Dzwan 16
16
1Mə ghii dzày na bə̀ ayiə yə â ghà nə̀ kəə ghǎ nì bvə̀ fyiə ŋwô dzə̂ anə ibɛmə yə ghà kwu nəniy. 2Ghu kî dzwùmə̀ fyiə gha anə ndaw tə udzəŋə tə aghě Dzû. Soŋə fə̀liy fiy nî bè ŋwò aghê ni wiy gha, ghu ni mòʼò kə nə̀ ghu ghî fàʼà fàʼ kə̀dzoŋə̀ kìy â Zə̀kìy. 3Aghê nî zəŋə àyiə yə azoŋə̀ ghà aŋwòə ghu kwu dzə̀ way Tà, kwu sòʼò way miə. 4Mə ayiə yə̀ dzày na zìì bə̀ â ghà tə̀ abu soŋə fiy kpe tsə nəniy awò ghu ani zəŋi ayiə yə, ghà ni myiŋì tsə ayiə yə mə kə dzìy nə̀ ghu nî zəŋə ŋwò azoŋə̀ ghà.
Fàʼ kə Zwàykə̀zwekiy
Mə kə kamə dzây dzə̂ nəway ayiə yə awò ghà, aŋwòə mə kə nam də̌ nə̀ ghà. 5Mə nyiə̀ dzwəŋə zè akə̀lə̀ Tà, à kə twum we miə, wù ù mòʼ kə̀ bôʼ bəb kê anə uzə ghi nə̀ mə zê yə̀. 6Ghà fələ̀ ŋge mwe ŋwò yəə ghà zuw tsə nəniy ayiə yə mə dzây nəniy. 7Mə ndzəmə̀ dzìy bə̀ ŋwò â ghà, iŋwô yam yiy kî fìì ŋwò gha, aŋwòə abu mə də kə̀ ŋwô nəway, wù wə̀ ù dziy fày ghà, ù kì bè sòʼò wày â ghà. Abu mə kwuni ŋwô yə̂ mə ki twum bə̂ we â ghà. 8Abu ù bù nəniy, ù kî zəŋi tsə nə̀ aghee mbyi yiy kəli tsə iyiə yə i də nəniy ìsoŋə̀ yìy kwùmə̀ yə̀ nə̀ ìbɛb yiy, kwùmə̀ yə̀ sòʼò nə̀ ìyiə yə i də nəniy tsitsi anə sə k-a-zə̀, kwùmə̀ yə̀ sòʼò nə̀ yəə Zə̀kìy nî saʼa wiy aghee mbyi yiy ate. 9Zwàykə̀zwekiy kî zəŋə tsə ghu kəli tsə iyiə yə i də nəniy ìsoŋə̀ yìy kwùmə̀ yə̀ nə̀ ìbɛb yiy, aŋwòə ghu kwu way ibɛmə yiy azoŋə̀ mìə̀. 10Ù kî zəŋi tsə sòʼò nə̀ ghu kəli tsə nə̀ ghu mə zəŋi bɛb anə ayiə yə a də nəniy tsitsi anə sə k-a-zə̀, aŋwòə mə nyiə̀ zè akə̀lə̀ Tà. Ghà ki də kàmə̀ kòʼò wày miə. 11Ù kî zəŋi tsə sòʼò nə̀ ghu kəli tsə iyiə yə i də nəniy ìsoŋə̀ yìy kwùmə̀ yə̀ nə̀ àyiə yə Zə̀kìy nî saʼa mbyi ate, aŋwòə Zə̀kìy maa kwu saʼ wiy àmbvə̂ntsə, tyoŋə wù wə̀ ù saʼa mbyi.
12Mə nam kwu ndə̀mə̀ ndə̀mə̀ tə ayiə ani dzày â ghà, à kwuni də̀ kə nə̀ a kî ŋge dùw ŋwò anə yiə yə ghà də wày ani zuw kəli. 13Abu Zwàykə̀zwe kə kə dê nəniy iyiə yə i də nəniy ìsoŋə̀ kwùmə̀ yə̀ nə̀ Zə̀kìy kî bê nəniy, ù kî zəŋi tsə nə̀ ghà kəli tsə ayiə àsoŋə̀ yə̀ àdzə̀m. Ù kì dzìy dzə̀ wày anə daʼa kə we. Ù kì dzìy bə̀ kə àyiə yə ù zuw nəniy awò mìə̀. Ù kî zəŋi tsə sòʼò nə̀ ghà kəli tsə ayiə yə a kwu nəniy ani bù fyi. 14Ù kì fàʼà àyiə yə a də ani bù mìə̀ nə̀ ŋkwiʼi miy, aŋwòə ù kì nìy kə àyiə yə mə dzây nəniy â we, ù dzày bə̀ â ghà. 15Ufyiə wə ùdzə̀m Tà kwu nəniy, à də̀ u wam wiy. À də̀ ighe mə dzîy nəniy nə̀ Zwàykə̀zwekiy kî nìy kə ayiə yə mə dzây nəniy â we ù dzày bə̀ â ghà.
Imwe ghəli yiy ni kyemì kə anə kədwiʼi
16Yesù ə zù kə nə̀ səkiy ani dzày nə̀, “Anə fə kə̀mə̀ ghà ki də kàmə̀ kòʼò wày miə. Abu ghab kiy fyi tsə ghà ki kâm kôʼ mìə̀.”
17Tsə̀təndii tə Yesù tə̀liy tiy kaʼ yə̀ ani bəb anə iwè ighu nə̀, “Yesù sì myìŋə̀ nə̀ìndiə anə yiə yə ù dzìy nəniy nə̀ a kî kàm kòʼ dzə̀ wày we anə fə kə̀mə̀, kàm dzày tsə sòʼò nə̀ abu ghab kiy fyi tsə ŋgà ki kâm kôʼ we ə? Ù myìŋə̀ sòʼò nə̀ìndiə ani dzày nə̀ ghe zê akə̀lə̀ Tà ə?” 18Ghu tsə̀ŋə̀ bəbə kə nə̀, “Ù dzìy ‘anə fəkə̀mə̀’ myìŋə tsə nə̀ìndiə? Ŋgà kwu way ayiə yə ù mòʼò nəniy.”
19Yesù kə kwu ŋwô nə̀ ghu kwu ayiə ani bəb, ù mee a ghu nə, “Mə dzîy nə̀ ‘Anə fəkə̀mə̀ ghà ki də kàmə̀ kòʼò wày miə, abu ghab kiy fyi tsə nəniy ghà ki kâm kôʼ mìə̀.’ À yù fə̀ tsəb də̀ iyiə yə ghà bəbə anə iwè nəli ə̀? 20Mə ndzəmə̀ dzìy bə̀ ŋwò â ghà, ghà ki dîy, ghà mwe soʼò, aghee mbyi ə ni kwuni dyoʼo. Ghà nî mwe ŋwò, ani buu ghab kiy fyi tsə nəniy, ghà ni kaʼ yə̂ ani dwiʼi. 21Bəə wìyəŋi dziy byi, u ŋge zuw ìfwabi. Abù soŋə fə ghà fə tsìy ŋwò tsə nəniy, u nìyzə̀ ŋwò tsə̀ yə̀ ìfwabi i ghè yə̀, kaʼ yə̀ ani dwiʼi aŋwòə ù mə byi bə̌ wa anə mbyi. 22À də̌ ndzòʼò ìyiə yə i fyiə nə̀ ghà nyiə. À yù də̀ soŋə fəli fə̀ mwe fiy, mə kî kwuni kòʼò fwulə yə̀ ŋwò gha. Ghà ki kəli tsə kədwiʼi anə yiə yə wù lìy kì də wày ani bwi na ghà nə̀ ghà kə dwiʼi sòʼò.
23Ani buu ntsuk fə ghè fə̀ nì kpe tsə nəniy, ghà nî kàmə̀ bəbə zələ way iyiə ìliy yiy â mìə̀. Mə ndzəmə̀ dzìy bə̀ ŋwò â ghà nə̀ təli wam kî nyə̀ ŋwò gha nə̀ fyiə kə ghà kî ŋwa yə̂ nəniy â we anə izəd yam. 24Ghà kamə kə̀ ŋwa nəway fyiə kə̀liy kiy â Zə̀kìy anə izəd yam bù kwùm tsə nyiə. Ghà ŋwa yə, Zə̀kìy kî nyə̀ ŋwò â ghà tə ghà ki də nə̀ dwiʼi kiy naʼ ìdzə̀m.
Mə taw tsìy mbyi
25Mə kə dzày àyiə yə â ghà anə mənzə̀zə̌. Soŋə fiy kî kpe tsə ŋwò, mə ki də kàmə̀ dzìy wày ayiə yiy â ghà anə mənzə̀zə̌, mə ni dzây faʼì tsə ayiə â ghà kwùmə̀ yə̀ nə̀ Tà. 26Ani bu ntsuk fə ghà fə̀ kpe tsə nəniy, ghà ni ŋwa yə̂ â Tà anə izəd yam. Mə dzîy dzə̀ wày nə̀ mə ŋwa yə̀ â we nə̀ ù nyə̀ bə̀ â ghà 27aŋwòə Tà liə ŋwô gha nə̀ ùwee u we wiy. Ù liə gha aŋwòə ghà liə ŋwô miə, bɛmə sòʼò nə̀ mə ŋwô bə̀ â Zə̀kìy. 28Mə kə ŋwò bə̀ akə̀lə̀ Tà, bù anə mbyi, mə nyiə̀ dziy ŋwô fə anə mbyi, mə zû akə̀lə̀ Tà.”
29Tsə̀təndii tə we tiy mee a we nə, “Wò dzìy dzwàbə̀ ŋwò ayiə yiy nyiə â ghə̀d nə̀ wò dzìy wày anə mənzə̀zə̌. 30Ghè kwu ŋwô nyiə nə̀ wò kwu ayiə adzə̀m. Ghè kâm kwu sòʼò way iyiə ìliy yiy ani bəb. Ghè bɛmə ŋwô nə̀ wò kə ŋwò bə̀ awò Zə̀kìy.”
31Yesù ə bə̀lì kə a ghu nə, “Ghà dzə̂m bɛmə ŋwô nyiə â mìə̀ ə̀? 32Soŋə fiy kî kpe tsə ŋwò, fəkəmə̀ fə bôʼ kpe, ghà ki ŋwô salì tu tsə miə gha adzə̀m, wù ùmoʼ umòʼ ki tee zee kə a ndàw we, ghà nasə tsə miə nə̀ noŋə̀ mìə̀. Mə kî wày dzə nə̀ noŋə̀ mìə̀, Tà kì kwuni də̀ ŋwô nə̀ mìə̀. 33Mə ayiə yə̀ ghî dzìy tə̀ ghà ki kwu ibvay yiy anə fôŋ təli, aŋwòə ghà də fyiə kəmòʼ nə̀ mìə̀. Aghee mbyi kî zəŋə ŋwò nə̀ ghà fii. Ghà kwuni kəli tsə kə fôŋ tə̀ taw tiy! Mə mə təm nyi aghee mbyi yiy.”
Valgt i Øjeblikket:
Dzwan 16: isu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© CABTAL 2023
