LUKE 22
22
Jisu Thatnatu Inruk a Ansil
(Met 26:1–5; Mak 14:1–2; Jon 11:45–53)
1 #
Met 26:2–5; Mak 14:1–2; Jon 11:47–53 Ipekva laalna Ujouhoong, chol jaonoh Tol buhdoonna aknichu innnaisa. 2Akthloi thiimpu leh ringjih lulok eiin Jisu ta khatloh a ithat umeta amijon; alamva anmah in miita antrihrelna.
Jisu Jurhnatu Judas in Aja
(Met 26:14–16; Mak 14:10–11)
3Cheva somlei innih ankaarna inkhat Iskariot akuunga Seitan in luutsa; 4chunna amah in akthloi thiimpu khatkho phrangki ankuunga seh a Jisu ta anmah kuunga khatloh a kamlan umeta antelpiei. 5#Met 26:14–16; Mak 14:10–11; Jon 13:2Ohchunna anmah in anroomthoksa, cheva amahkuunga baobeh amilannatu injasei. 6Nga tloh a amah in ajapei, miitam amnohlai Jisu ta ankuunga amlannatu taancha ajonpei.
Jisu in Laalna Buhdoon Saaknatu Amchaang
(Met 26:17–25; Mak 14:12–21; Jon 13:21–30)
7 #
Met 26:17–19; Mak 14:12–16 Chol jaonoh Tol Buhdoon aknikha thlengsa, mahnia laalna buhdoon sadamte ankattupot. 8#Noon 3:1; Luk 19:29Chunna Jisu in Pitar leh John ta sonna amthlah ei, “Nannih in seh choulaia laalna buhdoon saaknatu inihturel thlouraang tlohve.” 9Amahkuunga anson, “Mahchu ramma thlouraang namtlohja ungme?” 10Chunna amah in ankuunga asonei, “Anve, nannih in khuuboomma nanluutlai, mii khat in tuiipul tonga seh nantuukpitu; amah in aluutna innkhanna juih a luutve, 11che innputa sonve, ‘Lulok in nangta nakson, “Miitlungna khumkha khosame, kei kiroisoh laalna buhdoon ramma kansaak ume?” ’ 12Mahchunna thra thlouraang atlohche achungnung khum anrol inkhat amah in nanimmuhtu; mahchunna thlouraang tlohve.” 13Che anmah in seh a, Jisu in ankuunga asonkhata antuukpei; mahche ohkhanna anmah in laalna buhdoonta thlouraang antlohpei.
Akpu vaa Buhdoon
(Met 26:26–30; Mak 14:22–26; 1 Kor 11:23–25)
14 #
Met 26:20; Mak 14:17; Jon 13:17 Laichu aphah in amah in tebor a inboksa, che raangroi eikho amahsoh inbokjousei. 15#Luk 12:49–50Amah in ankuunga asonei, “keiin klah kphahnoh amaa a mah laalna buhdoon i nannihsoh khalmo kisaakja hangsa; 16#Luk 14:15alamva keiin nankuunga kitihchou Ringpu vaa kurung huunna a mah i amthlung nohmiil keiva mah i saanoh usang.” 17#Met 26:27; Mak 14:23; 1 Kor 10:16Che Jisu in kamta loua Ringpu ampaakche ason, “Mah i loua nankaar a insemve; 18#Met 26:29; Mak 14:25alamva keiin nankuunga kitihchou, Ringpu kurung huunna athlengnohmiil keiva ngangli atuii innoh usang.” 19#Met 26:26; Mak 14:22; 1 Kor 10:16; 11:23–26; Luk 9:16Che amah in tolta loua, Ringpu ampaakche mahchuta anmah kuunga malanna asonei, “Mah i nannih turel kamlan kei kiruungsa. Nannih in keita nantheihnatu mah i tlohve.” 20Mahchunanga saa ancheche kamta loua ason, “Mah kammi nannih turel tla kei kithii a akthar trongirhnasa.” 21#Met 26:21–24; Mak 14:18–21; Jon 13:21–30Chuta anve keita kamlansam miiva akut tebor a keisoh asihjou. 22Alamva Ringpu in amdon nujuih a miivaa Asa kupa in sehsa; chuta amahta amlan miikhava aleh a lahnasa a! 23Anmah ankaar a tunang in mah i atloh umeta anmahsengta inrui amithronpei.
Akliin Veina Turel Trong Inkharh
24 #
Met 18:1; Mak 9:34; Luk 9:46 Anmah ankaar a tunang in akliinrem umeta anmahseengta trong inkharhtlamsei. 25#Met 20:25–28; Mak 10:42–45; Jon 13:3–16Chunna anmahta asonei, “Jental kurung in miichunga ankil maphonga akpu veia paallei; che miichunga akchek amneh in kannihva miinaamtetu anpaiungta amidang. 26#Met 23:11; Mak 9:35; Luk 9:48Chuta nannih nankaar avah mahchu suuknohso; inkhattinga nannih nankaar a akliinrem amah in aksiinrem veiso, che lulok in routloh veiso. 27#Jon 13:12–15Tebor a anbokkha tunang in akliinme, nohle rou aktloh khareme? Tebor a anbok khanohme? Chuta keiva nankaar a routloh mii inkhat hukveisang.
28 #
Met 19:28; Luk 4:13; Hib 2:18; 4:15 “Keita chaang keianna a nannihva keisoh inpot amnoh a amjouchou; 29#Mak 14:24; Hib 9:20Pa in kurung huunna inkhat keikuunga amsilnanga, mahchunanga nankuung akho kamsil uchou, 30#Met 19:28; Mak 10:37; Mad 3:21; 20:4nannih in kei kurung huunna a kei tebor a nansaak nan iintu mahche phompii ah inbok a Israel jatih somlei innihta pichaar nantlohtu.”
Pitar in Andahsam Jisu in Matsah Aphoong
(Met 26:31–35; Mak 14:27–31; Jon 13:36–38)
31“Simon, Simon, anro, seitan in nangta kehu nanga nakloknatu anihpei, 32#Jon 17:15; 21:15–17chuta nangin namlotta amaangnohnatu nangturel kingenpei, che nangin keikuunga veikhat nanlenglai, niuhnaota anril matrangeiro.” 33#Met 26:33–35; Mak 14:29–31; Jon 13:37–38Chunna Pitar in amahta ason, “Akpu, keiva nangsoh sim akho kisehjounatu mahche nangsoh thikho kithihjounatu thlouraang chesang.” 34“Pitar keiin nikuunga kisonche, nangin keita nakromnoh angta veithum nandahnohmiil mi in aarkhong in inkhuungnohtu.”
Skhao, Thong Khatkho Chemsei
35 #
Met 10:9,10; Mak 6:8,9; Luk 9:3; 10:4 Mahche Jisu in akuunga asonei, “Keiin nannihta skhao nohle thong nohle kehkhraang jaonoh a kamthlah choukha nanvaatna amchoume?” Anmah in anson, “Jakhatkho vatnoh ung?” 36#Luk 22:49–50Jisu in anmahta asonei, “Chuta pekva, skhao ak am amah in phurhso, mahchunanga thongkho phurhso; tukhat in chemsei amnohle anluut juura chemsei leiso. 37Alamva keiin nankuunga kitihchou, mah chuvah mah ringjih i keininga amthlungtu tla, ‘Amahta alehchel eisoh inteensa; alamva keirella injihkha tlungsa.’ 38Chunna anmah in anson, ‘Akpu, anro, onna chemsei innih am.’ Mahchunna ankuunga asonni, ‘Mah i chanasa.’ ”
Jisu in Chorophol Muulchunga Angen
(Met 26:36–46; Mak 14:32–42)
39 #
Met 26:30; Mak 14:26; Luk 11:4; Jon 18:1 Amah in inthruh a amahtu anono veia Chorophol Muulla sehsa; che aroi in anjuihpei. 40#Met 26:36–46; Mak 14:32–42; Hib 5:7–8Jisu in amunchunna athlengin ankuunga asonei, “Nannih in madoia nantlaknoh natu ngenve.” 41Lung veikhat iloon in asehchaanga aklah khanna amah in ankuungnata insenga akhuk makamma angen, 42#Mak 10:38; Jon 18:11; 5:30“Pa o, nangin nimdon veileva, mah kam i kikuung nata lourosa; chulata keiin kamdon veinoh a nangin namdonchu veiso.” 43Cheva ringramna ringroi inkhat in amahkuunga indangsa, amahta amtrangpei. 44Che Jisu in aril lahmalla ralla tranga angen. Che amah akthlankha thiitlang nanga tukleia tla. 45Amah in angennata inthoua, aroi ankuunga athlengin anmahva klahmal seia inna louam antuukei, 46chunna ankuunga asonei, “Jarelna inchoume? Madoia nantlaknoh natu inthloua ngenve.”
Jisu ta Ansuur
(Met 26:47–56; Mak 14:43–50; Jon 18:3–11)
47 #
Met 26:47–56; Mak 14:43–49; Jon 18:3–11 Amah in tronga amsuunga, mii tamsoh Judas an ong somleinih ankaarna inkhat in anmahta chinga thlengsei. Che Jisu ta amchohnatu akuunga innaisa; 48chuta Jisu in amahta ason, “Judas nangin miivaa Asa kupata machoh a nijurhpeime?” 49#Luk 22:38Jisu soh inruui aroi in aksuuksam khata anmuh in ason, “Akpu, kannih in chemseiah kantuk useime?” 50Cheva ankaarna inkhat in akthloi thiimpu vaa naichi amkuur akchangtonga apheklokpei. 51Chuta Jisu in ason, “Mah i ajapei.” Cheva amah amkuurta palla amthratpei. 52Cheva amahta aksuur akthleng akthloi thiimpuei mahche mathruunna thlaamvaa phrangkiei khatkho anparuul eita alousonei, “Inruraanta aksuursam nanga chemsei leh suungsoh inruuia thleng sachoume? 53#Luk 19:47; 21:37Keiin anirel nannihsoh mathruunna thlaamma kiamlaia keisuurnoh choua. Chuta anthim tuui in apaallai, nannih in thlou nantlohnatu mah i nannih nanpungsa.”
Pitar in Jisu ta Indah
(Met 26:57–58,69–75; Mak 14:53–54,66–72; Jon 18:12–18,25–27)
54 #
Met 26:57–58; Mak 14:53–54; Jon 18:12–16 Aknu achunna anmah in Jisu ta ansuurche kaia akthloi thiimpu innsuunga anthlenpei. Cheva Pitar in inlabeb a ajuih. 55Che anmah in innpaal alaia mei luh a anboklaia Pitar kho ankaar a inboksa. 56#Met 26:69–75; Mak 14:66–72; Jon 18:16–18,25–27Cheva amah in meilenga anboklai, roijuih rungaak inkhat in amahta amuh a tlingta anche ason, “Mah kupa ikho amahsoh inruuijou mii.” 57Chuta amah in indah a ason, “Kumeio, amahta romnoh ang.” 58Kak amche mii aktleikhat in amahta amuh a ason, “Nangkho anmah ankaarnache.” Chuta Pitar in amsang, “Kupa o, keinoh ang.” 59Mahche pung inkhatvak aknua aktlei mii inkhat inla ason, “Taktak a mah kupa ikho amahsoh inruuijou miisa. Alamva amahva Kalili na mii.” 60Chuta Pitar in ason, “Kupa o, nangin nisonkha kei romnoh ang.” Che kak hanga atrong suunga aarkhongin inkhuungsa. 61#Luk 7:13; 22:34Mahchunna Akpu in inheia Pitar ta a anpei. Che mi inva arkhongin ankhuungnoh maa a nangin keita veithumkhek kandah ucheta akuunga Akpu in ason trongkha Pitar in intheihsa. 62Chunna amah in apaaltongta inthruh a aril sok a trapsa.
Jisu ta Aminuih Khatkho Ankhon
(Met 26:67–68; Mak 14:65)
63 #
Met 26:67–68; Mak 14:65; Jon 18:22–24 Chunna Jisu ta amtuh mii kupa in manuih a akhon. 64Che anmah in Jisu ta amit makaanga anrui, “Nangta tunang in nakkhonme? Kaniphoongro.” 65Che anmah aktam in thranoh trong achunga trongsei.
Jama Kuunga Jisu ta Anthlen
(Met 26:59–66; Mak 14:55–64; Jon 18:19–24)
66 #
Met 26:57; Mak 14:53; Luk 22:54 Che ni avaarsoh miitamvaa anparuul mah chuvah akthloi thiimpu leh ringjih lulok in inchunsei, che anmah in Jisu ta anmah anparuul anchunna kaar a thlenna anson. 67#Met 26:63–66; Mak 14:61–64; Jon 18:19–21“Nangi Khrista cheleva kanisonro.” Chuta Jisu in ankuunga asonei, “Keiin nankuunga nanison sanglakho nannih in malotnoh luung uchou. 68Mahche keiin nannihta nanirui sanglakho kamsangnoh uchou. 69Chuta peknata mathronna miivaa Asa kupa in Ringpu tuui akchanga inboktu.” 70#Luk 23:3; Met 27:11Mahchunna anmah naamtein anson, “Chunohleva nangva Ringpu vaa asa kupa cheme?” Che Jisu in ankuunga asonei, “Keisangta nannih in nansonpei.” 71Mahche anmah in anson, “Inih in sakhi veikhat ijonnatu darkaar ammangme? Alamva inih itak in anarnata trong itheihpei.”
Valgt i Øjeblikket:
LUKE 22: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
