Dzwan 2
2
Yesù kə zù a loʼo kə Inyi ì niy iwè kìy a inaʼ i Kanà
1Ntsukə tsìy tsə imbè, inyi ì niy iwè yìy kə də anə inaʼ i Kanà anə mbwòʼ ə̀ Galìlî. A də nə̀ zə̂ ə̀ Yesù də̀ sòʼò awote. 2A də nə̀ ghu mə nàm bə̀ sòʼò Yesù nə̀ tsə̀təndii tə we tiy a loʼo kə inyi ì niy iwè kə̀. 3Abù nlwùmìy swây tsə nəniy, zə̂ ə̀ Yesù ə dzày yə̀ â Yesù a we nə, “Nlwùmìy mə swày awò àghè ani mwu.”
4Yesù mee a we nə, “Kə̀ ndoʼò dzày dzə̀ iyiə yə mə dziy zəŋi, soŋə fam fiy kamə kpe dzə̂.”
5Zə̂ ə̀ Yesù ə dzày yə̀ â aghee kəfàʼ yə̀ awote a ghu nə, “Abu ù dzày kə nə̀ìndiə â ghà, zəŋi yə kə nə ŋwô.”
6Aghee Dzû yìy kə kwu kəbyiəə kwùmə̀ yə̀ nə̀ àwo à suuw yiy, à yù də̀ ighe ghu kə tyili na bə̂ nəniy ntwà tə mwi tiy awote ìntìfoŋ ani fàʼ ayiə ghè yə̀ ate, ntwà imoʼ kə də yəə ŋgùw tə mwi tiy nə nyi tsə ate mə̀vəm intii 7Yesù ə dzày yə̀ â àghě kəfàʼ yə̀ a ghu nə, “Kwe lwe tsə nə mwi anə ntwà tə mwi tiy.” Ghu kwe lwe tsə sòʼò. 8Ù mee a ghu nə, “Kyày fyi kə nə mwi mə̀ lìy mìy, ghà zû nyiə̀ yə̂ â wù wə̀ ù lia ayiə à nyiə yə.” Ghu kyày fyi kə sòʼò mwi mə, zù nyə̀ yə̀ awò wù ghà wə̀. 9Abù wù wə̀ ù lia ayiə à nyiə yə̀ mwàm kòʼ tsə nəniy mwi mə nə̀ ì mə fə̀d nlwù mìy, u kwu way loʼo kə ì ŋwò bə̂ nəniy ate, aghee kəfàʼ yə̀ kə kwuni kwu ŋwô loʼo kə ì ŋwò bə̂ nəniy ate. (Aŋwòə à də̌ ghu ghu kə tuw nəniy mwi mə ìŋ kə fə̂d kə nəniy nlwù mìy). À yù də̀ ighe ù kə twoŋə tsə nəniy ŋə̀mə̀ wìyəŋi wə dzày yə̀ a we nə, 10“Ghu səsə ki bê dzə̀ nə̀ nlwùmə̀ dzòŋə̀ mìy, aghê sì mwu, abù ghu kee doʼò tsə nəniy, ghu sì lələ̀ nìy fyiə bə̀ lwày kə mənlwù, wò kwuni nîy kə lwù mə̀ dzòŋə̀ mìy nùw na yə̀ zè lə̀lə̀ nìy fyiə bə̀ nyìə̀.”
11À kə yù də mali kə iyiə kə səsə kiy Yesù kə zəŋi anə inaʼi Kanà a mbwòʼ ə̀ Galìlî, u dè fyi bə̀ ŋkwiʼi mə ù kwu awote, tsə̀təndii tə we tiy bɛmə nyə̀ awò we.
12Abù i ghè yə̀ mày tsə nəniy, Yesù nə̀ zə̂ ə̀ we nə̀ àwizə̂ ə we iŋə̀mə̀, nə̀ tsə̀təndii tə we tiy, ghu ŋwò zù anə inaʼ i Kàpanùm dzə̀ dòʼò tə kə awote ntsukə i nsə̀ki kə ghi.
Yesù ə ŋwò zù a Ndàw Kə̀zə̀
(Matìyò 21.12,13; Mâk 11.15-17; Lukâs 19.45,46)
13A kə də nə̀ soŋə fə inyi i ŋkàmə̀tâzaʼà mìy nə̀ fə nyiə̀ kpe mìà kyoŋə bə̀ ŋwò, Yesù zù a Yèlusalèm. 14U ŋwò kwoʼ yə̀ a Yèlusalèm, zù dyaŋi a Ndàw Kə̀zə̀, zù kway kòʼ yə̀ aghe ghu fyê nəniy mbòŋ tìy, nə̀ ndzwù tiy, nə̀ ùbwubwumə wiy, nə̀ àghù yə̀ ghu kwunə ŋkhiy miy, ghu də nəniy anə ukwe u ghu. 15U byili kə ikwô, dzwùm fyi ndzwù tə̀ nə̀ mbòŋ tə̀ awote a ndàw Kə̀zə̀. U təm fwuli màʼà ùkwe wə aghê à kwunə ukhiy yə̀ kə də nəniy atə, nkhiy mə̀ tswaʼi sə̀àŋì kyabi tsə̀ ambvə̀dintsə. 16U tsày kə̀làŋ â àghù yə̀ ghu kə fyê nəniy ubwubwumə wiy a ghu nə “Niy ŋwo fyi nənìy nə̀ ùbwubwumə wə fə a ndaw, ghà kə nîy na tsə dzə̀ ndàw Təli wam nə̀ à də bekəivən.” 17Ayiə ù dzày tsə nəniy ghi, tsə̀təndii tə Yesù tiy dyaŋi tà mòʼ bə̀ àyiə yə i twâ doʼò nəniy anə ŋwàʼà k-a-zə̀ nə̀, “Ighaa yam a ndaw yiə̀ A Zə̀kìy, i byaʼa anə uwè nam yəə à də̀ uvələ.”
18Ŋgəd tə aghě Dzû tìy ə bəb yə̀ a wə nə, “Wò də ani dè tsə tsə̀e ì ghâ yìy nə̀ à nyə̀ Kə̀zə̀ wô nə̀ daʼa kiy ani fàʼ ndzòʼò àyiə yiy?”
19Yesù ə bə̀lì kə ghu nə, “Sàʼa màʼa fyi twi bə̀ nə ndàw Kə̀zə̀ yə̀ nyiə, mə ki nîy ntsukə intii mə byiə fyi dzoŋi kə.”
20Ghu bəb yə̀ a we nə, “Wò də fə̀ ndìə̀ ani nìy ntsukə intii wò byiə fyi dzwoŋi kə ndàw yə? Ghe kə nìy tə̀ŋə̀m iwuuiwû ìbè nə̀ ŋə̀mə̀ tìy ìn tyìfoŋ ani byiə ndàw Kə̀zə̀ yə̀.”
21Ndàw Kə̀zə̀ yə̀ Yesù kə dzîy nəniy à kə kwuni də̀ uwee u we. 22À yù də̀ ighe ayiə Yesù kə pfə tsə nəniy, ntsukə tsìy tsə inti, u zɛ̀mə̀ dzoŋi bə̀ anə ipfə, tsə̀təndii tə we tiy ŋwò tâ myìŋì bə̂ nə̀ ù maa dzây na ayiə yə ghii. Ghu bɛmə kə ayiə yə a twâ doʼò nəniy anə ŋwàʼà k-a-zə̀ nə̀ ayiə yə Yesù kə dzây nəniy awò ghu àdzə̀m.
Yesù kwu mà ŋwô fyiə̀ kə aghê də ghe kiy
23Anə yəə Yesù kə də nəniy a Yèlusalèm anə soŋə fə inyi ŋkà mə̀tâzaʼa mìy, ndə̀mə̀ aghê ə bɛmə nyə̀ â we, anə ayiə yə ghu kôʼ tsə nəniy mali tə yiə tə ù kə zəŋi nəniy. 24Yesù kə kə̀ kwuni nyiə̀ yə̂ dzə̂ ùwee u we wiy awò ghu, aŋwòə ù kə kwu mà ŋwô fyiə kə aghê də nəniy ghe kiy. 25Wè lìy kə̀ ndòʼò wày dzə ani dzày yə̀ fôŋ tə ghu awò Yesù, aŋwòə ù kə kwu mà ŋwô fôŋ tə aghè àdzə̀m tìy.
Valgt i Øjeblikket:
Dzwan 2: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
