San Juan 8
8
Te' cʌtzʌjcʌ'opyapʌ yomo
1Pero Jesús maŋu Olivo-tʌc pu'mnacʌsi. 2Y namdzuc witu'u Jesús te' templo'ojmo, y cumgu'yis quiʌtu'mʌyu. Y pocsquejcu'c inʌc nʌ 'yaŋma'yoyu tey. 3Pijche'ca ñʌminjayaju Jesús tumʌ yomo te' aŋgui'mguy-tyayu'sta'm y te' fariseo'sta'm, pya'tjumbʌ'yajupʌ nʌ'c quiʌtzʌjcʌyu jyayaj. Quiojtyaju pʌ'nʌcucmʌ Jesujsis wyi'na'ŋoyj, 4y ñʌjayaju: Maestro, yʌ' yomo mero nʌ'c quiʌtzʌjcʌyu'c jyayaj pya'tjumbʌ'yaju. 5Aŋgui'mgu'yojmo Moisejsistʌj aŋgui'mu wa'ytyʌs ndʌŋga'yaju tza'pit yʌ'šejta'mbʌ yomo. Pero mis, ¿tiya' ndzamba?
6Pero yʌ'šej maŋu ñʌjayaju Jesús wa'ytyij 'yoc'išaju. Sunba inʌc pya'tyaju tiyʌcʌsi wa'y ñiwa'cʌyaju. Pero mujcʌñe'cu Jesús y jayu nascʌsi myosipit. 7Pero como jyaque-cʌ'aŋwa'quiajpa inʌc, ʌ'mgui'mu Jesús y ñʌjayaju te' pʌnda'm: Jutiwʌ's ja'ndiyʌ quiowa mi'ojmota'm yajpʌcʌ tza' y yajtʌŋnitzʌcʌ.
8Y mujcʌñe'cwʌtzʌjcu y jaquiʌ'quie'tu nascʌsi. 9Myatoŋyaju'ctij yʌ'šej ñe'cʌ'sta'm ñʌctʌ'yaju choco'yojmo tumduma'ŋbʌ'nis que ijtyaju quiowa, y ca'ŋga'ŋñayu'c tzu'cumyaju. Wina tzu'cumyaju te' tzamupʌnda'mbʌ 'y yucaŋgʌ'ytya'm tzu'cumyajque'tu te' ŋga'eta'm. Ñaytyumʌ tzʌ'yu Jesús y te' yomo cucmʌ inʌc tenayupʌ. 10Y ʌ'mgui'mwʌtzʌjque'tu Jesús, y como ya'iwa' jaquiena sino que te' yomo, ñʌjayu: ¿Mij yomo, juta' ijtyaju te' ñicotza'mʌyajpapʌ'smij? ¿Janyajnʌco'aŋgʌ ya'iwʌ's? 11Te' yomo's 'yaŋdzoŋu: Ya'iwʌ's, Señor. Pijche'ca Jesujsis ñʌjayu: Ni ʌs ja'ʌsmij nyajnʌco'aŋgʌy. Mawʌ, y u'ya cowapa'tque'temaj.
Jesús yajsʌ'ŋgʌ'ajapyapʌ's pʌ'nista'm chocoy
12'Yoto'ŋʌwyʌtzʌquiaju Jesujsis te' tu'mʌyajupʌ te' templo'ojmo, y ñʌjayaju: Ʌste' sʌ'ŋgʌtzʌcjayajpa najsacopajcʌsita'mbʌ pʌ'nis chocoy. Iwʌ'sʌj co'ŋba ʌj ja'n wyiti pi'tza'ŋajcu'yojmo, sino que sʌ'ŋba te' chocoy, pya'tpapʌpit iscuy-quenguy. 13Pijche'ca te' fariseo'sta'm ñʌjayaju: Ne' nwin mis te' ndzamba, mis ndzambašej ja'ndʌs mbʌjcʌchowe wiyuŋbʌ tiyʌšej. 14'Yaŋdzoŋyaju Jesujsis: Wempe ʌsne' nwin ndzamʌ, ndzambaše'ʌs wiyuŋbʌ tiyʌte', porque muspa'ʌs jutʌ'ʌjyʌ' tzu'cumu y jutʌ'ʌj maŋba. Pero mista'm ja'nmis mustame jutʌ'ʌjyʌ' tzu'cumu ni jutʌ'ʌj maŋba. 15Šuñajpašej pʌ'nis te'šejmij ŋguiʌme'tzoytyamba, pero ʌs ja'ʌs ŋgʌme'tze ya'iwʌ. 16Y juca ʌs ŋgʌme'tzpa iwʌjutiwʌ, wiyuŋbʌ tiyʌpi'tʌs ŋgʌme'tzpa porque ja'nʌjyʌ' naytyumʌpʌ, sino que ʌji'ŋ ijtu ʌs Ndata Dios cʌ'wejupʌ'sʌj. 17Mista'm aŋgui'mgu'yojmo ja'yʌyu nʌmbamʌy que metza'ŋbʌ'nis chame, te'wʌ mbʌjcʌchoŋdambamis wiyuŋbʌ tiyʌšej. 18Ʌs ŋgotzamba'ʌs ne' nwin, y tzamgue'tpa'ʌj ʌs Ndata's te' cʌ'wejupʌ'sʌj. 19Ñe'cʌ'sta'm quiʌ'aŋwa'quiaju: ¿Juta' jeque ijtu mis Ndataj? Aŋdzoŋu Jesús: Ja'nmisʌj ispʌctame ʌj ni ʌs Ndataj. Juca inʌc misʌj ispʌctamba ʌj, ispʌcjaytyambamis inʌc ʌs Ndataj.
20Yʌ'šejta'mbʌ tiyʌ chamu Jesujsis te' quiojtyajumʌy tzi'oquiuy, nʌ'c 'yaŋma'yoyu te' judio-templo'ojmo. Y ya'iwʌ's jañucʌ, porque jañu'cʌ'cmajte' hora wa'y quia'u.
Ʌj maŋbamʌy mijta'm ja'nmij musi mindamu
21Y ñʌmwʌtzʌcjayaju Jesujsis: Maŋba'ʌj, y maŋbamisʌj me'tztamu, pero mijta'm cowatzʌquimij maŋba ŋguia'tamu. Maŋbamʌ'yʌj ʌj mista'm ja'nmij musi mindamu. 22Pijche'ca nʌmyajque'tu judiota'm: ¿Maŋbasʌ'ŋ yajca'u ñe'cʌ's wyin, te'cotoya nʌmba: Maŋbamʌ'yʌj ʌj mijta'm ja'nmij musi mindamu? 23Y ñʌjayajque'tu Jesujsis: Mijta'm najsacopajcʌsita'mbʌ mijyʌ', pero ʌj tzajpojmocpʌ'ʌjyʌ'. Mijta'm najsacopac-itita'm mijyʌ', y ʌj, ja'nʌjyʌ' najsacopac-iti. 24Te'cotoya'ʌsmijte' nʌjaytyamu que cowatzʌquimij maŋba ŋguia'tamu. Juca ja'nmisʌj nwʌ'aŋjamdame que ʌjte' te' ndzamuše'amʌs, cowatzʌquimij maŋba ŋguia'tamu. 25Y quiʌ'aŋwa'quiaju: ¿Mij, iwa'mijyʌ'? Pijche'ca Jesujsis ñʌjayaju: Ndzamjaytyamuše'amʌsmij desde nʌcʌtzo'tzu'cʌs aŋma'yoquiuy. 26Ijtu sone tiyʌcʌsi'ʌsmij wa'y ŋgotzamdamu y ŋgʌme'tztamu. Pero te' cʌ'wejupʌ'sʌj wiyuŋbʌ Tatajte', y tiyʌ'ʌj yajmatoŋu ñe'cʌ's, te'še'ʌs ndzamjayajpa najsacopajcʌsita'mbʌ.
27Pero jañʌctʌ'ya ñe'cʌ'sta'm que Jesujsis nʌ inʌc chamu Tata Dios. 28Te'cotoya ñʌjayajque'tu Jesujsis: Ʌjte' te' tzajpojmoc minupʌ. Nyajqui'mdamba'camisʌj cruzcʌsi, pijche'c mis maŋba nʌctʌ'ytyamu que ʌjte' maŋba minupʌ inʌc, y que ja'ʌs ndzʌqui ne' su'noquiuy. Aŋmayuše'ʌj Ndata's, te'wʌ ʌs ndzamba. 29Porque ʌj Ndata'sʌjyʌ' cʌ'weju y ʌji'ŋ ijtu. Jachacʌti'ʌj naytyumʌ Ndata's, porque ndzʌcjojcʌtʌcpa'ʌs šunbašej ñe'cʌ's. 30Nʌ'c inʌc chamu Jesujsis yʌ'šejta'mbʌ tiyʌ, wʌwʌ pʌ'nis wyʌ'aŋjamyaju ñe'cʌ.
Diojsis 'yuneta'm y te' nuyu'ajyajupa'a cowatzʌjcu'yojmo
31Y te' judiota'm, wyʌ'aŋjamyajupʌ's, ñʌjayaju Jesujsis: Mijta'm, juca myato'ŋoytyambamij ndzamjaytyamuše'ʌsmij, wiyuŋšejpʌ ʌs ŋgʌ'aŋmaye mijta'mde? 32Y maŋbamis mustamu wiyuŋbʌ tiyʌ, y te' wiyuŋbʌ tiyʌ'smij maŋba ŋguiotzoctamu. 33Y 'yaŋdzoŋyaju: Abraha'ŋistʌjyʌ' wyinboya, y yajujche'c tʌs ya'iwʌ ja'n mozo'ajay. ¿Tiyajca'nde' mij ñʌmba: Maŋbamij ŋguiotzoctamu? 34Jesujsis 'yaŋdzoŋyaju: Wiyuŋše'ʌsmij nwiyuŋdzamjaytyamba que iwʌ cowapa'tjojcʌtʌcpa, cowa'ste' quioyosa. 35Y te' coyosa ja'n chʌ'yoctuqui te' tʌjcoyj. Pero te' une tzʌ'pya mumu jamacotoya. 36Te'šej jeque ʌjte' te' Une, y juca nyajcotzoctamba'ʌsmij, wiyuŋšej ŋguiotzoctambamij.
37Muspa'ʌs que Abraha'ŋismijte' wyinboyata'm. Pero ndzʌcme'tztambamis wa'misʌj nyajca'tamu, porque ja'na tyʌjcʌy ʌs ndzamyajupʌ tiyʌ mista'm ndzoco'yojmo. 38Ndzamba'ʌs tiyʌ'ʌs ŋguenu ʌs Ndata's wyi'naŋdʌjqui. Y mista'm ndzʌctambamis tiyʌmis matoŋdamu mista'm ndata's wyi'naŋdʌjqui. 39'Yaŋdzoŋyajque'tu: Tʌs ndataj, Abrahaŋde'. Ñʌjayaju Jesujsis: Juca inʌc mij Abraha'ŋis 'yuneta'm, Abraha'ŋis chʌjcušej te'šejmis inʌc ndzʌctaŋgue'tpa. 40Pero yʌtij ndzʌcme'tztambamis wa'misʌj nyajca'tamu, y ndzamjaytyamu'ʌsmij wiyuŋbʌ tiyʌ yajmatoŋuše'ʌj Diojsis. Abraha'ŋis jaquipsʌ yajca'oquiuy. 41Mis ndzʌctambamis chʌcpašej inʌc mista'm ndata's. Pijche'ca ñʌjayaju Jesús: Tʌj, ja'ndʌjyʌ' ispʌqui-une. Tumʌtij ijtu tʌs Ndataj, te'wʌte' te' Dios. 42Pijche'ca Jesujsis ñʌjayaju: Juca inʌc Dios mista'm Ndataj, wiyuŋšej sundambamisʌj inʌc ʌj, porque ʌj, tzu'cumu'ʌj ijtumʌy Dios, y minu'ʌj yʌy. Jaminʌ'ʌj ne' su'noquiupyit, ñe'cʌ'sʌjyʌ' cʌ'weju. 43¿Tiyajca'nde' ja'n ŋgoquendame cuenta tiyʌ'ʌs nʌ ndzamu? Porque ja'n pya'jay mista'm ndzocoy ʌs ndzamyajupʌ tiyʌ's. 44Mijta'm diablo's mijyʌ' 'yuneta'm, te'wʌte' mista'm ndataj. Y mista'm ndata's šu'noquiuy, te'wʌ mis sunba ndzʌcjaytyamu. Ñe'cʌ yajca'opyapʌte' desde cho'tzcu'yojmo, y yajujche'c ja'n chʌqui wiyuŋbʌ tiyʌ porque ja'ndiyʌ wiyuŋbʌ tiyʌ ñe' choco'yojmo. Chamba'c sutzi ñe' quio'quips chamba, porque sutzpapʌte' y ñe'cʌ sutzi's te' pyo'c. 45Pero como ndzamba'ʌs wiyuŋbʌ tiyʌ ʌs, ja'nmisʌj nwʌ'aŋjamdame. 46¿Mi'ojmota'mbʌ's ijtusʌ'ŋ iwʌ's pya'tjapya ʌs ŋgowa? Nʌ'ʌs ndzamu wiyuŋbʌ tiyʌ, y ¿tiyajca'mʌjte' ja'n nwʌ'aŋjamdame? 47Iwʌta'm Diojsisñe' myatoŋjayajpa Diojsis chame. Te'cotoya ja'nmis ŋgʌmato'ŋʌytyame mista'm porque ja'n mijyʌ' Diojsista'mñe'.
Ja'ndiyʌ'cmaj yajtiyʌ Cristo ijtu'ctya'nde'
48Pijche'ca aŋdzoŋyajque'tu te' judiota'm y ñʌjayaju: Nʌtijtʌjte' nʌmu Šamaria-pʌnmijyʌ', y ñʌc'ijtʌyumij yatzi-espiritu's. 49Aŋdzoŋu Jesús: Ʌj jañʌc'ijtʌ'ʌj yatzi-espiritu's, sino que ŋgʌna'tzʌpya'ʌs Ndataj. Pero mista'm ja'nmisʌj ŋgʌna'tzʌytyame. 50Y ʌs ja'ʌs me'tze ne' mʌja'ŋajcuy. Ijtu iwʌ's mye'tzjapya y ñe'cʌte' te' cʌme'tzopyawʌ. 51Wiyuŋše'ʌsmij nwiyuŋdzamjaytyamba, iwʌ's quiojamjapya ʌs ndzame ja'n maŋu quia'u mumu jamacotoya.
52Pijche'ca ñʌjayaju judio's: Yʌytyʌs ŋgʌnʌctʌ'pya que ñʌc'ijtʌyumij yatzi-espiritu's. Con que Abrahán ca'u, y ca'yajque'tu tza'maŋwa'oyajpapʌ, y mij ñʌmbamij: Iwʌ's quiojamjapya ʌs ndzame ja'n maŋu quia'u mumu jamacotoya. 53¿Masja jequemij myʌja'ŋ que ja'nde' tʌs ndata'a'ŋucu Abrahán? Ca'u ñe'cʌ, y ca'yajque'tu te' tza'maŋwa'oyajpapʌ, ¿iwʌše'a ndzʌcpa ne' nwin?
54Aŋdzoŋu Jesús: Juca ne'cʌ'ʌs mʌja'ŋdzʌcpa nwin, ʌs mʌja'ŋajcuy yajtiyʌte'. Ʌste' Ndata'sʌj yajmʌja'ŋajpa, y mij ñʌmdambamij que ñe'cʌte' mista'm Dios. 55Pero ñe'cʌ ja'nmis ispʌctame, pero ʌs ispʌcpʌ'ʌs. Juca nʌmba'ʌj que ja'nʌs ispʌqui sutzpa inʌjcʌj jujcha' mij šutztamba. Pero ʌs ispʌcpa'ʌs y ŋgojamjapya'ʌs ñe' chame.
56Tʌta'm ndata'a'ŋucu Abraha'ŋis ñʌ'omu ñʌctʌ'yu'c que maŋba inʌjcʌj minu najsacopajcʌsi. Quenu'ʌj, y ñʌ'omu. 57Pijche'ca ñʌjayaju judio'sta'm: Ja'ndiyʌmaj ni wʌstʌjqui's-co-mac mis ame, ¿y ŋguenumaja Abrahán? 58Y ñʌjayaju Jesujsis: Wiyuŋše'ʌsmij nwiyuŋdzamjaytyamba: Ja'ndiyʌ'cmaj Abrahán, ʌj ijtu'ctya'mʌjte'.
59Pijche'ca pyʌquiaju tza' wa'y tyʌŋga'yaju. Pero Jesujsis quiʌwʌ'nu wyin, y pujtu te' templo'ojmoc. Y cʌtʌjcu ñe'ta'm quiucmʌ, y maŋu.
Valgt i Øjeblikket:
San Juan 8: ZCNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Zoque Copainalá © Sociedad Bíblica de México, A.C. 1967.
