Takwiin 8
8
Allah najja Nooh wa aayiltah
1Wa khalaas baʼad da, al-Rabb fakkar le Nooh wa le kulla l-haywaanaat wa l-bahaayim al-gaaʼidiin maʼaayah fi l-safiina. Wa l-Rabb rassal riih fi l-ard wa l-almi bada yangus. 2Wa uyuun almi al-kubaar al-tihit al-ard wa biibaan al-sama ansaddo wa l-matara wagafat.
3Wa fi muddit 150 yoom, al-almi bada yangus chiyya chiyya min al-ard. 4Wa fi yoom 17 hana l-chahar al-saabiʼ, hujaar Araraat waggafo al-safiina. 5Wa l-almi bada yangus lahaddi l-chahar al-aachir. Wa fi l-yoom al-awwal hana l-chahar al-aachir da, ruuse al-hujaar baano.
6Wa khalaas baʼad 40 yoom, Nooh fatah al-chubbaak al-hu sawwaah fi l-safiina 7wa talag khuraab. Wa hu yitiir yamchi wa yaji lahaddi almi chirib min al-ard. 8Wa baʼad da, talag hamaama kula le tichiif al-almi kan nagas min al-ard. 9Wa laakin al-hamaama ma ligat bakaan al-tukhutt foogah rijileenha achaan lissaaʼ al-almi gaaʼid fi l-ard. Wa hi gabbalat le Nooh fi l-safiina. Wa hu madda iidah wa chaalha wa dakhkhalha maʼaayah fi l-safiina. 10Wa Nooh gaʼad sabʼa yoom wa battaan talag al-hamaama min al-safiina. 11Wa l-hamaama gabbalat leyah be achiiye wa daahu indaha fi khachumha warchaalaay hana zaytuun akhdar. Wa be da, Nooh irif kadar al-almi nagas khalaas min al-ard. 12Wa gaʼad sabʼa yoom wa battaan talag al-hamaama. Wa l-hamaama battaan ma gabbalat leyah.
Nooh marag min al-safiina
13Wakit Nooh indah 601 sana, fi l-yoom al-awwal hana l-chahar al-awwal hana l-sana di, al-almi kammal min al-ard. Wa Nooh fatah raas al-safiina wa chaaf khalaas al-turaab bigi yaabis. 14Wa fi yoom 27 hana l-chahar al-taani, al-ard yibsat marra waahid.
15Wa khalaas, al-Rabb gaal le Nooh : 16«Amrug min al-safiina, inta wa martak wa awlaadak wa awiin awlaadak. 17Wa marrig maʼaak kulla l-haywaanaat misil al-tuyuur wa l-bahaayim wa zawaahif al-ard achaan yaldo wa yabgo katiiriin wa yamlo al-ard.»
18Wa Nooh marag min al-safiina wa awlaadah wa martah wa awiin awlaadah. 19Wa kulla l-haywaanaat wa l-tuyuur wa zawaahif al-ard marago min al-safiina, kulla nafar wiheedah.
20Wa baʼad da, Nooh bana madbah le yigaddim foogah dahaaya le Allah. Wa chaal min kulla l-bahaayim wa l-tuyuur al-akilhum halaal wa harragaahum fi l-madbah al-hu banaah.
21Wa Allah chamma al-riihe wa ridi beeha wa gaal fi nafsah : «Min al-yoom battaan ma nalʼan al-ard achaan al-insaan. Hatta kan galbah hawaan wa yidoor yisawwi illa l-fasaala min hu sakhayyar. Wa battaan ma nuguchch kulla makhluug hayy misil ma ana gachcheethum awwal.
22«Wa min al-ard gaaʼide da, daayman yaji
wakt al-teeraab wa wakt al-gatiʼ,
wakt al-hamu wa wakt al-barid
wa yaji seef wa yaji chite
wa yaji leel wa yaji nahaar
wa daayman yilkhayyaro misil da.»
Dewis Presennol:
Takwiin 8: ADT19
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Arabe tchadien (alphabet latin) Bible © Alliance Biblique du Tchad, 2019.