Luk 11

Kaɗeya ge ndu ge ame hateya mbiya kee ne

Mat 6.9-13; 7.7-11

1Ɗeɗ-ɗa go Zeso kee kaɗeya sok a̰me go. Sok ge aa go, ne ndu ge ame hateya a̰me ɗu kaɗe ne go: Bagezok, hate i go, i mbiya ele Dok kaŋ ge mojo̰o̰ Yohana hate na nda ge ame hateya ma go pe gyana de. 2Jan num go: Sok ge ḛ ɗege kaɗe a̰me, ḛ jin̰a go:

Baa!

N̰a mo dḭḭl ne ka harcal,

N̰a momuluk ne mbo ya!

3Ho̰ i kaŋ zam mà ge mbyaɗ dwam,

4Pore i sone ma. A fareba, i sḛ ma waɗme,

I pore nda ge kee i n̰aal ma mbe go.

N̰a i deɗ ge pe heeya zì to.

Ndu ge kee kaɗeya seɗ seɗ

Mat 7.7-11; 15.22-28; Luk 18.1-8; Jak 1.5-7; 1Yo 5.14-15

5Gwan jan num go iya: A huɗi ne ge ḛ buwal zì, ge wa mbo ge na kondore ge wa kag ta yà ɗaal ga̰a̰l zì ndwa ele ne go: Kondore, mbi ɓyare dupḛ taa ge mo tok go, 6ndwa go mbi kondore a̰me ɗu mbo mbi gɔswal ya ne, mbi a̰me ge hon ne zamma to. 7Mà kaɗɗa go, ne kondore mbe gwan ge ne janna ja ge zok zì ya go: Mbiya mbi sḛ go to, mbi feɗ zok wa ja digi, i ge mbi van ma fii ya se, mbi daa gwan ɗege digi hon mo dupḛ to. 8Ḛ kuwa, mbi jan ḛ ne no, ndu mbe ɗege digi mà hon ne dupḛ mbe ma, ge ne no na kondore pe to, ɗaŋɗe, mà ɗege digi hon ne num peɗ, ge wanna ge ne wa̰a̰ tene deŋel pe.

9Go no, mbi jan ḛ go: Ḛ ele kaŋ ge ḛ ɓyare, Dok mbo hon ḛ ne. Ḛ ɓyare, ḛ mbo seɗ me. Ḛ dabe zok wa, Dok mbo hage ḛ ne. 10Ago ndu ge diige ge ele a̰me, àa hon ne ne hon. Ndu ge ɓyare a̰me, seɗ ne seɗ. Ndu ge dabe zok wa, àa hage ne ne hage. 11A huɗi ne ge ḛ buwal zì, ge ne van wa ele ne [dupḛ ɗoo, wa mbo hon ne njal de?] Kaɗɗa na ele ne sini ɗoo, wa ɔwabe bwam hon ne, ge go na ho̰ ne sini de? 12Koo ele ne baare fà̰a̰ ɗoo, wa mbo hon ne ndecege de? 13Kaɗɗa ḛ ge sone gene mbe ma no, ḛ kuwa kaŋ ge kwaɗa ma hon ḛ van ma kuwa, kee mà pe gyana, ḛ Ba ge kaa no pḭḭ ma zì yà dee wa mbo kuri nda ge ele na On̰om ge harcal ma de.

Pool ge Zeso ne mbo ge dii ya de?

Mat 12.22-45; Mrk 3.22-30

14Dwam a̰me ɗu, Zeso mbo ya yan on̰om ge sone ge taa ndu a̰me ɗel se. Sok ge on̰om ge sone wuwa zum go, ndu mbe ɗege faa wa, ɓase ge kaa sok mbe go ma ka kee ajab. 15Ɗaŋɗe, a̰me ma ka janna go: A Belzebul#11.15 Belzebul, ga̰a̰l ge on̰om ge sone ma way ne, kaɗ Saytan dḭḭl ge ɗogle me., ga̰a̰l ge on̰om ge sone ma way hon ne pool ge yan on̰om ge sone ma ne. 16Ge ɗogle ma me ɗe, sok ɓyare vin̰a ge hee ne pe ge fare go, àa ele ne, ne kê kaŋ ngayya a̰me ɗu ge ngay go ne pool mbe mbo ge Dok ta ya. 17Ajo̰o̰ na ka kuwa num dwaɗɗa ma kuwa, jan num go: Muluk ge diige, ge ne nda ma kee ta ho̰o̰l ge ta ta buwal zì burmi gezi, ge go zok ge àa sḭḭ ma gaa gul ge ta pe ya me. 18Mà kaɗɗa Saytan nda ma ho̰o̰l ta ta buwal zì no, kee pe gyana ne muluk mbe mà gwan mḛḛ digi de? Mbi jan ano mbe ndwa ge dape, ḛ jan go Belzebul hon mbi pool ge yan on̰om ge sone ma ne. 19Kaɗɗa na mbe go ɗe, nda ge no ḛ pe go ma sḛ seɗ pool ge yan on̰om ge sone ma ge huɗi ta de? A ge pe, num kaŋ keeya ma ngay no go, ḛ fare janna mbe ma ge maa vin̰a go to. 20Ɗaŋɗe, kaɗɗa ne ge tok pool ge Dok ne ɗoo, mbi yan on̰om ge sone ma no ɗe, Dok kee muluk go ge sego ḛ buwal zì.

21Sok ge ndu a̰me ge pool, ge no ge kaŋ twam mbyaɗ tene koy na sok, a̰me ge mbo ya dabe ne kaŋ gan ma to. 22Ɗaŋɗe, kaɗɗa ndu ge waɗe ne ge pool mbo ja deɗ ne, waɗe ge ne pagal, ɔwabe ne kaŋ walam ge isi ge num pagal mbe ma mɔɗwag, vaa na nda ge na pe go ma kaŋ paal ge na harge num ge ne tok go ma me.

23Kaɗɗa ndu sal tèmel ge mbi kee, a ho̰o̰l ge mbi, ndu ge ɓan nda duwana ma pagal digi dagre ge mbi to, ɓasare se num.

Yal ge ndu ge gwan sone zì seɗ ne

24Sok ge on̰om ge sone ndage zum ge ndu zì ya, aa babur pul nanna na pagal, ndwa ɓyare sok ge ɗwabe tene. Sok ge seɗ sok to, jan tene go: Mbi gwan ge sok ge mbi mbô no ge ne ya. 25Sok ge gwan-na, seɗ ndu mbe ge mojo̰o̰ zok ge pul pella kɔn̰al ɗaɗaŋ go, kaŋ ma nuusiya kwaɗa, 26ago, ne guwa̰ mbo ɔwabe na ka̰a̰m ge sone waɗe na ma ya ɓỳala, àa ge num ɓan-na mbo kaɗ ɗagleya ge ndu mbe zì. Go mbe no, kàɗɗa ge ndu mbe ne ge guwa̰ go ge, kaɗ sone kakatag waɗe ne kàɗɗa ge wal.

27Sok ge Zeso ka jan fare mbe go ɗe, gwale a̰me ndage na ka̰a̰l ge nda ge ɓase ma buwal zì ya, jan ne go: Ndu gwale mbe ge ḭḭ mo emel, ge wuwa mo ge na pam, a ge laa saal ɗaŋ! 28Ɗaŋɗe, Zeso gwan ge ne janna go: Mo jan daa vare zoo go nda ge za̰a̰ Fare ge Dok ne ma, àa ka mboya ne pagal ma, num ne ge laa saal me kade!

Zeso kuri nda ge ele kaŋ ngayya ma

Mat 12.38-42

29Ajo̰o̰ ɓase ma ka mbwaɗɗa lulum Zeso pe go, ɗege jan num go: Doŋ pe ge màno mbe doŋ pe ge sone ne. Ɓyare kaŋ a̰me ɗu ge ngay tok pool ge Dok ne, ɗaŋɗe, Dok gaa ngay num ɗeŋew kaŋ ngayya ge kê ndu ge zwagre na wa Jonas ne, be a̰me ge ɗogle to. 30Ago, Jonas#11.30 Kaŋ ngayya ge Jonas ne sḭḭ go, ne kee dwam taa sini laa zì, Zeso mbo kee dwam taa ge tàal zì me. kaa kaŋ ngayya ge nda ge suwal ga̰a̰l Niniv ma pe, Van ge Ndu ne mbo kaɗ kaŋ ngayya a̰me ne ɗu, ge nda ge doŋ pe mbe ge màno ma pe waɗme. 31Ge del ge kale zḛḛ ya ma go, gan ga̰a̰l ge gwale ge lee ham ya ge, ɗege dee ge suwa wa aa ndegeɗe ma ya, mbo ya za̰a̰ fare andaŋ ge ka waɗ ge gan ga̰a̰l Salomo̰ wa zì ma no. Zane no ndu ge waɗe Salomo̰ gale no go go no, ḛ za̰a̰ ne go to. A ge pe, dwam ge Dok dee ɗege ya kun sariya, gan ga̰a̰l ge gwale mbe kan fare ge nda ge doŋ pe mbe ge màno ma pagal. 32Go mbe waɗme, ge dwam kun sariya go, nda ge suwal ga̰a̰l Niniv ma mbo kan fare ge nda ge doŋ pe ge màno mbe ma pagal, ndwa go maa seŋe ta se sok za̰a̰ fare ge ndu ge zwagre Dok wa Jonas dee oy maa ne go. Ge sego, mbi jan ḛ go, ndu ge waɗe Jonas gale no go go no, num vin seŋe ta se go to.

Fare sḭḭ ge lampe ne

Mat 5.15; 6.22-23

33Ndu a̰me ge dun lampe digi go ɗoo, wa mbo way koo mbo kubi ne sòo zì go de. Ee ne vare zoo ge kaŋ ee lampe pe digi, ndwa go nda ge waɗ-ɗa zok zì ma ndwa kuwa sok kɔn̰al. 34Mo ndwa ma ge mojo̰o̰ lampe go ge mo sḛ duul pe. Sok ge mo ndwa ma gale kaɗ pool, mo sḛ duul mɔɗwag kaɗ kɔn̰al go waɗme. Ɗaŋɗe, kaɗɗa go àa tuguɗi, mo sḛ duul waɗme a ge tṵṵ ge ɗeɗeg zì. 35Koy tene kwaɗa, ne kaa ge tṵṵ ge ɗeɗeg laa kɔn̰al ge no mo ta se to. 36Kaɗɗa mo sḛ duul mɔɗwag ge kɔn̰al go, be ge mo lee a̰me ɗu kaɗ ge tṵṵ ge ɗeɗeg zì to, mo sḛ duul mbo kaɗ kɔn̰al mɔɗwag, dinna ge lampe hon mo kɔn̰al go.

Zeso mḛḛre nda ge hate eeya ge Moyiz ne ma

Mat 23.1-36

37Zeso sok jan fare go gale, Farisi a̰me ɗu tol ne, maa mbo na yà zam kaŋ zam ge gyala. Mbo ge ne yà, a ge ne ɓan zam kaŋ zam dagre. 38Sok ge Farisi mbe see go ne za kaŋ zam be usi na tok ge nda kee ya day go to, fare mbe kee ne ajab. 39Ɗaŋɗe, Bagezok kuwa ne dwaɗɗa mbe jan ne go: Ḛ Farisi ma ɗe, ḛ usi gezi seɗe mage sufra guwa̰ ɗag ɗoo, ḛ dul wa ma kaɗ pella zì cocwag ge dwaɗɗa ge sone ma, ḛ kaɗ laa pisil me ɗe. 40Nda ge fare kuwaya hoɗege num ma! Ḛ daa kee fare ma gyana ge mojo̰o̰, ndu mbe ge kê kaŋ ge nè kuwa num no ma, be kee ndu duwana dul wa ne waɗme to go de? 41Ḛ mbaa vare zoo nda ge a̰se ma be tumriya ge ḛ dul wa ma zì, go mbe no, kaŋ ma mbo kaɗ kɔn̰al ge ḛ pe.

42Woo ge ḛ ḛ! Farisi ma! Ḛ hon ḛ kaŋ wa ge be fare pe to ge ḛ gaaso ne ge mojo̰o̰ gefere mage ɗeme ndwa go ma go ɓame, zane no, ḛ vyale kaŋ ge ḛ mbiya kee num ge temel taɗ mage laa wan Dok ya go. A kaŋ ge ḛ mbiya kee num ma ne, be ḛ vyale gegene ge gaa ma to me. 43Woo ge ḛ ḛ, Farisi ma! Ḛ laa wa̰a̰ sok kàɗɗa ge nda ndwa zḛḛge ma, ge zok kee kaɗeya ge Yahuɗ ma way ma zì mage wa sanna ge hormo ma ge sok ɓase ma go me. 44Woo ge ḛ ḛ! Ḛ dinna ge sḭḭ ge ndu mbyaɗ kuwa kaŋ ge ne pul zige to go, nda ka anna num pagal be wan pe to.

45 Ndu ge hate eeya ge Moyiz ne a̰me ɗu, hee fare, jan Zeso go: Ba ge hateya, ge mo fare janna mbe ma zì, mo daa luguy go i no waɗme ba! 46Zeso gwan ge ne janna go: Woo ge ḛ ḛ waɗme, ḛ mbe ge hate eeya ge Moyiz ne ma! Ḛ ee dṵṵl ge neneg#11.46 Dṵṵl ge neneg ma, àa eeya mbe ge nda ge hate eeya ge Moyiz ne ma zuli num se njaŋen̰ ma. ma nda duwana ma pagal gḛḛ, a̰me ge ḛ kee ne no go ge mbaa num in dṵṵl mbe ma to peɗ. 47Woo ge ḛ ḛ! Ḛ sin nda ge zwagre Dok wa ma sḭḭ ge siŋli ma, num sḛ mbe ma ḛ baŋ ma sḛ hṵṵ num ne me. 48Ano mbe no, ḛ ngay go go, ḛ wa dagre ge ḛ baŋ ma. Num sḛ ma hṵṵ nda ge zwagre Dok wa ma hun, ḛ me ɗe, ḛ sḭḭ#11.48 Ngay go, nda ge gwase mbe ge sin sḭḭ mage maa baŋ ma, kaŋ keeya ma sok ge ɗu go. num sḭḭ ma no me! 49Ge andaŋ ge na ne zì, Dok jin̰a fare ḛ pagal no go: Mbi mbo teme num nda ge zwagre mbi wa mage mbi nda ge temeya ma ya, àa mbo hun a̰me ma, àa kee ge cùb ma yal me. 50A ge pe no, swàm ge nda ge zwagre Dok wa ma way ma peɗ ge kan no se ge dunin̰a pe dolla ya day, mbo kaɗ num mbe ge doŋ pe ge màno ma pagal. 51Ge swàm ge Abel ne ya day, ɗiŋ deɗ-ɗa ge swàm ge Zakari ne go, ne ge àa hṵṵ ne ge sok ge harcal mage twal tuwaleya buwal zì. A fareba go Dok mbo ele num swàm ge doŋ pe mbe no tok go.

52Woo ge ḛ ḛ nda ge hate eeya ge Moyiz ne ma! Ḛ dibi vin̰a ge tyan nda ndwa ge kuwaya ta ya digi, ḛ sḛ ma daa hee vin̰a mbe to me no, ḛ tele nda ge ɓyare hee vin̰a mbe ma ya me.

53Sok ge wuwa ya zum ge Farisi mbe zok diŋ ya, nda ge hate eeya ge Moyiz ne mage Farisi ma laa vḛḛne ge ne ta, àa ɗege ele ne fare ma se batraŋ, 54ndwa ɓyare vin̰a ge wan ne ge fare, ge fare ge ndage ge ne wa zige ma ta.

Valgt i Øjeblikket:

Luk 11: kiaGRB

Markering

Del

Kopiér