San Juan 9
9
Yajtzojcu Jesujsis to'titya'a pʌ'najupʌ pʌn
1Y nʌ'c myaŋu Jesús quienu tumʌ pʌn to'titya' pʌ'najupʌ. 2Y tʌs, te' quiʌ'aŋmaye's ŋgʌ'aŋwa'cutʌs: ¿Maestro, iwa'sʌ'ŋ cowapa'tu yʌ'wʌ o tyatajta'm wa'y to'tipʌytya' pyʌ'naju? 3Aŋdzoŋu Jesús: Ja'nde' juca cowapa'tu yʌ'wʌ, ni tyatajta'm, sino que wa'ytye' quieju Diojsis isaŋwʌ'ajcuy ñe'cʌcʌsi. 4Nʌ'cše'ŋo'yʌj tzi'yaju lugar wa'yʌj nyojsu pyʌcpa wa'yʌs ndzʌcjayu Diojsis yoscuy, porque ñe'cʌ'sʌj cʌ'weju. Porque maŋba minu te' aŋsʌŋ ja'nandʌ maŋu tzi'yaju lugar wa'ytyʌ nyostamu. 5Yʌ'yʌj ijtu'cše'ŋoyj najsacopajcʌsi ʌste' sʌ'ŋgʌtzʌcjayajpa najsacopajcʌsita'mbʌ pʌ'nis chocoy.
6Yʌ'še'a nʌmu'c, tzuju nascʌsi y chʌjcu mote chuwinbit. Y te' motepit jyasjayu te' to'tipʌ's wyitʌm. 7Y ñʌjayu: Ma cotze'a Siloe-tanque'ojmo (y te' Siloé sunbate' ñʌmu: Cʌ'wej). Pijche'ca maŋu y quioche'u, y quenba'ca witu'u.
8Y te' tome ijtyajupʌ's y te' ispʌquiajpapʌ's desde une'cmaj que to'tipʌte' inʌc, nʌmgʌ'yaju: ¿Ja'nja jequete' yʌ'wʌ te' yʌy pocspapʌ inʌc wa'y wya'cu? 9Wene pʌn nʌmyajpa inʌc: Yʌ'wʌte'. Y eyata'mbʌ nʌmyaju: Ñe'cʌšej quenba. Pero ñe'cʌ nʌmu: Pijtʌjyʌ'. 10Te'cotoya quiʌ'aŋwa'quiaju: ¿Jutza' jeque yʌtij sʌ'ŋba mis nwitʌm? 11Aŋdzoŋu ñe'cʌ y nʌmu: Te' pʌn ñʌjayajpapʌ Jesús, te'wʌ's chʌjcu mote y jyasjayu ʌs nwitʌm y nʌjayu'ʌj: Mawʌ Siloe-tanque'ojmo y tze'a. Tiju'ʌs ndze'u, y yʌtij quenba'mʌj. 12Pijche'ca ñʌjayaju: ¿Juta' ijtu te' ñcho'yʌyupʌ'smij? Y ñe'cʌ nʌmu: Ja'ʌs musi.
Fariseo'sta'm 'yaŋwa'cpʌquiaju te' to'tiwʌ inʌc
13Y ñʌmaŋyaju fariseo'sta'm wyi'naŋdʌjqui te' to'tipʌ inʌc. 14Y sabado-jamate' inʌc chʌjcu'c Jesujsis te' mote wa'y yajsʌ'ŋjayu te' wyitʌm. 15Y te' fariseo'sta'm quiʌ'aŋwa'quiajque'tutij jutzte' yajsʌ'ŋjayu te' wyitʌm. Y te' to'tipʌ inʌc aŋdzoŋu: Cotjayu'ʌj mote nwitʌmgʌsi. Ndze'u'ʌs, y yʌtij quenba'mʌj. 16Pijche'ca metza tuca'y te' fariseo nʌmyajpa inʌc: Te' cho'yʌyupʌ's ja'nde' Diojsis quiʌ'weju porque ja'n quiojame sábado. Eyata'mbʌ nʌmyajpa inʌc: ¿Jutza' jeque muspa chʌjcu yʌ'šejta'mbʌ isaŋwʌ'ajcuy cowatzʌquipʌ pʌ'nis? Y quipotoŋgʌ'yaju ñe'co'mo.
17Y quiʌ'aŋwa'cwʌtzʌquiaju te' to'tipʌ inʌc: ¿Mis, tiya' ndzamba, iwa'sʌ'ŋde' yajsʌ'ŋjayupʌ's mis nwitʌm? Y ñe'cʌ nʌmu: Tza'maŋwa'opyapʌte'. 18Pero jawyʌ'aŋjamya te' judio'sta'm juca ñe'cʌte' te' to'tipʌ inʌc, y tzocwa'a wyitʌm. Pijche'ca wyejayaju tyatajta'm te' to'tipʌ'sñe'. 19Aŋguejyaju, y quiʌ'aŋwa'quiatʌju: ¿Yʌ'wʌjate' te' mista'm une? ¿Yʌ'wʌjate' te' ñʌmdambapʌmij to'tipʌytya'a pʌ'najupʌ? ¿Jutza jequeyʌ' yʌtij quenba'a? 20'Yaŋdzoŋyaju te' tata'sta'm: Muspatʌs que yʌ'wʌ tʌsyʌ' une y to'tipʌytya'a pʌ'naju. 21Pero ja'ndʌs musi jutzyʌ' yʌtij sʌ'ŋba'a wyitʌm. Y ja'ndʌs musi iwʌ's yajsʌ'ŋjayu. Tzamupa'ʌ', cʌ'aŋwa'ctamʌ ñe'cʌ. Ñe'cʌ's yajtzamʌ. 22Yʌ'šej nʌmyaju te' tyatajta'm porque ña'chajpa inʌc te' judiota'm porque nʌmyaju'ctya'nde' que iwʌ nʌmba que Jesuste' te' Mesías, maŋba myacpujtyaju te' ñe'ta'm wyindʌjcojmoc. 23Te'wʌcotoya nʌmyaju te' tyatajta'm: Tzamupa'ʌ', cʌ'aŋwa'ctamʌ ñe'cʌ.
24Pijche'ca wyejwʌtzʌquiaju te' pʌn to'tipʌ inʌc y ñʌjayaju: Wʌcotzamʌ Dios y ja'n te'wʌ, porque tʌs muspatʌs que te'wʌ cowatzʌquipʌ pʌnde'. 25Pijche'ca ñe'cʌ's 'yaŋdzoŋyaju: Tey ja'na'mʌs musque'te juca cowatzʌquite'. Tiyʌ'ʌs yʌtij muspa que to'ti inʌjcʌj, y yʌtij quenba'mʌj. 26Y ñʌmwʌtzʌcjayajque'tu: ¿Tiyʌpi'ta ñcho'yʌyu? ¿Jutza'nde' nyajsʌ'ŋjayu mis nwitʌm? 27'Yaŋdzoŋyajque'tu: Ndzamjaytyamwa'mʌsmij y ja'nmis ŋgoquendame cuenta. ¿Tiyajca'nde' sunba matoŋwʌtzʌctaŋgue'tutij? ¿Sunbasʌ'ŋ mij ŋguiʌ'aŋmaye'ajtaŋgue'tu? 28Y quioraje-otoŋjayaju y nʌmyaju: Mij, ñe'mijyʌ' quiʌ'aŋmaye, pero tʌj, Moisejsistʌjyʌ' quiʌ'aŋmaye. 29Muspatʌs que Moisés 'yoto'ŋʌyu Diojsis, pero ʌ'wʌ ja'ndʌs musi jutʌpʌ'ʌ'.
30Aŋdzoŋu te' pʌn, y ñʌjayaju: Wiyuŋšej maya'cupyʌ tiyʌyʌ' yʌ'wʌ. Mista'm ja'nmis mustame jutʌpʌ'ʌ', y yajsʌ'ŋjayu ʌs nwitʌm. 31Mustambatʌ que Diojsis ja'n quiʌmato'ŋʌy cowatzʌquita'mbʌ. Pero juca iwʌjutiwʌ's quiʌna'tzpa Dios, y chʌcpa ñe'cʌ's šunbašej, yʌ'wʌ quiʌmato'ŋʌpya Diojsis. 32Yajujche'cmajtʌ jamyatoŋdʌ'ʌ juca iwʌ's yajtzoctʌ'wa'a to'titya' pʌ'najupʌ pʌn. 33Juca inʌc ja'n Diojsis quiʌ'weju, ja'n inʌc musi chʌjcu yʌ'šejta'mbʌ tiyʌ. 34Ñʌjayajque'tu fariseo'sta'm te' to'tipʌ inʌc: Saŋgowatzʌquimijyʌ' mbyʌ'naju, ¿y sunbajatʌj aŋmayu mis? Y myacpujtyaju te' ñe'ta'm wyindʌjcojmoc.
Ja'n ñʌctʌ'yapyʌ's wiyuŋbʌ tiyʌ
35Myujsu Jesujsis que myacpujtyajwa'a, y pya'tque'tu'ca ñʌjayu: ¿Nwʌ'aŋjambaja te' Diojsis 'Yune? 36Aŋdzoŋu te' to'tipʌ inʌc: Señor, tzamja'ʌj iwʌte' te' Diojsis 'Yune wa'yʌs nwʌ'aŋjamu. 37Y Jesujsis ñʌjayu: Nguenwa'mis. Pijtʌjyʌ', yʌ'yʌj nʌ ndzamdzamnayu miji'ŋ. 38Y ñe'cʌ nʌmu: Señor, nwʌ'aŋjamba'ʌsmij. Y cutcʌne'cu wyi'naŋdʌjqui.
39Y nʌmu Jesús: Minu'ʌj yʌ' najsacopajcʌsi wa'y Diojsis quiʌme'chaju pʌnda'm, wa'y iwʌ'sta'mis ja'ndiyʌ quipsoquiu'yis šʌ'ŋgʌ' wa'yʌs nyajsʌ'ŋjayaju quipsoquiuy, y te' nʌmyajpapʌ's que sʌ'ŋyajpa wyitʌm wa'y jana ispʌquiaju te' wiyuŋbʌ tiyʌ. 40Tey inʌc ijtyaju fariseo ñe'cʌji'ŋ y myatoŋyaju yʌ'šej, y ñʌjayaju: ¿Te'šejtijsʌ'ŋ ja'n šʌ'ŋgue'te tʌs nwitʌm? 41Ñʌjayaju Jesujsis: Juca inʌc ja'ndiyʌ mista'm ŋguipsoquiu'yis šʌ'ŋgʌ' ja'ndiyʌta'm inʌc mis ŋgowa. Pero yʌtij como ñʌmdambamij que sʌ'ŋba mista'm ŋguipsoquiuy ittamu mis ŋgowa.
Valgt i Øjeblikket:
San Juan 9: ZCNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Zoque Copainalá © Sociedad Bíblica de México, A.C. 1967.
