LUKE 21
21
Trulmeinu in Baobeh Akat
(Mak 12:41–44)
1 #
Mak 12:41–44
Jisu in intoua a kooia a anlai mathruunna thlaamma baobeh sihna thlaam a ankatta amuhpei; 2che inran trulmeinu inkhat in kuri apum innih akatta amuh. 3Amah in ason, “Keiin atak a kitihchou, amah inran trulmeinu in anmah annaamte chunga tam akatpei; 4alamva anmahva huuitanga maleia ansihnata loua ankat, chuta inran kumei inva amah in aringnatu asih apumteta akatpei.”
Mathruunna Thlaam Inpilsam Relna Jisu in Trong
(Met 24:1–2; Mak 13:1–2)
5 #
Met 24:1–19; Mak 13:1–17 Amanlu lunga anseem kathra thlaammi ian in jikchaphao iril ampelme che khalmo tlanna kuttholpoot ankatname ta aroi in Mathruunna Thlaam relna trongei, 6#Luk 19:43–44; Mak 14:58; 15:29; Noon 6:14mahchunna Jisu in ankuunga asonei, “Laikha thlengumang mah chuvah nannih in nanmuh poot ei i amah amun inna lung inkhat in inkhatchunga indolhnoh a inmahnoh a, apumte inpilkir umang.”
Klah knang Khatkho Chut
(Met 24:3–14; Mak 13:3–13)
7 #
Luk 17:20; Noon 1:6 Mahche anmah in Jisu ta anrui, “Lulok o, mahchu tikna ume, mahche asuuktumma jaknang daang thlengume?” 8#Luk 17:23; Mak 13:21; 1 Jon 2:18Chunna amah in asonei, “Nannihta chimnoh a inhea naniseh pinanohtu cheksilve; alamva keiminga mii khalmo thlenga ‘Kei i amahsang!’ che ‘Lai innaisa!’ ta nanisontu. Mahlaia anmahta juihnohve. 9Nannih in raalhou mahche raal amsuuk ahou nantheihlai, intrinohve; alamva mah i matsah a suuktutla, chuta achenava kak hanga thlengnohtu.”
10Mahchuche ankuunga asonei, “Jaatboom inkhat in jaatboom inkhatchunga che kurung huunna inkhat in kurung huunna inkhatchunga raal suuktuei; 11aktrang runaangnu jikcha thoutu, ram aje ajea buhchaal che thitrang natna satna rii jikcha suuktu; khatkho trihkhopna vei mahche akliin daang jikcha ringramnata nanmuhtu. 12#Met 10:17–21#Noon 25:24; Jon 16:2Chuta mah naamte i asuuknoh maa a nannihta suura nanichuttu, mahche sinakok a nanimlantu che simma nanithuntu, chuche kei kikming rella kurung khatkho rampuui ankuunga naniphurh tuei. 13#Phil 1:12Mahlaichun nannih ringtukna thaminta nansonnatu laikha thlengsa. 14#Luk 12:11–12Alamchunna mahlai khatloh a namisang umeta nanlah nanohtu matsah a nanril mangirhve; 15alamva nannih jeknaei in nantrongta vat nohle indah ancheknoh natu nar khatkho lousing kamlan uchou. 16#Luk 12:52–53Nannu nanpa in, nan ute ei in, nan uhte nannaoei in, che nanruul nanpailuung inkho nanilontuei, che mii arouva nanithattu; 17#Met 10:22; Jon 15:18–25kei kikming relna mii naamtein nannihta nantirh tuei. 18#Luk 12:7; Met 10:30; Noon 27:34Chuta nankangna sam akmol inkhatkho maangnohtu. 19#Met 10:22; Mad 2:7Nannih in nandoutrang khanna nanchaan inkal nanphahtu.”
Jerusalem Anpilsam Relna Jisu in Trong
(Met 24:15–21; Mak 13:14–19)
20 #
Luk 19:41–44; 23:28–31; 17:31 “Chuta Jerusalem ta raalmii in ankoi nanmuhlai, amaangnasam innaisa romve. 21Mahlai Judia a ak am in muul muulla tlaaneiso, khuuboom suunga ak am in ohkhannata inthruh eiso, che ramboom apaalla ak am in innsuunga luutnoh eiso; 22alamva anjih anaamteta atlungnatu athunglohna aknikha maisa. 23#Luk 23:29Mahni achunna naoson akroi anmah kuunga aleh a lahnasa a! Alamva thaleichunga khalmo klah knang suuktu mahche inhaanga asaokha mii anchunga tla usa; 24#Rom 11:25; Mad 11:2anmahta chemsei aha in athattuei, che arouin jaatboom naamte ankaar a phurh a pajatla a ansihtuei; Jental ei laikha atlungnohmiil, Jerusalem ta Jental in anchilhtu.”
Miivaa Asa kupa in Athlengsam
(Met 24:29–31; Mak 13:24–27)
25 #
Met 24:29–30; Mak 13:24–26; Mad 6:12,13 “Kini, thla, mahche arsi a daang amtuei, chuche tuiiboomvaa aktrang amri khatkho tuiisolh ahouin thaleichungna jaatboom naamtein khalmo klah knang anphahtu che anlusip binta insaatuei, 26tukleiram a aksuukthlou khanna amidon in klahmalla mii in intrituei; alamva marvaanvaa atuui inloktu, 27#Luk 9:27; Mad 1:7mahchuche miivaa Asa kupa in tuuileh paarthrasoh inruuia sumphaia thleng anmah in anmuhtu. 28#Luk 18:7–8Pek mah ei ita suuk amthronlai, intouva anve, alamva nannihta nanithloknatu innnaisa.”
Thotthinga Pandam
(Met 24:32–35; Mak 13:28–31)
29 #
Met 24:32–35; Mak 13:28–31 Che amah in pandam inkhat asonei, “Thotthing mahche thing anaamteta anve; 30Anmah in anbur suun amthronsoh, thralpiini naisa ta nantak in muh a nanrom. 31Mahchunanga mah naamte i suuk nanmuhlai, Ringpu kurung huunna naisa ta nanrom. 32#Luk 9:27Atak a keiin kisonchou, mah naamte i asuuknoh miilva, mah ringnatluun i maangnohtu. 33#Luk 16:17Marvaan mahche thaleiva maanga cheumang, chuta kei kitrongeiva tiknikho maangnoh luungtuei.”
Jih Trangnoh Janoh
34 #
Luk 12:45; Mak 4:19; 1 Thes 5:6–7 “Chunna saa iinna, tuiibuh inrui mahche mah ringna inna ril namiluut nanohtu cheksilve, mah aknichu chaang nanga kak hanga nantakchunga thlengtu; 35alamva mahchu thaleichung apumtea a am miinaamchunga thlengtu. 36#Mak 13:33Chuta anaamte nata inlit nancheknatu che miiva Asa kupa maikunga ngir nancheknatu lai amrel jihtranga ngenve.”
37 #
Luk 19:47; Mak 11:19 Anirel amah in mathruunna thlaam a amtheih ei, chuta khulouh avah Chorophol Muulla rik. 38Juktiingrel inranga mathruunna thlaamma amah atrongta anrungeihnatu miinaam in thlengei.
Valgt i Øjeblikket:
LUKE 21: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
