LUKE 12
12
Akthra Akveisinta Amthritnaei
(Met 10:26–27)
1 #
Met 16:6; Mak 8:15 Mahlai achunna miitam akpul in khat in khatta inchuunna anlom invah matsah a aroi ankuunga son amthronpei, “Akthra veisin Pharisi ancholkha cheksilve. 2#Met 10:26–27; Mak 4:22; Luk 8:17; Eph 5:13Inphoongnohtu inbahkhuptu jakhatkho amnoh, nohle inromnanoh luunga inthuptu jakhatkho amnoh. 3Alamchunna nannih in inthim kaara nanson naamtekha akvaar kaar a intheihkirtu, che nannih in khumma nanroua insoh a trongchoukha innbunga indanga insonkirtu.”
Tunangta Trih Uchou
(Met 10:28–31)
4 #
Jon 15:14–15
#
Met 10:28–33
“Kiruul eio nannihta kitihchou, ruungta akthatchek anmahta trihnohve, ruungta anthatche aknua anmah in antlohchektu jakhatkho amnoh amahta trihnohve. 5#Hib 10:31Chuta nannih in tunangta trih uchoume keiin nanimtheih tang. Anthatche aknua repnanga thlaknatu tuui ak am amahta trihve; oi, keiin nankuunga kisonchou, Akpu amahta trihve! 6Baobeh innih turellaru usak ranga nanjurnoh eime? Ringpu amaikuunga ampolhtu jakhatkho amnoh. 7#Luk 21:18; Noon 27:34; Met 12:12Jarelna choume, nankangna sam phaova amasing tangkir a ateenpipei Intrinohve; nannihva usak chunga aman nanral.”
Khrista ta Ja a Akphoong Khatkho Akjanoh
(Met 10:32–33; 12:32; 10:19–20)
8“Mahche keiin nankuunga kitihchou, miimaikuunga keita keija kamliin miirelta, miivaa Asa kupa inkho Ringpu vaa ringroi anmaikuung akho ja a kamliintu; 9#Mak 8:38; Luk 9:26; 2 Tim 2:12chuta miimaikuunga keita keijanoh miirelta Ringpu vaa ringroi anmaikuung akho janohtu. 10#Met 12:31–32; Mak 3:28–29Che miivaa Asa kupata indah janoh a aktrong miirelta a iptu; chuta Li Akseengta janoh a aktrong khava ipnohtu. 11#Met 10:19–20; Mak 13:11; Luk 21:14–15Che anmah in nannihta sinakok ah, rampuuiei mahche akchek amneh ei anmaikunga naniphurh laia, nannih in khatloh a kamisangtu chunohle khatloh a trong tu ungta inchoinohve; 12alamva Li Akseeng in mah pungtal khanna khatloh a trong uchoumeta nanimtheihtu.”
Kdoon Kmongvaa Pandam
13Miitam ankaarna inkhat in amahkuung ason, “Lulok, keiin kphahtuphu kichang khaankha kei kuungakho keipeknatu kiuhte kuunga keisonro.” 14Chuta Jisu in akuunga ason, “Miio, nannih nanpootta semnatu mahche nanchunga pichaar tlohnatu tunang in keita keithunme?” 15#1 Tim 6:6–10Che amah in ankuunga asonei, “Cheksilve, che karal karaamsam anaamte nata nantak inkem theihve; alamva miikhatvaa achaan i amah in asih adoon akhaal khanna amnoh.” 16Mahchunna ankuunga pandam khat malanna asonei, “Akdoon miikhatvaa aramma saak iin inleisolh a tam masuuk a asih; 17chunna arilsuunga amdonpei, ‘Keiin kha kitloh usa: alamva kei saangniim kipeinatu aphom amnohsa?’ 18Che amah in ason, ‘Keiin mai tlohtang: keitom anaamte thrit a ralbeb a anrol seemtang; che mahchunna kei saangniim mahche pootchei anaamte peia sihtang. 19Mahche kei kiruungvaa likuunga sontang, Li o, akthlengsam kum jikchana turella nangtu saangniim khatkho pootchei akthra jikcha kipeipei; nang turella lahna amnohsa, saaro, iinro, khatkho roomthokrosa.’ 20#Luk 12:33–34Chuta Ringpu in amahkuunga ason, ‘Kmongo, mi in khulouh a nang niklikha keiin kiloh usa; che nangturel thlouraang tloh a nisih naamtekha tunangta vei ume?’ 21Ringpu tinga doonnoh a atak turel lalpei amahkha oinangsa.”
Ringpu ta Malot
(Met 6:25–34)
22 #
Met 6:25–33
Chunna amah in aroita asonei, “Alamchunna keiin kisonchou, nannih in jangnansaaktu, chunohle jangnansilhtu mahche nannih nanchaan turella inchoinohve. 23Alamva chaan in saak iinchunga che puunrei in iruung chunga aral. 24#Luk 12:6–7Uiiaakta madonve: anmah in vorhkho vorhnoh ei vaatkho vaatnoh ei, anmahtu tom nohle khoongkho amnoh ei, chulata Ringpu in anmahta roia akemmei. Nannihva va chunga khalmo ralla akthloichou. 25Mahche nannih tunang in aringna turella inchoichoua amah achaanta kiilkhat maral nanchekme? 26Chunna nannih in andihte khatphao tlohcheknoh chouva jarella anlei chaan turella inchoichoume? 27Tuiirei ta madonve, anmah in khatloh a moongeime; anmah in inchekho incheknoh ei che thrulhkho thrulhnoh ei; chuta keiin kisonchou, Solomon luung inkho amah paarthra a anmah nanga puunrei inliing inseemnoh. 28Chuta Ringpu in phaia akring inloueita maichah thra a sihleva mi in ak am mahche tungva avah taploia inloontu, chuleva nannihva khalmo akthloi akral choume, malot amnoh miieio! 29Mahche nannih in jangkansaaktu che kan iintuta nanril inhalnohve. 30#Met 6:8Alamva tukleiramna jaatboom in mainang ita anjon; nannihtu nandarkaar am nan Pa in arom. 31Mahchu ngutva Ringpu vaa kurung huunnata jonve, che mah naamte i nanta veitu.”
Ringramma kdoon
32 #
Jon 21:15–17
“Sadamloom andih eio intrinohve, alamva nan Pa in kurung huunnata nankuunga malanni amah aril apelna. 33#Met 6:19–21; Luk 18:22Nannih in nandoonkha juur choulaia, anran anriingta malanve; amlui amnoh skhao nannih turel tlohve, kmaang amnoh, mah chuvah inruin thlenga anlohcheknoh mahche aklungin mamaang acheknoh ringramma nannihtu lal sihve. 34Alamva nannih nanlal amna khanna nanrilkho amtu.”
Ringramting Doonkhaal
(Met 6:19–21)
35 #
Eph 6:14; Met 25:1–13; Mak 13:33–37 “Nannaam raak a mahche meiser taar a amve, 36#Mak 13:34–36mahche changvaangna buhdoonnata anmah Akpu in inna anleng akngaak anmah khanangve, chunna amah in athlenglai kak hanga inkhaar achumlai anmah in amihoongnatu mahchunang veive 37#Jon 13:3–5; Met 24:42; Luk 21:36Anmah Akpu in athlenglai doutrang inthranga antuuk roijuih eikha doiphah vei tuei; keiin nannihta atak a kisonchou, amah in anaam raak a anmahta tebor a amboktuei, che amah in thlenga anmahta rou atlohtuei. 38Amah in innih tihpi jaanngaak nohle inthumtihpi jaanngaak atlak in thlenga anmahta tuukleva anmahva doiphah veiusei! 39#Met 24:43–44; 1 Thes 5:2; Mad 3:3; 16:15; 2 Pit 3:10Chuta mah i romve, innpuin jaknang punga inruin thlengume tihta romleva, amah in innta mahnoh a che inruin thlenga apoot acheita khoia maruknoh uta. 40Nannih inkho inchaanga amve; alamva miivaa Asa kupa in namidonnoh punga thlengtu.”
Malot aja khatkho malot jahnoh
41Pitar in ason, “Akpu, mah pandam i kannih kankuung khopta nisonningme chunoh a mii naamte akho nisonme?” 42#Met 24:45–51; Luk 7:13Mahchunna Akpu in ason, “Mahchunna, ajana laikhanna innpuin amahkuunga a inn alou mahche apootchei pumte masilla amahta malot aja aksing amreltheih miichu tume? 43Amah akpu in athlenglai mahchunanga thra marella amah a inn alouta kemtheih a amlaitalla aphah roijuikha doiphah veisa. 44Atak a keiin nankuunga kisonchou, innpuin adoon akhaal naamte aroikuunga amchoih kirtu. 45Chuta amah roijuih in arilla anroua amdontu, ‘Kei akpu in thleng thilsa,’ cheva amah in kupa kumei roijuih eita khonraan mathronna, che saa iinna tuiibuh inruia amle, 46roijuih in amdonnoh aknia mahche amah in aromnoh punga amah akpu in thlengtu, amahta tanti atlohtu che malotjanoh mii eisoh repnanga asihjoutuei. 47#Luk 8:18; 19:26Roijuih khanna amah akpu in amdonva arom, chuta inchaangnoh chunohle amah akpu in amdonta tlohnoh, amah roijuih khava trihkhop sungmun aphahtu. 48Chuta akpu in amdon romnoh, che khon aja roijuih khava sungmun inleou a akhontu. Che khalmo darkaar am mii eita anmah darkaar nujuih a tam amlantuei, chekho ralla tam darkaar mii kuungah ralla tam amlantu.”
Jisu in Inthrek Inbaak Amsuuk
(Met 10:34–36)
49 #
Luk 22:15
“Keiin thaleichunga mei kilonnatu thlengsang; keiin mei luh angle keiin kikditchu jangsme! 50#Mak 10:38–39; Jon 12:27Keiin kanlupna ahoong inkhat am; mahchu atlungnoh miilva keiin jikcha kitho umangme! 51#Met 10:34–36; Luk 21:16Keita thaleichunga leh oi amlan thlengta namidon ang? Nganoh, keiin nankuunga kisonchou chuta ralladom threknatu; 52peknata innsuung khat a mii ranga amta inthrek inbaak asuuknatu, che inthum in innihta janohtu mahche innih in inthumta janohtu, 53anmah in inthrek inbaak tuei, apa in asa kupata che asa kupa in apata an theihnohtu, anuin asa kumeita che asakumei in anuta antheihnohtu, ani in amouta che amouin anita an theihnohtu.”
Laita Romtheih
(Met 16:2–3)
54 #
Met 16:2–3
Amah in miitam ankuungakho asonei, “Nannih in kulrel nata sumphai kal nanmuh in, ‘Khu suurtuta’ kak hanga nansontrang, che suurkho suur. 55Mahche akhuna thliraang nanmuh in, ‘Kini tranga insaatuta’ nansontrang, che insaakho insa. 56Akthra veisin eio! nannih in thalei mahche marvaan hoongva nanmuhche mah i ngatuta sonvah nanchek; chuta ipek pek a aksuukva jarella sonva cheknoh choume?”
Nangin Niandah Miikhasoh Injaro
(Met 5:25–26)
57 #
Met 5:25–26
“Mahche nantaktal in jarella akchimta pichaar tlonohchoume? 58Nangsoh trong nisuukpi miisoh pichaarpu amaikuunga nansehjoulai, lamma nansehsuung amahsoh injana thlennatu insuulro, chunohleva amah in nangta pichaarpu akuung phah a kaia naksehpi aja, che pichaarpu in nangta phrangki kuunga namsiltu, cheva phrangki in nangta simma nakthuntu. 59Keiin nangta kitihche, nangin niksiin tuphu achena baobehkha nisiin nohmiil amun khannata inthruh janohluung uche.”
Valgt i Øjeblikket:
LUKE 12: TARAOBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
