Sawltakte 8
8
1Tuaciang Stephen a thalupna sia Saul in lungkimpui hi.
Saul in Pawlpi Vawtsia
Tua ni mama in Jerusalem a om pawlpi sia vawtsiatna nasia takin thuak tu kipan hi. Sawltakte simngawl thu um dangte theampo sia Judea le Samaria ngamkhente sungah kithethaang siat uh hi. 2Thu umte pawlkhat in Stephen phum uh a, hee in awnging tak taw ama kaa uh hi. 3Ahihang Saul ahile Pawlpi sukthap natu hanciam hi; inn khat pan inn khat ah pai in, thu umte kaikeak a, pate zongh numeite zongh thonginn sung denna in nei hi.#Sawl 22:4-5; 26:9-11
Samaria ah Lungdamna Thu Kihil
4A kithethaang thu umte in mun theampo ah pai in thuhil uh hi. 5Philip in Samaria khuapi ah pai in tua mun mipite tungah Messiah ii thu hil hi. 6Mihonpite in Philip ii thuson ngai a, nalamdang lakna a vawtte a mu uh ciang ama neakin pha tak ngai uh hi. 7Mihing tam mamate sung pan doai ngilote sia a nging in au a, pusuak hi; pumzawte, peangbaite tam mama dam uh hi. 8Tua ahikom tua khuapi sungah lungdamna lian om hi.
9Tua khuapi ah Simon min nei pasal khat om a, tawmvei hun sung tengin Samaria te sia ama ii mitbum lakna taw lamdang sasak hi. Ama sia mi thupi khat in ama le ama kison a, 10tuaciang khuapi sungah om theampo kidoidanna om ngawlin, ama thu ngai uh hi. “Ama in ‘Vaangletna Lianpi’ a kici tua Pathian ii vaang sia ahi hi,” ci uh hi. 11Khuangei mama sung ama ii mitbum taw lamdang sasak ahikom, a thusonte pha takin ngai uh hi. 12Ahihang Pathian Ngam lungdamna thupha le Jesus thu Philip ii sonna a up ciangin, pate zongh numeite zongh tui kiphum uh hi. 13Simon mama zongh in um hi; tui a kiphum zawkciang Philip nai ah om top a, a nasia a lamdangte le nalamdang laknate a kivawt a mu ciangin lamdang sa hi.
14Jerusalem a om sawltakte in, Samaria a mihingte ii Pathian kammal a saan uh sia za ahikom amate in Peter le John sia tua mite kungah paisak hi. 15Amate hong thet uh ciang, Thaa Thiangtho a nga thei natu in, thu umte atu thungetsak hi. 16Banghang ziam cile Thaa Thiangtho sia amate khat ii tung zongh ah tuaksuk ngawl lai hi; amate sia Topa Jesus min taw a ki baptize hi bek hi. 17Tuaciang Peter le John in, amate tungah a khut uh nga a, tuasia ciangin Thaa Thiangtho nga uh hi.
18Amate tungah sawltakte a khut a ngak uh ciangin, thu um mite tungah Thaa Thiangtho a kipiak sia Simon in mu hi. Tua ahikom Peter le John tungah sum pia in, 19“Ka khut ka ngakna pawpo tungah Thaa Thiangtho a nga natu in, hi vaangletna sia kei zongh hong pia tavun,” ci hi.
20Ahihang Peter in zo kik a, “Pathian letsong sia sum taw kilei thei tu in na up hu in, nang le na sum teng sia hell ah pai tahen! 21Nang in kote nasepna taw kisai nawn ngawl ni hi, banghang ziam cile, Pathian muna ah na thin maan ngawl hi. 22Tua hi a, hi a sia na ngealna panin kisiik kik ta'n a, tuaciang tuabang ngaisutna na nei hu in, hong maisak natu in Topa tungah thungen ta'n. 23Banghang ziam cile nang sia ngual eenna thin taw a kidim mawna sungah, koltaang pa hi, ci in kong mu hi,” ci hi.
24Simon in Peter le John tungah, “Tu a nong ci teng kei tungah hong tun ngawl natu, nong hesuakna in Topa tungah thu hong ngetsak tavun,” ci hi.
25Amate in tetti pangin Topa thute a thansak zawkciangin, Peter le John te Jerusalem khua ah cia kik uh hi. A cia lam in, Samaria ngam khuano tam mamate ah Lungdamna Thupha hil uh hi.
Philip le Ethiopia Maangpa
26Topa vantunglalang khat in, Philip munah, “Kithoai in a, thangsang zuanin Jerusalem pan Gaza paina lampi zui in va pai ta'n,” ci hi. (Hi lampi sia kizangh nawn ngawl hi.) 27-28Tua ahikom Philip in kithoai in pai hi. Tu in Ethiopia kumpinu ii sum kholna a uk cil kinget Ethiopia mi a thupi ulian khat sia a inn ah cia tu in pai hi. Ama sia Jerusalem ah Pathian bia tu in a theng hi a, a siphu ngalleang taw cia kik hi. Tuabangin a cia kawmin, Isaiah thubu sim hi. 29Thaa Thiangtho in Philip munah “Va pai ta'n a, tua leang taw a kinai in va om ta'n” ci in sawl hi. 30Philip in del a, a phak ciangin, ama in kamsaangpa Isaiah thubu a sim sia za hi. “Na sisim teng na tel ziam?” ci in dongh hi.
31Ulian pa in “Hong thiangson khat a om buale bangbangin tel tu khi ziam?” ci in zo kik hi. Leang tungah Philip kaato tu in sam a, amate tokhawm hi. 32A sim laithiangtho mun sia hi bang ahi hi:
“Ama in ngawlup tu in a kikai
tuu khat taw kibang hi,
ama in a mul a kimeetsak ciangin,
a haam ngawl tuuno taw kibang hi.
Kam khat zongh a pau bua hi.#Is 53:7-8
33Ama sia kizawnsak vawt a,
thukhaikim thu kitaansak hi.
Ama ii suan le paalte huvau sia
kuama in a son thei buatu hi,
banghang ziam cile, ama ii leitung nuntakna bo hi.”
34Ulianpa in, Philip munah “Kamsaangpa pauna hisia akua a cinopna ziam hong son tan? Ama le ama kici nuam ziam maw midang khat ziam?” ci in dongh hi. 35Tuaciang Philip in son tu in kipan hi; hi Lai Thiangtho kammal pan panto in, Jesus ii Lungdamna Thupha son hi. 36Tuabangin a pai susuk ciangin tui omna mun khat theng hi, tuaciang Ulianpa in, “Hi sungah tui om hi. Tui ka kiphum natu in bang in hong khak ziam,” ci hi. 37Philip in ama tungah “Na thin theampo taw na um le, tui kiphum thei tu ni hi,” ci hi. Ama in “Um khi hi. Jesus Christ sia Pathian Tapa hi, ci in um khi hi,” ci in zo hi.
38Ulianpa in a leang a tawlngak natu thupia a, amate nii tui sungah tuaksuk in, Philip in ama tuiphum hi. 39Tui sung pan hong kaato uh ciangin, Topa Thaa in Philip la hi. Ulianpa in ama mu kik nawn ngawl ahihang, lungdamna taw kidim in, a pai ngei in paisuak hi. 40Philip sia Azotus khua ah theng ahi hunlam ama le ama kitel hi; ama Caesarea ah pai suak a, lamdung khua theampo ah Lungdamna Thupha hil hi.
Valgt i Øjeblikket:
Sawltakte 8: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016