मर्कूस 16
16
येशू म्वानावःगु
मत्ती २८:१-८; लूक २४:१-१२; यूह २०:१-१०
1विश्रामबार वने धुंकाः मरियम मग्दलिनी, याकूबया मां मरियम व सलोमीपिं मिलय् जुयाः सीम्हय् इलेत वासः न्याः वन। 2आइतबार खुन्हु, सुथ न्हापां निभाः त्वयेवं इपिं चिहानय् स्वःवन। 3इपिं लँय् थथे हा हां वन – “प्वाः तिनातःगु ल्वहं सुनां चीका बीगु जुइ?” 4थथे हा हां इमिसं उखेपाखे थस्वःबलय् तग्वःगु ल्वहं चीकातःगु खन।
5चिहानय् दुहां वनाः स्वःबलय् अन तुयुगु वसतं पुना च्वंम्ह मनू छम्ह जवय्पाखे दनाच्वंगु खनाः इपिं अजू चाल। 6वं इमित धाल – “ग्याये मते। छिपिं क्रूसय् यख्खानातःम्ह नासरतयाम्ह येशूयात स्वःवयाच्वनागु मखु ला? वय्कः ला थन मदी। वय्कः म्वाना वये धुंकल। स्व, थ्व हे थासय् मखु ला, इमिसं वय्कःयागु सीम्ह तयातःगु? 7आः वनाः छिमिसं चेलातय्त व पत्रुसयात थथे धयाब्यु – ‘वय्कः छिपिं स्वयाः न्हापां गालीलय् थ्यंकादी। वय्कलं धयादी थें छिमिसं वय्कःयात अन हे खनी।’”#मत्ती २६:३२; मर्क १४:२८
8थ्व न्यनेवं इपिं ग्यानाः व अजू चायाः चिहानं बिस्युं वन। थ्व खँ इमिसं सुयातं मकं, छाय्धाःसा इपिं तसकं ग्यात।
9येशू सिनाः हानं म्वाना झाये धुंकाः आइतबार सुथ न्हापां मरियम मग्दलिनीयाथाय् खनेदत। वय्कलं थ्व हे मरियमयागु म्हं न्हय्म्ह भूततय्त पिछ्वयादीगु खः।#१६:९ गुलिं गुलिं हस्तलिपिइ मर्क १६:९-२० मदु 10वं वनाः नुगः मछिंकाः ख्वया च्वंपिं येशूया चेलातय्त थ्व खँ कन। 11म्वाना झाःम्ह येशूयात वं खन धकाः धाःगु खँय् इमिसं विश्वास मयाः।
12थनंलिपा इपिं मध्ये निम्ह चेला गामय् वनाच्वंबलय् वय्कः मेगु हे रूप कयाः इमिगु न्ह्यःने खनेदय्कः झाल। 13थुमिसं नं वयाः मेपिं चेलातय्त थ्व खँ कन। थुमिगु खँय् नं इमिसं विश्वास मयाः।
14लिपा झिंछम्ह चेलातय् नयाच्वंबलय् येशू इमिथाय् झायाः इमिसं विश्वास मयाःगु व इमिगु नुगः छाःगुलिं ब्वःबियादिल, छाय्धाःसा वय्कः म्वाना झाये धुंकाः वय्कःयात खंपिन्सं धाः वःगु खँय् इमिसं विश्वास मयाः।
15अले इमित धयादिल – “सारा संसारय् वनाः छिमिसं फुक्क मनूतय्त भिंगु खँ न्यंकि।#प्रे १:८ 16विश्वास यानाः बप्तिस्मा काःम्ह बचय् जुइ, विश्वास मयाःपिं दोषी ठहरय् जुइ। 17जितः विश्वास याःपिन्के थ्व चिं दइ – जिगु नामं इमिसं भूततय्त पितिनाछ्वइ, न्हू न्हूगु भाषां नवाइ, 18सर्पयात ज्वनी, छुं जुयाः बिख हे त्वंसां इपिं सी मखु, उसाँय् मदुपिनिगु छेनय् ल्हाः तयाः ल्वय् लाय्काबी।”
19थथे इपिं नाप खँ ल्हाये धुंकाः प्रभु येशूयात स्वर्गय् थत यंकल। अले वय्कः परमेश्वरयागु जवय् च्वनादिल।#प्रे १:९-११ 20लिपा चेलातय्सं फुक्कभनं वनाः भिंगु खँ न्यंकाजुल। प्रभु थः नं इपिं नाप जुयाः इमिगु ज्याय् ग्वाहालि यानादिल। अजू चायापुगु चिं क्यनाः इमिसं न्यंकाजूगु खँयागु दसि बियादिल। आमेन।
Valgt i Øjeblikket:
मर्कूस 16: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
