Hinangan 8
8
Duk padūs si Saul pamapateyde Estepanin.
Bininasa weꞌ si Saul meꞌ masandel pu si Isahin
1-2Kinubul si Estepan weꞌ meꞌ aꞌa be-āgama. Magmatey siye duk magtangis sabab iye. Puwas hadja kamatey Estepanin, tinagnaꞌan ne paminasa si meꞌ masandel pu si Isa si Awrusalamin. Sabab miyaꞌan, kēmon katindegan si Isahin kanat-kanat si meꞌ kalahat-lahatan laꞌi si Yahudiya duk si lahat Samariya. Luwal du meꞌ kawakilan sampūꞌ duk duwehin manggaꞌ maꞌusaꞌ amban Awrusalamin.
3Duk si Saul miyaꞌan, bininasa teꞌed weꞌ ne meꞌ aꞌa masandel pu si Isahin. Inasekan weꞌ ne meꞌ kalumaꞌanden dambuwaꞌ-dambuwaꞌ, duk siniggew weꞌ ne siye lella-dende, duk kinalabusu weꞌ ne.
Minahalayak aka-aka mahāpin laꞌi si Samariya
4Meꞌ masandel pu si Isa makanat-kanatin, ilatag weꞌ de kalahatanin duk minahalayak weꞌ de aka-aka mahāp sabab si Isahin. 5Si Pilip hap pī si dambuwaꞌ puweblo laꞌi si Samariya. Magmahalayak iye laꞌi si meꞌ aꞌahin sabab Almasi, pineneꞌ Tuhan magbayaꞌin. 6Meꞌ aꞌa mabanesin pakale teꞌed si meꞌ binissā si Pilipin, duk takite weꞌ de meꞌ hinangan balakatan hininangnen. 7Ekka meꞌ aꞌa paguwaꞌan meꞌ seyitan. Magkilahap meꞌ seyitanin papales sakaliꞌ siye paluwas. Duk ekka meꞌ aꞌa matey baranden duk meꞌ kukuꞌ kawuliꞌan. 8Hangkan kēgan teꞌed meꞌ aꞌa si puweblo miyaꞌan.
9Niyaꞌ aꞌa maglahat laꞌi si puweblo miyaꞌan inēnan si Simon. Dambuwaꞌ iye landungan duk ulaliꞌ teꞌed meꞌ aꞌa Samariyahin sabab meꞌ hininangnen. Paꞌin si Simon miyaꞌan weꞌ dambuwaꞌ koꞌ iye aꞌa balakatan. 10Kēmon meꞌ aꞌa si lahat miyaꞌan, diyawaꞌ ke atawa langkew pagaꞌanen, asal pakale teꞌed si iye. Paꞌin meꞌ aꞌahin sabab si Simon miyaꞌan, “Iye ne hatu inin taga balakat amban Tuhanin ēnande ‘Balakat Mahadjehin.’ ” 11Tiggel ne pagulaliꞌde sabab meꞌ hinangnen hangkan pinakale teꞌed iye weꞌ de. 12Saguwaꞌ pagkahagad ne meꞌ aꞌa miyaꞌan si aka-aka mahāp minahalayak si Pilip sabab pagbayaꞌ Tuhanin duk sabab Isa Almasihin, manjari pinandi siye lella-dende tandaꞌ weꞌ siye sukuꞌ pu si Isa ne. 13Bisan si Simon kahagad isab. Duk pagubus iye pinandi, luwal ne iye nuhut-nuhut si Pilip. Ulaliꞌ teꞌed iye pagkitene meꞌ hinangan balakatan duk makaꞌulaliꞌ hininang si Pilipin.
14Manjari takale weꞌ meꞌ kawakilan malaꞌi si Awrusalamin weꞌ kinahagad ne weꞌ meꞌ aꞌa Samariyahin lapal Tuhanin. Hangkan dinaꞌak weꞌ de si Petros duk Yahiya hap Samariya. 15Pagtekkade laꞌi, māku-māku siye si Tuhan para si meꞌ masandel pu si Isahin supaya siye paꞌasekan weꞌ Niyawa Sutsihin. 16Peggeꞌ gaꞌ pe hep Niyawa Sutsihin bakas paduwaꞌi pī si siye bisan dangan. Saguwaꞌ bakas hadja siye pinandi tandaꞌ weꞌ siye sukuꞌ pu si Isa. 17Ubus binettad weꞌ si Petros duk Yahiya tanganden pī si meꞌ aꞌa Samariya masandelin. Manjari paꞌasekan ne siye weꞌ Niyawa Sutsihin.
18Pagkite si Simon weꞌ pinangurung Niyawa Sutsihin si meꞌ aꞌahin pagbettad meꞌ kawakilanin tanganden si siye, pī iye nōngan si Petros duk Yahiya pilak. 19Paꞌinne si siye, “Urunganun bi ku isab balakatbi iyan supaya bang bettadku meꞌ tangankun bisan pu sine, paꞌasekan du iye weꞌ Niyawa Sutsihin.” 20Sambungan si Petros iye, paꞌinne, “Kamulkaꞌan kew sampay pilaknu iyan. Weꞌ kannalnu tabellinu balakat pangurung Tuhanin? Gaꞌi. 21Gaꞌ niyaꞌ sukuꞌnu atawa lamudnu tuꞌu si hinang kami inin,” paꞌin si Petros, “peggeꞌ ateynun gaꞌi bentel si matahan Tuhan. 22Hangkan pagsusunanun ne tapikilnu malaꞌat iyan duk māku kew ampun si Tuhan, kaw du ampunne tapikilnu malaꞌat iyan. 23Peggeꞌ tahātiku,” paꞌin si Petros, “weꞌ asal ngimbū kew teꞌed duk kuweꞌ kew banyagaꞌ dusenun.” 24Manjari paꞌin si Simon pu si Petros duk Yahiya, “Māku-māku kaꞌam si Tuhan para si aku, supaya gaꞌi du tekka si aku suknaꞌbi miyaꞌan.”
25Minahalayak pe weꞌ si Petros duk Yahiya lapal Tuhanin si meꞌ aꞌa malaꞌihin duk naksiꞌ siye sabab si Isa. Puwas miyaꞌan balik siye hap Awrusalam. Sābude si lān, padeheng siye si meꞌ kalumaꞌan si Samariya duk minahalayak weꞌ de laꞌi aka-aka mahāp sabab si Isahin.
Si Pilip duk bagellal bangsa Etiyopiyahin
26Manjari niyaꞌ dambuwaꞌ malaꞌikat Tuhanin missā pu si Pilip. Paꞌinne, “Magmemes kew. Hap pī kew si lān amban Awrusalam tudju Gasaley.” (Lān inin gaꞌi ne tantu ginuna kuweꞌitu.) 27Hangkan magmemes ne si Pilip duk hap pī ne iye. Paglaꞌi ne iye si lān miyaꞌan, ngite iye dambuwaꞌ aꞌa bangsa Etiyopiya bakas amban Awrusalam ngisbat Tuhanin. Aꞌa inin bagellal bangsahan, duk iye mangantanan pangalataꞌ sultan dende magbayaꞌ si lahat Etiyopiyahin. Aꞌa inin kapun. 28Kuweꞌitu lengngan moleꞌ ne iye amban Awrusalam duk laꞌi iye ningkoloꞌ diyataꞌ kalesane matsa-matsa kitab sinulat weꞌ Nabi Isaya. 29Paꞌin Niyawa Sutsihin pu si Pilip, “Patapit kew pī paꞌabey si kalesa miyaꞌan.” 30Magubas ne si Pilip pī patapit duk takalene aꞌahin matsa-matsa amban kitab sinulat weꞌ Nabi Isayahin. Tilew si Pilip iye, paꞌinne, “Tahātinu ke binatsanu iyan?” 31Nambung bagellalin, “Saꞌingge pakahātikun bang gaꞌ niyaꞌ magpahāti si aku?” Duk daꞌakne si Pilip pasakey pī ningkoloꞌ si bihingne. 32Meꞌ ayat binatsanen inin:
“Kuweꞌ iye bili-bili nuhut hadja bang binoꞌo sinumbaliꞌ. Kuweꞌ iye anak bili-bili gaꞌi bisan mabehe bang inurutan bulu. Gaꞌ iye bisan kebbutan. 33Diniyawaꞌan iye duk gaꞌ iye hinukum duk hukuman bentel. Sine saꞌ makapagaka-aka sabab meꞌ tubuꞌnen? Gaꞌ niyaꞌ. Peggeꞌ umulne si dunya inin magtamanan ne.”
34Manjari paꞌin bagellalin pu si Pilip, “Akahanun ku. Sabab sine be binissā nabi inin? Sabab dine ke atawa sabab aꞌa seddili?” 35Manjari missā si Pilip. Duk tinagnaꞌan amban meꞌ ayat bakas binatsa miyaꞌan, sinuwi-suwihan iye weꞌ si Pilip aka-aka mahāp sabab si Isahin. 36Duk sābude mapalanjal si lānin, tekka siye si kaniyaꞌan boheꞌ. Paꞌin bagellalin, “Payamanun, niyaꞌ boheꞌ tuꞌu. Makajari ke ku pinandi tandaꞌ weꞌ sukuꞌ pu si Isa ne ku?” (37Paꞌin si Pilip si iye, “Makajari kew pinandi bang kahagad kew pu si Isa dambūs-būs ateynun.” Nambung iye, paꞌinne, “Aweꞌ, asal kahagad ku weꞌ Isa Almasi Anak Tuhanin.”) 38Manjari daꞌak bagellalin pinadeheng kalesahin si meꞌ aꞌanen. Duwaꞌi siye duwangan pī dem boheꞌ duk pinandi ne iye weꞌ si Pilip. 39Pagguwaꞌde amban boheꞌ, bessuwang si Pilip binoꞌo weꞌ Niyawa Tuhanin tahalaꞌ. Gaꞌ ne iye kite bagellalin balik saguwaꞌ palanjal ne bagellalin kēgan manamal. 40Bu si Pilip inin, īꞌ ne iye laꞌi si lahat Asotus. Minahalayak weꞌ ne aka-aka mahāpin si meꞌ kalumaꞌan malaꞌihin duk si kēmon kalahatan palabeyannen sampay tekka iye si lahat Kesarea.
Valgt i Øjeblikket:
Hinangan 8: yakV
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2019, Wycliffe Bible Translators, Inc. All rights reserved.