Luk 10

Tèmel mboya ge nda ge ame hateyage warɓỳala ma way

Mat 10.7-16

1Guwa̰ ge fare mbe ma way go, Bagezok gwan twaɗ nda ge temeya ge ɗogle ma ta warɓỳala#10.1 Ge Baybul ge àa zwagre num a̰me ma zì ɗe, àa njaŋe zì warɓỳala pɔgwa zi., ka teme num kakab ge na ndwa zḛḛ yà, ge suwal ga̰a̰l ge diige diŋ peɗ, sok ge diige go peɗ ge ne sḛ mbiya mbo num go ma. 2Jan num go: Tèmel ge siyal ne danjan̰, ɗaŋɗe, nda ge kee tèmel ma hoɗege. Ḛ kaɗe Ba ge kan na siyal ɗaŋ, ne teme nda ge tèmel ma ge gaaso zì yà. 3Ḛ mbo, ḛ kaa ge kuwaya go, mbi teme ḛ no ɗe, ḛ dinna ge tame van ge waɗ ge bagomso ma buwal zì yà ma go. 4Ḛ hee bware ge ḛ patar ma zì to, ḛ hee galam ge mbo gɔswal, koo tyako ma ḛ tok-ga to, ḛ mḛḛ se bàŋ tata san ndu a̰me wa ge vin̰a zì to me. 5Ge zok a̰me ge ḛ mbo kaɗ-ɗa ka waɗ num diŋ ma, ḛ ee pe jan zḛḛ go: Halas ne kaa ge zok no diŋ. 6Kaɗɗa ndu a̰me ge yan halas pe ge zok mbe diŋ ɗe, halas ge ḛ gene ya mbe kee tèmel ge ne dul wa zì. Kaɗɗa go to, ḛ wa guwa̰ ya ḛ pagal. 7Ḛ kaa ge zok mbe diŋ, ḛ zam kaŋ zam ge àa mbo kaɗ-ɗa ka hon ḛ ma. Ago ndu ge kee tèmel mbiya seɗ poɗɗa ge na tèmel ge na kee pagal tem. Ḛ kaa ge be zwagre ta lee gene me-lee gene me to. 8Sok ge ḛ waɗ-ɗa ge suwal ga̰a̰l a̰me ge diige diŋ, kaɗɗa nda ge suwal ma ame ḛ ya, kaŋ zam ge àa hon ḛ ya ma, ḛ za num. 9Ḛ zo̰o̰ nda ge tuguɗi ge suwal ga̰a̰l mbe diŋ-ge ma, ḛ ka jan num go: Sok ge Dok mbo ya kee muluk ḛ pagal mbyaɗ-ɗa go. 10Ɗaŋɗe, sok ge ḛ waɗ-ɗa suwal ga̰a̰l a̰me diŋ, kaɗɗa àa ame ḛ ya to, ḛ mbo ge sok seɗ ta ge ɓase ma way ma yà, ḛ jin̰a num go: 11«Koo kuci ge ḛ suwal ga̰a̰l ne ge i ko ta ma puy, i poy num ge ḛ pagal. Ɗaŋɗe, ḛ kaa ge kuwaya go, sok ge Dok kee muluk ḛ pagal mbyaɗ-ɗa go.» 12Mbi jan ḛ go, ge dwam ge Dok kun sariya ge nda duwana ma pagal go, dṵṵl ge yan̰a ge nda ge Sodom diŋ-ge ma pagal mbo kaɗ nde-nde waɗe ge num ge suwal ga̰a̰l mbe ne ma.

13Woo ge ḛ ḛ, nda ge suwal Korazḛ mage suwal Betsayda ma! Daa no go kaŋ ajab ge àa kê num mbe ma no, àa kê num ge nda ge suwal Tir mage Sido̰#10.13 Tir mage Sido̰ suwal ga̰a̰l ge rusu ge ɗogle ma way ne. diŋ-ge ma buwal zì, àa dee seŋe ta ja se ge maa sone keeya ma go, sok kan kacigri mage ɔwabe siyam kanna ge maa pagal digi go. 14Ge ano mbe no ta, ge dwam ge Dok kun sariya ge nda duwana ma pagal go, dṵṵl ge yan̰a ge àa mbo ee ne ya Tir mage Sido̰ pagal mbo kaɗ nde-nde waɗe ge ḛ ḛ. 15Ḛ ge suwal Kapernawom diŋ-ge ma! Ḛ dwaɗ go Dok mbo hee ḛ suwal pḭḭ digi ya caɗ de? To! Mbo ɓyan ḛ ɗiŋ ge sok kàɗɗa ge nda ge swày ma way se yà. 16Gwan jan na nda ge ame hateya ma go: Ndu ge kaɗɗa ka ame fare janna ge ḛ ḛ ma, ame mbi fare ma. Ndu kaɗɗa ka kuri fare janna ge ḛ ḛ ma, kuri mbi fare ma. Ndu ge kuri mbi fare ya, kuri Ba ge teme mbi ya me.

Gwanna ge nda ge temeya ge warɓỳala ma way ya

17Guwa̰, nda ge ame hateya ge warɓỳala ma gwan-na fereya ge laa saal, àa ka janna go: Bagezok-goo, on̰om ge sone ma puy, àa ka za̰a̰ i, sok ge i ka tol dḭḭl ge mo, sok hoɗ num i wa go. 18Jan num go: Mbi ka kuwa, sok mbe go Saytan deɗɗa ge pḭḭ zì ya dinna ge pḭḭ see go. 19Ḛ kuwa go, mbi ho̰ ḛ pool ge mbo ge bwam mage ndecege ma pagal, ge pool ge Ba ge ho̰o̰l ne ma pagal peɗ me. A̰me mbo kee ḛ yal to baɗ. 20Go no puy ɗe, ḛ kaa ge be kee laa saal go ḛ daa ho̰ on̰om ge sone ma wa ɗaa, num za̰a̰ ḛ no kade to, ɗaŋɗe, ḛ ke laa saal ge ḛ dḭḭl waɗ ja nda ge Dok ne ma way ma buwal zì ge pḭḭ zì yà pe.

Zeso ngay nda na Ba

Mat 11.25-27

21Ge sok mbe go gaw, On̰om ge Harcal huy Zeso ge laa saal, ɗege janna go: Mbi ke mo mersi Baa, Mo ɗu, ge kee muluk no pḭḭ zì yà, ge suwa pagal me. Ago, Mo way kaŋ keeya ge amo ma ge nda ge andaŋ mage nda ge no ge kuwaya ɗugul ma ndwa zḛḛ, mo din̰a num ya ge nda ge no ge mojo̰o̰ nda jabso go ma ta no. O̰o̰ Baa, kaŋ mbe ma kê go no ɗe, Mo ɓyare ne go num dee ya keeya mbe go.

22Mbi Ba n̰a fare ma mbi tok go mɔɗwag. Ndu a̰me ge wan pe go, Van no ne huɗi ne de to, a Baa ɗeŋew kuwa ano mbe ne, koo ndu a̰me ge wan pe go mbi Ba ne huɗi ne de to me, a Van ɗeŋew me no, ndu ge Van ɓyare tyan ne ndwa gezi ge na Ba ta me. 23Guwa̰ seŋe tene ge na nda ge ame hateya ma ta, faa fare mbe num sḛ ma ɗeŋew: «Laa saal a ge ḛ ge ndwa kuwa kaŋ mbe ge ḛ kuwa num ma no pe ɗaŋ!» 24Ago, mbi kee ḛ kuwaya go nda ge zwagre Dok wa mage gan ga̰a̰l ma gḛḛ kê ene kuwa kaŋ mbe ge ḛ kuwa num mbe ma no ma, àa be seɗ vin̰a to ba! Àa kê ene za̰a̰ fare mbe ge ḛ za̰a̰ num ma no, àa be seɗ vin̰a za̰a̰ num to me.

Fare sḭḭ ge ndu ge Samari ne ge ngay laa wanna

25Ḛ kuwa gale, sok ɓyare hee Zeso pe ge fare go, ndu ge hate eeya ge Moyiz ne a̰me ɗege digi, ele ne fare go: Ba ge hateya, a ma̰ kaŋ ge mbiya mbi kee nee ne ndwa hon mbi vin̰a ge mbo kaɗ ge ndwa ge ɗiŋ ge din ge Dok de? 26Zeso gwan ge ne eleya go: Njaŋe ge eeya ge Moyiz ne ma zì gyana de? Mo sḛ ya isi go da ma zoo de? 27Gwan ge Zeso janna, eeya ma jan go: «Mbiya mo laa wan mo Bagezok, Dok ge amo, ge mo dul wa mɔɗwag, ge mo sḛ mɔɗwag, ge mo pool mɔɗwag, mo dwaɗɗa mɔɗwag me. Mbiya mo laa wan mo ka̰a̰m, dinna ge mo laa wa̰a̰ tene go me.»#Dwa 6.5.#Lev 19.18. 28Zeso jan ne go: Mo guwa̰ fare vinna kwaɗa. Mo kaɗ-ɗa keeya mbe go, mo mbo kaɗ ge ndwa.

29Ɗaŋɗe, ndu ge hate eeya ge Moyiz ne mbe ɓyare ngayya go na fare eleya temel, ele Zeso go: «A huɗi ma mbiya kaɗ mbi ka̰a̰m ma ne de?» 30Zeso hee fare, jan ne go: Dwam a̰me go, ndu a̰me ɗege ge suwal ga̰a̰l Jerusalem diŋ ya, ndwa mbo Jeriko. Deɗ ge nda ge fiiri vin̰a ma tok zì, àa harge ne kaŋ ma ge ne tok go mɔɗwag, àa poɗ ne iyalla cɔcɔm, àa ee ne wa ge swày, àa mbo maa mboya. 31Ɗeɗ-ɗa go, ndu ge kee tuwaleya a̰me ɗu hee vin̰a mbe ya waɗme. Kuwa ndu mbe, coŋle vin̰a gezi yà. 32Ndu a̰me ɗu ge no rusu ge Levi#10.32 Nda ge wuwa no ge rusu ge Levi ne zì ma mbaa nda kee tèmel tuwaleya ma. Ndu ge kee tuwaleya me no, ndu ge no rusu ge Levi ne zì mage ndu ge àa tase ne cɔcɔm Yahuɗ ma ne taa mɔɗwag. ne zì, deɗ-ɗa ge sok mbe go waɗme, kuwa ne, coŋle vin̰a gezi yà. 33Ɗaŋɗe, ndu ge no suwa ge Samari ne go a̰me ɗu, ge ka mbo gɔswal, deɗ-ɗa ge sok mbe go, kuwa ndu mbe, ngay kuwa a̰se ge na ne ge ne ta gḛḛ maam to. 34Mbo ya ne ta zì guwa, kan nùm mage on̰or jìn̰al ge ne jwaŋ ma wa zì, taa num zì. Guwa̰ go, ee ne ge na kwar pagal, gene ne mbo ge zok ge gɔswal ma way zì yà, hee ne dṵṵl ma ge na pagal. 35Sok yan kin̰are, hon ga̰a̰l ge zok gɔswal ne bware ge tèmel dwam zi ne, jan ne go: Koy ndu mbe kwaɗa, kaɗɗa kaŋ ge mo mà kee ya ge ne, kale ya ge bware ge mbi ho̰ mo pagal puy ɗe, mbi mbo poɗ mo ne, sok ge mbi mbo seŋe ja.

36Zeso gwan ele ne go: Ge nda ge taa mbe ma buwal zì, mo dwaɗ go ne ge diige ndi ndu mbe ge chala ma tase cɔcɔm ne ge na sḛ go de? 37Gwan ge ne janna go: A ba mbe ge kuwa ndu mbe a̰se. Zeso jan ne go: Mo sḛ waɗme, mbo, mo gaa keeya mbe go.

Marta mage Mari ame Zeso maa diŋ

38Zeso mage na nda ge ame hateya ma sok mboya go gale, àa waɗ-ɗa ge suwal jiyale a̰me diŋ, gwale a̰me ɗu ge àa ka tol ne Marta ame ne ge na diŋ. 39Ne na̰ van ge gwale a̰me kaa ɗu, ge àa ka tol ne Mari, mbo ya kaɗ ge Bagezok ko pul se, ame hateya ge ne ne ma. 40Tèmel ge zok diŋ-ge ma mbo ya hee Marta sok ma mɔɗwag. Seɗ vin̰a hoɗege guwa, ge mbo ya Zeso ta, jan ne go: Bagezok-goo, Mo dwaɗ gyana ge mbi na̰ van swaɗɗa ge swaɗ mbi ya kaŋ zam ta keeya no de? Jin̰a ne, ne mbo ya mbaa mbi ɗaŋ. 41Bagezok gwan ne janna go: Mo Marta, tèmel ge gḛḛ ceɗeɗ mbe ma iigi mo ya digi, mo za̰a̰ yal gḛḛ ge num pe no. 42Zane no, tèmel ge mbiya melaw ɗu, Mari taa lee ge kwaɗa, ge ndu mbo mbyaɗ ame ne gezi ge ne tok go to.

Valgt i Øjeblikket:

Luk 10: kiaGRB

Markering

Del

Kopiér