लूका 6
6
विश्रामबारयागु खँ
मत्ती १२:१-८; मर्क २:२३-२८
1विश्रामबार खुन्हु वय्कःपिं छ्वबया लँ झाया च्वंबलय् वय्कःया चेलातय्सं छ्वमा स्वाहाय्काः ल्हातिइ तयाः ब्वब्वस्यानाः नल।#व्य २३:२५ 2थ्व खनाः फरिसीतय्सं धाल – “विश्रामबार खुन्हु याये मज्यूगु ज्या छिमिसं छाय् यानागु?”
3अले येशूं लिसः बियादिल – “दाऊदं थः व थःनाप वःपिनि नये पित्याःबलय् छु यात धयागु खँ छिमिसं ब्वनागु मदु ला? 4गुकथं वं परमेश्वरया छेँय् दुहां वनाः छायातःगु मरि नल? अले थःनाप वःपिन्त नं नकल।#१ शमू २१:१-६ परमेश्वरयात छायातःगु मरि ला पुजाहारीतय्सं सिबय् मेपिन्सं नये हे मज्यू।”#लेवी २४:९ 5अले हानं वय्कलं इमित धयादिल – “मनूया काय् विश्रामबारया नं प्रभु खः।”
ल्हाः गंम्ह मनू
मत्ती १२:९-१४; मर्क ३:१-६
6मेगु विश्रामबार खुन्हु नं वय्कः धर्मशास्त्र स्यनीगु छेँय् झायाः स्यनेकने यानादिल। अबलय् अन जव ल्हाः गंम्ह मनू छम्ह नं दु। 7शास्त्रीत व फरिसीतय्सं वय्कःयात दोष बीत चेवा यानाच्वन। उकिं इमिसं विश्रामबार खुन्हु नं वय्कलं ल्वय् लाय्कादी ला कि धकाः स्वयाच्वन।
8इमिगु मतिइ च्वंगु खँ सीकाः वय्कलं ल्हाः गंम्ह मनूयात धयादिल – “दना वयाः दथुइ च्वँ।” अले व दनाः दथुइ च्वंवल। 9वय्कलं अन च्वंपिन्त धयादिल – “विश्रामबार खुन्हु भिंगु यायेगु ज्यू ला कि मभिंगु यायेगु ज्यू? सुयातं बचय् यायेगु भिं ला कि स्यायेगु भिं? का, थुकियागु लिसः बियादिसँ।”
10अले वय्कलं इपिं फुक्कसिथाय् मिखा ब्वय्काः ल्हाः गंम्ह मनूयात धयादिल – “ल्हाः तप्यंकि।” वं अथे हे यात। अले वयागु ल्हाः लन। 11शास्त्रीत व फरिसीत तसकं हे तंम्वल, अले येशूयात छु यायेगु धकाः ग्वसाः ग्वल।
झिंनिम्ह प्रेरितत ल्ययादीगु
मत्ती १०:१-४; मर्क ३:१३-१९
12छन्हु वय्कः पहाडय् प्रार्थना याः झाल। अबलय् चच्छिं हे वय्कलं परमेश्वरयात प्रार्थना यानादिल। 13कन्हय् खुन्हु सुथय् थः चेलातय्त सःताः इपिं मध्ये झिंनिम्हय्सित ल्ययादिल। अले इमित प्रेरितत धकाः नां छुनादिल।
14थुकथं ल्यःपिं थुपिं खः – सिमोन, गुम्हय्सिगु नां वय्कलं पत्रुस तयादिल, वया दाजु अन्द्रियास अले याकूब व यूहन्ना, फिलिप व बारथोलोमाइ, 15मत्ती व थोमा, अल्फयसया काय् याकूब, क्रान्तिइ सने धुंकूम्ह सिमोन, 16याकूबया काय् यहूदा, व यहूदा इस्करियोत गुम्हय्सिनं लिपा वयाः येशूयात धोखा बिल।
येशूं ल्वय् लाय्कादीगु
मत्ती ४:२३-२५; मर्क ३:७-१२
17अले वय्कःपिं पहाडं क्वहां झाल। अन माथंवंथाय् वय्कःया यक्व चेलातनापं यहूदियाया फुक्क थासं, यरूशलेमं, समुद्र सिथय् लाःगु टुरोस व सीदोनया इलाकां 18वय्कःयागु खँ न्यनेत व थथःगु ल्वय् लाय्केत वःपिं ग्वाः ग्वाः मनूत मुनाच्वन। वय्कलं भूतआत्मा दुबिना च्वंपिं मनूतय्त नं लाय्कादिल। 19फुक्कसिनं वय्कःयात थीत कुतः यानाच्वन, छाय्धाःसा वय्कःयात थीवं ल्वय् लायावनी।
पहाडय् बियादीगु उपदेश
मत्ती ५:१-१२
20येशूं चेलातय्त स्वयाः धयादिल –
“छिपिं नये मखंपिं मनूत
धन्यपिं खः।
परमेश्वरया राज्य छिमिगु हे खः।
21 छिपिं नयेपित्याका च्वंपिं धन्यपिं खः,
छाय्धाःसा छिमिसं लुधंके खनीतिनि।
आः ख्वया च्वंपिं धन्यपिं खः,
छाय्धाःसा छिपिं लय्ताये दइतिनि।
22 मनूया काय् नाप जुयाः
मनूतय्सं घृणा याकाजुइपिं धन्यपिं खः,
अले पितिना तःपिं, मभिंका तःपिं
व दुष्ट धाय्का च्वनेमाःपिं धन्यपिं खः।” #
१ पत्र ४:१४
23 छिपिं लय्ताया च्वँ,
छाय्धाःसा स्वर्गय् छिमित
तःधंगु सिरपाः तयातःगु दु।
इमि तापाःबाज्यापिन्सं नं
अगमवक्तातय्त थथे हे
याना छ्वःगु खः। #
२ इति ३६:१६; प्रे ७:५२
24 “आः तःमि जुयाच्वंपिं मनूत –
छिपिं गुलि अभागी,
छाय्धाःसा छिमिसं काये माक्व
आः हे काये दये धुंकल।
25 आः प्वाः जाय्क नया च्वंपिं,
छिपिं गुलि अभागी,
लिपा छिमिसं नयेखनी मखु।
आः न्हिलाः च्वंपिं मनूत,
छिपिं गुलि अभागी,
लिपा छिमिसं दुःख फयेमाली,
अले ख्वयेमाली।
26 मनूतय्सं भिं धाय्का जूपिं
छिपिं गुलि अभागी,
छाय्धाःसा इमि तापाःबाज्यापिन्सं नं
मखुपिं अगमवक्तातय्त थथे हे भिंपिं धयाजूगु खः।”
शत्रुतय्त माया यायेगु
मत्ती ५:३८-४८; ७:१२
27 “जिं छिमित धाये बांलाक न्यँ, शत्रुतय्त माया या, हेला याइपिन्त भिं या। 28थःत सराः ब्यूपिन्त सुवाः ब्यु। थःत मभिं याःपिनिगु निंतिं प्रार्थना या। 29सुनानं छिमित न्यतालय् दाल धाःसा मेगु न्यता नं फया ब्यु। सुनानं छिमिगु गा लाका का वःसा, लं नं त्वया ब्यु। 30फ्वं वःपिन्त ब्यु। सुनानं छिमिगु छुं कयाः यंकाः लितबी महःसां हजि धकाः फ्वने मते। 31मेपिन्सं छिमित छु याःसा यः, छिमिसं नं इमित अथे हे या।”#मत्ती ७:१२
32 “थःत माया याइपिन्त जक माया याःसा छिमिसं छु हे तःधंगु यात? पापीतय्सं नं ला थःत माया याइपिन्त माया याः नि। 33थःत भिं याइपिन्त जक भिं याःसा छिमिसं छु हे तःधंगु यात? पापीतय्सं नं ला अथे याः नि। 34पुले हइपिन्त जक त्यासा बीगु याःसा छिमिसं छु हे तःधंगु यात? पापीतय्सं नं ला पुले हइपिं पापीतय्त त्यासा ब्यू नि।
35 “अय्जूगुलिं छिमिसं शत्रुतय्त माया यानाः इमित भिं या। लित कायेगु मतिइ मतसे त्यासा ब्यु। अले छन्त तःधंगु सिरपाः दइ। अले हानं छिपिं दकलय् तःधंम्ह परमेश्वरया काय्पिं जुइ। छिमि परमेश्वर बाःनं लोभीतय्त नं, तसकं मभिंपिं मनूतय्त नं, उतिकं हे दया माया यानादी। 36अथे हे छिपिं नं, बाः थें, दया माया याइपिं जुयाच्वँ।”
कर्पिन्त दोष बीगु
मत्ती ७:१-५
37 “कर्पिनिगु न्याय याये मते, अले छिमिगु नं न्याय याइ मखु। कर्पिन्त दोष बी मते, अले छिमित नं दोष बी मखु। क्षमा ब्यु, अले छिमित नं क्षमा बी। 38कर्पिन्त ब्यु, अले परमेश्वरं नं छिमित बियादी। छिमिसं फयां फय् मफय्क कुलि संकाः संकाः दानाः बी। गुलि छिमिसं कर्पिन्त बिल, उलि हे छिमित नं बी।”
39अले वय्कलं इमित छगू उखान नं कनादिल – “कांम्ह मनुखं कांम्ह मनूयात ल्हाः ज्वनाः यंकूसा इपिं निम्हं गालय् कुतुं मवनी ला? 40गुरु स्वयाः चेला तःधं मजू। अथेसां ब्वने गाकाः व नं गुरु थें हे जुइ।#मत्ती १०:२४-२५; यूह १३:१६; १५:२०
41 “थःगु मिखाय् सुपः दुहां वनाच्वंगु मखंम्हय्सिनं थः किजाया मिखाय् धू दुहां वनाच्वंगु खँय् छाय् वास्ता याः जुइ माल? 42थःगु हे मिखाय् च्वंगु सुपः मखंम्हय्सिनं थः किजाया मिखाय् च्वंगु धू लिकयाबी धकाः गथे धाये फइ? हे निपाः ख्वाःपाः दुपिं, न्हापां थःगु मिखाय् च्वंगु सुपः निं लिका। अले तिनि कर्पिनिगु मिखाय् च्वंगु धू खंकाः लिकाये फइ।”
सिमा व फल
मत्ती ७:१५-२०; १२:३३-३५
43 “मभिंगु सिमाय् भिंगु फल सइ मखु। अथे हे भिंगु सिमाय् मभिंगु फल सइ मखु, 44छाय्धाःसा फलं हे सिमा भिं मभिं सीके फइ। कंमाय् यःमरि सया च्वनी मखु। अथे हे कंझालय् नं दाख सया च्वनी मखु।#मत्ती १२:३३ 45भिंम्ह मनूया मतिइ भिंगु हे दइगुलिं वं भिंगु भिंगु हे न्ववाइ। अथे हे मभिंम्ह मनूया मतिइ मभिंगु दइगुलिं वं मभिंगु हे न्ववाइ, छाय्धाःसा मतिइ छु दु, व हे खँ म्हुतुं न्ववाना हइ।”#मत्ती १२:३४
छेँ दय्कीपिं निम्ह मनूत
मत्ती ७:२४-२७
46 “छिमिसं जिं धयागु खँ न्यने मखुसा, छाय् जितः प्रभु, प्रभु, धकाः धायेगु? 47जिथाय् वयाः जिगु खँ न्यनाः अथे हे याःम्ह मनू गज्याःम्ह जुइ धकाः जिं छिमित कने। 48व मनू छेँ दय्कीम्ह मनू थें खः। गुम्हय्सिनं ल्वहंया द्यःने बल्लाक जग म्हुयाः छेँ दन। खुसिबाः वलं नं व छेँ चुइकः यंके मफुत, छाय्धाःसा व छेँ बल्लाक दय्कातःगु खः। 49जिगु खँ न्यनाः नं अथे मयाइम्ह मनू जग मम्हुसे छेँ दंम्ह मनू थें खः। खुसिबाः वःबलय् वयागु छेँ चुइकः यंकल। थुकथं वयागु छेँ हासनास जुयाः वन।”
Valgt i Øjeblikket:
लूका 6: NEW
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 Nepal Bible Society, Newa Christian
Literature Center and Wycliffe Bible Translators, Inc.
