Juan 7
7
Ma ja Jesús ka'ap ja nyaax kyajpn kyupëkyën
1Ko jëtu'un y'ëkjajty y'ëkkëpejty, jamtsow ja Jesús jyëtijty Galilea y'itjotm. Ka'ap ojts nyijkxy Judea y'itjotm, jä'ä ko yaj'ookanëp ënety ja jutiis ja'ayëty jam. 2E jä'ä ko tyimpatyp ënety ja ujts aaytyëjk xëëw, tu'uk ja xëëw mëti'ipë ja jutiis ja'ayëty xyëëwtuuntëpën, 3ets ja Jesús ja myëkä'äxtëjk y'ënëmaayëtë:
Ka'ap yaa mwë'ëmëty, nëjkx jam Judea ets näjyëtu'un t'ixtëty yë m'ijxpëjkpëtëjk mëti'ipë yaa mtuunpyën. 4Ka'ap pën tii ayu'utsy tuny pën tsyojkpy ets ja ja'ay nijawëty. Tä mijts ya'atë jëtu'unpë xytyunyën, yajnikëxë'ëk ma ja'ayëtyën.
5Jä'ä ko ni myëkä'äxtëjk ja Jesús ënety kyamëpëkyë. 6Ets ja Jesús y'ënëmaayëtë:
Ka'apnëmës ja nxëëw tpaaty; je'eyëp ko ma miitsëtyën oyjyëna'ajëty. 7Mëti'ipë ka'ap ja Dios nijawëtën ka'ap tjëkyepy miits m'ëxëëk'ixëtëty; je'eyëp koos xy'ëxëëk'ijxtëpës yë'ëjëty, jä'ä koos nnikäjpxy ko ka'ap tii oy tuntë. 8Nëjkxtë miitsëty mxëëwatë; ëjts ka'apës nnëjkxa'any, jä'ä ko ka'ap ja nyixëëw tpaatynyëm.
9Ko jëtu'un y'ënëmaayëtë ënät ojts jam Galilea jyaak wë'ëmy.
Ko Jesús nyijkx ma ja aaytyëjk yajnixëëwtunyën
10Ko ja myëkä'äxtëjk ojts tsyoontë ënät ja Jesús ojts nyijkx ma ja xëëw tyunyën; je'eyëp ko ayu'utsy ame'tsyë, ka'ap y'ijxnë kyä'äxnëty. 11Ojts ja jutiis ja'ay jya'ixta'ajëtë jam xëëwjotm, ets y'ëna'antë: ¿Ma ënät tääpë ja ja'ay?
12May ja ja'ay nyimëtya'akëtë xiitsow yaatsow. Jënaakën y'ëna'antë: Oyjyä'äy yë'ë. Wiinkpë y'ëna'antë: Ka'ap y'oyjëtity; nëkoo ja'ay twin'ëëny.
13Ka'ap pën nyikäjpxyë nikëxë'ëky mayjyä'äyjoty, jä'ä ko tsyë'këtëp ja jutiis ja'ayëty.
14Xëëw kujkwä'kxy ja Jesús ojts nyijkx ma ja mëjtsajptëjkën ets yaj'ijxpëjktso'ony. 15Ja jutiis ja'ayëty mëj ixy t'ijxtë, paaty y'ënantë:
¿Wi'ix jëtää ya'atë ja'ay winë timynyijawë ets ka'ap të y'ijxpëky?
16Ënet ja Jesús y'ëtsoowëtë:
Mëti'ipës ja'ay ntuk'ijxpëjkpyën ka'apës ëjts njä'äjëty, yë'ë jyä'ä mëti'ipës të xykyexyën. 17Pën jää pën tuna'any mëti'ipë Dios tsyojkpyën, nyijawëp pën jamës ja n'ijxpëjkën tsyoony ma Tiosën, ëkë pën nkë'ëmwinma'anyës nkäjpxyp. 18Pën yë kyë'ëm winma'any kyäjpxyp ets ja ja'ay myëjpëjktä'äkyë, yë'ë y'ixtääpy ets yajmëjpëjkta'akëty; mëti'ipë y'ixtääpyën ets yajmëjpëjkta'akëty ja mëti'ipë të kyexyën yë'ë mëtëy kajpxp ets ka'ap tjëkyepy wi'ix tëkatsy yajnimëtya'akëty.
19Ojts mo'ojëtë ja Moisés ja ënä'ämën, ¿këtiijë? ets nitu'uk të xykyapatuntë. ¿Tiits koos xyaj'ooka'antë?
20Ets ja ja'ay y'ëtsoowëtë:
Ku'oypyë mijts mmëët'ajtyp. ¿Pën yam myaj'ookanëp?
21Ënet ja Jesús y'ënëmaayëtë:
Ni'ëmukë miitsëty janty mëj'ixy xyjyawëtë koos ojts tu'uk ja mëj'ajtën ntuny po'kxënxëëw. 22Oy jyapo'kxënxëëwëty, mnatsujk'ëwtijtëp ja mye'etyëjk'ajtënëty, ijxtëm ja Moisés ja y'ënä'ämën myinyën. Oy yë'ëjëty ja Moisés tkayajtso'ontäky, aptëjk ojts tyajtso'onta'aktë. 23E miitsëty ko xykyaninaxa'antë ja Moisés ja y'ënä'ämën, mnatsujk'ëwtijtëp ja mëxu'unk ja ye'etyëjkajtën po'kxënxëëwjoty. ¿E tiits ko xywiinkjawëtë koos nyajtso'oky po'kxënxëëwjoty tu'uk ja pa'amja'ay? 24Ka'ap tii nitsuu nipoj xypyaye'eytyëty. Mëtëy winë xypyaye'eytyëty.
Ko ja Jesús tnikäjpxy ma tsyoonyën
25Tääts ojts pënëty tyajtëwtë mëti'ipë tsënaaytyëpën jam Jerusalén:
¿Këtii yë'ëjëty ya'atë mëti'ipë y'ijxtaaytyëpën ets tyaj'ooka'antë? 26Ix jam kyäjpxy myëtyä'äky nikëxë'ëky mayjyä'äyjotm. ¿Tii ko ka'ap wi'ix nëëmëtë? ¿Wä'än jëtää yë kutuunktëjk tëë tmëpëktë ko tyiyëty ko yë'ë ja ye'etyëjk mëti'ipë Yajnitso'okaanpënë? 27E nnija'awëtëpës ëëts yë'ë maa tsyoonyën. Ko myina'any ja Kristë ka'ap pën nijawëja'any maa ënety tsyoony.
28Tam ënety ja Jesús yaj'ixpëky ma ja mëjtsajptëjkën, ënät mëk y'ënäny:
Xy'ixy'ajtëpës miits ets mnija'awëtëp maas ntsoonyën. E ka'apës kë'ëmwinma'any të nminy, yë'ëjës të xykyexy mëti'ipë mëtëy winë tyuunpyën, mëti'ipë miits ka'ap xy'ixy'atën. 29Ëjts n'ixy'äjtypyës yë'ë jä'ä koos jam ntsoony ets yë'ëjës të xykyexy.
30Ënet ojts tjamatsa'antë, je'eyëp ko ni pën ojts tkanixajë, jä'ä ko ka'anëm ënety ja nyixëëw tpaatynyëm. 31May ja ja'ay ojts myëpëktë ets y'ënantë:
Ko myinëty ja Kristë, ¿wäänë jëtää ni'ik tunëty ja mëj'ajtën këtiinëm ya'atë ye'etyëjkë?
Ko ja fariseë ja'ayëty tjamatsantë ja Jesús
32Ko ja fariseë ja'ayëty tmëtoy'ajtëy ko ja ja'ay ja Jesús tnikäjpxy tnimëtya'aktë, ënät yë fariseë ja'ayëty ets ja teety wintsënëty ojts tkäxtë ja mëjtsajptëjk këwent'ajtpë ets tmatstëty ja Jesús. 33Tääts ja Jesús y'ënäny:
Wäänës yaa njaak'ita'any mëët miitsëty, tsojkës jam nëjkxa'any ma yajpaatyën mëti'ipës xykyäjxpën. 34Nëjkxëpës xyjya'ixta'atë, je'eyëp ko ka'apës xypyaata'antë, jä'ä ko ka'ap tjëkyepy miits jam mnëjkxtëty maas nnëjkxyën.
35Tääts ja jutiis ja'ayëty nyäyajtëëwëtë nixim niyam:
¿Ma nyëjkxa'any ya'atë ja'ay ets ka'ap n'ëkpatënëty? ¿Kajts tjëkyepy jam muum nyëjkxëty wiink kajpn ets jam muum ma jyëpyo'kxykyajpnën tyaj'ijxpëkëty yë jutiis ja'ay? 36¿Ka'ap oy yajja'akyukë tiitën jyatijäämpy: Xy'ixta'atëpës, je'eyëp ko ka'apës xypyaata'antë jä'ä ko ka'ap jam tjëkyepy mnëjkxtëty maas nëjkxyën?
Jesús yë'ë yäjkpy nëë mëti'ipë yajjuuky'ajtpën
37Ja tu'kxëëw ënety kyakëxy ja mëj xëëw tyunyë jyätyën. Ko ja Jesús ojts wya'kukë ets mëk y'ënäny:
Pën tëtsëp, wä'änës xynyiminy ets y'uukëty. 38Ets y'atëwëty ijxtëm jap kuja'ay myinyën: Mëti'ipë mëpëjkpën jëtu'un jap y'aawjoty jyotjoy yajpaata'any ijxtëm jeexyë ja komnëë jap myuutyën mëti'ipë yajjuuky'ajtpën.
39Ko ja Jesús jëtu'un y'ënäny yë'ë Kënu'kxymyëkajtën tyij mëti'ipë y'ëxajëtëpën ja mëpëjkpë, jä'ä ko ka'anëm ënety ja Jesús tsyajp petynyëm, paaty ja Kënu'kxymyëjajtën ënety ka'ap myinyëm.
Ma ja ja'ay nyäpyëjkwa'kxëtën
40Jam may mayjyä'äyjyotm y'ënantë ko jëtu'un tmëtoowtë:
Tëy ko ya'atë yë'ëjëty yë Dios yë kyäjpxynyajxpë.
41Ets ja wiinkëtypë y'ëna'antë:
Yë'ë yë Kristë ets jatu'kpëky y'ëna'antë:
Ka'ap Kristëty jä'ä ko ka'ap jam tsyoona'any Galilea y'itjotm. 42Jëtu'un ja Dios ja y'aaw y'ayuk y'ënä'äny ko ja yajkutujkpë David ja y'u'unk y'ok nëjkx Kristë'aty ets jam tsyoona'any Belén, jä'ä ko jam ja David ijty kyukajpnëty.
43Tääts ja ja'ayëty ka'ap ojts oy tyajtu'knaxëtë ja wyinma'anyëty ko tjanikajpxtë pën Jesus'ajtp. 44Tam jënaakën mëti'ipë ojts tjamatsa'antën, je'eyëp ko ka'ap tmajtstë.
Ko ja yajkutujkpëtëjk ka'ap tmëpëktë ja Jesús
45Ënet ja mëjtsajptëjk këwent'ajtpë ojts wyimpijtkojnëtëpë ma ja teety wintsënëtyën ets ma ja fariseë ja'ayëtyën, ets y'ënëmaayëtë:
¿Tii ko të xykyayajmintë?
46Ets y'ëtsoowtë:
Jä'ä ko ka'ap nijëna'a pën jëtu'un kyäjpxynyëm ijxtëm yë'ë kyäjpxyën.
47Ënet ja fariseë ja'ayëty y'ënëmaayëtë:
¿Tëë näjyëtu'un miits myajwin'ëëntë? 48¿Ëkë tëë jää pën nitu'ukën yë wintsën ëkë fariseë ja'ay myëpëkyë? 49Ja'ay mëti'ipë ka'ap tnijawëtën ja Dios ja y'ënä'ämën, kajpxpoky y'itë.
50Ja Nicodemo mëti'ipë ojts tëkok myëtyä'äkyën mëët ja Jesús, jëtu'un ojts y'ënë'ëmxëtë:
51Jëtu'un ja tëyajtën y'ënä'äny ko ka'ap y'oyëty ets ja ja'ay nyajnitujkëmëty pën ka'anëm nmëto'owëm wi'ix y'ënä'änyën ets yajnijawëty tii të tunyën.
52Ets ja myëku'uktëjk jëtu'un y'ëtsoowtë:
¿Näy mkaliletë ja'ay mijtsë? Ixpëk yë Dios yë y'aaw y'ayuk, tääts xy'ixëty ko ka'ap pën Dios käjpxynyajxpë tsyoona'any jam Galilea.
Ja to'oxytyëjk mëti'ipë ka'ap twintsë'ëkën ja pëjkën ukën
53Tääts ja ja'ay ojts nyëjkxnëtë këëktëjk.
Valgt i Øjeblikket:
Juan 7: QUETZMIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Biblia Dc en Mixe de Quetzaltepec, Oaxaca México © Sociedad Bíblica de México, A.C.
