Hinangan 9
9
Patindeg si Saul pu si Isa
(Hinangan 22:6-16; 26:12-18)
1Sābu miyaꞌan, si Saul isab gaꞌ dehenganne pamantane duk panunggaꞌne meꞌ tindeg si Isa, Panuhutanin. Pī iye si imam nakuraꞌin 2duk māku iye meꞌ sulat boꞌone si meꞌ kalanggal-langgalan Yahudi laꞌi si puweblo Damaskus. Meꞌ sulat miyaꞌan ngurungan iye kapatut. Bang niyaꞌ kasuwaꞌne laꞌi meꞌ aꞌa manuhut toloꞌ Isa Almasihin, makajari siye siggewne lella-dende binoꞌo balik pī si Awrusalam kinalabusu.
3Manjari, sābu laꞌi iye si lān tapit ne si Damaskus, bessuwang niyaꞌ sahaya amban langit sinag paliput si iye. 4Magtawus iye hebbaꞌ diyataꞌ bulak. Manjari makakale iye suwala missā si iye. Paꞌin suwalahin, “O Saul, Saul. Weꞌey ku binasanu?” 5Nambung si Saul, paꞌinne, “Sine kew, Tuwan?” “Si Isa ku,” paꞌin suwalahin. “Aku hep bininasanun. 6Saguwaꞌ kuwat kew,” paꞌinne, “duk pī ne kew dem puweblo miyaꞌan. Inakahan du kew laꞌi bang ine subey hininangnun.” 7Meꞌ saweꞌ si Saul maglengnganin, nengge laꞌi bengngangan. Takalede suwalahin saguwaꞌ gaꞌ niyaꞌ aꞌa takitede. 8Manjari kuwat ne si Saul amban diyataꞌ bulak saguwaꞌ paglukane matanen, gaꞌi ne iye ngite. Hangkan tinundan ne iye weꞌ de hap pī si Damaskus. 9Tellum bahangi gaꞌi iye makakite duk gaꞌ iye mangan atawa nginum.
10Laꞌi si Damaskus niyaꞌ tindeg Isa Almasi inēnan Ananiyas. Pabagala si iye si Isa duk paꞌin si Isa, “O Ananiyas.” “Weꞌey, Tuwan?” paꞌinne. 11Paꞌinne pu Ananiyas, “Kuwat kew. Pī kew si kalsara inēnan Kalsara Tiludley duk tilewun laꞌi si lumaꞌ si Judas sabab dambuwaꞌ aꞌa amban Tarsus inēnan si Saul. Īꞌ iye sasang ngampun-ngampun. 12Bakas pinakite ne weꞌ ku si iye bang ine sōng hininangnu si iyehin. Kuweꞌ du kew takitene padiyalem pī mettad meꞌ tangannun si iye supaya iye ngite balik.” 13Saguwaꞌ nambung Ananiyas, paꞌinne, “Allo, Tuwan, ekka ne bakas ngakahan aku sabab si Saul miyaꞌan. Laꞌatan teꞌed meꞌ hininangne si meꞌ tindegnu si Awrusalamin. 14Duk tiyaꞌ iye tuꞌu si Damaskus kuweꞌitu iban kapatutne amban meꞌ nakuraꞌ meꞌ imamin niggew kēmon meꞌ mangampun si kaꞌuhin.” 15Saguwaꞌ paꞌin si Isa, Panuhutanin, pu Ananiyas, “Pī kew, peggeꞌ tapeneꞌku ne si Saul maghinang si aku. Iye magaka-aka sabab akuhin pī si meꞌ kabangsa-bangsahan dumaꞌin Yahudi, duk si meꞌ kasultananden, duk si meꞌ bangsa Yahudi du isab. 16Duk pakitehanku du si iye kēmon subey sinandalannen sabab panuhutne akuhin,” paꞌin Panuhutanin.
17Hangkan hap pī ne Ananiyas duk padiyalem iye pī dem lumaꞌ si Judas. Binettad weꞌ ne meꞌ tangannen laꞌi pu si Saul duk paꞌinne, “Saul, pungtinaꞌite kew. Tiyaꞌ ku dinaꞌak pitu weꞌ Panuhutanten, si Isa, bakas mapakite si kaꞌu si lān papitunun. Daꞌakne ku pitu supaya kew ngite balik duk supaya kew paꞌasekan weꞌ Niyawa Sutsihin.” 18Magtawus niyaꞌ kuweꞌ bantuk meꞌ sisik kenna laboꞌ amban meꞌ mata si Saulin duk makakite ne iye balik. Manjari kuwat iye duk pinandi iye, tandaꞌ weꞌ sukuꞌ pu si Isa ne iye. 19Ubus mangan ne iye duk balik ne basagnen.
Magmahalayak si Saul laꞌi si Damaskus
Patennaꞌ si Saul bang piyem bahangi laꞌi si meꞌ tindeg si Isa si Damaskusin. 20Manjari magtawus iye pī si meꞌ kalanggal-langgalan Yahudi duk magusihat iye sabab si Isa. “Si Isa inin,” paꞌinne, “Anak Tuhanin.” 21Kēmon makakale iyehin ulaliꞌ teꞌed. Paꞌinde, “Iye hep inin aꞌa malaꞌi si Awrusalam maminasa sasuku mangampun pu si Isahin. Duk iye hep akane mapitu si Damaskusin, asal niggew sasuku manuhut toloꞌ si Isahin duk moꞌo siye balik pī si Awrusalam si meꞌ imamin.”
22Saguwaꞌ pasōng ne ngabasag pagusihat si Saulin. Pastiꞌ teꞌed meꞌ purebanen weꞌ si Isa Almasihin ne, tapeneꞌ Tuhan magbayaꞌin. Hangkan meꞌ Yahudi si Damaskusin gaꞌi taꞌu nambungan iye.
23Pagtiggel-tiggel ne iye laꞌi, magisun meꞌ Yahudihin weꞌ papateyde si Saul. 24Saguwaꞌ kaꞌakahan si Saul sabab isunde miyaꞌan. Ellew-sangem binanteyan weꞌ meꞌ Yahudihin meꞌ tarangka paluwasan amban puweblo miyaꞌan supaya si Saul tapapateyde. 25Saguwaꞌ dambuwaꞌ sangem, ineddoꞌ si Saul weꞌ meꞌ tindegnen bu pinatingkoloꞌ iye weꞌ de dem bakaꞌ bu tinuntunan pī padiyawaꞌ amban tendewan laꞌi si birang batu mapaliput si puweblo miyaꞌan.
Laꞌi si Saul si Awrusalam
26Hap pī si Saul si Awrusalam. Pagtekkane laꞌi, batang iye patuhut si meꞌ tindeg si Isa malaꞌihin. Saguwaꞌ tinalew siye si iye peggeꞌ gaꞌ siye kahagad weꞌ iye asal tindeg si Isa ne. 27Manjari tinabangan si Saul weꞌ Barnabas duk binoꞌo iye weꞌ ne pī si meꞌ kawakilanin. Inakahan siye weꞌ Barnabas weꞌ si Saul inin bakas takitene Panuhutanin, si Isa, sābune si lān hap Damaskus duk missā isab Panuhutanin si iye, duk weꞌ laꞌi si Damaskus bahani iye magusihat si meꞌ aꞌahin sabab si Isa. 28Hangkan si Saul patennaꞌ ne laꞌi si siye duk maglengngan iye diyalem Awrusalam. Gaꞌ niyaꞌ talew-talewne magmahalayak si meꞌ aꞌa sabab si Isa, Panuhutanin. 29Magbissā isab iye duk magpasuweyan duk meꞌ Yahudi bissāhanden Girik. Saguwaꞌ batang si Saul papateyde. 30Pagkataꞌuhan inin weꞌ meꞌ pagkasine tindeg si Isahin, tinuhutan si Saul weꞌ de padurul pī si Kesarea duk dinaꞌak iye tahalaꞌ pī hap Tarsus.
31Manjari bahune ne sanyang kēmon masandel pu si Isa si tibuꞌukan lahat Yahudiyahin, duk si lahat Jalilin duk meꞌ malaꞌi si lahat Samariyahin. Tinabangan siye weꞌ Niyawa Sutsihin hangkan ngabasag sandelden kēmon duk pasōng isab siye magkaꞌekka. Magmātabat teꞌed siye si Tuhan.
Laꞌi si Petros si lahat Lidda duk Joppa
32Manjari maglengngan si Petros ngalatag kalahatan. Mintedde tapī iye si puweblo Lidda nindew meꞌ katindegan si Isa maglahat malaꞌihin. 33Niyaꞌ laꞌi takitene aꞌa inēnan Aneyas, Aꞌa inin gaꞌi dumongaꞌ amban pabākanne dem walun tahun ne peggeꞌ matey barannen. 34Paꞌin si Petros si iye, “Aneyas, pakoleꞌ Isa Almasi ne kew. Dongaꞌ kew duk lūnanun pabākannun.” Magtawus Aneyas dongaꞌ. 35Ekka teꞌed meꞌ aꞌa maglahat si Liddahin duk meꞌ maglahat si Saronin ngite iye duk patuhut ne siye pu si Isa, Panuhutanin.
36Na, laꞌi si lahat Joppa, niyaꞌ dende tindeg si Isa inēnan Tabita. (Bang si bissāhan Girik, ēnnen si Dorkas, hātinen payew.) Luwal iye maghinangan hāp duk nabang teꞌed iye si meꞌ mamiskinin. 37Masa miyaꞌan, tewwaꞌ saki iye bu matey. Sinutsi weꞌ de barannen duk pinabāk weꞌ de si dambuwaꞌ bilik diyataꞌ lumaꞌ. 38Lahat Joppa miyaꞌan gaꞌi du tala teꞌed amban Lidda. Pagtakale weꞌ meꞌ tindeg si Isa malaꞌi si Joppahin weꞌ īꞌ si Petros si Lidda, ngandaꞌak siye duwangan aꞌa pī pu si Petros ngeddoꞌ iye dinaꞌak pī dayiꞌ-dayiꞌ. 39Pagkataꞌuhan si Petros miyaꞌan, magtawus iye magmemes duk nuhut siye ne. Pagtekka laꞌi si Joppa, binoꞌo iye weꞌ de pī si bilik diyataꞌ lumaꞌin. Paliput pī si iye kēmon meꞌ dende baluhin magtangis. Pinakitehan weꞌ de si iye meꞌ badjuꞌ duk meꞌ jaket bakas ilaꞌit weꞌ si Dorkas para si siyehin kaꞌellumnen. 40Pinaluwas siye kēmon weꞌ si Petros amban bilik miyaꞌan, ubus bu nengge iye duk tuꞌutne diyataꞌ kāpan māku-māku si Tuhan. Manjari paharap iye si bangkeyin duk paꞌinne, “Tabita, dongaꞌ kew.” Pinakellat weꞌ dendehin matanen duk pagkitene si Petros, ningkoloꞌ iye. 41Pinasōng weꞌ si Petros tangannen duk pinatengge weꞌ ne. Manjari ilinganan weꞌ ne meꞌ katindegan si Isahin duk meꞌ balu dendehin duk sinōngan weꞌ ne si Dorkas si siye ellum ne. 42Bawag si tibuꞌukan lahat Joppa miyaꞌan sabab kaꞌellum si Dorkas balikin, hangkan ekka aꞌa sandel ne pu si Isa, Panuhutanin. 43Patennaꞌ pe si Petros laꞌi si Joppa tiggel-tiggel. Laꞌi iye si lumaꞌ si Simon, aꞌa iye hinangnen maghatul-hatul kuwit hayep.
Valgt i Øjeblikket:
Hinangan 9: yakV
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators, Inc. All rights reserved.