Marako 4
4
1Adi dre tandu bazo tadale todia yitapara laga. Dialezolepi bi dii we dreki rukebezo adi vuna, kadre nitini adi ši kaluṅbana, dre lirizo yina; dialezolepi dii aii dreki adrezo o̱ei yi laga ta’ana. 2Adi dre ta bi dii tadazo aiidri tandu alale dise, dre taza aiidri ai ta tadale dise, 3Mì koyi wa: Mì no ka, dia kori rilepi di afo kori ri. 4Kadre nitini adi dre kori rira’a arukana de lati laga, ari dreki alizo te na. 5Arukana dre dezo vo kiraro di mi, kini vo na mi we ko; nga dre mbazo mbelembele, kini dre adrele we ko dise. 6Kitu ko ka di nga dre lañuzo, dre ’yozo, dre adrele andu ako dise. 7Arukana dre dezo kucina, kuci dre mbazo ru na, nga dre ’azo ko. 8Arukana dre dezo vo tani di mi, dre mbazo ’ale, dre lezozo aruka ñadingi‐dri mudri, aruka ñabana, aruka ñadinji. 9Adi dre taza, Dia adrelepi bibale be ta yi di, koyi wa.
10Adi kadre kaloma di, dia adrelepi lagana dii, mudri‐dri‐iri nii be, dreki ta lizizo adi ti tandu alale dise. 11Adi dre taza aiidri, A fe ta Nzambeni mataya adea zule di amidri: a o nga o̱ei tandu alale dise dia adrelepi amve dii dri. 12Nitini nga nora’a aii koniro, dre atogiazoa ko; dre ta yira’a, aii koyiro, dre nizoa ko; ngale aii kalaro aiiki togo todi ya di, a kotizaro ta aiidri. 13Adi dre taza aiidri, Mì ni tandu alale nidi ko ya? Mì koniro tandu alale o̱ei dii angini ya? 14Dia kori rilepi di adre ta nidini ri. 15Dia adrelepi lati laga nii ta nidini rira’a di, aii ko yi di, drañano Setani ali, dre ta i dre rile aii lena di dozoa. 16Kadre nitini dia rile vo kiraro di mi nii, aii ko yi ta nidi di, drañano dre dozoa ari be; 17aiiki andu dayokodo, aiikia togo tro ca; dra tiza kaca ta nidise di, ta diaki mi fozo fofo di be, drañano aii o dele. 18Dia arukaba rile kucina dii; dia ta ni yilepi dii, 19ta vo adea olepi diaki togona kuku dii e, ta nga dre dia litizo di e, ta nga lavo azidi dre šizo diaki togona di be adreki ta nidi fu, dre ’azo ko. 20Dia rile vo tani mi dii, aii adreki ta nidini yi, dreki ka’izoa, dreki ’azo, aruka dre lezozo ñadingi‐dri‐mudri, aruka ñabana, aruka ñadinji.
21Adi dre taza aiidri, Aji tala bale kanji zona ya, bale langa zona ya? A ba fa‐tala‐bazo di dri ko ya? 22Ta o̱ei dre adrele zule, dii a kotada; a ba ado ta ya adrele liaro di, ta nidi kaforo ngadra’a. 23Ngale dia alo adrelepi bibale be ta yi di, koyi wa. 24Adi dre taza aiidri, Mì kolama ta mì dre yile di: ado nga ya nga tibizo di mì adre nga tibi asa; a kotibi nga amidri asa, a kofe azina amidri. 25Dia dre adrele nga be dise, a kofe nga akodidri: dia adrelepi nga ako di, a kodo nga akodi drikase, ngani tandi akodi dre adrezo aba di.
26Adi dre taza, Mataya Nzambe adea nitini, ngoro ago dre kori rile vudri di tini; 27dre kayizo, dre ngazo, nga̱cise, kituse, kori dre afozo mbale, adi ni togina dre mbazo di ko. 28Vo o laña afole i‐ase kaloma; dridri aluna, velero ñeru, velero mondu mvedre. 29Laña ko ka di, drañano adi li li be, lokia laña loazo di dre acale dise.
30Adi dre taza, Mà kozi mataya Nzambe adea ado nga tini ya? Mà kala tandu angotini ya mataya nidi tadazo diadri? 31Nzambeni mataya adre mutadikisia tini, a kori vudri di ngakisia camva ngakisia o̱ei dii vo adea ruse; 32a koridre vudri di, dre mbazo murungu amba laña o̱ei dii ruse, kolana murungu dii dreki afozo; kadre nitini aria bu adea kicoa lirile lindrina’a.
33Tandu alale bi nitini dise adi dre ta nidi tazoa aiidri, ngoro aii dre kicoale yile di tini: 34adi dre ta o̱ei dii alazo tale aiidri tandu alale diiro: adi tada tai o̱ei dia ai tandini tayilepi dii dri̱ aii taiya.
35Kitu anda dise, kitu ko ndi di, adi adre taza aiidri, Mà kozia ta’ana. 36Dre dialezolepi diiki ta’ira’a aii adriki adi ditini kaluṅbana. Kaluṅba azidii dreki adrezo adi be. 37Lia dre ngazo vile ṅbaṅba, yi dre kakpazo dile kaluṅbana, kadre nitini yi o ta tizo kaluṅbana. 38Adini tandi dre adrezo kaluṅbandua, adre ayiko bongodri, aii dre adini tirozo, dre taza adidri, Togilii, ami togo ti̱ amase ko mà kodraro ya? 39Adini mi dre tizo, adi dre lia ndrizo, dre taza yi murungu di dri̱, Mi kadre kedrikedri: mi kolovo ki̱ri. Lia akedre, nga go adrele ši we. 40Adi dre taza aiidri, Mì ro nga roro adose ya? Amiki ta ka’ile di dre yokodo ya? 41Aii dreki nga rozo roro ambani, aii adre taza aiiki kofulena, Ago nidi adi e ya? Liani tandi adre akodia ta o, yi murungu be.
Valgt i Øjeblikket:
Marako 4: LOG
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
first printed by the British and Foreign Bible Society in 1924 and 1927.
