San Juan 6
6
Pyʌ'nʌyu Jesujsis mosa'y mil pʌn
(Mt. 14.13-21; Mr. 6.30-44; Lc. 9.10-17)
1Jʌsa'ca maŋu Jesús te' Galilea-ma'ra'ocwinduc, y te'wʌtijte'que' Tiberias mar. 2Nʌ inʌc quio'ŋu Jesús wʌwʌ pʌ'nis porque quieñaju jutz inʌc chʌcpa isaŋwʌ'ajcuy wa'y yajtzojcu ca'eta'mbʌ. 3Y qui'mutʌj Jesusji'ŋ pu'mnacʌsi ŋgʌ'aŋmaye-tʌwʌji'ŋ y maŋutʌj mbocsu tey. 4Nʌ inʌc tyo'mʌyu te' pascua-sʌŋ, quiosʌ'ŋajyajpapʌ inʌc judio'sta'm. 5Quengui'mu Jesús y quienu jutz wʌwʌ pʌn cutzunu'quiaju. Pijche'ca ñʌjayu Felipe: ¿Juta'ndʌ njuytyʌ'pa cu'tcuy wa'ytyʌ mbʌ'nʌyaju yʌ'ta'mbʌ? 6Wa'ytyijte' inʌc chʌjquisu Jesujsis yʌ'šej ñʌjayu. Ñe'cʌ's myuspawʌytya'nde' inʌc tiyʌ maŋba chʌjcu. 7'Yaŋdzoŋu Felipe's: Majqui's denariojpyʌ pa'ŋis ja'n maŋu quiʌpa'tyaju ni uša'ŋ uša'ŋ wa'y quiu'tyaju tumduma'ŋbʌ'nis. 8Tey inʌc ijtu tumʌ te' Jesujsis quiʌ'aŋmaye ñʌjayajpapʌ Andrés, Simón Pedro's pyotzo. Yʌ'wʌ's ñʌjayu Jesús: 9Yʌy ijtu tumʌ ŋga'e ñʌ'ijtupʌ's mosa'y cebadapʌ pan y metza chicsta'mbʌ coquej. Pero te'še'ŋbʌ cu'tcuy ja'n jyujche'ŋay yʌ' aŋba'tepʌ pʌngotoya. 10Pijche'ca Jesús nʌmu: Yajpocsquecpʌ'ya yʌ' pʌnda'm. Y tey pe'chmu'c lugarte' inʌc. Y mosa'y mil pʌnše'ŋoyj pocsquequiaju. 11Pijche'c pyʌjcu Jesujsis te' pan y ñʌjayu Dios yʌscotoya. Pijche'ca we'nbʌ'jayutʌj jujche'ŋdʌj quiʌ'aŋmaye, y tʌsa maŋutʌs sajne'ŋbʌ'u mumu te' pocšajupʌ'ojmo. Y sajque'tutʌs te' coquej, y cu'tyaju šuñajuše'ŋ. 12Tajšaju'ca te' pʌnda'm, nʌjayutʌj Jesujsis: Piŋdu'mʌytyamʌ te' cu'tcʌchʌ'yʌ uy tyocoyu'ŋmʌjcʌ ni uša'ŋ. 13Mbiŋdu'mʌyutʌs jeque, y njo'ʌquie'tumajtʌs macwʌstʌjca'y waca te' cu'tcʌchʌ'yaŋbit. Te'še'ŋ tzʌ'yu te' cu'tcʌchʌ'yaŋ cu'tyaju'ca myuma'ŋgʌ'y te' mosa'pyʌ cebadapʌ pan.
14Quieñaju te' pʌ'nista'm te' isaŋwʌ'ajcuy chʌjcupʌ Jesujsis. Te'cotoya nʌmyaju: Wiyuŋšej yʌ'wʌte' te' tza'maŋwa'oye maŋba inʌc minupʌ najsacopajcʌsi. 15Pero ñʌctʌ'yu Jesujsis que maŋba inʌc miñaju wa'y jyupcʌtʌjcʌyaju wa'y quiojtyaju re'yajcu'yojmo. Pijche'ca ca'ŋjʌcʌ'u tey y qui'mwʌtzʌjque'tutij ñaytyumʌ pu'mnacʌsi.
Ca'ŋu Jesús ma'ranʌ'cʌsi
(Mt. 14.22-27; Mr. 6.45-52)
16Y nʌ'ca chu'yanʌmu, tʌj te' cʌ'aŋmaye, wanajcutʌj ma'ra'acapoyo'mo. 17Tʌjcʌyutʌj barco'ojmo y nyajtu'ŋajcʌ'yutʌs wa'ytyʌs njajcu te' mar wa'ytyʌj nu'cu Capernaum-gumgu'yojmo. Pi'tza' inʌc y Jesús ja'n inʌc quieye. 18Y te' maya'aŋbʌ sawa's yajtepsqui'mcʌ'yu te' mar. 19Y nyajemdu'ŋaju'candʌs te' barco tumʌ leguaše'ŋoyj ŋguenutʌs Jesús ca'ŋba nʌ minu marcʌsi wa'y ñu'cu te' barco'aŋi, y na'tzutʌj. 20Pero nʌjayutʌj ñe'cʌ's: Ʌjyʌ', uy na'tztame. 21Pijche'ca oma'omatʌs nyajtʌjcʌyu te' barco'ojmo. Y jʌnʌjtya' nu'cu te' barco te' nʌtʌj maŋupʌ najsoyj.
Minu mye'chaju Jesús pʌ'nista'm
22Jo'pit te' ma'ra'ocwinduc tzʌ'yajupʌ's myujšajpa inʌc que tumʌtij inʌc ijtu te' barco. Quieñaju que jamyawʌ Jesús tʌji'ŋ porque ŋgʌ'wi'ŋgʌ'ytyijtʌ tzu'cumu. 23Pero miñaju eyata'mbʌ barco Tiberias-cumgu'yojmoc. Y nu'quiaju tome quienbamʌy te' lugar tijumʌy wyi'quiaju pan te' pʌ'nista'm, ñʌjayu'c yʌscotoya Dios tʌ Ngomi's. 24Quieñaju te' pʌ'nista'm que ja'ndiyʌ inʌc tey Jesús ni tʌj te' quiʌ'aŋmayeta'm. Pijche'ca tʌjcʌyaju te' barco'ojmota'm y maŋyaju te' Capernau'ŋojmo wa'y mye'chaju Jesús.
Jesuste' te' pan quenguquiotoya
25Y pya'tyaju'ca ma'ra'ocwinduc, ñʌjayaju: Maestro, ¿jujche'ca ñu'cu yʌy? 26'Yaŋdzoŋyaju Jesujsis: Wiyuŋše'ʌsmij nwiyuŋdzamjaytyamba: Nʌmisʌj me'tztamu ja'n porque nʌmis ŋguendamu ʌs ndzʌjcupʌ isaŋwʌ'ajcuy. Me'tztambamisʌj porque mbʌ'nʌytyamu'ʌsmij hasta que ñdyastamumij. 27Yostamʌ, ja'n na' wa'mis mba'ttamu yajpapʌ cu'tcuy, sino que wa'mis mba'ttamu ja'n yayepʌ cu'tcuy. Ʌs, te' Pʌ'nis 'Yune's, sunba'ʌsmij ndzi'tamu cu'tcuy ja'n yayepʌ quenguquiotoya. Porque ʌj copiŋu Ndata Diojsis wa'yʌsmij ʌs ndzi'tamu. 28Y ñʌjayaju Jesús: ¿Tiya'ndʌs ndzʌctʌ'wa'a wa'ytyʌs ndzʌjcu Diojsis šunbašej? 29'Yaŋdzoŋyaju Jesujsis: Yʌ'šejte' šunba Diojsis wa'mis ndzʌctamu, wa'misʌj nwʌ'aŋjamdamu ʌj, porque Diojsisʌjyʌ' cʌ'weju.
30Te'cotoya quiʌ'aŋwa'quiajque'tu Jesús: ¿Tiyʌ isaŋwʌ'ajcu'ya jeque ndzʌcpa mis wa'ytyʌs ŋguenu, y wa'ytyʌsmij nwʌ'aŋjamu? ¿Tiyʌ tzʌqui'a ndzʌcpa mis? 31Tʌs ndata'a'ŋucu'sta'm quiu'tyaju maná te' ja'itʌnʌmʌmʌy. Porque yʌ'šejte' ja'yʌyu: Yajwi'quiatʌju pan wanajcupʌ tzajpojmoc. 32Jesujsis ñʌjayaju: Wiyuŋše'ʌsmij nwiyuŋdzamjaytyamba: Ja'nde' Moisejsismij ñchi'tamu te' pan wanajcupʌ tzajpojmoc, sino que ʌste' Ndata'smij ñchi'tamba te' wiyuŋšejpʌ pan wanajcupʌ tzajpojmoc. 33Porque te' pan šajpapʌ Ndata Diojsis, te'wʌte' wanajcupʌ tzajpojmoc, y ñe'cʌ'ste' maŋba chi'yaju quenguy te' najsacopajcʌsita'mbʌ pʌn. 34Ñʌjayaju te' judio'sta'm: Señor, tzi'jojcʌtʌcʌtʌj te'šejpʌ pan. 35Y ñʌjayaju Jesujsis: Ʌjte' te' pan šajpapʌ's iscuy-quenguy mumu pʌngotoya. Iwʌ'sʌj cʌ'minba ʌj ja'na yu'que'temaj. Y iwʌ'sʌj wʌ'aŋjamba ʌj, ja'na yoctʌtzque'temaj. 36Pero ndzamjaytyamwa'mʌsmij ñempe misʌj ŋguendamʌ ja'nmisʌj nwʌ'aŋjamdame. 37Mumu jujche'ŋ quiopiŋba Diojsis wa'yʌj wʌ'aŋjamyajupʌ's, maŋba'ʌj cʌ'miñaju. Y iwʌ'sʌj cʌ'minba ja'nʌs macwinduqui. 38Porque wanajcu'ʌj tzajpojmoc, ja'n wa'yʌs ndzʌjcu ne' su'noquiuy, sino que wa'yʌs ndzʌjcu šunbašej te' cʌ'wejupʌ'sʌj. 39Ʌs Ndata'sʌjte' cʌ'weju, y ñe'cʌ's šunba u'yʌs nyajtocoyu ni tumʌc ñe'cʌ's quiopiŋyajupʌ wa'yʌj wʌ'aŋjamyaju. Šunba wa'yʌs nyajwinsa'yaju te' ultimopʌ jamo'oyj. 40Y yʌ'šej šunba ʌs Ndata's: Jujche'ŋ iwʌ'sʌj ispʌcpa que ʌjte' te' Diojsis 'Yune, y wʌ'aŋjamba'ʌj, pya'tpa ja'n yayepʌ quenguy. Y ʌs maŋba'ʌs nyajwinsa'u ultimopʌ jamo'oyj.
41Pijche'ca te' judio'sta'm ñu'motoŋgʌ'yjayaju Jesús porque nʌmu: Ʌjte' te' pan wanajcupʌ tzajpojmoc. 42Y nʌmyajpa inʌc: ¿Ja'nja jeque te' yʌ'wʌ te' Jesús, te' Jose'is 'yune? Ispʌcjaytyambatʌ tyataj y ñanaj. ¿Tiyajca' jequeyʌ' nʌmba: Tzajpojmojcʌjyʌ' wanajcupʌ? 43Jesús aŋdzoŋu: Uy nu'motoŋdame ne'co'mota'm. 44Ya'iwʌ ja'n musi minu ʌ'aŋi juca ʌs Ndata Diojsis ja'n yajpononajay chocoy. Y te' cʌ'miñajpapʌ'sʌj maŋba'ʌs nyajwinsa'u ultimopʌ jamo'oyj. 45Yʌ'šej jya'yʌyaju tza'maŋwa'oyajpapʌ's: Diojsis maŋba 'yaŋmayaju mumu pʌn. Te'cotoya mumu iwʌ's quiʌmato'ŋʌpya tʌ Ndata Dios y aŋmapya, cʌ'minba'ʌj.
46Ja'nde' suni ñʌmu juca iwʌjutiwʌ's quienu Dios. Ʌstijte' ŋguenu porque ñe'cʌ ijtumʌ'yʌj tzu'cumu. 47Wiyuŋše'ʌsmij nwiyuŋdzamjaytyamba: Iwʌ'sʌj wʌ'aŋjamba ʌj, pya'twa'a ja'n yayepʌ quenguy. 48Ʌjte' te' pan chi'yajpapʌ's mumu pʌn iscuy-quenguy. 49Tʌta'm ndata'a'ŋucu's quiu'tyaju te' maná te' ja'itʌnʌmʌmʌy, pero te'wʌ's jachi'ya ja'n yayepʌ quenguy. 50Pero ʌjte' te' pan wanajcupʌ tzajpojmoc. Iwʌ's wyi'cpa yʌ' pan ʌs maŋba'ʌs ndzi'u ja'n yayepʌ quenguy. 51Ʌjte' te' pan wanajcupʌ tzajpojmoc, y šajpapʌ's quenguy. Juca iwʌ's wyi'cpa yʌ' pan, maŋba pya'tu ja'n yayepʌ quenguy. Y te' pan ʌs maŋba ndzi'oquia'upʌ, ʌste' ŋgüerpo. Ndzi'oquia'pa'ʌs wa'y pya'tyaju iscuy-quenguy najsacopajcʌsita'mbʌ's.
52Pijche'ca quipotoŋgʌ'yaju judiota'm, y nʌmyajpa inʌc: ¿Jutza'ndʌ muspa tzi'u yʌ' pʌ'nis ñe' cuerpo jujcha' cu'tcupyʌ tiyʌ wa'ytyʌ ŋgʌ'sjaytyamu šis. 53Jesujsis ñʌjayaju: Ʌjte' te' Pʌ'nis 'Yune, y juca ja'nmis ŋgʌ'sjaytyame ʌs sis y ndo'ŋjaytyame ʌs nʌ'pin, ja'ndiyʌ mista'm iscuy-quenguy ndzoco'yojmo. 54Iwʌ's quiʌ'sjapya ʌs sis y tyo'ŋjapya ʌs nʌ'pin pya'twa'a ja'n yayepʌ quenguy, y maŋba'ʌs nyajwinsa'u ultimopʌ jamo'oyj. 55Porque te' ʌs sis wiyuŋšejpʌ cu'tcuyšejpʌte', y te' ʌs nʌ'pin wiyuŋšejpʌ to'ŋguyšejpʌte'. 56Iwʌ's quiʌ'sjapya ʌs sis y tyo'ŋjapya ʌs nʌ'pin, ʌs ndzoco'yojmo itjojcʌtʌcpa y ʌj ñe' choco'yojmo itpa. 57Ʌs Ndata Dios ñe' pyʌmipit quengu'yʌyu, y ñe'cʌ'sʌj cʌ'weju. Y jutzʌj ʌj ñe'cʌpit quengu'yʌyu, te'šej iwʌ's quiʌ'sjapya ʌs sis pya'twa'a ʌjpit te' ja'n yayepʌ quenguy. 58Ʌjte' te' pan wanajcupʌ tzajpojmoc. Ja'nde' jujcha' te' maná quiu'tyajupʌ tʌ ndata'a'ŋucu'sta'm, pero te'wʌ's jachi'ya ja'n yayepʌ quenguy. 59Yʌ'šejta'mbʌ tiyʌ chamu Jesujsis te' judio'sta'm wyindʌjcojmo, nʌ'c 'yaŋma'yoyu'c Capernaum-gumgu'yojmo.
Tiyʌta'm chamu Jesujsis, ja'n yayepʌ quenguquiotoyate'
60Y soneta'mbʌ quiʌ'aŋmaye's myatoŋyaju y nʌmyaju: Jene na'chaŋda'mbʌ tiyʌ chamba, ¿iwʌ'sasʌ'ŋ muspa ñʌtu'ŋaju? 61Ñʌctʌ'yu Jesujsis ñe' choco'yojmo que te' quiʌ'aŋmaye nu'motoŋyajpa inʌc te' chamupʌ tiyʌpit. Pijche'ctij ñʌjayaju: ¿Ñchʌcna'tztamba yʌ'šejta'mbʌ tiyʌ's? 62¿Tiya'sʌ'ŋmis maŋba ŋguipstamu juca ŋguendambamisʌj, ʌj te' Pʌ'nis 'Yune, nʌ'camʌj ŋgui'mu'c tzajpojmo ijtumʌ'yʌj inʌc wina? 63Tʌ espiritu'stʌ tzi'pa quenguy, tʌ ŋgüerpo's ja'n quiotzowe. Y te' ʌs ndzamyajupʌ tiyʌ espiritute' y quenguytye'. 64Pero ijtu mi'ojmota'm ja'n wyʌ'aŋjamyapyʌ's. Porque myuspa inʌc Jesujsis desde tzo'tzcu'yojmo iwʌ'sta'm ja'n inʌc wyʌ'aŋjamyay, y iwʌ's inʌc maŋba chi'oquia'u. 65Y nʌmu: Te'cotoya'ʌsmijte' nʌjaytyamu que ya'iwʌ'sʌj ja'n maŋu cʌ'minu juca ʌs Ndata Diojsis ja'n yajpononajay chocoy.
66Pijche'c chaquiaju Jesús soneta'mbʌ quiʌ'aŋmaye's y jawyijtyajque'tamaj ñe'cʌji'ŋ. 67Pijche'ca tʌj, te' macwʌstʌjca'pyʌ quiʌ'aŋmaye, cʌ'aŋwa'cutʌj Jesujsis, y nʌjayutʌj: ¿Sunbaja'ʌj ndzactaŋgue'tu mista'm? 68'Yaŋdzoŋu Simón Pedro's: Señor, juca ndzacpatʌsmij, ¿iwa'ndʌs ŋgʌ'maŋba? Mis ndzambamis tiyʌ'stʌ tzi'pa ja'n yayepʌ quenguy. 69Y tʌs nwʌ'aŋjambatʌs y ispʌcbatʌsmij que mijte' te' Cristo. Mijte' te' Diojsis 'Yune, te' Diojsis ñe' pyʌmipit quengu'yʌyupʌ. 70Y aŋdzoŋutʌj Jesujsis: Mijta'm te' macwʌstʌjca'ytya'mbʌ, ʌsmijte' ŋgopiŋdamupʌ. Pero mi'ojmota'm ijtu tumʌ ñʌc'ijtʌyupʌ yatziwʌ's. 71Te' Judas te' inʌc nʌ chamu, Simón Iscariote's 'yune, te' maŋbapʌ's inʌc chi'oquia'u. Te'wʌ nʌcma'yʌyupʌte' macwʌstʌjca'pyo'mo.
Valgt i Øjeblikket:
San Juan 6: ZCNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Zoque Copainalá © Sociedad Bíblica de México, A.C. 1967.
