Lucas 2

Ko Jesús myëxu'unk'aty

1Jää it ja yajkutujkpë César Augusto ojts tni'ënä'ämë ets ja ja'ay ni'ëmukë yajjaaymyuktëty ma yë'ë yajkutukyën. 2Mëtëkokpë ja ja'ay ënäty yajjaaymyuktë jää ma ja Cirenë yajkutukyën jam Sirië y'itjotm. 3Tääts ja ja'ay ni'ëmukë ojts nyëjkxtë yajjääpyë ma kyukajpn'atën.

4Paaty ja José tsyo'ony jam Nazaret, Galilea y'itjotm ets ojts nyijkx Belén, Judea y'itjotm, ma ja yajkutujkpë David ënäty të myëxu'unk'atyën, jä'ä ko ja José yë'ë tyeety'ajt y'ap'ajt ja David. 5Tääts ojts nyijkx yajjääpyë mëët ja Maria, mëti'ipë ënäty mëët të yaj'ajaaymyukyën ets tmëëtsëënëja'any, u'unk mëët ja Maria ënätynyë. 6Tam ënätyëty Belén, ko ja nyixëëw tpaty ma ja María ja y'u'unk myëxu'unk'ata'anyën. 7Jam myiiny jyä'äjty ja y'u'unk mëtu'ukpë. Tääts ojts tpity tmotsy mëët ja wit ets tko'ky jëyujk ajë'kxënjoty, jä'ä ko ka'ap ojts ja jya'ajtakn tpaatë ma ja kajpnën.

Ko ja kupixyny këwent'ajtpë myëkajpxëtë ja tsajpjotmëtë kukäjpxy

8Jam kajpnpë'am ënäty ja ja'ay tkëwent'atë ja kyupixynyëty. 9Ajotkumonë ojts tu'uk yë Wintsën yë y'anklës nyänyikëxë'ëkyë ma ënäty jam yajpaatën ets ja Wintsën ja myëj'ajt y'oyajtën tyë'kxkeky na'ëwtityë ets tsyë'këtyë. 10Tääts ja tsajpjotmëtë kukäjpxy y'ënëmaayëtë:

Këtii mtsë'ëkëtë, aaw ayukës oypyë nmëmiinpy mëti'ipë ja'ay ni'ëmukë tyukxoonta'aktëpën. 11Tëë tyam myëxu'unk'aty jam David kyajpnjotm ja Yajnitsokpë, yë'ë ja Kristë, ja Wintsën. 12Yë'ë mtuk'ixkaptëp ko xy'ixtëty tu'uk ja mëxu'unk winmotsy winpity kyo'knë jëyujk ajë'kxënjoty.

13Tääts pyëtsëëmtë nimay ja tsajpjotmëtë kukäjpxy tsajpjotmëpë tsyoontën ets jam nyäpyëjktakëtë ma ja myëku'ukëtyën, mëti'ipë Tios myëja'aw jyääntyjya'awëtëpën ets y'ëna'antë:

14Mëjjaw jaantyjawë ja Tios nyäxy tsajpjotmëpë,

ets wä'än jotkujk ja naaxwiinyëtë ja'ay tyajpaatë mëti'ipë tyuk'oy'ajtëpën ko ja mëyajtën të tuny.

15Ko ja tsajpjotmëtë kukäjpxy wyimpijnëtë tsajpjotm, tääts ja kupixyny këwent'ajtpë nyäy'ënanëtë nixim niyam:

Ja'amtë jam Belén ets n'ijxmëty tii të tyuny të jyätyë, mëti'ipë yë Wintsën të xytyuk'ëwa'anëmën.

16Tääts janty jotëkoy ojts nyëjkxtë ets tpatë ja Maria ets ja José, tam ja mëxu'unk kyo'knë jëyujk ajë'kxënjoty. 17Ko t'ijxtë, tääts nimëtyaktë wi'ix ënäty ja tsajpjotmëtë kukäjpxy të tnimëtyä'äkyën ja mëxu'unk. 18Ets ko jëtu'un tmëtoowtë ja ja'ayëty wi'ix ja kupixyny këwent'ajtpë y'ëna'antën, mëjmëtoy ojts tmëtowtë. 19Ja Maria pëjkë'ëky ja tyaj'ijta'ay y'aawjoty jyotjoy ets je'eyë tmëmay tmëtajy. 20Tääts ja kupixyny këwent'ajtpë ojts wyimpijnëtë akujk jotkujk, tukxoonta'aktë ja Tios ko ënäty të t'ixtë jëtu'un tä ja tsajpjotmëtë kukäjpxy ënäty të y'ënë'ëmxëtën.

Ko Jesús tsyajptëjkpaaty

21Kom tuktujk xëëw ja mëxu'unk yajnatsujk'ëwtijty ja ye'etyëjkajtën ets xyëëwpejty Jesús, nän yë'ë xëëw pyëjktaktë mëti'ipë ënäty ja tsajpjotmëtë kukäjpxy të tuk'ëwaanën ja Maria ma ënäty ka'ap ja y'u'unk nëkëjxm'atynyëmën.

22Ko ja xëëw po'o tpaty jëna'a ja José ets ja Maria näypyuj näjyä'ätsë tpaata'antën, ijxtëm ja Moisés ja y'ënä'ämën nikäjpxyën, tääts ja mëxu'unk ojts tyajnëjkxtë jam Jerusalén ets ja Wintsën tukkë'ëtëkëja'antë. 23Jëtu'un tuuntë, jä'ä ko ja Wintsën ja y'ënä'ämën jëtu'un y'ënä'äny: Ni'ëmukë ja mëtu'ukpë ja u'unk maay mëti'ipë kä'äxkopkën, aak Wintsën yajtukë'ëtëjkëp. 24Tääts ojts nyëjkxtë Tios ëwtajtpë ijxtëm ja Tios ja y'ënä'ämën y'ënä'änyën: ets tmënëjkxtë mäjtsk ja kuuk ëkë mäjtsk ja pak mëti'ipë yajtukwintsë'këpën ja Tios.

25Jam ënäty tu'uk ja ja'ay tsyëënë Jerusalén, Simeónk'ajtp. Oy ets wa'ats jyuuky'äty ma Tiosën, wyintsë'këp ja Tios ets y'owëxijtyp jëna'a ja Israel ja'ay nyitso'oka'antën. Ja Simeón myëët'ajtyp ijty ja Kënu'kxymyëkajtën, 26tëë ënäty ja Tios jëwyiin tyuknijawëty ko ka'ap nya'ookëty koonëm t'ixëty ja Kristë, mëti'ipë Wintsën kyäxäämpyën. 27Tääts ja Kënu'kxymyëkajtën yajnëjkxë ma ja mëjtsajptëjkën. Ko ja mëxu'unk Jesús ojts ja tyaak tyeety yajnëjkxyë ets tpatuntë wi'ix ja ënä'ämën y'ënä'änyën, 28ënät ja Simeón ja mëxu'unk t'ëxajëy, tam jëtu'un tsä'än'ity ets ja Tios tukmëjja'aw tukjaantyja'awëy:

29Tyam, Wintsën, tëë ja mwaantakën y'atëy.

Oyës n'o'knëty akujk jotkujk.

30Yë'ë ko tëëjës n'ix ja nitsokën

31mëti'ipë të xyajtso'ontä'äkyën ets ni'ëmukë ja naaxwiinyëtë ja'ay t'ixtëty,

32jëtu'unts y'itëty ijxtëm ja kutë'kxnën mëti'ipë kyujaj kyutë'kxëpën ja naax kajpn, mëti'ipë yajnaxëpën ja Israel ja'ay mëj'äämpy. 33Tääts ja José ets ja Maria mëjmëtoy tmëtoowtë ko ja Simeón jëtu'un tijy ja mëxu'unk Jesús. 34Ënät ja Simeón myooyëtë ja kënu'kxën ets t'ënëmaay ja Maria, ja Jesús ja tyaak:

Ya'atë mëxu'unk ye'etyëjk, yë'ë të yajtuknipëjktaakë ets may ja Israel ja'ay kyëtawtëty ëkë pyëtë'ëktëty; ijxpät nëjkx y'ity ets may nëjkx ja'ay ka'ap kyupëkyë, 35jëtu'un yajnijawëty wi'ix ja ja'ay nitu'ukjaty myäytyën tyajtën. E mijts jëtu'un ya'atë tu'kë'ëyë xyjyawëja'any ijxtëm jeexyë ja mja'awën tyuknaxyë tu'uk ja tsujkn.

36Näy tam ënäty tu'uk ja to'oxytyëjk Jerusalén, Aná xyëëwajtyp, Tios käjpxynyajxpë; Penuel yë nyëëx, Aser yë y'u'unk y'ok. Tëë ënäty ni'ik myëjja'ayënë. Je'eyë ojts wëxtujk jëmëjt tmëëtsëënë ja nyiye'etyëjk ko y'ëna'k'ajty; 37mëmajkta'px jëmëjt ënäty ku'ooky të y'ijnë. Xëmë ja Tios twintsë'ëkë ma ja mëjtsajptëjkën xëëny koots; ayuu'ajtp näjyëtu'un ets ja Tios tja'amyetsy. 38Tääts ja Aná nän jää jyä'äjty ets ja Tios tkukajpxëy ets ojts tnikäjpxy tnimëtyä'äky ja mëxu'unk Jesús, ma ja ja'ayëtyën mëti'ipë jyëjp'ijxtëpën ets ja jerusalén kajpn y'ëwaatsëpëtsëmëty.

Ko nyëjkxtë jatëkok jam Nazaret

39Ko jëtu'un tpatuuntaaytyë ijxtëm ja Wintsën ja y'ënä'ämën y'ënä'änyën, tääts wyimpijnëtë ets nyëjkxnëtë ma kyukajpn'atën jam Nazaret, Galilea y'itjotm. 40Ets ja mëxu'unk ye'ky pyejty oy mëk, kuwinma'any ets kënu'kxëp ja Tios.

Ko ja mëxu'unk Jesús yajpaaty ma ja mëjtsajptëjkën

41Winjëmëjt ja Jesús ja tyaak tyeety ijty nyëjkxtë jam Jerusalén ko ëmaayxyëëw tpaaty. 42Ko ja Jesús ënäty ja jyëmëjnë majkmäjtsk, ënät ojts nyëjkxtë jam Jerusalén xëëw'ajtpë, ijxtëm tukjuuky'atën. 43E ko wyimpijnëtë xëëwnaxy, nyëjkxnëtë ma tyëjkëtyën; tääts ja Jesús ojts wyi'im jam Jerusalén, ka'ap ja tyaak tyeety tnijawëtë. 44Jam tjëjp'ixtë ja Jesús myiny mayjyä'äy itkujky. Tu'kxëëw ojts ye'eytyë, tääts ojts t'ixtaaytya'aktë ma ja myëku'uktëjkëtyën mëti'ipë y'ixy'ajtëpën. 45Ka'ap tpatë. Tääts ojts jatëkok wyimpitë jam Jerusalén ets jam t'ixtaaytyaktë.

46Kom tëkëëk xëëw tpatë ma ja mëjtsajptëjkën, jap ënäty y'u'unyë akujk ma ja yaj'ijxpëjkpëtëjkëtyën; ja yaj'ixpëjkpëtëjk yë'ë myëtoow'ijtëp wi'ix ja Jesús myëtyä'äkyën. 47Ni'ëmukë mëti'ipë jam y'amëtoow'ijtëpën, mëj'ixy t'ijxtë ko nëkoo wyijy'ajnë ets mëtëyëty t'ëtsoowinpity. 48Ko ja tyaak tyeety y'ijxpatëtë, mëj ixy t'ijxtë. Tääts ja tyaak y'ënëmaayë:

U'unk, ¿tii koos jëtu'un xytyuntë? Yë mteety ets ëjts, tëë najënu'un n'ixtaaynyëtë, nëkooyës njotmaypyatnëtë mëët mijts.

49Tääts ja Jesús y'ëtsoowëtë:

¿Tii koos xy'ixta'atë? ¿këtii xynyijawëtë ko kopkpëky etsës yaa nyajpaatëty maajës ja nteety ja tyëjkënë?

50Ja tyaak tyeety kä'äp twinja'awëtyë tii ko jëtu'un y'ënä'äny ja Jesús.

51Tääts mëët wyimpijnëtë jam Nazaret. Jam tsyënaay Nazaret ja Jesús, ets myëmëtoow ja tyaak tyeety. Ja Maria pëjkë'ëky tyaj'ity y'aawjoty jyotjoy wi'ix tu'kë'ëyë winë tyunyë jyätyën. 52Ets ja Jesús ye'ky pyejty, wij'ëtëtsp käj'ëtëtsp, tukxoontakëp ja Tios ets ja ja'ay.

Valgt i Øjeblikket:

Lucas 2: QUETZMIXE

Markering

Del

Kopiér