Luc 18
18
Atcha d’a modonod’a ki ma ka sariyad’a
1Jesus mi dazi zla d’a d’ogola á had’azi a tchen teteu bei tazi tchuk lus ba. 2Mi dala: Sama ka sariyad’a nga kur azina, nga mi le mandara Alona d’i, nga mi le zulo sa d’uo mi. 3Atcha d’a modonod’a nga kur azì máma, ti mba yat ablaud’a gen ma ka sariya máma. Ti dum ala: Ang kan ir sariya manda ki man ma djangûna. 4Yina kal ngola mi min nga d’i, wani bugol mi de kurum ala: An nga ni le mandar Alona d’i, nga ni le zulo sa d’uo pî ni, 5wani kayam modono ndata ti ndagan heî, an mba ni kat sariya mata, kayam mba mat ta teteud’a, kayam ti wagan yan ndi.
6Salad’a mi dazi kua ala: Agi humugi zlad’a hi ma ka sariya ma bei d’ingêr mámid’a. 7Wani Alona mba mi ka sariyad’a hi suma mi manazi suma a nga tchi kam andjege ki faleina d’uo zu? Mba mi le lilinga á ndjunuziya? 8An nga ni dagiya, mba mi kazi sariya mazid’a atogo. Wani fata an Gor Sana mba ni mbad’a, mba ni fe he gagazid’a yam andagad’a ko zu?
D’ogol ma yam Fariziyêna azi ki ma ve lombod’ina
9Jesus mi de zla d’a d’ogola yam suma a nga djib’er ala azi ni suma d’ingêrâ avok Alona, a nga gol suma dingâ is mi na. 10Mi dala: Suma mbà a djak kur gong nga kud’ora hAlonid’a á tchen Alona. Tu ni ma Fariziyêna, ma hina ni ma ve lombod’a mi. 11Fariziyê máma mi tchol tchen hina yam tamba ala: Alona, an lang mersi kayam an nga d’igi suma hiu suma kula d’oze suma bei d’ingêrâ d’oze suma mizeuna na d’i, d’igi ma ve lombod’a ma wana na d’uo mi. 12Kur burâ kid’iziya an d’el tan bei te tena yan mbà, an he yam ahle mana dima pet mi.
13Wani ma ve lombod’a mi tchol bugol sä woi hina dei, mi min hle iram akulo d’uo ko, wani nga mi tchi abom kurum ala: Alona, ang wan hohowonu, an ni sama tchona.
14Jesus mi dala: An nga ni dagiya, sa máma mi i avo hatam mi mbut sama d’ingêrâ kal Fariziyê máma. Kayam sama hle yam akulona, a mba hulongôm yam kä; sama mi ge yam kä na, a mba hlum yam akulo mi.
Jesus mi tin abom yam gugureina
(Gol Mat 19.13-15; Mar 10.13-16)
15Suma dingâ a mba ki gugurei suma gureina mi Jesus, kayam mi tin abom kaziya. Wani ata yima mam suma hata a wazina, a ngoboziya. 16Wani Jesus mi yï gugurei ndazina gevemu, mi de mi mam suma hata ala: Agi aragi gugureina a mbeï gevenu. Ar agi d’elezi d’i, kayam leud’a hAlonid’a ni yam suma d’igi azi na na. 17Gagazi, an nga ni dagiya, sama ge nga yam kä yam leud’a hAlonid’a d’igi gogorâ na d’uo na, mba mi kal kurut ti.
Sama ndjondjoîna
(Gol Mat 19.16-30; Mar 10.17-31)
18Ma ngolâ hi Juif-fîna mi djop Jesus ala: Ma hat ma djivina, an le ni nana ba, ni fe ari d’a didinda ge?
19Jesus mi hulong dum ala: Ni kayam me ba, ang yan ala ma djivina ge? Sama djivi nga d’i; nAlona tu. 20Ang we vun ma hed’a hAlonina ala: Ang le mizeu d’i, ang tchi sa d’i, ang kul li, ang le glangâs ma aboina d’i, ang hu abung kasungû.
21Sa máma mi hulong dum ala: An ngomozi kan pet ni ki gogoron dei.
22Kid’a Jesus mi hum zla ndatid’a, mi dum ala: Ang kid’ak va tu. Ang gus ahligiyeng ngei pet, ang he bege ndata mi suma houd’a. Hina wani, ang mba fahle suma ndjondjoîna sä akulo. Bugola, ang mbeï tit ad’unu. 23Wani kid’a sa máma mi hum zla ndatid’a, hurum zal ngola, kayam mam mi sama ki ndjondjoîna heîna.
24Ata yima Jesus mi wum ala hurum zala na, mi dala: Nad’enga heî ki suma ndjondjoîna á kal kur leud’a hAlonid’a. 25Nafefeta mi djambala á kal kur zul la libirâ, kal la ma ndjondjoîna mi kal kur leud’a hAlonid’a mi.
26Suma a hum zla ndatina a dala: Le ni na ni, sama ndak á fe suta ni nge ge?
27Wani Jesus mi dazi ala: Vama suma a ndak á lum mbuo na, Alona mi ndak á lumu.
28Pierre mi dum ala: Gola! Ami arami wa ahligiyemi pet teyo, ami nga tid’imi ad’ungû.
29Jesus mi dazi ala: Gagazi, an nga ni dagiya, sama ar aziyam mbei d’oze amamba d’oze b’oziyoma d’oze simiyêm mboze groma yam leud’a hAlonid’ina, 30mba mi fe kam kua ngola kur atchogoi d’a wanda, mba mi fe ari d’a didinda kur atchogoi d’a nga d’i mbad’a mi.
Jesus mi de yam á hindid’a yam mad’am ki tchol mamba
(Gol Mat 20.17-19; Mar 10.32-34)
31Jesus mi yo suma dogo yam mbàna gevemu, mi dazi ala: Gola! Ei nga djak i Jerusalem, ahlena pet suma suma djok vun Alona a b’irizi yam an Gor Sanina a mba landjiya. 32Azi mba han abo andjaf suma bei wAlona; sum ndazina a mba lazanu, a mba ngulunu, a mba tuvon ayôna iranu, 33a mba ton ki blafâ, a mba tchanu. Wani kur bur ma hindina an mba ni tchol akulo aduk suma matna.
34Wani suma hata a we nga zla ndata ad’ut ti; zla ndata ni ngeid’a iraziya, a we nga zla d’a mi data ad’ut tuo mi.
Jesus mi mal ir ma duka woyo
(Gol Mat 20.29-34; Mar 10.46-52)
35Kid’a Jesus mi mba go ki Jeriko-d’a, ma duka mi nga kaka kä avun lovota á tchenda. 36Ata yima mi hum del ablau suma a nga kalâ, mi djop ala: Ni me na ge?
37A dum ala: Ni Jesus ma Nazarat-na kalî mamu.
38Mi er ad’um akulo ala: Jesus, ang David goroma, ang wan hohowonu.
39Suma sä tit avo’â a ngobom ala: Ang ba!
Wani mi er ad’um er ra dinga kala ala: Ang David goroma, ang wan hohowonu.
40Jesus mi tchola, mi hazi vuna ala a mbeï ki sed’emu. Kid’a ma duka mba go d’a, Jesus mi djobom ala: 41Ang min ala an langî me ge?
Mi dum ala: Salana, ar ang malan iran ndeyo.
42Jesus mi dum ala: Irang mal leyo, he gagazi manga sud’ung wa da’. 43Ata yi máma na wat, iram mal leyo, mi i ad’u Jesus, nga mi subur Alona. Suma a wahle ndazinina pet a nga gile Alona mi.
Dewis Presennol:
Luc 18: BA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Azumeina Bible © Alliance Biblique du Tchad, 1999.