Luc 19
19
Jesus azi ki Zake
1Jesus mi mbaza azì ma ngol ma Jeriko-na, mi kal kuru. 2Sana nga kua, simiyêm ala Zake, ni ma ngolâ hi suma ve lombod’ina, ni sama ndjondjoîna mi. 3Mi hal lovota á we Jesus mi ni nana ge? Wani mi ndak á wum mbi abo ablau suma, kayam mam mi sama gid’engâ. 4Mi ring avogo, mi djak akulo ata diyagad’a á we Jesus, kayam mi hle ni lovot ndata. 5Kid’a Jesus mi mbaza ata yi mámid’a, mi hle iram akulo, mi dum ala: Ang Zake, tchugï aseng kä atogo, kayam an kak ini avo hatang mbeî.
6Mi tchugï asem kä atogo zak, mi vum ki furîd’a. 7Kid’a suma a we hina d’a, a nga kud’os tazi ala: Mi i ka’î avo hi sama tchona.
8Zake mi tchol akulo avok Salad’a, mi dum ala: Salana, gola! An nga ni wal ahle mana ki suma hohoud’a. Le an te va abo sa hawa ni, an hulong hum kam kua yan fid’i.
9Jesus mi dum ala: Suta mba wa ini kur azì ma wana, kayam mam mi Abraham gorom ngolona mi. 10Kayam an Gor Sana ni mba ná hal suma vit teina á sud’uzi mi.
D’ogol ma yam bege d’a lorina
(Gol Mat 25.14-30)
11Jesus mi de zla d’a d’ogola kua mi suma a mba á hum zla ndatina. Azi djib’er ala Alona nga mi mba ni ka tchetchem á te leu mamba, kayam mam mi go ki Jerusalem. 12Kayam ndata, mi dala: Sana tu nad’u andjaf ma amula. Mi i yam andaga d’a deid’a á mbut amul ma ngolâ yam tamu, bugola, mi hulongîya. 13Mi yi azungeî mama dogo, mi hazi bege d’a lora tutu. Mi dazi ala: Agi i mbud’ugi abogi ki bege ndata gak an hulongîya. 14Wani suma yam andaga mambina a noyômu, a ge sunda blogomu, a dala: Ami min sa máma mi te kami d’i.
15Ata yima mi mbut amul ma ngolâ dana, mi hulongî yam andaga mamba. Mi yi azungeî mam suma mi hazi beged’ina, kayam mam we mbiyo ma azi fuma. 16Azong ma avo’â mba, mi dum ala: Salana, bege d’a lor manga ni tu; an fe kam kua dogo. 17Amulâ mi dum ala: Ang le djiviya, angî azong ma djivina. Kayam ang d’engzeng ki vama akid’eina, ang te yam azina dogo. 18Azong ma mbàna mi mba, mi dum ala: Salana, bege d’a lor manga ni tu; an fe kam kua vahl. 19Amulâ mi dum ala: Ang te yam azina vahl mi. 20Azong ma dingâ mi mba, mi dum ala: Salana, gola! Bege d’a lor mang nga tud’a wana; an ngomot gita ki barud’a. 21An lang mandarangû, kayam angî sama ad’eng ma kal papana. Ang nga hle vama ang tinim nga kä d’uo na, ang nga fet awu ma ang zaram nga d’uo na mi. 22Amulâ mi dum ala: Angî azong ma tchona. An nga ni kang sariyad’a kang yam zla d’a ndavunanga. Ang wala an ni sama ad’eng ma kal papana, an nga ni hle vama an tinim nga kä d’uo na, an nga ni fet awu ma an zaram nga d’uo na. 23Le ni na ni, ni kayam me ba, ang he bege manda mi suma ngom beged’a, tala an hulong fat ki mbiyot tuo d’a ge? 24Mi de mi suma a nga tchola gevema ala: Agi vagi bege d’a lor ra abom ndata, agi hagizi mi ma nga ki bege d’a lora dogona. 25Azi dum ala: Salamina, mam nga ki bege d’a lora dogo da’. 26Amulâ mi dazi ala: An nga ni dagiya, sama lara ma nga ki va aboma, a mba hum kam kua, wani sama nga ki va abom mbuo na, vama nga abom nde na pî, a mba hlumzi woi abomu. 27Wani man suma djangû suma a min an te kazi d’uo na, agi mbeyendjï ka hî, agi tchazi kä woi avoron wana.
DIMAS SA DABI D’A JESUS MI LAT
GO KI JERUSALEM-MBA
(9.28—23.56)
Jesus mi kal kur Jerusalem
(Gol Mat 21.1-11; Mar 11.1-11; Jn 12.12-19)
28Ata yima Jesus mi de hina dana, mi i avorozi á djak i Jerusalem. 29Kid’a mi mba go ki Betfage ki Betani gen ahina d’a a yat ala Olif-fa d’a, mi sun mam suma hata mbà. 30Mi dazi ala: Agi igiza kur azì ma ngol ma sä avorogi wana. Ata yima agi kalagi avona, agi mba fagi gor korona nga djinda kä ma sa mi nga kam mbuo tua na; agi bud’umu, agi mbeyendjïya. 31Le sa mi dagi ala: Ni kayam me ba, agi bud’um ge ni, agi dum ala: Salad’a mi minimî mamu.
32Suma mi sunuzina a i fum d’igi Jesus mi dazi na. 33Kid’a azi nga but gor koro mámid’a, suliyoma a dazi ala: Ni kayam me ba, agi bud’ugi gor korona ge?
34Azi hulong dazi ala: Salad’a mi minimî mamu. 35Azi mba ki gor korona mi Jesus, a zlup baru mazina kamu, a tin Jesus kamu. 36Ata yima nga mi ina, azi bar baru mazina kä kur lovota.
37Kid’a mi mba go ki Jerusalem mi surop kä woi yam ahina d’a Olif-fid’a, ablau suma hata pet a nde le furîd’a, a gile Alona ki delezi akulo yam ahle suma ndandal suma azi wazina. 38A dala: Ar Alona mi b’e vunam yam amul ma ngol ma mi mba ki simiyê Ma didinina. Agi suma sä akulona, agi kagagi ki b’leng nga halasa, agi suburugi Alona mi.
39Fariziyê suma hiuna aduk ablau suma a de mi Jesus ala: Ma hat suma, ang ngop mang suma hata.
40Jesus mi hulong dazi ala: An nga ni dagiya, le azi ba pî, ahuniyôna a mba er ad’uzi akulo.
Jesus mi tchi yam Jerusalem
41Kid’a mi mba go kazì ma ngol ma Jerusalem-mid’a, mi wumu, mi tchi kamu. 42Mi de mi suma kurâ ala: Ladjï agi wagi ini ala ni vama ndak á mbagi ki b’leng nga halasa ni, ni vama djivina kagiya, wani ki tchetchemba a ngeyem wa iragiya, agi ndak á wum mbi. 43Kayam burâ nga mba kagiya, magi suma djangûna a mba nguyugi ki gulumuna, a mba hebegi abo yina pet. 44Azi mba b’lagagi woi ki sum magina pet, a mba ar ahina yam ndrat akulo d’i, kayam me agi wagi nga bur ma Alona mi mba á ndjunugina d’i.
Jesus mi kal kur gong nga kud’ora
(Gol Mat 21.12-17; Mar 11.15-19; Jn 2.13-22)
45Jesus mi kal kur gong nga kud’ora hAlonid’a, mi nde dik suma a nga gus ahlena woina. 46Mi dazi ala: A b’ir kur mbaktumba hAlonid’a ala: Alona mi dala: A mba yi gong manda ala Gong nga tchen Alona, wani agi mbud’ut domina hi suma kulina.
47Nga mi hat suma kur gong nga kud’ora hAlonid’a teteu. Nglo suma ngat buzuna azi ki suma hat gata ki suma nglona hi sumina a nga halam á tchid’a. 48Wani a fe nga lovota á lum va d’i, kayam suma pet a humî zla mamba.
Dewis Presennol:
Luc 19: BA
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Azumeina Bible © Alliance Biblique du Tchad, 1999.