LUKE 16
16
Ril Seengnoh Thlousil Thloumarel
1Amah in aroi ankuung akho ason ei, “Thlousil thlou marella aksih kdoon mii khat am, thlousil thloumarel mii khanna nang nipoot nicheita apupu akanana amnoh veia ahuuinapei ta akdoon kuungkhanna anlonpei. 2Chunna amahta onga ason, ‘Nangrella keiin kitheih i khame? Nangin thlousil thlou marella namluut akpul hisab kamlanro, alamva nangin veikhat inlenga thlousil thloumarel veicheknoh usache.’ 3Cheva thlousil thloumarel in arilsuunga ason, ‘Kei Akpu in thlousil thloumarel phomnata keilousale, keiva khavei usangme? Keiin tuklei kichohna tukho trangnohsang, che doh a kisaakna tukho injaksang. 4Kei kiril kamngirhpei mah chuvah kei Akpu in thlousil thloumarel phomnata keiloule, mii inva keita anmah an inna keiloukho ajaei.’ 5Cheva amah akpu vaa lal antoleita khatkhat a onga, matsahna miita arui, ‘Nangin kei akpu alalta jikcha intoolchme?’ 6Amah in amsang, ‘Thao olna chaang reija.’ Amahkuunga ason, ‘Nangin hisab majih a nisihna nirikha louro, che intha inbok a sopnga majihro.’ 7Mahchuche aktlei khatta arui, ‘Nangin jikcha intoolcheme?’ Amah in amsang, ‘Kihu olna chaang reija.’ Amahkuunga son, ‘Nangin hisab majih a nisihna nirikha louro, che soprit majihro.’ 8#1 Thes 5:5; Eph 5:8; Luk 20:34; Jon 12:36Trongson majuihnoh thlousil thloumarel in ksinga thlou atlohrella amah akpu in ampaakpei; alamva akvaarvaa ansachunga tukleiramna ansa in anmah anmahtu ringnatluun turel tlohkhallah ralla singei. 9#Luk 12:33; 18:22Keiin kisonchou, chimnohlal turella nantak nantaktu ruul linve, mahkha acheni avah anmah in nannihta ache amnoh a amna amunna naniloonna turelna.”
10 #
Met 25:21; Luk 19:17 “Thlou akirrua malot aja mii in thlou inrolpa akho malot aja uning; mahchuche akirrua son majuihnoh mii khanna inrolpa akho son majuihnoh veitu. 11Chuleva akchimnoh lal luungakho malotphu veinoh choule, khatloh a akchim lalla nannihta thlou nanimsil ume? 12Aktlei miita ah malotphu veinoh chlouleva, khatloh a nang nita luungakho mii in thlou namsil tueime? 13#Met 6:24Roijuih tukhat inkho akpu innihvaa routloh cheknohtu, alamva inkhatta intirh a inkhatta aringvoltu, nohle inkhattingva aril maluut a inkhattingva maluutnohtu. Nannih in Ringpu mahche lalta routloh cheknoh uchou.”
Jisu in Trong ste Ason
(Met 11:12–13; 5:31–32; Mak 10:11–12)
14Baobeh akditrang Pharisi ei in, mahchuta antheih lai, amahta antheihnohsei. 15#Noon 1:24; Luk 10:29Chuta ankuunga asonei, “Nantak invah miimai kuunga akchim veisungta namimuhpei, chuta Ringpu in nanril arom; alamva miikaara inkaanga indom veikha Ringpu mit an avah intirhsana vei.
16 #
Met 11:12–13
“Trongsuur leh ringraan in John amlai phah a ammei; mahlai khannata Ringpu kurung huunnavaa akthra trongta anraanpei, che mii naamtein mah khanna kalthi suuk a luutei. 17#Met 5:17–18; Luk 21:33Chuta trongsuur nata tikta ansun inkhat ansoi chungva ringram leh thalei amaang in ralla laitu.
18 #
Met 5:31–32; 19:9; Mak 10:11–12; 1 Kor 7:10–11 “Tunangkhat in amah akmeita inthrekpia aktlei inkhatta loule, amah in kumei kupa inlaalthlou atlohpei, che amsal in amdah kumeita aklou amah inkho kumei kupa inlalthlou atlohpei.”
Adoon Mii khat leh Lajaras
19“Akdoon mii khat louam, amah in bukal amchu puunleh bulapuun silh a anirel roomthok tlanna saa iinna paal. 20#Jon 11:1–44; 12:1,9Che atak pumte paan akming Lajaras an ong inran kupakhat amah kolol a ansih, 21Akdoon kupa vaa tebornata aktla aktli saakphukhan avon amvahjahang; mahchu chunga uii inkho thlenga amah apaannata amileiakho amiliik. 22#Jon 13:23Anran miikha thisa, che ringroi in amahta Abraham aklaak a anphurhpei. Akdoon miikho thisa che anphuumpei; 23cheva amah in thikhua aleluunga klah a amsa, amah in inlahnata intoua a an in, Abraham khatkho amah aklaak a am Lajaras ta amuhpei. 24Chunna amah in onga, ‘Pa Abraham, keita niril kamvolroba, che Lajaras akutmajunga tuii phuumma kikdang chaar kamleita amchornatu amahta keininga mathlahroba; alamva keiin meiboom inna aleh a klah a kdoupei.’ 25#Luk 6:24Chuta Abraham in ason, ‘Nangin niringlaia niphahtuphu anaam niphahpei mahkha intheihro, che mahchunanga Lajaras inkho thranoh tlannoh jikcha aktuukpei; chuta pekva amah in onna diltlanna amsa, che nangva alehluunga klah a amsa che. 26Mah naamte i chungakho, kannih leh nannih nankaar a tunangkhat inkho van ancheknoh natu asonna amnoh a adongna amnoh aku inrolkhat incheknoh a am.’ 27Amah in ason, ‘Chuleva pa o, amahta keipa inna namthlahnatu kamthruunche, 28alamva kei unao ranga ammei, anmah inkho onna alehluunga lahna amun in anthlengnoh natu anmahta chaak a son eiso.’ 29#Jon 5:45–47; Noon 15:21; Luk 4:17Chuta Abraham in ason, ‘Anmah kuunga Moses mahche ringraan amsei; anmah antrongta rungai eiso.’ 30#Luk 3:8; 19:9Che amah in asonla, ‘Nganoh nganoh, pa Abraham; chuta tunangkhat akthi kaarnata anmah ankuunga thlengeile, anmah anril anthlengtu.’ 31Amahkuunga ason, ‘Anmah inta Moses mahche ringraan antrongta rungainoh eile, akthi kaarnata ringa ankuunga thleng seilakho anmah in tikni akho anril thlengnoh tuei.’ ”
Valgt i Øjeblikket:
LUKE 16: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
