LUKE 17
17
Aleh
(Met 18:6–7,21–22; Mak 9:42)
1 #
Met 18:6–7; Mak 9:42; 1 Kor 8:12 Amah in aroita asonei, “Madoi tinga nanithlaknatu inlitnoh a thranoh tlohmii thlengtu tla; chuta mah kharella akthleng miikha lahnasa a! 2Amah in andihnao inkhatta aleh ah amthlaak angutva arukinga buhsukna lung inkhat mathoia tuiiboomma nanthlak in amah turelva ralla akthratna veitu. 3#Met 18:15,21–22Nantak nanroua cheksilve; nan uh nannao in alehthlou tlohle, amahta chaakve, che amah inta aril thlengle, amahta ipve; 4Che amah in nikhatnia nikuunga veisrih alehthlou tlohle, mahchunna nikuunga veisrih inlenga kei kiril kithlengpeita naksonle amahta ipve.”
Malot
5 #
Met 17:20; 21:21; Mak 11:22–23; Luk 7:13 Raangroi in Akpu ta anson, “Kannih in kamilot i ralla kamilotnatu thlou kanitlohro.” 6Akpu in asonei, “Nannih in intrammutal malotchoule, nannih in mah thotthing ita ‘Nang nikjung inlongbulh a tuiiboomma moongrota’ nanson in nantrong amjuihtu.
Roijuih Khatva Athlou
7“Nannih nankaar a tunangkhat in amah roijuih in loukhoi seh nohle sadamkem asehnata athlengin ‘Intha thlenga buh nisaaknatu mah tebor kuung in inbokro’ ta nanson peime? 8#Luk 12:37; Jon 13:3–5Mahchu ngut a nangin amahta ‘Buh kisaaknatu thlouraang tlohrosa, nitak intlen inseemma keiin buhsa kichenohmiil rou keitlohro; keiin kisaakche aknua nangin nisaak ni iin umangta’ sonnohrei choume? 9Innpuin jathang malanna roijuih in rou atloh kharelna amahta ampaakrei peime? 10Nannih inkho chunanga tlohve, nankuunga anson naamte nannih in nantlohlai sonve, ‘Kannihva matik chanoh roijuih ung; kannih in kantlohtupot kanthloukha kantloh uning.’ ”
Jisu in Mii Somta Amthrat
11 #
Luk 9:51; 13:22; 19:11 Jerusalem lamtonga aseh in Samaria leh Kalili akaar a amah in phaova sehsa. 12Che amah in khuu inkhat a aluut in, reichi kop kupa som in inlabep a ngirra amahsoh intuuksei 13#Luk 5:5; 8:24,45; 9:33,49cheva anmah in anhou inkaanga onga anson, “Akpu Jisu, kannihta kanirilvolro.” 14#Met 8:4; Mak 1:44; Luk 5:14Anmahta amuh in asonei, “Nannih in seh choulaia nantakta thiimpu ankuunga mamuh eive.” Anmah in ansehsuunga antakchu seengsei. 15Cheva anmah ankaarna inkhat in anatna thra sang ta aromin, inlenga, ahoutranga onga Ringpu ta ampaak; 16che Jisu akehkungah akhup a antolhche, amahta ampaak. Amah atakva Samaria na mii. 17Mahchunna Jisu in ason, “Mii somta kamseengnoh choume? Kuvah ramche seime? 18Mah rapkheina mii inoh a Ringpu ta inlenga mapaaknatu tukhatkho amnohseime?” 19#Met 9:22; Mak 5:34; Luk 8:48; 18:42Che amahkuunga ason, “Inthoua nilamting sehrosa; nangin namlot kharella nangta namthratpei.”
Akthlengsam Kurung Huunna
(Met 24:23–28,37–41)
20 #
Luk 19:11; 21:7; Noon 1:6 Ringpu vaa kurung huunnakha tik a thleng umeta Pharisi in anrui, amah in amsangei, “Ringpu vaa kurung huunna i daang eisoh inruuia thlengnohtu; 21chunohle anmah in ansontu, ‘Anve, onna amsa!’ nohle ‘Mah khanna amsa!’ alamva anve, Ringpu kurung huunna i nannih nankaar a amsa.”
22 #
Met 9:15; Mak 2:20; Luk 5:35 Che aroi ankuunga asonei, “Miivaa Asa kupa akniei ankaar nata inkhat nannih in khalmo nanmuh jahangna laichu thlengtu, che nannih in ohchu muhnoh uchou. 23#Met 24:23; Mak 13:21Che anmah in nankuunga nanisontu, ‘Mah khanna anve!’ nohle ‘Onna anve!’ Sehkho sehnohve, aknukho juihnohve. 24#Met 24:27; Mad 1:7Alamva marvaanna inkhattonga khu anthla in aktlei inkhattonga kvaar nanga miivaa Asa kupa aknikha ochunanga veitu. 25#Luk 9:22Chuta amah in matsah a klah knang khalmo aphahtu tla che mah ringnatluun in amahta indahtuei. 26#Met 24:37–39Noah laia suuk khananga, miiva Asa kupa aknikho mahchunanga veitu. 27Noah in mulipii asuunga luutnatu aknichu aphahnohmiil, anmah in saa iinna, changvaanga mahche anmahta chang mavaanga inpea ammei, mahcheva tuiiliin thlenga annaamteta ammaangkhemei. 28Chunanga Lot laia suuk khananga, anmah in saa iinna, lei a juura, che inn lou tloh a ammei, 29chuta Lot in Sodom nata anthruh aknia marvaannata mei leh meirui inkah a anmah naamteta ammaangei– 30chunna miiva Asa kupata amdangni achunna mahchunanga veitu. 31#Met 24:17–18; Mak 13:15–16; Luk 21:21Mahni achunna tunangkhat innchunga am in innsuunga am pootta alohnatu trumnoh eiso, che louva ak am amah inkho mahchunanga inna inlengnoh eiso. 32Lot akmeita intheihve. 33#Met 10:39; 16:25; Mak 8:35; Luk 9:24; Jon 12:25Tunangkhat in amah achaanta ankalnatu jonle mahchu maangtu, chuta tunangkhat in amah achaanta maangle mahchu amringtu. 34#Met 24:40–41Keiin nankuunga kisonpeichou, mahni khulouh a kukthol inkhat a mii innih amtuei; inkhatta aphurhtu che aktlei inkhatva amahtu. 35Kumei innih in buh sukjoua amtuei; inkhatta aphurhtu che aktlei inkhatva amahtu.” 36“Mii innih in loupuk ah amtuei; miikhatva alohtu aktlei khatva amahtu” 37#Met 24:28Anmah in akuunga anson, “Ram ame, Akpu?” Amah in asonei, “Akthi ruung amna amunkhanna barmupii in inlomtuei.”
Valgt i Øjeblikket:
LUKE 17: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
