Juan 6

Ko Jesús tyajkay ja nimëkoxk mil naxypyë ja ja'ay

Mt 14:13-21; Mc 6:30-44; Lc 9:10-17

1Ko wäänë y'ijty, ënät ja Jesús ojts nyijkx jamtsow nëë'awinm Galilea mejypyë'am, mëti'ipë näjyëtu'un yajtijpën Tiberias. 2May ja Jesús ënety ja ja'ay pyanëjkxyë, jä'ä ko tëë ënety t'ixtë ko tuny ja mëj'ajtën ko tyajtso'oky ja pa'amja'ay. 3Ënet ja Jesús pya'tëjkëy ma tu'uk ja kopkën ets jam nyaaxwe'tsy mëët ja y'ijxpëjkpëtëjk. 4Tim wiinkoonp ënety ja ëmaayxyëëw, mëti'ipë jutiis ja'ayëty xyëëtuuntëpën. 5Ko Jesús t'ijxy ko may ja ja'ay nyiminyë ets t'ënëmaay ja Felipe:

¿Ma ënät ja kääky uuky nju'uymyëty ets ya'atë mayjyä'äy kyäytyëty?

6Paaty ja Felipe ojts jëtu'un yaj'ënëëmë, yë'ë ja Jesús ënety y'ixäämpy wi'ix ja Felipe y'ëk'ëtsoy, jä'ä ko tëë ënety ja Jesús kë'ëm tnijawë wi'ix tii tuna'anyën. 7Ënet ja Felipe y'ëtsooy:

Nimäjtsk mëko'px denario kyamëta'akëty ets ja tsajpkääky yajtukjuyëty ets yajmo'otëty këëkyiin këëkwään ja ja'ay.

8Ets y'ënëmaayë tu'uk ja y'ijxpëjkpë, Andrés xyëëwajtyp, Simón Pedro myëkä'äx:

9Tyaa tu'uk pi'k ëna'k, tap mëkoxk yë tsajpkääky tmëëtëty ets mäjtsk yë ajkx, je'eyëp ko ka'ap myëta'akëty mëët ya'atë mayjyä'äy.

10Ënet ja Jesús y'ëtsooy:

Ënëëmëtë ja'ay wä'än ni'ëmukë naaxwä'tsta'atë.

Ënet ja ja'ay ujtskëjxy nyaaxwä'tstaaytyë. Nimëkoxk milën ja ye'etyëjk. 11Ets ja Jesús tkoonë'ky tu'uk ja tsajpkääky ets ja Dios tkukajpxëy. Tääts ojts tujkwä'kxy ets tmooy ja ja'ayëty mëti'ipë ënety jam u'unyääytyëpën. Näyjyëtu'un ojts tyajwä'kxy ja ajkx ets ojts yajmo'otë ja ja'ay jënu'un ënety tsoktën. 12Ko ja ja'ay kyuxënëtë ets ja Jesús t'ënëmaay ja y'ijxpëjkpëtëjk:

Pëjkmuktë yë natëkë ets ka'ap tii wyintëkoyëty.

13Ënet tpëjkmujktë ets tyaj'ujtstë majkmäjtsk katsy ja tsajpkääky mëti'ipë natëjkëyën. 14Ko ja ja'ay t'ijxtë ja mëj'ajtën mëti'ipë Jesús tyuunën ënät y'ënantë:

Tëy jëtu'un ko yë'ë ya'atë Dios kyäjpxynyajxpë mëti'ipë yaa naaxwiiny ënety minaanpën.

15Ojts ja Jesús tnijawë ko ja ja'ay pyëjkta'aka'anyë atsip yajkutujkpë, paaty ojts jam tsyoony ets ojts nyijkx kopkëjxm nätyu'uk.

Ko ja Jesús ye'ey nëëwiinkëjxy

Mt 14:22-27; Mc 6:45-52

16Ko tsyu'ujënë ojts ja y'ijxpëjkpëtëjk nyëjkxtë mejy nëë'ëkë'ëm, 17jamts ojts tyëkëtë kepy nëëwinye'epyëjoty ets tuknaxa'antë ja mejy, Capernaúm jya'ta'antë. Ko ënety të kyootsënë ets ka'anëm ja Jesús wyimpity. 18Ënet ja nëë y'ëtëtstäky ko ja mëkpoj myiiny. 19Ko ënety tëë mëkoxk mil ëkë tëtujk mil metrën nyëjkxnëtë nëë'itkujky ënät t'ijxpatë ja Jesús ko ja kepy nëëwinye'epyë tmëwinkony ye'epy mejy wiinkëjxm ets ojts tsyë'ëkëtë. 20Tääts ja Jesús y'ënëmaayëtë:

Ëjts yë'ë, këtii mtsë'ëkëtë.

21Ënet jyotkujkëtyë ets tyajtëkëtë kepy nëëwinye'epyëjoty. Wäänë jyaak ijty ets jyajtë naaxwintë'ëtstum ma ënety jya'ta'antën.

Ko ja'ay t'ixta'atë ja Jesús

22Komjëpom ja mayjyä'äy tnija'awëtyë mëti'ipë jam nëë'awinmëtyën ko ja Jesús ja y'ijxpëjkpëtëjk yë'ë ënety të tuknëjkxtë ja kepy nëëwinye'epyë tu'kpajkpë jampë yajpaatyën ets ko ka'ap ënety ja Jesús jap mëëtëty. 23Ënet ojts wiinkpë kepy nëëwinye'eyë jya'të mëti'ipë tso'ontëpën Tiberias, ma ënety ja tsajpkääky të tkaytyën ko ja Wintsën jëyëjp tkukajpxëy ma Tiosën. 24Ko t'ijxtë ko ka'ap pën ja Jesús jap, ni yë'ë y'ijxpëjkpëtëjk ets ja ja'ay tyëjkëtyë kepy nëëwinye'epyëjoty ets ojts nyëjkxtë jam Capernaúm t'ixta'atë ja Jesús.

Jesús, jëtu'un tä tsajpkääkyën mëti'ipë yajjuuky'ajtpën

25Ko jyajtë jam awinmtsow ets tpatë ja Jesús ënät tyajtëëwtë:

Wintsën, ¿jëna'a yaa mminy?

26Ets ja Jesús y'ëtsoowëtë:

Tëy miits nëëmëtë, paaty xy'ixta'atës ko ojts ku'uxyë mkaytyë; ka'ap yë'ëjëty ko miits xy'ixtë ja mëj'ajtën. 27Ko tii xytyuntëty ka'ap yë'ëkyëjxmëty ko ja kääky uuky xytsyoktë mëti'ipë këjxp najxpën, yë'ë mnituntëp mëti'ipë mmo'ojëtëp ja juukyajtën xëmëkyëjxmëpë. Ya'atë ja kääky uuky yakäämpy ja naaxwiinyëtë ja'ay ja y'U'unk, jä'ä ko yë'ë Dios Teety yë kuttujkën të myo'oyë.

28Ets tyajtëëwtë:

¿Tii tsojkëp etsës ntunëty mëti'ipë Dios tsyojkpyën?

29Ënet ja Jesús y'ëtsoowëtë:

Mëti'ipë Dios tsyojkpyën ets xytyuntëty, yë'ë ets miits xymyëpëktëty mëti'ipë të tkexyën.

30Tääts ojts tyajtëwtë:

¿Tii mëj'ajtën maayëp ëëts xytyuk'ixtëty ets mijts nmëpëktëty? ¿Tii jëtu'un mtuunäämpy? 31Ëëts yë n'ap n'okëty ojts tkaytyë ja maná jam të'ëts'itjotm, ijxtëm jap këxja'ay myinyën: Ja tsajpkääky ojts tyukayëtë mëti'ipë tso'onën tsajpjotm.

32Ets ja Jesús y'ëtsoowëtë:

Tëy miits nëëmëtë ko ka'ap yë'ëjëty yë Moisés ojts mmo'ojëtë ja tsajpkääky mëti'ipë tsajpjotm tso'onpën, ja nTeetyës ojts mmo'ojëtë ja tsajpkääky mëtëypyë mëti'ipë tsajpjotm tso'onpën. 33Ja tsajpkääky mëti'ipë Dios yäjkpyën, jä'ä tsajpjotm tso'omp ets ja naaxwiinyëtë ja'ay ja juukyajtën tpaaty.

34Ënet yë'ëjëty t'amëtoowtë:

Wintsën, mooytyëkës xëmë tääpë tsajpkääky.

35Ënet ja Jesús y'ënëmaayëtë:

Ëjts jëtu'un tsajpkääky mëti'ipë ja juukyajtën yäjkpyën. Pën xynyimiinpës, nijëna'a kyayuu'ookëtëty; ets pën xymyëpëjkpës, nijëna'a kyatëëtsëty. 36Ijxtëm të nëëmëtën, miitsëty ka'apës të xymyëpëktë oyës të xyjya'ixtë. 37Tu'kë'ëyë mëti'ipës ja nteety të xymye'eyën, ëjts xynyimiinp; ets pën xynyimiinpës, nijëna'ajës nka'ixkäxëty. 38Jä'ä ko ka'apës yë'ëjëty tsajpjotm të nitsoony etsës ja nkë'ëmwinma'any nyajtunëty; yë'ëjës jam të nitsoony etsës ntunëty mëti'ipë tsyojkpyën ja nTeetyës mëti'ipës të xykyexyën. 39Ets ja tsyojkën mëti'ipës të xykexyën, yë'ë etsës nitu'uk nkayajtëkoyëty mëti'ipës të xymye'eyën, etsës nyajjuukpyëkëty jä'ä xëëw ko ënety ja ja'ay yajpaye'eytyë. 40Ja nTeetyës tsyojkpy ets tpaatëty ja juukyajtën mëti'ipë ja Dios ja y'u'unk y'ijxtëpën ets myëpëjktëpën, jëtu'un tmëët'atëty ja juukyajtën xëmëkyëjxmëpë; ets oy ënety të y'ooktë nyajjuukpyëkëpës ma ënety xëëw jëmëjt kyixyën.

41Ko ojts jëtu'un tmëtowtë ja jutiis ja'ayëty ënät ojts ëxëëkjaty tnimëtya'aktë ja Jesús, jä'ä ko ja Jesús ojts y'ënä'äny: Ëjts ja tsajpkääky mëti'ipë tsajpjotm tso'onpën, 42ets nyäy'ënanëtë:

Këtii yë'ëjëty ya'atë Jesús, José myaankë. N'ixy'ajtëm yë tyaak tyeety. ¿Wi'ix jëtu'un tyam y'ënaanpë ko tsajpjotm tsyoony?

43Ënet ja Jesús y'ënëmaayëtë:

Këtii je'eyë jëkäm mnimëtya'aktë. 44Ja'akyukë ijxtëm nëëmëtën, ka'ap tjëkyepy pën xynyiminëtyës pën ka'ap ja Dios Teety wyoowminyë, mëti'ipës të xykexyën, etsës yë'ë nyajjuukpyëktëty ko ënety ja xëëw jëmëjt kyä'pxy. 45Jëtu'un ja Dios ja kyäjpxynyajxpë y'ënantë: Ni'ëmukë ja Dios tyaj'ijxpëka'any. Paaty mëti'ipë myëtoow'ijtëpën ja Dios Teety ets tjatë mëti'ipë tuk'ijxpëjkëtëpën, ëjts xynyimiintëp.

46Ka'ap yë'ëjëty ko pën ja Dios Teety të t'ixy; yi'iyë të t'ixy mëti'ipë të tsyoonyën ma Tiosën. 47Tëy miits nëëmëtë ko pën xymyëpëjkpës, yë'ë myëët'ajtyp ja juukyajtën xëmëkyëjxmëpë. 48Ëjts ja tsajpkääky mëti'ipë ja juukyajtën yäjkpyën. 49Miits ja m'aptëjkëty ojts tkaytyë ja maná jam të'ëts'itjotm. E oy tjakaaytyë, o'ktë jä'ä. 50E pën ya'atë tsajpkääky kyääpy mëti'ipë tso'onpën jam tsajpjotm, ka'ap y'ooka'any. 51Ëjts ja tsajpkääky mëti'ipë juukyajtën yäjkpyën ets tsajpjotmëpë të tsyoonyën, ko pën ya'atë tsajpkääky tkay, xëmëkyëjxm jyuuky'ata'any. Ja tsajpkääky mëti'ipës nyakäämpyën, ni'kx nkopkës ntijpy, mëti'ipës nyakäämpyën ets ja naaxwiinyëtë ja'ay tmëët'atëty ja juukyajtën xëmëkyëjxmëpë.

52Tääts ja jutiis ja'ayëty tyëjkëtyë aakyë'ë mëtyakpë nixim niyam:

¿Wi'ix yë'ë nyi'kx kyopk xymyo'omyëty ets një'kxmëty?

53Ënet ja Jesús y'ënëmaayëtë:

Tëy miits nëëmëtë, pën ka'ap xytsyu'utstë ja xyixy ja naaxwiinyëtë ja'ay ja y'U'unk, ets pën ka'ap ja nye'pny xy'ukëtë, ka'ap ja juukyajtën xymyëët'atëty. 54Pën tsyu'tsyp ja nxixyës ets y'ukpy ja ne'pnyës, myëët'ajtyp ja juukyajtën xëmëkyëjxmëpë, etsës nyajjuukpyëka'any ko ënety ja xëëw jëmëjt kyukëxë. 55Jä'ä ko ja ni'kx nkopkës ets ja ne'pnyës, yë'ë mëtëypyë tsu'utsy ets mëtëypyë uuky. 56Pën tsyu'tsyp ja nini'kxës ets y'ukpy ja ne'pnyës, tu'ukyë jyuuky'äty mëët ëjts ets tu'ukyës njuuky'äty mëët yë'ë. 57Ja nTeetyës mëti'ipës të xykexyën myëët'ajtyp ja juukyajtën ets jam njuuky'ätyës ma yë'ëjën; näjyëtu'un mëti'ipë kääpy ukp ma ëjtsën paaty jyuuky'äty jä'ä koos ëjts yaa. 58Yë'ës nimëtyäkpy ja tsajpkääky mëti'ipë tsajpjotm tso'onpën. Ya'atë tsajpkääky ka'ap jyëtu'unëty ijxtëm ja manájën mëti'ipë ja m'aptëjk kyääytyën; oy ojts tjakaytyë, ojts je'eyëm y'ooktë. Pën ya'atë jëtu'unpë tsajpkääky kyääpy, xëmëkyëjxm jyyuukyata'any.

59Jam ojts ya'atë Jesús tyaj'ijxpëky Capernaúm.

Ja aaw ayuk mëti'ipë yäjkpyën ja juukyajtën xëmëkyëjxmëpë

60Ko ja Jesús ja y'ijxpëjkpëtëjk jëtu'un tmëtoowtë, ënät may y'ënantë:

Ya'atë mëti'ipë nyimëtyäkpyën tsip ets nkupëjkmëty, ¿pën yë jëtu'unpë y'ëkmëpëkäämpy?

61Ja Jesús ojts nijawë ko jëtu'un myäytyë tyajtë, paaty tyajtëëy:

¿Ya'atë miits mka'oyjya'awëtëpë? 62¿Tii tunëtëp jatëtëp ko xy'ixtëty ja naaxwiinyëtë ja'ay ja y'U'unk pya'tëkë jam tsajpjotm ma të tsyoonyën? 63Ja Dios ja Jya'awën yë'ë ja juukyajtën yäjkpy, ka'ap tyuny mëti'ipë jam yë nyi'kx kyopkën. Mëti'ipë yam të ntukmëmëtya'aktën yë'ë mëti'ipë ka'ap yaj'ixyën je'eyëp ko yäjkpy ja juukyajtën. 64Täänëm ma miitsëtyën mëti'ipë ka'ap myëpëkyën.

Yë Jesús paaty jëtu'un y'ënäny jä'ä ko nyija'ap ënety pën ka'ap myëpëktën ets pën kë'ëyakanëpën. 65Ets jyaak'ënany:

Paty miits nëëmëtë ko ka'ap tjëkyepy pën xynyiminëtyës pën ka'ap ja Dios Teety wyoowminyë.

66Tääts ojts may ja Jesús t'ëxmatstë mëti'ipë ënety të tjapatsoontën, ets ka'ap mëët y'ëkjëtijnëtë. 67Tääts ja Jesús tyajtëëy ja nimajkmäjtskpë ja y'ijxpëjkpëtëjk:

¿Mnëjkxantëp miits näjyëtu'unë?

68Ënet ja Simón Pedro y'ëtsooy:

Wintsën, ¿Pën n'ëkninëjkxtëpës? mijts yë'ë mnimëtyäkpy ja juukyajtën xëmëkyëjxmëpë. 69Tëës mijts nmëpëktë ets nija'awëtyëpës ko mijts mKristëty, Dios Wa'atspë.

70Ënet ja Jesús y'ëtsooy:

Nimajkmäjtsk miits të nwin'ixtë, je'eyëp ko tam tu'uk mëti'ipë ku'oypyë'ajtpën.

71Ko ja Jesús jëtu'un y'ënäny, ja Judas ënety tyijpy, ja Simón Iscariote ja myaank; tu'uk ja nimajkmäjtskpë ja Jesús ja y'ijxpëjkpë, jä'ä ko ja Judas ënety kyë'ëyakäämpy ja Jesús.

Valgt i Øjeblikket:

Juan 6: QUETZMIXE

Markering

Del

Kopiér