यूहन्ना 19
19
कोड़ा लगवांण अर मजाक उड़ाण
1यां पर पिलातुस ल सिपैयूं तैं आज्ञा दे के, की यीशु तैं लिजा अर वे पर कोड़ा मारा। 2सिपैयूं ल यीशु तैं बैंगनी जु शाही कपड़ा छा पैरेनि जन राजा पैरदो अर वेको ठट्टा कैरी अर झिबलांण कु मुगट बूणि कै वेका मुंड मा रखि 3अर इन बोलि के यीशु तैं प्रणाम कन लगि गैनी “हे यहूदियों का राजा प्रणाम” इन बोलि के वे तैं छकड़ भि मरिनि। 4तब पिलातुस ल फिर भैर ऐ के लुखुं मा बोलि, “देखा मि वे तैं फिर तुमारा संमणी भैर लांदु इलै कि तुम तैं जांणि सक्यां कि मि वेमा कुई भंगार नि दिखणु छौं।”
सूली पर चढ़ौणु कु सौंपण
5तब यीशु कांडों कु मुकुट अर बैंगनी कपड़ा पैरी के भैर लैनि अर पिलातुस न ऊंकु बोलि, “यु मनिख तैं देखा” 6जब प्रधान याजक ल अर मन्दिर का रखवला ल यीशु तैं देखि त चिल्लै कै बोलि, “वे तैं सूली पर चड़ौ सूली पर” पिलातुस न ऊं लुखुं मा बोलि “तुम ही वे तैं सूली पर चड़ा किलैकि मि त वे पर कुई भंगार नि पांणु छौं।” 7यहूदियों का अगुवों ल वे तैं जवाब दे “हमारी भि व्यवस्था छिन अर ऊं व्यवस्था का अनुसार उ मरै जांण लैख च किलैकि वेल अफ तैं परमेश्वर को नौंनो बतै।”#19:7 लैव्य. 24:16 8जब पिलातुस न यु बात सुंणिनि त अर भौत ही जादा डौर गै 9अर फिर राजा का महल का भितर गै अर यीशु मा बोलि, “तु कख बट्टी छै” पर यीशु ल कुई जवाब नि दे। 10पिलातुस ल यीशु बट्टी बोलि “मि मा किलै नि बुल्णी छै? क्य तु नि जंणदी कि त्वे तैं छोड़णो कु अधिकार मि मा च अर त्वे तैं सूली पर चड़ाणो कु भि अधिकार मि तैं च।”
11यीशु ल जवाब दे “जु मि तैं परमेश्वर की तरपां बट्टी नि दिये जांदु, त तेरु मि पर कुछ अधिकार नि हूंदो इलै जैल मि तैं तेरु हथ पकड़वै च वेको पाप जादा च।”
12यु कारण बट्टी पिलातुस ल वे तैं छोड़ी दींण चै, पर यहूदियों ल चिल्लै-चिल्लै कै बोलि, “जु तु यु तैं छोड़ी दीलि त तु कैसर कु दगड़िया नि; जु कुई भि राजा हूंण का दावा करदु च उ कैसर कु दुश्मन च।” 13यूं बातें तैं सूंणि कै पिलातुस यीशु तैं भैर लै, अर उ न्याय आसण पर बैठी, जु की ढुंगों कु एक चौंरि छै जैकु इब्रानी भाषा मा गब्बता बुल्दा छा वे जगह पर छों। 14यु फसह को त्यौहार कु दिन छो अर दुफरा का बगत का लगभग छो; तब वेल यहूदियों मा बोलि, “देखा, यु ही च तुमारो राजा!” 15पर उ चिलांण लगि गैनी “वे तैं मर डाला, वे तैं मर डाला!” वे तैं सूली पर चढ़ावा! पिलातुस ल ऊंमा बोलि, “क्य मि तुमारा राजा तैं सूली पर चढ़णै” प्रधान याजक ल जवाब दींनि, “कैसर तैं छोड़ी कै हमारो अर कुई राजा नि च।” 16तब पिलातुस ल यीशु तैं सूली पर चढ़ाणा कु ऊंका हवाला कैरी दींनि कि उ सूली पर चढ़ै जौं।
सूली पर चढ़ै जांण
(मत्ती 27:32-44; मरक 15:21-32; लूका 23:26-43)
17तब उ यीशु तैं ली गैनी। अर उ अपड़ी सूली तैं उठै कै वीं जगह तक भैर लीगि जैकु, “खोपड़ी कि जगह” बुल्दा छिन अर इब्रानी भाषा मा गुलगुता बुलै जांदु। 18उख ऊंल यीशु अर द्वी डाकूओं तैं सूली पर चढ़ै एक तैं दैंणि अर एक तैं बैं तरपां अर बीच मा यीशु चढ़ै दींनि। 19अर राज्यपाल पिलातुस ल यीशु का मुंड का सूली का मथि एक भंगार की एक तख्ती लिखीं के ठोकी दींनि जै पर लिख्युं छो “नासरत को यीशु नासरी यहूदियों कु राजा।” 20यु भंगार-चिठ्ठी भौत यहूदियों ल पैढ़ी किलैकि वीं जगह जख यीशु सूली पर चढै गै छो यरूशलेम शहर का संमणी छो अर चिठ्ठी इब्रानी भाषा अर लतीनी अर यूनानी भाषा मा लिख्युं छो। 21तब यहूदियों का प्रधान याजक ल पिलातुस मा बोलि, “यहूदियों कु राजा नि लिख पर इन लिख कि येल बोलि, मि यहूदियों कु राजा छौं।” 22पिलातुस ल न जवाब दे “मिल जु लिखीं येले, उ बदली नि सकदु।”
23जब सिपै यीशु तैं सूली पर चढ़ै चुकि गैनी त ऊंल यीशु का अर चरी सिपैयूं ल एक-एक बांठा लै द्या अर कुर्ता भि लै द्या, कुर्ता तैं सिलियूं नि छो बल्कि उ मथि बट्टी मूड़ि तक बणयुं कपड़ा कु एक ही टुकड़ा बट्टी बणयुं छो। 24इलै सिपैयूं ल एक दुसरा बट्टी बोलि, “हम यु तैं नि फडुला पर इलै चिठ्ठी डाली की यु कैकु होलो” यु इलै हवे कि परमेश्वर का वचन मा लिखै गै छो उ सच हो, ऊंल मेरा कपड़ा आपस मा बांटि दींनि अर मेरा कपड़ा पर चिठ्ठी डाली तब सिपैयूं ल इन ही कैरी।#19:24 भज. 22:18
यीशु की अपड़ी ब्वे तैं सलाह
25पर यीशु का सूली का संमणी वेकी ब्वे अर वेकी ब्वे की बैंण, क्लोपास की जनन मरियम जु मगदल गौं की छै खड़ी छै। 26जब यीशु ल अपड़ी ब्वे अर वे चेला तैं जै बट्टी उ प्रेम रखदु छो संमणी खड़ो देखि त ऊंल अपड़ी ब्वे कु बोलि, “हे नारी देख यु तेरु नौंनो।” 27तब वेल चेला कु बोलि, “या तेरी ब्वे च।” तब उ चेला वीं तैं अपड़ा परिवार का हिस्सा बंणै कै अपड़ा घौर ली गै।
कामों कु पूरो हूंण
(मत्ती 27:45-56; मरक 15:33-41; लूका 23:44-49)
28यांका बाद यीशु ल यु जांणि के की अब वेल अपड़ो सैरो काम खत्म कैरी येले इलै कि परमेश्वर का वचन मा लिखीं बात सच साबित हो, यीशु ल बोलि, “मि तिसलो छौं।” 29उख एक सिरका ल भुर्युं एक भांडों रख्युं छो सिपैयूं ल सिरका मा भिज्युं रुवां कु एक गुंडो निंगला डगुला पर रखि के ऊंका गिच्चा पर लगै।#19:29 भज. 69:21 30जब यीशु ल उ सिरका चूसि तब ऊंल बोलि, “पूरो हवे गै” अर वेल मुंड झुकै कै अपड़ा प्राण छोड़ी दींनि।#19:30 लूका 23:46, मर. 15:37
भाला बट्टी बिधै जांण
31उ यहूदियों कु तैयारी कु दिन छो, अर हैंका दिन यहूदियों को विश्राम कु दिन छो जु परमेश्वर कु पवित्र दिन छो अर त्यौहार द्वी ही छा यु यहूदी लुखुं कु एक विशेष दिन च अर उन ही चांदा छा की यु दिन कु शव तैं सूली पर नि रो इलै ऊंल पिलातुस बट्टी बोलि, कि ऊं मनिख का टंगड़ा तुड़वै द्या कि ऊं जल्दी मोरि जौं अर शव तैं भुयां उतारे जै सका।#19:31 मर. 15: 42, व्य. 21:22, 23 32इलै सिपैयूं ल जै के जु यीशु का दगड़ा मा सूली पर चड़ाये गै छा ऊं द्वी का खुट्टा तोड़ी दींनि। 33पर जब उ यीशु मा ऐनी अर ऊंल देखि कि उ मोरि गै त ऊंल वेका खुट्टा नि तुड़िनि। 34पर एक सिपै ल वेकी पंणकोखि पर भाला कि चोट मारि अर उख बट्टी वे बगत ल्वे अर पांणी निकली। 35जै आदिम ल यु सब देखि, वेल गव्है दींनि, कि तुम भि यीशु पर विश्वास कैर सका अर वेकी गव्है सच हो। अर उ जंणदु च कि उ सचै बट्टी बुल्दो की तुम विश्वास कैरा। 36यु बात इलै हवे कि परमेश्वर का वचन मा जु लिख्युं च ऊं सच हवे जौ, “वेकी कुई हड्डी तुड़ै नि जालि।”#19:36 निर्ग. 12:46, गिन. 9:12, भज. 34:20 37फिर एक अर जगह पर परमेश्वर का वचन मा यु भि लिख्युं च “जैल वे तैं बेधि छो वे पर नजर कैरा।”#19:37 जक. 12:10
यूसुफ का कब्र मा यीशु तैं दफनै जांण
(मत्ती 27:57-61; मरक 15:42-47; लूका 23:50-56)
38यूं बातों का हूंण का बाद अरिमतियाह गौं का यूसुफ ल जु यीशु को चेला छो पर यहूदियों का अगुवों का डर से यूं बातें तैं छिपै के रखि, पिलातुस बट्टी बिनती कैरी, कि मि यीशु का शव तैं लै जौं, पिलातुस ल वेकी बिनती सूंणि, अर उ ऐ के ऊंका शव ली गै। 39अर नीकुदेमुस जु कि राती का बगत यीशु मा ऐ छो तैंतीस किलोग्राम का लगभग मिल्युं, भीनी खुशबुदार चिज्युं अर एल्वा लै ऐ। 40तब ऊंल यीशु की लांश तैं यहूदियों का दफनौंणै की रीति का अनुसार, वे पर खुशबुदार चिज्युं तैं लगै के कपड़ै की पटियों ल लपैटि। 41वीं जगह का संमणी जख यीशु सूली पर चढ़ै गै छो, एक बगिचा छो; वे बगिचा मा एक नई कब्र छै पैली कभि इस्तेमाल नि किये गै छो। 42इलै ऊंल यीशु का शव तैं वे कब्र की गुफा मा रख दींनि किलैकि उ संमणी मा छै अर यहूदियों का सब्त कु तैयारी को दिन भि छो।
Valgt i Øjeblikket:
यूहन्ना 19: GHMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
