LUKE 13
13
Nang Nilehnata Inheiro Chunohleva Thiuche
1Chunna Pilat in Kalili na miita thii leh anmah in inthiimna pootsoh amipool relna Jisu kuunga aktong mii arou mahlaital khanna ammei. 2#Jon 9:1–3Chunna amah in amsangei, “Alamva nga tloh a anmah in klah knang anphah rella, Kalili na mii in Kalili a am annaamte chunga ralla alehchelsei ta namidonme? 3Keiin nannihta kitihchou, Mahchunoh, chuta nannih in nanril thlengnoh choule mahchunanga nannaamte maanguchou. 4Nohle Silom a am thaprel in mii somlei kiritta dolh a athat, anmah in Jerusalem a am mii anaamte chunga ralla thranoh tlohmii seita namidonme? 5Keiin kitihchou, Mahchunoh, chuta nannih in nanril thlengnoh chouleva mahchunanga nannaamte maanguchou.”
Akrah Inrahnoh Thotthingvaa Pandam
6 #
Met 21:18–20; Mak 11:12–14,20–21 Che mah pandam ita asonei, “Mii khat in ngangli billa alin thotthing inkhat am; okhanna amah in akrahjon athlengin akrah tuuknohsa. 7#Met 3:10; 7:19; Luk 3:9Chunna amah in nganglibil aktloh eita asonei, ‘Anve, mah kumthum asuung in keiin thotthing akrah akjon kthlengin, khalekkho tuuknoh ang. Tuk a loonve, leipii sul amvei i jarelname?’ 8Chunna amahkuunga amsang, ‘Lulok, mah i mi inkumkho ammangso, keiin mah ita inhiilla kichohche haar thlakmangtang. 9Mah inta akthleng kumma akrah inrahle, thrasa roomthok nasa; chuta inrahnoh leva tukrosa.’ ”
Sabat nia Sehloon Cheknoh Kumei Khatta Amthrat
10Ipek sabat nia sinakok inkhat a amah in amtheih ei. 11Mahchunna kum somlei kirit thranoh li in atak a amma sol inkuuia inding cheknohluung kumei khat am. 12Mahchuta Jisu in amuh in amahta onga ason, “Kumeio, nitakna aksolkhanna nangta nakmahpei.” 13Amah achunga akut asih in kak hanga atakkha indingkengsa, cheva ringpu ta ampaakpei. 14#Luk 6:6–11; 14:1–6; Jon 5:1–18Chuta sinakok akpuui in amahta antheihnohsa, alamva sabat nia Jisu in akna amthrat, “Thlou tlohnatu nijan kuruk am; mahni chunna thlenga akna mathratro, chuta sabat nia tlohnohro.” 15#Luk 7:13; 14:5; Met 12:11Chunna Akpu in akuunga amsang, “Akthra veisin eio, siilkonna khit a nansih siilchal nohle samongta sabat nia majak a tui maiinnatu nankainohme? 16#Luk 19:9Abraham va asakumei akvei, kum somlei kirit seitan in suura asih kumeita sabat nia amthlah nohme?” 17Che maita ason, amah anjetta akjak amphah ei; che paarthratna thlou amah in atlohkhanna mii naamte in anroomthoksei.
Intrammu Pandam
(Met 13:31–32; Mak 4:30–32)
18 #
Met 13:31–32; Mak 4:30–32 Churella amah in asonei, “Ringram kurung huunnakha jaknangjim meio? Che mahchu jaknngsoh imlak ume? 19Mah i mii inkhat in amah thakbilla avorh intrammu inkhat nangsa; chuuna intrammu in moonga thingnanga inrolsa, mah chuvah marvaanna va in abaak a anbu antlohpei.”
Chol Pandam
(Met 13:33)
20 #
Met 13:33
Veikhatla asonei, “Ringram kurung huunnakha keiin jaknangsoh kamlak ume? 21Mahchuva, kumei inkhat in jaam olna chaang inthumma, anaamteta chol an olnohmiil akmot khanangsa.”
Insiik Thong
(Met 7:13–14,21–23)
22 #
Luk 9:51; 17:11; 18:31; 19:11 Amah in khuuboom khuuboomma, khuu khuua mahche Jerusalem a mii eita amtheihnatu thlengsa. 23#Met 7:13–14; Jon 10:7Chunna tunangkhat in amahkuunga ason, “Akpu, inkal akphah eikha mii steru tueime?” Mahchun ankuunga asonei, 24“Ansiik thonga luutnatu kalthi tlohve; alamva keiin kisonchou, miitam in mah khanna anluutnatu anjontu chuta cheknoh tuei. 25#Met 25:10–12Innpuin inthloua innkhaar akhaarche nannih in apaalla ngirra inkhaarta chumma nantihtu ‘Akpu, innkhaar kanimhoongro,’ amah in nanimsangtu, ‘Ramnata thlengchoume keiin naniromnoh ang.’ 26#Met 7:21–23; 25:41; Luk 6:46Mahlai nannih in son namithrontu, ‘Kannih in nangsoh kansaak kan iinjou, che nangin kannih kanlam kanlam a namtheih ung.’ 27Chuta amah in nanisontu, ‘Keiin nannihta kisonchou, ramnata thlengchoume keiin nannihta naniromnoh ang; thranohthlou aktloh naamte eio, kei kuungnata amnohve!’ 28#Met 8:11,12; 22:13; 25:30Nannih in Ringpu vaa kurung huunna a Abraham, Aisaak, Jakop mahche ringraan annaamteta nanmuhlai ohkhanna nanha maket a traptruui uchou. 29Che mii in kulkung kulrel nata khatkho akhu akhinata thlenga Ringpu vaa kurung huunna tebor a inbokjou tuei. 30#Met 19:30; 20:16; Mak 10:31Mahche anve, matsah miikhan juktooltu che juktool miikhan matsahtu.”
Jisu in Jerusalem Relna Arilvol hang
(Met 23:37–39)
31Mah pungtal achunna Pharisi in thlenga akuunga asonpei, “Onnata sehrosa amnohrosa, alamva, Herot in nakthatsampei.” 32#Hib 2:10; 7:28Chunna anmahta asonei, “Nannih in seh choulaia uiiramuiita sonve, ‘Anve, keiin khousaarta kamnomei che akna eikho kamthrat ei, che nithum tihpia keiin kitlohtuphu kithlou kamche usa. 33Chuta mi inkho, tungvakho, tuibahkho keiin sehtu tlasang; alamva Jerusalem nata ringraan inkhaluungtkho maangva veinohtu.’ 34#Met 23:37–39; Luk 19:41Nannih nankuunga kamthlah ringraan eita akthat mahche lunga akden Jerusalem o! Jerusalem o! Aarpui in ateta amthlanuuia a oh nanga keiin nisata jikcha injomma ki oh umangme, chuta nannih in indahschou, 35#Luk 19:38Anve, nannih nan innta nanmahpei. Che keiin kisonchou, ‘Akpu minga akthleng amahkha doiphah veisa ta nansonnohmiil keita keimuhnoh usachou!’ ”
Valgt i Øjeblikket:
LUKE 13: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
