù wə̀ ù ŋwò tswi bə̂ an-a-byiwuŋ, ù tsìy fyi ŋwô àghê àdzə̀m. 32U nìʼà bə̀ ayiə yə ù kòʼ nəniy, nə̀ à yuu ù zuw sòʼò nəniy. I kwuni də̀ kə nə̀ wù lìy byemə way ayiə we à dziy yiy. 33Wù wə̀ ù kwuni bɛmə dzə̂ nəniy ayiə yə ù nìʼà nəniy, ù ghi bɛmə dzə̀ nə̀ Zə̀kìy də ayiə àsoŋə̀ yìy. 34Wù wə̀ Zə̀kìy kə twum bə̂ nəniy, nàʼà àyiə yə àdzə̀m, aŋwòə Zə̀kìy mə nyə̀ màa Zwàykə̀zwekiy kiy. 35Təli ŋge liə ŋwoə wà we, ù mə nyə̀ mà ayiə adzə̀m anə wo kə Wa. 36Wù wə̀ ù tsəb bɛmə dzə̂ nəniy â Wà Kə̀zə̀, wù ù ghà wə̀ kì kyilə ìmùə̀ itsà. Abu wù wə̀ ù twe maʼà ayiə Wà Kə̀zə̀ à dziy yiy, ù nìy wày ani kəli dzə ìmùə̀ itsà. Ù ki lyimə kə ìsaʼ yə Zə̀kìy nî saʼa nəniy we ate nə̀ fòŋ ì ŋəmə̀ yìy.
Valgt i Øjeblikket:
Dzwan 3: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
