Salm 137:1-9
Salm 137:1-9 beibl.net 2015, 2024 (BNET)
Wrth afonydd Babilon, dyma ni’n eistedd ac yn wylo wrth gofio am Seion. Dyma ni’n hongian ein telynau ar y coed poplys yno. Roedd y rhai oedd yn ein dal ni’n gaeth eisiau i ni ganu, a’n poenydwyr yn ein piwsio i’w difyrru: “Canwch un o ganeuon Seion i ni!” Sut allen ni ganu caneuon yr ARGLWYDD ar dir estron? Os anghofia i di, Jerwsalem, boed i’m llaw dde gael ei pharlysu. Boed i’m tafod lynu wrth dop fy ngheg petawn i’n anghofio amdanat ti, a phetai Jerwsalem yn ddim pwysicach na phopeth arall sy’n rhoi pleser i mi. Cofia, O ARGLWYDD, beth wnaeth pobl Edom y diwrnod hwnnw pan syrthiodd Jerwsalem. Roedden nhw’n gweiddi, “Chwalwch hi! Chwalwch hi i’w sylfeini!” Babilon hardd, byddi dithau’n cael dy ddinistrio! Bydd yr un fydd yn talu’n ôl i ti ac yn dy drin fel gwnest ti’n trin ni, yn cael ei fendithio’n fawr! Bydd yr un fydd yn gafael yn dy blant di ac yn eu hyrddio nhw yn erbyn y creigiau yn cael ei fendithio’n fawr!
Salm 137:1-9 Beibl Cymraeg Newydd Diwygiedig 2004 (BCND)
Ger afonydd Babilon yr oeddem yn eistedd ac yn wylo wrth inni gofio am Seion. Ar yr helyg yno bu inni grogi ein telynau, oherwydd yno gofynnodd y rhai a'n caethiwai am gân, a'r rhai a'n hanrheithiai am ddifyrrwch. “Canwch inni,” meddent, “rai o ganeuon Seion.” Sut y medrwn ganu cân yr ARGLWYDD mewn tir estron? Os anghofiaf di, Jerwsalem, bydded fy neheulaw'n ddiffrwyth; bydded i'm tafod lynu wrth daflod fy ngenau os na chofiaf di, os na osodaf Jerwsalem yn uwch na'm llawenydd pennaf. O ARGLWYDD, dal yn erbyn pobl Edom ddydd gofid Jerwsalem, am iddynt ddweud, “I lawr â hi, i lawr â hi hyd at ei sylfeini.” O ferch Babilon, a ddistrywir, gwyn ei fyd y sawl sy'n talu'n ôl i ti am y cyfan a wnaethost i ni. Gwyn ei fyd y sawl sy'n cipio dy blant ac yn eu dryllio yn erbyn y graig.
Salm 137:1-9 Beibl William Morgan - Argraffiad 1955 (BWM)
Wrth afonydd Babilon, yno yr eisteddasom, ac wylasom, pan feddyliasom am Seion. Ar yr helyg o’u mewn y crogasom ein telynau. Canys yno y gofynnodd y rhai a’n caethiwasent i ni gân; a’r rhai a’n hanrheithiasai, lawenydd, gan ddywedyd; Cenwch i ni rai o ganiadau Seion. Pa fodd y canwn gerdd yr ARGLWYDD mewn gwlad ddieithr? Os anghofiaf di, Jerwsalem, anghofied fy neheulaw ganu. Glyned fy nhafod wrth daflod fy ngenau, oni chofiaf di; oni chodaf Jerwsalem goruwch fy llawenydd pennaf. Cofia, ARGLWYDD, blant Edom yn nydd Jerwsalem; y rhai a ddywedent. Dinoethwch, dinoethwch hi, hyd ei sylfaen. O ferch Babilon, a anrheithir: gwyn ei fyd a dalo i ti fel y gwnaethost i ninnau. Gwyn ei fyd a gymero ac a drawo dy rai bach wrth y meini.