Lucas 1

Teófilo ya'atë noky yajktuknija'ayëy

1May ja ja'ay të tjatuknipëjktaakë tja'aja'antë mëti'ipë të tyuny të jyätyën ma ëëtsajtëmën, 2jëtu'un ijxtëm ojts xytyuk'ëwa'anëmën ja mëti'ipë y'ijxtën nyija'awëtyën wi'ix tsyo'onë'ky tsyo'ontäkyën mëti'ipë tuunën jajtën, mëti'ipë ojts yajtuknipëktën tkajpxwa'kxtëty ja Tios ja y'aaw y'ayuk. 3Ëjts näjyëtu'un, jëëky mëku'uk Teófilë, tëëjës nyajtëy nyajtëtä'äky wi'ixjaty winë tyuunë jyajtën ko tsyo'onë'ky tsyo'ontäky. Oyës të nmëmay të nmëtajy ya'atë ko mijts ntuknijayë në'ëwitsy tu'uwitsy 4ets xyjyaaktimnyijawëty ko tyiyëty jyääntyëty mëti'ipë të myajtukni''ixën.

Ko Juan Yajnëëpäjtpë myina'any naaxwiiny

5Jää it ma ënäty ja Herodes yajkutukyën jam Judea, jam ënäty tu'uk ja teety mëti'ipë xyëëwajtypyën Zacarías, yë'ë ijty mëët tyuny ja teety mëti'ipë yajtijtëpën Abías. Isabel ja tyo'oxytyëjk xyëëwajtyp, teety Aarón ja y'oknëëx. 6Nimäjtskëty oy ijty yë Tios tmëtuntë, pyatuuntëp ja Wintsën ja y'ënä'ämën ets ka'ap tii poky tmëët'atë. 7Je'eyëp ko ka'ap ijty pën y'u'unkëty, jä'ä ko ja Isabel ka'ap tjëkyepy y'u'unk'ixëty, jëtu'un ojts myëj ja'ayënëtë nimäjtskëty.

8Tëkok ja teety Zacarías mëët ja jyä'äy ojts tyuka'ayë ets wyë'ëmtëty jap ma ja mëjtsajptëjkën. 9Ënät t'ijxpëtsëëmtë pën tuka'ajëp ets tyëkëty jap tsajptëkoty poomno'kpë. Ja Zacarías ojts tyuka'ayë. 10Ko tpaty ja poomno'k, ni'ëmukë ja mayjyä'äy ja Tios tja'amyäjtstë mëjtsajptëjkwinm. 11Ënät ja Zacarías ojts ja Tios ja y'anklës t'ijxpaaty, jap tyänë aka'any'äämpy ma ja wintsë'këntyaknën, ma poom tyoyën. 12Ko ja Zacarías t'ijxy ja tsajpjotmëtë kukäjpxy jëtu'unyë ojts tyimwë'ëmy ets tsyë'këy. 13Tääts ja tsajpjotmëtë kukäjpxy y'ënëmaayë:

Zacarías, këtii mtsë'ëkë, tëë ja Tios tmëtoy ko xyjyä'äymyetsy, pyatäämpy ja mto'oxytyëjk Isabel tu'uk ja y'u'unk mëti'ipë mtukxëëwatëpën Juan. 14Mtukxoonta'akäämpy yë'ë ets may ja ja'ay nëjkx tukxoonta'aktë ko myina'any jya'ta'any naaxwiiny. 15Yë'ë ko mëj'äämpy ja m'u'unk y'ita'any Wintsën wyintuuy. Ka'ap yë tsatsym nyëë nëjkx t'uuky, ni wiinkpë mëknëë. Naamka'anëm ënäty myiny yaa naaxwiiny ets ja Kënu'kxymyëkajtën myo'ojëtëty ja winma'any ets ja mëk'ajtën. 16Yë'ë yajjootwinpitëp may ja Israel ja'ay ma ja Wintsënën. 17Ya'atë Juan, yë'ë nëjkx jëwyiin nyijkxy, mëët ja jyot jya'awën ja käjpxynyajxpë Elías. Yë'ëts ja u'unktaak u'unkteety nëjkx tyajnämyë'oypyikyë mëët ja y'u'unk y'ëna'k ets tjatëty wi'ix ja Tios tmëmëtowtëtyën. Jëtu'unts ja ja'ay tnipëjktaakëty ets tjëjp'ixtëty ja Wintsën.

18Tääts ja Zacarías tyajtëëy ja tsajpjotmëtë kukäjpxy:

¿Wi'ixës ya'atë njëjp'ixëty?, ëjts tëëjës nmëjja'ayënë ets näjyëtu'un yë nto'oxytyëjkës.

19Tääts ja tsajpjotmëtë kukäjpxy y'ëtsooy:

Gabrielës ëjts, Tiosës y'ënä'ämën npatuunëp; yë'ëjës të xykyexy ets mijts n'ëwaanëty ya'atë aaw ayuk oypyë. 20E tyam, mëët ko ka'ap të xymyëpëky wi'ix të n'ënëëmën, uum mwë'ëma'any; jäänëm mkajpxë'ëkëty ko tu'kë'ëyë tyunëtëty jyatëtëty mëti'ipë yam ntukmëmëtyäkpyën.

21Tap ënäty ja ja'ay y'owëxitë tëja'p ets ojts nyäyajtëwëtë tii ko nëkoo tyimpoxnë ja Zacarías jap mëjtsajptëkoty. 22Ko pyëtsiimy ja Zacarías, ka'ap tjajty wi'ix kyajpxëty. Ënät ja ja'ay tnija'awëtyë ko ënäty të t'ixy ja tsajpjotmëtë kukäjpxy jap mëjtsajptëkoty. Je'eyë y'akë'ë y'axajë, jä'ä ko tëë ënäty y'uumy.

23Ko ja Zacarías ojts tyajkä'pxy ja tyuunk, tääts ojts nyëjkxnë ma tyëjkën. 24Ko jëtu'un tyuunë jyajtë, tääts ja Isabel ojts wyi'imy u'unk mëët, mëkoxk po'o y'ijty tyëkoty, ka'ap pyëtsiimy, je'eyë tmëmay tmëtajy: 25Paatyës ja Wintsën të xypya'ëyoy etsës ja ja'ay ka'ap xypyäxëty.

Ko ja tsajpjotmëtë kukäjpxy tnikäjpxy ko ja Jesús myëxu'unk'ata'any

26Komtëtujk po'o ja Tios ja y'anklës Gabriel tkejxy jam Galilea y'itjotm ma ja kajpn txëëwatyën Nazaret, 27ets tku'ixëty ja to'oxy'ëna'k ka'apë ye'etyëjk tmëët'atynyëmën, mëti'ipë xyëëwajtypyën Maria. Ajaaymyuky ënäty y'ijnë ets ja José tmëëtsëënëja'any, yajkutujkpë David y'u'unk y'ok. 28Tääts ja tsajpjotmëtë kukäjpxy tyëjkëy ma ja Maria ënäty jap y'u'unyën ets t'ënëmaay:

Tios mkënu'kxëtëp Maria, ni'ik mijts ja Wintsën mtsokyë, Tios mijts mëët myajpaaty.

29Ko ja Maria tmëtooy ko ja tsajpjotmëtë kukäjpxy jëtu'un y'ënë'ëmxëty, mëjmëtoy ojts tpëjktä'äky ets twinmaay twintajy wi'ix nyiwijy ja kajpxpo'kxën. 30Tääts ja tsajpjotmëtë kukäjpxy y'ënëmaayë:

Maria, këtii mtsë'ëkëty. M'oyjya'awëyëp mijts yë Tios. 31U'unk mëët mwë'ëma'any, mpaatäämpy tu'uk ja maank mëti'ipë mtukxëëwatëpën Jesús. 32Mëj'äämpy nëjkx y'ity, Tios U'unk yajtija'any, ja Wintsën nëjkx pyëjktä'äkyë yajkutujkpë ijxtëm ja y'apteetyën David, 33ets yajkutukëty xëmëkyëjxm ma ja Israel ja'ayëtyën ka'ap kyëxa'any nyaxa'any ja kyutujkën.

34Tääts ja Maria tyajtëëy ja tsajpjotmëtë kukäjpxy:

¿Wi'ixtsën ya'atë jëtu'unpë tyuna'any jyata'anyë? kajts mëti'ipë ye'etyëjk nmëët'atynyëmës.

35Tääts ja tsajpjotmëtë kukäjpxy y'ëtsooy:

Minaanp ja Kënu'kxymyëkajtën ma mijtsën, Tios ni'ik këjxmëpë myëk'ajtën myajnitukëtëp ijxtëm tu'uk ja yootsën, paaty ya'atë mëxu'unk mëti'ipë minaanp ja'taanpën, wa'ats yë'ë, Tios U'unk yë'ë. 36Näy pyatäämpy ja mtsëkuu Isabel tu'uk ja u'unk, oy tëë jyamëjja'ayënë; mëti'ipë ijty tyijtëpën ko ka'ap tjëkyepy y'u'unk'ixëty, tam tyam ja mëxu'unk tnëkëjxm'aty mëtuktujk tyam ja pyo'o. 37Tios, ka'ap tii tyajtsiptä'äky.

38Tääts ja Maria y'ënäny:

Wintsënës ëjts nmëtuumpy, wa'an jëtu'un tunyë tjatyë ijxtëm ja Tios të tuknipëjktaakën ma ëjtsën, ijxtëm të xynyëëmënës.

Ënät ja tsajpjotmëtë kukäjpxy ojts nyëjkxnë.

Ko ja Maria tku'ixë ja Isabel

39Ko jëtu'un jyäjty kyëpejty, ënät ja Maria tsyo'ony ets ojts nyijkx tunjotm kopkjotm jam Judea itjotm. 40Ënät jyä'äjty ma ja Zacarías ja tyëjkën ets ojts tkajpxpo'kxy ja Isabel. 41Ko ja Isabel tmëtooy ja Maria kyajpxpo'kxyë, tää ojts ja y'u'unk tjawë y'ëti'itsy jyootjoty ets ja Isabel ja Kënu'kxymyëkajtën ojts tyukëtä'äkyë. 42Ënät mëk y'ënäny:

Tëë mijts ja Tios wäänëni'ik mkënu'kxyë këtiinëm ja to'oxytyëjk ni'ëmukë ets näjyëtu'un ja m'u'unk tëë yajkënu'kxy. 43Tim pën ëjtsnë ets ja Wintsën ja tyaak xykyu'ixëtyës. 44Je'eyës yë mkajpxpo'kxën të njamëtoy, ënätyë yë n'u'unkës të njawë y'ëti'itsy mëët ja xoontakën njootjotyës. 45Akujk jotkujk mijts ko të xymyëpëky ets jëtu'un tyunëtëty jyatëtëty wi'ix ja Wintsën të mnë'mxëtyën.

46Tääts ja Maria y'ënäny:

Nmëjja'aw njaantyjya'apës yë Wintsën,

47ets xoontakpës ja njot nja'awën mëët ja nTiosës mëti'ipës xyajnitsokpën.

48Tëës ja Tios xynyi''ijxkëtä'äky, ëjts yë tyuunpë yu'unkpë naxymyëpë.

Tyam ënät ëjts xëmë ja ja'ay ni'ëmukë xytyijnëty ko n'akujk njotkujkëtyës.

49Yë'ë ko ja Tios mëti'ipë maaytyääyëpën winë mëj këjää ja mëyajtën të tuny maas ëjtsën.

Wa'ats ets kënu'kxy yë xyëëw nyaxëty.

50Xëmë tpa'ëyoy mëti'ipë wiinkutsë'këyëpën.

51Tëë ja myëk'ajtën tyaj'ixyë,

tëë tyaj'atëkoy mëti'ipë ënäty të tjatuknipëjktaakëtën ja mëjpë këjxmëpë jyä'äy'atën.

52Tëë tpëjkë ja yajkutujkpëtëjk ja kyutujkën,

ets të tyajmëjnaxy ja ayoopë ja'aytyëjk.

53Tëë ja ayuupë axëëwpë tmo'oy ja nyaax kyam,

ets awa'ats kë'ëwa'ats të tpëjktä'äky ja kumeenyjyä'äytyëjk.

54Tëë ja Israel ja'ay tputëkë,

mëti'ipë tyuunpë'ajtypyën ets ka'ap të tja'atyëkoy ja pya'ëyo'owën,

55Ja n'ap'ajtëmë Abraham mëët ja y'u'unk y'ok,

jëtu'un ënäty të yajtukwinwanëtë.

56Tääts ja Maria ojts mëët wyi'im ja Isabel tëkëëk po'o. Ok ojts wyimpijnë ma ja tyëjkën.

Ko Juan Yajnëëpäjtpë myiny jyä'ty naaxwiiny

57Ko ja nyixëëw tpaty jëna'a ja Isabel ja y'u'unk myëxu'unk'ata'anyën, jää ojts myëxu'unk'aty. 58Ënät ja myëjëën myëtëjk ets ja myëku'uktëjk nyimiinëtë ets tyukxoontakëtë ko ja Wintsën ja mëjmëyajtën të tuny ma yë'ëjën. 59Kom tuktujk xëëw ja mëxu'unk ojts tyajnëjkxtë ets yajnatsujk'ëwëtitëty ja ye'etyëjkajtën, näjyëtu'un ojts tjatukxëëwata'antë Zacarías ijxtëm ja tyeety txëëwatyën. 60E jëtu'un ja tyaak y'ënäny:

Ka'ap, Juan xyëëwatëp.

61Tääts ja Isabel yaj'ëtsooy:

Ka'ap pën yë mmëku'uk jëtu'un txëëwaty Juan.

62Tääts ja Zacarías tyajtëëwtë tii ja y'u'unk xyëëwatëp. 63Tääts ja u'unkteety t'amëtooy tu'uk ja pu'uy tsyetsy. Jam tkëxjaay: Juan xyëëwatëp. Ni'ëmukë ja ja'ay mëjmëtoy tmëtoowtë. 64Näy jää ja Zacarías ojts jatëkok kyajpxpëky ets ja Tios tmëjja'aw tjaantyja'awëy. 65Ni'ëmukë ja myëjëën myëtëjk ojts mëjmëtoy tmëtowtë ets ja ja'ay tnija'awëtyääytyë jam Judea y'itjotm, tunjotm kopkjotm, wi'ix ënäty të tyuny të jyätyën. 66Mëti'ipë myëtoowtën, ojts nyäyajtëwëtë jaxim jayam: ¿Tii jëtää tyunäämpy ko yääkëty? Jä'ä ko ënäty ja Wintsën ja myëk'ajtën tyaj'ixyë ma yë'ëjën.

Ko ja Zacarías ja Tios tmëjjaw tjaantyjyawë

67Tääts ja Zacarías ja Tios yajkajpxë ko ja Kënu'kxymyëkajtën tyuktëjkëyë, ets y'ënäny jëtu'un tä tu'uk ja käjpxynyajxpën:

68Kënu'kxy mëjjawë yë Wintsën nyäxy,

mëti'ipë ja Israel ja'ay Tyios'ajtëpën,

Jä'ä ko tëë tniminy ja nyaax kyajpn ets tyajnitso'oka'any.

69Tëë xytyuknikäjxëm tu'uk ja mëj yajnitsokpë,

David yë y'u'unk y'ok, mëti'ipë ijty ja Tios myëtuumpyën.

70Yë'ë ja Tios ojts twinwanë mëët ja kyäjpxynyajxpëtëjk,

71ko xyaj'ëwa'atspëtsëma'anëm ma ja nmëtsip'ajtëmën

mëti'ipë xykya'oy'ijxëmën,

72ko tpa'ëyowa'any ja n'ap'ajtëmë,

ets ko ka'ap tja'atyëkoyä'äny ja käjpxytyu'unën.

73Ya'atë ojts yajtukwinwanëtë

ja n'ap'ajtëm Abraham,

74-75ko xytyukmëmëta'aka'anëm ja nmëtsip'ajtëmë,

ka'ap ntsë'këmëty,

wa'ats aaw wa'ats jot n'ijtmëty

ets nyajpatmëty xëmë ma yë'ëjën mapaat njuuky'ajtëmën.

76E mijts, u'unk maay, jä'ä nëjkx myajtijy: Tios ni'ik këjxmëpë kyäjpxynyajxpë,

jä'ä ko jëyëjp mnëjkxa'any ma ja Wintsënën

ets xynyipëjktaakëja'any ja nyë'ë tyu'u,

77jëtu'unts ja ja'ay nijawëtëty ja nitsokën

ets ja pyoky yajnimä'kxtëty.

78Yë'ë ko ja nTios'ajtëmë myëët'ajtyp ja pa'ëyo'owën,

paaty jam tsajpwinm të tyajjajtä'äky ja xëëw ets ja jempyë xëëw të xytyuk'ijxëmë,

79ets tkutë'kxa'any mëti'ipë tsënaaytyëpën jam akootstum ma o'ktaknën,

jëtu'unts xytyu'umo'omyëty ets jotkujk nyajpatmëty.

80Jëtu'un ja Juan ye'ky pyejty ets myëkpëjky mëët ja Kënu'kxymyëkajtën, jam tsyënaay ma ja të'ëts itjotmën koonëm ojts nyänyikëxë'ëkyë ma ja Israel ja'ayëtyën.

Valgt i Øjeblikket:

Lucas 1: QUETZMIXE

Markering

Del

Kopiér