Sawltakte 12
12
A tam zawlai Vawtsiatna
1Hi hun laitakin, Kumpipa Herod in, pawlpi mi pawlkhat vawtsia tu in kipan hi. 2Ama in John suapuipa James namsau taw thatlumsak hi. 3Hi bang a, a ngamtat ciangin, Jew te thukim hi ci in a mu ciang, Peter zongh mansak hi. (Hi hun sia Tol saw ngawl Anluum Poai sung ahi hi.) 4Peter sia a kimat zawkciang thonginn sungah khum a, ngalkap li veu pawl li kisua a, tuate in cingsak hi. Ama mipite mai ah Paisan Poai zawkciangin thusit tu in Herod in ngealna nei hi.#Pu 12:1-27 5Tua ahikom Peter thong sungah koi a, ahihang pawlpi mite in Pathian munah ama atu in nasia tak thu ngengen uh hi.
Peter Thong sung pan Suakta
6Mipite mai ah Herod in Peter thusit tu ni ma zanin Peter sia thongcingte nii ii kilaklaw ah mutthip hi. Ama sia thikkhau nii taw kikhii a, a thong kongkha ah thongcingte in cing hi. 7Thakhat thu in Topa vantunglalang khat tua munah ding a, thonginn doituam sung khuavak taang khat hong om hi. Vantunglalang in, Peter liangko panin lokin phong a, “Manlang in! Tho in!” ci hi. Thakhat thu in, thikkhaute Peter khut panin kizuk hi. 8Tua zawkciangin vantunglalang in, “Na kawngkhau sawm in a, na peangdap thua in,” ci hi. Peter in tuabangin a vawt zawkciangin, vantunglalang in, “Na puantual silhin hong zui ta'n,” ci hi. 9Peter in thonginn doipua ah zui hi, ahizong ama in vantunglalang ii ngamtatna sia a takpi ma ziam ci in a tel bua hi; mukholna khat a mu kisa hi. 10Amate in thongcingte ii phual masa sia a kaantan zawkciang a niina sia zongh kaantan uh a, a khakbelin khuapi sung tumna thik kongkha ah theng uh hi. Amate atu in kongkha sia ama thu in kihong a, amate pusuak hi. Tuaciang khuapi sung lampi khat a totsuk laitak thakhat thu in vantunglalang in Peter nusia hi.
11Tua zawkciang Peter in ama tungah bang thu piang, ci in phawk a, “Tu in a maan tatak sia ka he hi!” ci hi. “Topa in a vantunglalang khat sia, Herod ii vaangletna pan le Jew te ii kei tungah hong piang tu a upna theampo pan hong suatak tu in, hong paisak hi,” ci hi.
12Ama in a dinmun kitel ahikom, John Mark ii nu Mary inn ah pai hi, tua munah mihon kikhawm a, thungen uh hi. 13Peter in kongkha puanung sia king a, Rhoda kici numei naseam khat in inn hon tu in pai hi. 14Ama in Peter aw tel a, lungdam leilam in, kongkha zongh hon meal ngawlin, heak kik hi. Inn sung a omte munah, Peter doipua ah ding hi, ci in son hi. 15Amate in, “Na thin amh hi!” ci uh hi. Ahihang numei nu in, a takpi ma hi, ci veve hi. Tua ahikom amate in, “Ama a keam vantunglalang hi vak,” ci uh hi.
16Tua lan tengin, Peter in kongkha king top hi. A khakbel ciangin, amate in kong hon uh a, Peter a mu uh ciangin, lamdang sa uh hi. 17Amate a thim natu in a khut taw lak a, thonginn sung pan Topa ii ama a pusuasakna thu teng son hi. “Hi thu James le thu um dangte munah son tavun,” a ci zawkciangin amate nusia in mun dang khat ah pai hi.
18Zingsang khuavak ciang, thongcingte sungah — Peter bang tawk ziam, ci in nasia takin buai uh hi. 19Herod in ama a zon natu thupia hikale, a mu zo bua uh hi. Tua ahikom ama in thongcingte thu donghsakin amate thalup tu in thupia hi.
Hisia zawkciang, Herod in, Judea ngam nusia in, Caesarea ah hun tawmvei zangh hi.
Herod Thina
20Herod in Tyre le Sidon mite tungah a thin uuk mama hi, tua ahikom amate in Herod taw kimu tu in, pai hon uh hi. A masa in kumpi inncingpa Blastus sia amate a hu tu in, a thinzosak phot uh hi. Tua zawkciang amate in Herod kungah pai in kilemna ngen uh hi, banghang ziam cile amate ngam ii anneak tu sia kumpipa ii ngam panin nga uh hi.
21A kiciam ni a thet ciangin, Herod in a kumpi puantual silhin kumpi tokhum tungah to a, mipite tungah thusonna khat nei hi. 22“A papau sia mihing hi ngawl a, pathian khat hi!” ci in amate au uh hi. 23Thakhat thu in Topa vantunglalang khat in Herod velvawk hi, banghang ziam cile ama in Pathian vaang a pia bua hi. Ama sia lungte in ne a thi hi.
24Tua hun sungin, Pathian kammal kizel suak a, khang vaial hi.
25Barnabas le Saul in, amate ii ngamthak nasep man a, John Mark, tonpui in Jerusalem panin heak kik uh hi.
Valgt i Øjeblikket:
Sawltakte 12: SCB2
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Siyin Chin Bible © Bible Society of Myanmar, 2016