Hinangan 10
10
Si Petros duk si Korneliyus
1Laꞌi si lahat Kesarea, niyaꞌ aꞌa inēnan Korneliyus. Dambuwaꞌ iye kapitan si kumpaniya meꞌ sundalu bangsa Roma inēnan “Kumpaniya Italiya.” 2Aꞌa inin asal be-āgama. Siye kēmon magtewtey-anakin magsambahayang si Tuhan. Ekka pangurung-ngurungne panabangne meꞌ Yahudi mamiskinin, duk luwal iye ngampun si Tuhan. 3Dambuwaꞌ kohap waktu asal niyaꞌ pabagala si iye dambuwaꞌ malaꞌikat Tuhanin. Takitene pastiꞌ malaꞌikatin paꞌasek dem bilikne duk magpaꞌin si iye, “O Korneliyus.” 4Hawal talew Korneliyusin, dinendengan weꞌ ne malaꞌikatin. Manjari paꞌinne, “Weꞌey, Tuwan?” Paꞌin malaꞌikatin, “Takale Tuhanin pangampunnu si iyehin duk takitene panabangnu meꞌ mamiskinin duk tapikil du kew weꞌ ne. 5Kuweꞌitu ngandaꞌak kew meꞌ aꞌa pī si Joppa ngeddoꞌ dambuwaꞌ aꞌa inēnan si Simon, inēnan isab si Petros. 6Laꞌi iye patennaꞌ pu si Simon, aꞌa maghatul-hatul kuwit hayepin. Lumaꞌnen si higad tahik.” 7Paglumikut ne malaꞌikatin, ngalingan Korneliyus duwangan daraꞌakanne si lumaꞌin duk dambuwaꞌ sundalu bataꞌanne. Sundalu miyaꞌan be-āgama. 8Inakahan siye weꞌ Korneliyus sabab paguwaꞌ malaꞌikatin duk dinaꞌak siye weꞌ ne pī hap Joppa.
9Pagsasumu lettu ellewin, sābude si lān tapit ne si Joppa, manaꞌik si Petros pī diyataꞌ sapew madatag si lumaꞌ palaꞌihanne miyaꞌan ngampun laꞌi. 10Gaꞌ tiggel, inusan ne iye duk batang iye mangan. Saguwaꞌ sābu pinanyap pe kapamanganin, niyaꞌ pabagala si iye amban Tuhan. 11Takitene langitin paluka duk niyaꞌ takitene kuweꞌ bantuk olos ladjab iningketan pidjūnen kaꞌampat pinatuntun pinadiyawaꞌ si dunya. 12Diyalem olos miyaꞌan laꞌi ne meꞌ bayuꞌ-bayuꞌan hayep malumengnganin, meꞌ mapalelehin, duk meꞌ manuk-manukin. 13Manjari niyaꞌ suwala takalene magpaꞌin si iye, “Kuwat kew, Petros. Numbaliꞌ kew duk mangan kew.” 14Saguwaꞌ paꞌin si Petros, “O Tuwan, gaꞌi ku. Tiggelanku ellum, gaꞌ pe ku bakas makaꞌakan ine-ine mukalu atawa haram.” 15Takalene ne isab suwalahin magpaꞌin si iye, “Daꞌa paꞌinun haram bakas tahalal weꞌ Tuhanin.” 16Mintellu inin pinalabey si iye ubus bu pinaꞌangkat ne olos miyaꞌan balik pī si langit.
17Sābu si Petros pe magulaliꞌ bang ine hāti bakas pinabagala si iye miyaꞌan, tekka ne laꞌi si lumaꞌ si Simon meꞌ dinaꞌak Korneliyusin. Laꞌi ne siye si tarangka. 18Ngalingan siye magtilew, paꞌinde, “Niyaꞌ ke luꞌu patennaꞌ aꞌa inēnan si Simon, inēnan isab si Petros?” 19Sābu miyaꞌan laꞌi pe si Petros mikil-mikil bang ine hāti bakas takitenen. Manjari paꞌin Niyawa Tuhanin si iye, “Pakalehun be. Niyaꞌ laꞌi tellungan aꞌa miha kaꞌu. 20Kuwat kew duk duwaꞌi kew pī. Daꞌa kew magalang-alang nuhut siye peggeꞌ aku mangandaꞌak siye mapituhin.” 21Hangkan duwaꞌi ne si Petros duk paꞌinne si meꞌ aꞌahin, “Aku ne hep aꞌa pinihabin. Ine teꞌ akabi si akuhin?” 22“Dinaꞌak kami pitu weꞌ Kapitan Korneliyus,” paꞌinde. “Aꞌa hāp iye. Talew iye si Tuhan duk pagaddatan iye weꞌ meꞌ Yahudihin kēmon. Niyaꞌ malaꞌikat Tuhanin ngandaꞌak iye, dinaꞌak kew pinasan pī si lumaꞌne, supaya koꞌ takalene ine-ine bissānu.” 23Na, dinaꞌak dahuꞌ siye weꞌ si Petros padiyalem duk inohotan siye weꞌ ne laꞌi ne sangemin.
Pagsasumuhin, magmemes iye duk nuhut ne iye siye. Niyaꞌ isab meꞌ pagkasine tindeg si Isa amban Joppa nuhutan iye. 24Pagellew dambuwaꞌin, tekka ne siye si lahat Kesarea. Si Korneliyus laꞌi ne ngagad si lumaꞌne. Pinagtipun isab weꞌ ne laꞌi meꞌ kaꞌusbahannen duk meꞌ bagayne inessebin. 25Pagsōng padiyalem ne si Petros laꞌi, pasampang pī Korneliyus duk pasujud iye si antag bettis si Petros. 26Saguwaꞌ pinatengge iye weꞌ si Petros. Paꞌin si Petros si iye, “Nengge kew. Aku inin manusiyaꞌ du kuweꞌ kaꞌuhin.” 27Magbissā-bissā siye duwangan sābude mapadiyalemin. Laꞌi diyalem, takite si Petros meꞌ aꞌa maꞌekka magtipunin. 28Paꞌinne si siye, “Kataꞌuhanbi, bang si āgama kami Yahudi, gaꞌi kami makajari palamud si meꞌ aꞌa dumaꞌin Yahudi. Gaꞌi kami makajari bisan patindew si meꞌ kuweꞌ kaꞌam inin. Saguwaꞌ pinahāti weꞌ Tuhanin si aku,” paꞌinne, “weꞌ subey gaꞌ niyaꞌ aꞌa kimmatanku batal atawa haram. 29Hangkan hep sakaliꞌ ku pasanbi, gaꞌ ne ku magalang-alang pitu. Manjari tilewte kaꞌam, ine teꞌ pamasananbi akuhin?”
30Nambung Korneliyus, paꞌinne, “Hatu meꞌ sa īꞌ, tellu ellew ne palabey, tuꞌu ku miyaꞌan si lumaꞌ ngampun waktu asal. Manjari bessuwang niyaꞌ aꞌa nengge paharap si aku ngillap teꞌed semmeknen. 31Missā aꞌa miyaꞌan si aku, paꞌinne, ‘O Korneliyus. Takale Tuhanin ne meꞌ pangampunnu si iyehin duk takitene panabangnu meꞌ mamiskinin. 32Ngandaꞌak kew pī si Joppa ngeddoꞌ dambuwaꞌ aꞌa inēnan si Simon, inēnan isab si Petros. Laꞌi iye patennaꞌ pu si Simon, aꞌa maghatul-hatul kuwit hayepin. Lumaꞌnen si higad tahik.’ 33Na, hangkan hep kew pasanku magtawus,” paꞌin Korneliyus. “Duk magsukul ku teꞌed si kaꞌu peggeꞌ tiyaꞌ ne kew. Duk kuweꞌitu tiyaꞌ ne kami kēmon tuꞌu magtipun si matahan Tuhan pakale ine-ine bissā pangandaꞌakan Tuhanin kaꞌu.”
Binissā si Petrosin
34Manjari missā si Petros si siye. Paꞌinne, “Kuweꞌitu mattan ne si aku weꞌ asal bennal Tuhanin gaꞌi pagbiddaꞌne manusiyaꞌin. 35Bisan bangsa ine, sasuku magmātabat si Tuhan duk bentel meꞌ hinangannen, kasulutan Tuhanin si iye. 36-37Bakas takalebi ne hatu sabab aka-aka mahāp pinaboꞌohan Tuhan si meꞌ bangsa Yahudihin, weꞌ niyaꞌ ne kasanyangan sabab bakas tahinang Isa Almasihin; iye hep magbayaꞌ si kēmon-kēmonin. Kataꞌuhanbi bang ine maꞌumantag si tibuꞌukan lahat Yahudiyahin tinagnaꞌan laꞌi si Jalil pagubus Yahiya magusihat pasal pandi tawubatin. 38Kataꞌuhanbi sabab si Isa, aꞌa Nasaretin. Pinapī weꞌ Tuhanin si iye Niyawa Sutsihin duk inurungan iye balakat. Lumengngan iye duk tungan-tunganne, maghinangan hāp iye. Pinakawuliꞌ weꞌ ne kēmon pasayedan weꞌ nakuraꞌ seyitanin, peggeꞌ laꞌi Tuhanin si iye. 39Duk kami inin,” paꞌin si Petros, “kasaksiꞌan kami kēmon bakas hininang si Isa si lahat meꞌ bangsa Yahudihin duk laꞌi si Awrusalamin. Manjari pinapatey iye weꞌ meꞌ aꞌahin, ilansang weꞌ de diyataꞌ olom. 40Saguwaꞌ katellum bahangi puwas kamateynen, pinakellum iye balik weꞌ Tuhanin duk pinakitehan iye weꞌ ne. 41Gaꞌ iye pinakite si kēmon aꞌa, luwal hadja si kami meꞌ asal andang pineneꞌ weꞌ Tuhanin hinang saksiꞌ. Takite kami iye. Makapagtuhut kami duk si Isa mangan duk nginum kaꞌellumne mabalikin. 42Duk dinaꞌak kami weꞌ ne magmahalayak aka-aka mahāpin si meꞌ aꞌa. Dinaꞌak isab kami naksiꞌ weꞌ kaꞌurungan iye kapatut weꞌ Tuhanin ngahukum meꞌ manusiyaꞌin kēmon, meꞌ maꞌellumin duk meꞌ pateyin. 43Kēmon meꞌ kanabi-nabihanin bakas missā isab sabab si Isa Almasi. Paꞌinde weꞌ sasuku masandel pu si Isahin, inampun du meꞌ duseden sabab bakas tahinang si Isahin.”
Tasangka weꞌ meꞌ aꞌa dumaꞌin Yahudi Niyawa Sutsihin
44Sasang missā pe si Petros, paꞌasek Niyawa Sutsihin pī si kēmon meꞌ aꞌa mapakale si bissānen. 45Magulaliꞌ teꞌed meꞌ Yahudi masandel pu si Isahin, iye meꞌ saweꞌ si Petros amban Joppahin. Ulaliꞌ siye peggeꞌ pinapī isab weꞌ Tuhanin lasa-lasahannen, Niyawa Sutsihin, si meꞌ aꞌa dumaꞌin bangsa Yahudi. 46Takalede hep disi Korneliyus missā nanglitan Tuhanin si bissāhan dumaꞌin bissāhande. Manjari paꞌin si Petros, 47“Meꞌ aꞌa inin tasangkade ne Niyawa Sutsihin sa kitehin bi isab. Gaꞌ ne niyaꞌ makasaggaꞌ bang siye inin pinandi.” 48Hangkan dinaꞌak ne siye weꞌ si Petros pinandi, tandaꞌ weꞌ sukuꞌ pu si Isa ne siye. Manjari inohotan weꞌ disi Korneliyus si Petros laꞌi dahuꞌ patennaꞌ si siye meꞌ piye-piyem bahangi ne.
Valgt i Øjeblikket:
Hinangan 10: yakV
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators, Inc. All rights reserved.