LUKE 20
20
Jisu in Achek Amneh Relna Anrui
(Met 21:23–27; Mak 11:27–33)
1 #
Met 21:23–27; Mak 11:27–33 Nikhatnia, amah in mathruunna thlaamma miita Akthra Trong matheih a che raanna amlai, akthloi thiimpu leh ringjih lulok khatkho anparuul ei in akuunga thlenga, 2#Jon 2:18amahta anson, “Kannih kankuunga kanisonro, nangin jaknang nichek namneh amma mah thlouei i nitlohme? Nohle mah akchek amneh thloui tunang in nangkuunga amlanme?” 3Amah in ankuunga amsangei, “Keikho nankuunga trongkhat naniruitang: pek keisonve, 4John in alupkha ringram tingname chunohle mii tingname?” 5Che anmahseeng seeng intella insonsei, “Inih in ‘Ringram tingna,’ ta sonmele, ‘Chuleva jarella amahta malotnoh choume?’ initihtu. 6#Met 14:5; Luk 7:29Chela inih in ‘Mii tingna’ ta sonmele, mii naamtein inihta lung inidentu; alamva anmah in John ta ringraan inkhatta anloh.” 7Chunna anmah in mah i ramname romnoh ungta amisangpei. 8Mahchunna Jisu in ankuunga asonei, “Mah akchek amneh thlouei i jarelna kitlohme keiin nankuunga nanison nohtung.”
Nganglibil Lampaarsaa Pandam
(Met 21:33–46; Mak 12:1–12)
9 #
Met 21:33–46; 25:14; Mak 12:1–12 Mah pandam ita mii kuungah son amthronpei: “Mii khat in nganglibil inkhat atloh, che mahchu lampaar aksaa ankuunga amsil, che amah in khuuboom khat a seh a khalmo soot a amsa. 10Che nganglirah luhnatu laikha athlengin, nganglirah ste anloupeknatu lampaar aksaa ankuunga amah roijuih inkhatta amthlah; chuta lampaar aksaa thloutloh in amahta khonna aruuk a amilengpei. 11Chela amah in aktlei roijuih inkhatta veikhat amthlahla, amahlakho loukhonna khalmo usitnoh a aruuk a amilenglapei. 12Chelakho amah in inthumtihpi veia amah roijuih khat amthlahla; mahmii chuta khonraanna apaaltinga anlonpei. 13Cheva nganglibil akpu in ason, ‘Keiin mah i kha kitloh usa? Keiin kirilvol kisa kupata mathlahtang, amahta anmah in injah tuei.’ 14Chuta nganglibil lampaar Aksaa thloutloh ei in amahta anmuh in, khatleh khat intella insonsei, ‘Mahmii i pipasa; amahta thatrei, chuche amah in aphah tuphukha inihta imveinatu.’ 15Cheva amahta nganglibil apaalla that a anlonpei. Chuleva nganglibil akpu in anmahta kha atloh tueime? 16#Noon 13:46; 18:6; 28:28Amah in thlenga nganglibil lampaarsa thloutloh eita ammaang tuei, che ngangli bilta aktlei mii kuungah amlantu.” Mahchuta antheih in antihpei, “Ringpu in janohtu!” 17#Noon 4:11; 1 Pit 2:6–7Chuta anmahta anna asonei, “Chuleva mah injih i jarelname: ‘Inntloh mii in andahtal lungta innkiingtu amuvei hukvei nohme?’ 18Tungangkhat in mah lungchung khanna anloom miirelta akir kir a koituei; chuta mah in tunangkhat achunga inloomle amahta amvuitui.”
Roithaang Malan Relna Anrui
(Met 22:15–22; Mak 12:13–17)
19 #
Luk 19:47
Mah pungtal chunna ringjih lulok che akthloi thiimpu ei in amahta ansuurnatu insuulsei, chuta anmah in miita trihsei; alamva anmahta indah a mah pandam i ankuunga asonpeita anmah in anrompei. 20#Met 22:15–22; Mak 12:13–17Chunna anmah in amahta anruungpei, che ril akseeng veisin, inruk a aksuimii eita amithlahpei, mah chuvah amahta ruunga atronga suura pichaar aktloh akhal mahche rampuui ankuunga thlenna amilannatu. 21#Jon 3:2Amahta anrui, “Lulok, kannih in kanrom, mah chuvah nangin chimma trongche mahche chimma namtheih ung, nangva keimii miimii annohche, chuta Ringpu alamta chimm namtheih. 22Kannih in Keisaar kuunga roithaangi trongsuur in ajame chunoh a janohme?” 23Chuta amah atronga anromnatu antrong khanna amah in arompeia, ankuunga asonei, 24“Baobe apumkhat kammuhve. Mah achunga injih i tume?” Anmah in anson, “Keisaar.” 25#Rom 13:7; Luk 23:2Amah in ankuunga asonnei, “Chuleva, Keisaar ta veile Keisaar kuunga malanve, mahche Ringpu ta veile Ringpu kuunga malanve.” 26Amah in asontrong khanna miimai kuunga amahta suur cheknohsei; chuta amah in amsangtrong khanna salungkhou seia rimta amsei.
Thinata Ring Rella Rui
(Met 22:23–33; Mak 12:18–27)
27 #
Met 22:23–33; Mak 12:18–27; Noon 4:1–2; 23:6–10 Veikhat kiring tih i amnohta akson Sadukiis ste in amahkuung thlenga trong anrui, 28“Lulok, Moses in kannih turella amjihvah miikhatva auh anao inkhat in kumei alohche asa amnoh a thileva, amah auh anao turella adhara amnatu auh anaokhan akmei veia alohtutla. 29Pek auh anao sirih ammei; anparem in kumei alohche asa amnoh a thisa; 30innih tihpi inkho che inthumtihpi inkho anmei veia anlohpei, 31mah chunanga sirih tihpi phah amahta anlohche ansa amnoh a thisei. 32Aknuremma kumeikho thisa. 33Alamchunna veikhat kiring athlenglaiva kumeikha anmah ankaar a tunang akmei vei ume? Alamva anmah sirih in amahta anlohpei.”
34Chunna Jisu in ankuunga asonei, “Mah chupna asa ei in changvaangei che chang mavaanga inpe ei; 35chuta kthinata veikhat kiringkha phahnatu matikcha ta antenche anmahva changvaangnoh tuei chekho chang mavaanga inpenoh tuei, 36alamva anmahva veikhat inlenga thinoh usei, jarelna tihva anmahva ringroisoh intrim usei che veikhat akring khavaa asa vei taningeiva anmahva Ringpu asa veiusei. 37Mah chuvah Moses inkho Akpu ta Abraham, Aisaak leh Jakop vaa Ringpu ta aonglai akthi mii kiringsei, mah i inchaam kaarna thaminna ataktal in seenga amdangpei. 38Pek amahvah akthiva Ringpu noh, chuta akringva Ringpu; alamva mii naamte amahkuunga ringsei.” 39#Mak 12:28Ringjih lulok ste in amisang, “Lulok, nangin thratea nisonpei.” 40#Mak 12:34; Met 22:46Alamva anmah in veikhat inlenga karaanga akuunga trong jakhatkho ruinohsei.
Mesaiah Relna Anrui
(Met 22:41–46; Mak 12:35–37)
41 #
Met 22:41–45; Mak 12:35–37 Chuta anmah ankuunga asonei, “Khrista i Devit va asa kupata anmah in khatloh a ansonme? 42Alamva Devit ataktal in Leila nirik a ason, ‘Akpu in kei Akpu kuunga ason, 43nang jeknaeita nikehchuunna kamveinohmiil, kei kikchanga inbokro.’ 44Nga tloh a Devit in amahta Akpu a ong; chuleva khatloh a amah in asa vei ume?”
Trongsuur Lulok eita Jisu in Amtritei
(Met 23:1–36; Mak 12:38–40)
45 #
Mak 12:38–40; Met 23:6–7; Luk 11:43; 14:7–11 Amah atrongta miinaam in arungeih laia aroi ankuung asonei, 46“Ansuul puunrei silh a inloi akdi mahche keithiil keithiilla mii in kamthruun eisota akdi chuche sinakok a akthrarem inbokna a inbok khatkho buhdoonna a mii in jnjahna vei ringjih lulok eikhata cheksilve, 47anmah in trulmeinu an innta amiruk mahche khalmo soot a akngen veisinnei. Anmah in ralla anrol maraal aphahtu.”
Valgt i Øjeblikket:
LUKE 20: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
