Marako 10
10
1Adi dre ngazo lile dalese, dre acazo kofula Yudaya’a di‐a Yoradene ni ta’ana; dialezolepi we dii dreki gozo rukebe adi vuna todia; adi dre ta tadazo aiidri todia, ngoro adi dre adrele ole di tini. 2Farusii dreki alizo adi vuna, dreki ta lizizo adi ti, dre adini litira’a ki di, Togi e ya ago adre tokona ta’i? 3Adi dre ta akozo, dre taza aiidri, Ado togi ya Mose dre tale amidri? 4Aii dreki taza, Mose ka’i waraga toko ta’izo di tišizo dre adini ta’izo. 5Yesu dre taza aiidri, Adi tiši togi nidi amidri amiki togo dre adrele mbamba dise. 6Ta nga kayu bazo di Adi ba aii ni, agoro, tokoro. 7Tandu nidise ago kota’i atana, andrena be, kotroro tokonaru; 8aii iri niiki za go adrele alo, kadre nitini aii go adrele dia iri diiro todia ko, aiiki za alo. 9Kadre nitini dia angodi ya Nzambe atona aiidre, dia kolanji aii ko. 10Dia adini tayilepi dii dreki ta lizizo adi ti jona todia tandu nidise. 11Adi dre taza aiidri, Dia angodi ya ta’i tokona, dre toko azidi mozo, dre ta toko kamvozo di ozo adiru. 12Tokoni tandi kota’i agona di, dre ago azidi mozo, dre ta ago kamvozo di ozo.
13Aii dreki anjimva ki ajizo adi vuna, adi kotabero aii; dia adini tayilepi dii dreki aiiki ndrizo. 14Yesu ko no di, adre kumba o, dre taza aiidri, Mì koka’i anjimva dii dri alizo ma vuna: mì kologa aii re ko: Nzambeni mataya dre adrele aii tini dise. 15Ma ta amidri pati, Dia angodi ya kodri mataya Nzambe adea anjimva tini ko, koširo teji lena ko. 16Adi dre aiiki dozo i drika, dre drika bara’a aiiru, ba beneditu aiidri.
17Adi dre lira’a latia dia alo di ra adi vuna, dre ai ka’yati tizo adi kandra, dre ta lizizo adi ti, ki di, Togilii tani di, ma ko’o ado ya, ma kodoro lidri kolia. 18Yesu dre taza akodidri, Mi zi ma tani adose ya? Dia tani di yokodo, alo Nzambe tani kodi’a. 19Mi ni togi ole, Mi kofu dia drale ko; mi kokamvo dia ko; mi kokugu nga ko; mi ko’o kinzo tandu tara’a ko; mi ko’o ta loabaro ko; mi koba ami atani kañi, ami andre be. 20Akodi dre taza adidri, Togilii, ta nii o̱ei ma odre, ma dre adrera kaduraro di‐a. 21Yesu dre mi bara’a akodiru le akodi, dre taza akodidri, Ta ambi alo midri: mi koli, ado nga ya mi dri̱ka di mi kogi, dre fezo dia lemerero di dri̱, mi kadrero masoro be bua: mi kali, dre alizo ma vuse. 22Akodi mi anji di̱di̱ ta tale nidise: akodi dre adrele nga be we dise.
23Yesu dre mi lebezo i lagase, dre taza dia ai tayilepi di dri̱, Dia adrelepi nga be we dii aiiki šiši Nzambeni matayana di kokoroko kani’a. 24Dia adini tayilepi diiki lindri dre gazo gaga adini tase. Yesu ako ta todia, dre taza aiidri, Anjia, dia ka’ilepi nga we di dri̱ dii aiiki šiši Nzambeni matayana di kokoroko. 25Amba ta añi kameli lavu sindani miase, ta ngalii dre šile mataya Nzambe adea lena di ruse. 26Aiiki lindri dre gazo gaga ambani, dreki ta tara’a adidri, ki di, Kadre ditini di dia angodi kicoa rutedri ni ya? 27Yesu dre mi bara’a aiiru, ki di, Ta nidi pi dia vele, pi Nzambe ko: ta alo di dre Nzambe pile ko dise. 28Petero dre tandu bazo tale adidri, ki di, Mi no ka, mà ta’i amakia nga o̱ei dre, alizo mi vuse. 29Yesu dre taza, Ma ta amidri pati, Dia ai jo ta’ilepi di, ai adrupiki ta’ilepi di, ai amvupiki ta’ilepi di, ai andreni ta’ilepi di, ai atani ta’ilepi di, ai anjiaki ta’ilepi di, ai voki ta’ilepi, ama tandise di, tandu tani dise di, 30akodi kodo ta lezolepi dii kama alo di ñanomvano lokia nidise, joe, adrupiae, amvupiae, andrae, anjia be, vce be, ta mi fole dii be; lokia alilepi velero dise akodi kodoro lidri kolia. 31Dia bi dridri dii kadrero dia velero diiro; dia velero dii kadrero dia dridri diiro.
32Aii dreki lizo lati balena, mbara’a Yerusalemina; Yesu dre dezo aii kandra dridri: aiiki lindri dre gazo gaga, dia lilepi aii vuse dii roro kani’a. Adi dre mudri‐dri‐iri niiki drizo todi i vuna, dre ta acalepi idri velero dii andu bazo tale aiidri, 33Adi ki di, Mì no ka, mà mba Yerusalemina: a kofe Adamuni Mva koani dridri dii dri̱, dia tatišilepi dii dri̱ be; aii kota adini tavo kodraro, aii kofe adi šuru adeadri: 34aii kota̱bi adi, dre tušu fuzo adiru, dre adini coazo kinise, dre adini fuzo drale; kitu na velero dise adi dre ngazo todia.
35Dia dreki alizo añi adi vuna, Yakobo e, Yoane be anjiago Zebedayo adea, aii dreki taza adidri, Togilii, mà le ta ma dre zile mi ti di mi ko’oro amadri. 36Adi dre taza aiidri, Mì le ma ko’oro amidri ado ta ya? 37Aii dreki taza adidri. Mi koka’i amadri mà koliriro, alo ami drigualese, alo lijialese, ami utukufuna. 38Yesu dre taza aiidri, Tai mì dre zile ma ti di, mi ni ko kani’a, Mi kicoa kega ma dre mvule dini mvu ya? Mi kicoa batisimo do ngoro ma dre dole di tini a kobatisi ami asa ya? 39Aii dreki taza adidri, Mà kicoa kani’a. Yesu dre taza aiidri, Kega ma dre mvule di mì komvu vele; batisimo ma dre dole di mì kodo indi: 40Ta lirizo ama drigualese, ama lijialese di ama ta ma dre fele di ko; ta nidi aiikia di a lede dre aiidri. 41Mudri nii ko yi ta nidi di, aii ba tandu lawazo Yakobo be Yoane be. 42Yesu dre aiiki zizo i vuna, dre taza aiidri, Mì ni dia adrelepi ta fe miriki voa šuru adeadri dii adreki ta fe miri tini aiidri; aiiki dia murungu dii adreki ta o mi la̱njila̱njise aiidri. 43Kadre nitini amiki kofule ko: ta adrezo murungu di lavo ru dia angodi ya amiki kofule akodi kadre dia ta olepi amidri di: 44ta adrezo dridri di lavo ru dia angodi ya amiki kofule, akodi kadre diadri o̱ei adremakandraro. 45Adamuni Mva dre alile dia dre ta ole idri ko dise pati; i dre alizo ta o diadri, dre ai lidri fezo dia bi niidri aiiki logozo.
46Aii dreki acazo Yerikona: adi dre ngara’a Yerikolese dia ai tayilepi dii be, dialezolepi bi dii be, mva Timaya adea, runa Batimaya, dia miako nga zilepi di, dre lirira’a lati laga. 47Akodi ko yi di nidi Yesu Nazaretalese di e, dre ao bazo ngole, dre taza, Yesu, mi Dawidini mva, ami togo koki̱ni maru we. 48Dia bii dreki akodia ta zezo zeze, akodi agi titi: akodi ngo ambani, ki di, Mi, Dawidini mva, ami togo koki̱ni maru we. 49Yesu dre adrezo kiri, dre taza, Mì kozi akodi. Aii dreki ago miako di zizo, dre taza akodidri, Ami togo koki̱ni: mi konga, adi ara ami zi. 50Akodi dre bongo bera’a i ruse, dre ngazo kuru mbele, dre alizo Yesu vuna. 51Yesu dre ta akozo akodidri, dre taza, Mi le ma ko o midri ado ta ya? Ago miako di dre taza adidri, Rabboni, ma konoro nga. 52Yesu dre taza akodidri, Mi koli; ami ta ka’ile di lede mi dre. Drañano akodi dre nga nozo dre lizo adi vuse latina.
Valgt i Øjeblikket:
Marako 10: LOG
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
first printed by the British and Foreign Bible Society in 1924 and 1927.
