Luk 12

Mḛḛreya ge nda ge ndil ta kee Dok gḛḛ ma pe

Mat 6.12; 10.16-39

1Guwa̰ ge fare mbe ma way go, ɓase ma nɔseya nɔnɔg ge be isiya to, àa mbo ya yagle ta digi, ge go ndu seɗ vin̰a ge on̰n̰a to. Zeso ee pe ge na nda ge ame hateya ma guy, jan num go: Ḛ koy ta kwaɗa, ge kaŋ keeya ge Farisi mbe ge mbuɗi nda ndwa ma ta, ge num kaŋ keeya mbe ge zwage nda ge mojo̰o̰ jìn̰al hore ɗege kaŋ go ma ta me. 2Ago, kaŋ a̰me ge way no ge sego ma peɗ, nda mbo kuwa num. Kaŋ ge kee ɗimil zì ma, nda mbo kuwa num benna kɔn̰al. 3Go mbe no, fare ge ḛ mbo faa num ya ge nda ndwa go to ma, nda mbo za̰a̰ num gyala ɗeɗel. Fare ge ḛ mbo wuwase ta num ya wuwase ge piyal-la ma, nda mbo sun num tuŋ.

Ndu ge mbiya nda chiya ne voo

4Mbi jan fare mbe no ḛ, mbi kondore ma: Ḛ kaa ge be chiya nda duwana ge hun sḛ duul ma voo to, guwa̰ go, àa gwan kee a̰me ge waɗeya sḛ to peɗ. 5Mbi ɓyare tyan ḛ pagal gezi go, ndu ge mbiya ḛ chiya ne voo no: Ḛ chiya voo Dok, guwa̰ ge ndage ndu on̰om go, a ge pool ge gwan dol ne ge sok njoɗ yal zì yà. Mbi jan ḛ go, ḛ chiya voo Ne. 6Ḛ kuwa kuwa go, nda yaɗ njoole ban gezi har go nuwan̰ ge silay zi pe bàba to de? Go no puy, ɗu vyale gezi to, Dok ndwa fà̰a̰ num pagal mɔɗwag. 7Koo susu ge no ḛ pagal digi ma, Dok kuwa kuwa go num go gyana ga de. Ḛ chiya voo to ɗaŋ! Ge Dok ta, ḛ waɗe njoole ban ge gḛḛ ceɗeɗ mbe ma waɗe.

Wa eeya ge Ndu ge Dok taa ne pe

8Mbi jan ḛ go iya, ndu ge diige ge mbo wan na wa ya ngangaɗ ge nda duwana ma ndwa se go, na ge ambi ne, Van ge Ndu ne mbo jan zum waŋ waɗme ge malayka ge Dok ne ma ndwa se go, ne ge na nee ne. 9Ɗaŋɗe, ndu ge mbo jan-na nda duwana ma ndwa se go, na kuwa mbi to, Van ge Ndu ne, mbo jan ge malayka ge Dok ne ma ndwa se go, ne ge na ne nee to waɗme. 10Ndu ge diige, ge mbo kaɗ-ɗa ka vḛḛne Van ge Ndu ne dḭḭl, àa mbo pore ne, ɗaŋɗe, ndu ge mbo jan fare ge sone kakatag ya ge On̰om ge Harcal pagal, mbo seɗ poreya to. 11Sok ge àa mbo gene ḛ ya ge zok kee kaɗeya ge Yahuɗ ma way ma zì, ge ga̰a̰l ge kun sariya mage nda ga̰a̰l ma ndwa se yà, ḛ iigi ta ge fare ge ḛ mà mbo ya mbo faaya, ndwa ben ta ge fare zì pe to. 12Ago On̰om ge Harcal mbo hon ḛ ge sok mbe go gaw, fare ge mbiya ḛ faa num ma.

Fare sḭḭ ge ndu ge seɗ kaŋ ge dàle ne

13Ndu a̰me ge ɓase ma buwal zì ya, jan Zeso go: Ba ge hateya, jin̰a mbi na̰ van ge son go, ne va i kaŋ joo ma se nde no de! 14Gwan ge ndu mbe fare janna go: Kondore, a huɗi ho̰ mbi vin̰a ge kun ḛ sariya koo vaa ḛ kaŋ joo ma ne de? 15Guwa̰, jan ɓase mbe ma go: Nà! Ḛ koy ta kwaɗa ge aham ge kaŋ seɗɗa ma way ma ta, ago, a be ge mo kaŋ seɗɗa ge gḛḛ ma ta ɗoo, wa ee mo mbo kaɗ ge ndwa to.

16Sok mbe go kee num fare sḭḭ a̰me ɗu go: Ndu ge seɗ kaŋ a̰me ɗu, ne kaŋ kyarga ma see ne kaŋ zam gḛḛ. 17Ka dwaɗɗa, ele tene go: Sok ge mbi wa kwate mbi kaŋ zam go to me ɗaŋ-noo, mbi sḛ kee gyana de? 18Jan tene go, mbi kuwa kaŋ ge mbi keeya ya no: Mbi mbo gul mbi hal ma se, mbi sin ge ga̰a̰l waɗeya ma, mbi wa kwate mbi geme mage mbi kaŋ kwaɗa ge mbi see ge ɗogle ma se me. 19Mbi mbo jan tene go: A huɗi ndu ne, mo ge kaŋ seɗɗa ma gḛḛ, ge àa ee no digi ge mo pe, in mo del ma gḛḛ, ɗigli tene, za, njoo, an̰. 20Ɗaŋɗe, Dok jan ne go: Ndu ge fare kuwaya hoɗege ne! Ge ɗaal mbe no zì bàba, àa mà hee mo on̰om. O̰o̰, mo mbo n̰aa kaŋ ge mo kwate num mbe ma huɗi de? 21Zeso gwan jan num go iya: A mbe go no ca, ge ndu ge kwate kaŋ gan ma ge na sḛ pe, ge Dok ndil num no ge a̰me ma to boo go.

Kaŋ ge mbiya ndu ee na jobreya ge ne pe

Mat 6.19-34

22Guwa̰ go, Zeso jan na nda ge ame hateya ma go: «A ge pe, mbi jan ḛ no go: Ne kaa ge ḛ iigi ta ge kaŋ ge mbiya ḛ zamma mage njoɗɗa pe ɗoo, ḛ wa mbo kaɗ ge ndwa to, koo ge ba̰a̰ ge ḛ laa ḛ pe pe to me.» 23Ago, kàɗɗa ge ndwa waɗe kaŋ zam waɗe, sḛ duul waɗe ba̰a̰ waɗe me. 24Ḛ doo ḛ ndwa ge ga̰a̰ ma pagal ndilla gale: Àa zare kaŋ rusu to, àa syaɗ a̰me to me, num sok koy kaŋ koo hal to, ano peɗ puy, Dok ka wal num ba. Gyana ga ge ḛ waɗe njoole ma no go de! 25A huɗi ne ge ḛ buwal zì, sok iigi tene go ɗoo, wa seɗ vin̰a ge dol dwam ya koo ɗu ge dwam kàɗɗa ge Dok ho̰ na num ma pagal de? 26Kaɗɗa ḛ mbyaɗ a̰me pe go fyalag ge kee kaŋ ge hoɗege guwa mbe no to ɗe, ge dape ḛ wa gwan ka iigi ta ge fare ge ɗogle ma pe de? 27Ḛ kuwa buu ge don no ge ful zì ma wa folla ma kale gale! Àa kee tèmel to me no, àa paare ba̰a̰ to me, go no puy ɗe mbi jan ḛ go koo gan ga̰a̰l Salomo̰ sḛ ge na pagal, ge kaŋ kwaɗa ge na no ge num ma peɗ puy, be kan ba̰a̰ ge siŋli dinna ge a̰me ɗu ge num buwal zige wa folla go to. 28Kaɗɗa Dok nuusi buu ge don no ful zì ma siŋli mbe go, num ge nè kuwa num màno ma, kin̰are àa goole num kan ol zì, laa ḛ pe walay mà ndwa gyana ga de, nda ge hoɗ fareba hoɗege guwa ma? 29Ḛ sḛ ma waɗme, ḛ iigi ta sok ɓyare kaŋ ge ḛ mà mbo zamma, koo kaŋ ge ḛ mà mbo njoɗɗa pe to me. 30Ago, kaŋ mbe ma no peɗ, a nda ge kuwa Dok to ge no dunin̰a zì ma iigi ta ne sok ɓyare num pe go. Ḛ Ba kuwa kuwa go ḛ ɓyare kaŋ mbe ma ɓyare waɗme. 31Ḛ yin̰a vare zoo ne muluk pe, mbo hon ḛ kaŋ ge ḛ ɓyare num ma kon pagal.

32Ḛ chiya voo to, ḛ ge no ge mojo̰o̰ vwag kaŋ kogor ge hoɗege guwa ma go, ago, ḛ Ba ndi kwaɗa go na gene ḛ muluk ge na ne zi yà. 33Ḛ yiya ḛ kaŋ kwaɗa ma gezi, ḛ ho̰ num bware mbe a̰se ma bobo. Ḛ nuusi ta kaŋ kan bware ge pe day zuɗɗa to ma, ḛ kwate kaŋ gan ge be aaya to ma, ge pḭḭ ma zì yà, sok ge chala ma dale yà go to koo buli ge vḛḛne kaŋ ma to me. 34Ago sok ge ḛ kaŋ gan ma no ne go, ḛ dwaɗɗa ma mɔɗwag gaa sok mbe yà waɗme.

Kaɗɗa jejew da̰a̰re Bagezok

Mat 24.42-51; Mrk 13.33-37

35Ḛ kaa ge ba̰a̰ tèmel ma ḛ ta, ɓyare go ḛ lampe ma ka digi dunna me. 36Ɓyare go ḛ kaŋ keeya ma kaa ge mojo̰o̰ dore ge da̰a̰re maa ba ge zok ma go, ge mà seŋe ja ge sok vḛḛso sanna ya, ndwa hage ne zok wa gaw, sok ge mà dabe zok wa ya go. 37Ndu ge tèmel mbe mà kee laa saal, sok gwanna ge num ba ge zok ne ya, kaɗɗa na see num kàɗɗa ge ndwa ɗaŋ! Fareba mbi jan ḛ ne no, num ndu ge zok mbe eya kan ba̰a̰ tèmel ne, hon num sok kàɗɗa, wa gaa vaa ndu ge diige kaŋ zam. 38Àa mbo kee laa saal, kaɗɗa na yan ja seɗ num ɗaal ga̰a̰l koo lee aaram pagal ge ndwa mbe go!

39Ḛ kuwa ano mbe kwaɗa, daa go ndu ge zok ge kuwaya go chala mà mbo ya ler gene go ga, daa mà kaɗ ge na ndwa, n̰a na zok àa zuɗ ne to me. 40Ḛ sḛ ma waɗme, ḛ kaa jejew, ago Van ge Ndu ne mbo mbo ya ge ler ge ḛ dwaɗ ge ne pagal to go.

41Piyer jan ne go: Bagezok, mo kee fare sḭḭ mbe ge i pagal ɗeŋew koo a ge nda pe peɗ de? 42Zeso gwan ge ne janna go: Mà kaɗɗa go ndu ge koy kaŋ ge n̰a wa to, gwan kaɗ ndwa ndaa go no, ne ndu ge zok mbo ee ne na ka̰a̰m ge tèmel ma pagal, ndwa go ne ka vaa num kaŋ ge mbiya ge dwam pe to de? 43Laa saal go ge ndu ge tèmel mbe pe, dwam gwanna ge ne ndu ge zok ne ya, kaɗɗa na seɗ ne ya tèmel ta keeya mbe go! 44Fareba mbi jan ḛ ne no, mbo ee ne, ne gaa na kaŋ kwaɗa ma wa go ne peɗ. 45Ɗaŋɗe, kaɗɗa ne ndu ge tèmel mbe dwaɗɗa na dul wa zì go: Mbi ndu ge zok pagal gale wanna go wan na sok mbe ya, kaɗɗa mà ɗege ya iyal na ka̰a̰m ge soɗob mage zaab ge tèmel ma, ka an̰n̰a ge kaŋ zam, ka buyya ge jin̰al no, 46ne ndu ge zok mbe mà mbo ja tan ne tugcug ge dwam mage ler ge ne sḛ dwaɗ ne pagal to go, mbo njaa ne mamaɗ, ɓan za̰a̰ yal ge nda ge mbô eeya ge Dok ne pagal to ma dagre. 47Ndu ge tèmel mbe ge kuwa laa ɓyareya ge na ndu ge zok ne ma, ɗaŋɗe, nuusi a̰me koo kee kaŋ ge ne ɓyare mbe ma to, mbo seɗ iyalla ge gḛḛ. 48Kaɗɗa ge dore ge kuwa laa ɓyareya ge na ndu ge zok ne ma to ɗoo, kee kaŋ ge mbiya seɗ mḛḛreya num pagal ma, mbo seɗ iyalla hoɗege guwa. Ndu ge Dok hon ne gḛḛ, mbo ɓyare ge ne ta gḛḛ me, ndu ge Dok ee ne kaŋ ge gḛḛ ma pagal, mbo ele kaŋ gḛḛ waɗeya ge ne ta waɗme.

Zeso gene ya caɗeya

Mat 10.34-42

49Zeso jan ɓase ma go: Mbi mbo ya dun ol suwa pagal. Mbi ɓyare go go ne dṵṵ ge sego. 50Mbi ɓyare mbo waɗ yal njoɗɗa zì ge mojo̰o̰ àa waɗ nda mam se kee nda baptem go. Mbi ge iigiya zì ɗiŋ ge go ne dee ya. 51Ḛ dwaɗ go mbi gene ya halas ge suwa pagal de? To baɗ, mbi jan ḛ ne no, a caɗeya ne vare zoo. 52Ago a gaa mbo zḛḛ no, nda nuwan̰ ge zok ge ɗu diŋ, àa mbo caɗe se. Nda ge taa ma mbo kaɗ ho̰o̰l ge nda ge zi ma. 53Ba mbo kaɗ ho̰o̰l ge na van, van mbo kaɗ ho̰o̰l ge na ba me. Na̰ mbo kaɗ ho̰o̰l ge na van ge gwale, van ge gwale kaɗ ho̰o̰l ge na na̰. Van son na̰ mbo kaɗ ho̰o̰l ge na tisi, ne van gwale kaɗ ho̰o̰l ge ne.

54Zeso jan ɓase ma waɗme go: Sok ge ḛ kuwa pḭḭ mbeeya ge lee kuu ya, ḛ jan gaw go: Mam mà suwa, mbo ya kee mbe go tem. 55Sok ge ḛ kuwa sa̰a̰m ɗege kwalla ge ham ya, ḛ ka janna go: Sok mà zale, mbo ya kee mbe go tem. 56Nda ge mbuɗi nda ndwa ma! Ḛ kuwa kaŋ ge ɓyare keeya suwa pagal mage pḭḭ digi ma buwal vaaya kuwa ɗag, ge dape ḛ wa wan kaŋ ge kee màno ge sego ma buwal vaaya to de?

57Ge dape, ḛ sḛ ma ge ḛ pagal, ḛ wa mbyaɗ vaa kaŋ ge mbiya ḛ keeya ge temel ma buwal to de? 58Sok ge ḛ ge mo kon ge huur kaɗ ge fare ge ee ne mbo ge mo nda ge kun sariya ma ndwa se yà, ɓyare vin̰a ge ḛ eyal ta buwal zḛḛ be ge go ḛ dee yà, ne kaa ge go ne gene mo ge ba ge kun sariya ndwa se yà to, ba ge kun sariya ne ɓin̰a mo ge asagar ma ga̰a̰l tok zì, asagar ma ga̰a̰l me, ne dibi mo ge daŋay zì to me. 59Mbi jan mo ne no, mo mbo waɗ-ɗa zum to ge sok mbe zì ya, be ge mo poɗ bware mbe ge no mo pagal papandaŋ to.

Valgt i Øjeblikket:

Luk 12: kiaGRB

Markering

Del

Kopiér