ᐋᐴᓯᑕᓖᑦ ᐱᓂᐊᕐᓂᖏᑦ 1
1
ᔩᓱᓯᐅᑉ ᐃᓕᓐᓂᐊᕐᑎᒥᓂᒃ ᑲᑎᒪᒃᓯᓱᖓᕐᓂᖓ
1 #
ᓘᑲᓯ 1:1-4. ᑎᐅᐱᓘᓰ, ᑎᑎᕋᓚᐅᕐᑕᓐᓂ ᓯᕗᓪᓕᕐᓂ, ᑎᑎᕋᐅᓯᖃᓚᐅᕐᐳᖓ ᔩᓱᓯᐅᑉ ᐱᓂᐊᕐᓂᕆᓚᐅᕐᑕᓕᒫᖏᓐᓂᒃ ᐊᔪᕆᕐᑐᐃᑦᔪᑎᒋᓚᐅᕐᑕᖏᓐᓂᒡᓗ, ᐱᒋᐊᓕᕐᓂᕐᒥᓂᑦ, 2ᐅᓪᓗᖅ ᑍᓐᓇ ᕿᓚᓕᐊᕐᓂᖓ ᑎᑭᓪᓗᒍ, ᕿᓚᓕᐊᓚᐅᖏᓐᓂᕐᒥᓂ, ᐊᑐᕐᑕᐅᖁᔭᒥᓂᒃ ᐅᖃᓚᐅᕐᒪᑦ ᐊᓂᕐᓂᒃᑯᑦ ᐃᑦᔪᕐᓁᑦᑐᒃᑯᑦ ᐋᐴᓯᑕᓕᖕᓄᑦ ᓂᕈᐊᕐᓯᒪᔭᒥᓄᑦ. 3ᐋᓐᓂᐊᑎᑕᐅᓂᕐᒥ ᑭᖑᓂᖓᓂ ᐅᓪᓗᓂᒃ 40ᓂᒃ ᓴᖅᑭᖃᑦᑕᓚᐅᕐᐳᖅ ᑖᒃᑯᓄᖓ ᐅᓄᕐᑐᐃᕐᓱᕐᓗᓂ, ᒪᑭᓯᒪᓪᓚᕆᖕᓂᕐᒥᓂᒃ ᖁᓚᖏᑦᓯᐊᓕᕈᑎᒃᓮᑦ ᐊᑐᕐᓗᒋᑦ, ᐅᖃᖃᑎᒋᓪᓗᒋᑦ ᒎᑎᐅᑉ ᐊᑕᓂᐅᕕᖓᓂᒃ. 4#ᓘᑲᓯ 24:49.ᑲᑎᒪᖃᑎᒋᒐᒥᒋᑦ#1:4 ᑐᑭᖃᕈᓐᓇᕐᒥᔪᖅ ᓂᕆᖃᑎᒋᓪᓗᒋᑦ ᐅᖃᐅᑎᓪᓚᕆᒃᐰᑦ ᐊᐅᓪᓚᖁᓇᒋᑦ ᔨᕉᓴᓕᒻᒥᑦ, “ᐅᑕᖅᑭᒋᑦᓯ ᐊᑖᑕᒪ ᑐᓂᓂᐊᕐᓂᕋᕐᓯᒪᔭᖓᓂᒃ ᐅᖃᐅᑎᒋᓚᐅᕐᑕᓐᓂᒃ ᐃᓕᑦᓯᓐᓄᑦ. 5#ᒫᑎᐅᓯ 3:11; ᒫᑯᓯ 1:8; ᓘᑲᓯ 3:16; ᔪᐊᓇᓯ 1:33.ᔪᐊᓇᓯ ᐹᑉᑎᑦᓯᓚᐅᕐᐳᖅ ᐃᒥᕐᒧᑦ, ᐅᓪᓗᐃᑦ ᒪᒃᑯᐊ ᐅᓄᖏᑦᑐᑦ ᑭᖑᓂᖓᑦᑎᒍᑦ ᐹᑉᑎᑕᐅᓛᕐᐳᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ.”
ᔩᓱᓯᐅᑉ ᕿᓚᓕᐊᕐᓂᖓ
6ᐋᐴᓯᑕᓖᑦ ᑲᑎᒪᒐᒥᒃ ᔩᓱᓯᒥᒃ ᐃᓚᖃᕐᓗᑎᒃ ᐊᐱᕆᕚᑦ, “ᐊᑕᓃᖅ ᒫᓐᓇᐅᔪᖅ ᐃᓴᕆᐊᓕᒥᐅᑦ ᐊᖓᔪᖅᑲᐅᕕᖓ ᐱᒋᐊᕐᑎᒃᑲᓐᓂᕐᓂᐊᕐᐱᐅᒃ?”
7ᔩᓱᓯᐅᑉ ᑭᐅᕔᑦ, “ᐃᓕᑦᓯ ᑕᒪᑐᒥᖓ ᖃᐅᔨᒪᔭᕆᐊᖃᓐᖏᓚᓯ ᐱᕕᒃᓴᒥᒃ ᓇᓪᓕᐅᑎᕕᒃᓴᓂᒡᓗ ᐊᑖᑕᒪ ᑕᒪᒃᑯᐊ ᐱᔪᓐᓇᕐᓂᕐᒥᓄᑦ ᐋᖅᑭᒃᓯᒪᖕᒪᒋᑦ. 8#ᒫᑎᐅᓯ 28:19; ᒫᑯᓯ 16:15; ᓘᑲᓯ 24:47,48.ᐱᔪᓐᓇᕐᓂᕐᒥᒡᓕ ᐱᑎᑕᐅᓛᕐᐳᓯ ᐊᓂᕐᓂᕐᒧᑦ ᐃᑦᔪᕐᓁᑦᑐᒧᑦ ᑎᑭᑕᐅᒍᑦᓯ; ᐅᕙᓐᓂᒃ ᓇᓗᓁᕐᓯᔨᒋᓛᕐᐸᑦᓯ ᔨᕉᓴᓕᒻᒥ ᔫᑎᐊᓕᒫᒥᓗ ᓴᒥᐊᕆᐊᒥᓗ ᓄᓇᕐᔪᐊᓪᓗ ᐃᓱᐊ ᑎᑭᓪᓗᒍ.” 9#ᒫᑯᓯ 16:19; ᓘᑲᓯ 24:50,51.ᑍᒫᒃ ᐅᖃᕇᕋᒥ, ᑖᒃᑯᐊ ᑕᑯᓐᓇᕐᑎᓪᓗᒋᑦ ᖁᒻᒧᐊᒃᑎᑕᐅᓕᕐᐳᖅ ᕿᓚᓕᐊᓕᕐᓗᓂ, ᓄᕗᔭᒧᑦ ᑕᑯᒃᓴᐅᔪᓐᓃᕐᓗᓂ ᑖᒃᑯᓄᖓ.
10ᑖᒃᑯᐊ ᕿᓚᖕᒧᑦ ᓱᓕ ᐋᕐᓗᖓᑎᓪᓗᒋᑦ ᖁᒻᒧᐊᒃᑎᑕᐅᕕᒋᔭᖓᓄᑦ, ᑕᑯᒋᑦ, ᐊᖑᑏᒃ ᒪᕐᕉᒃ ᖃᑯᕐᑖᖕᓂᒃ ᐊᓐᓄᕌᓖᒃ ᑖᒃᑯᐊ ᓴᓂᐊᓂ ᓇᖏᓕᕐᐴᒃ, 11ᐅᖃᕐᓗᑎᒃ, “ᒐᓕᓕᐊᒥᐅᖑᔪᓯ, ᓲᖅ ᕿᓚᖕᒧᑦ ᐋᕐᓗᖓᕕᓰ? ᑖᓐᓇ ᔩᓱᓯ, ᑕᑯᓐᓇᕐᑕᓯ ᕿᓚᖕᒧᐊᕐᑎᓪᓗᒍ, ᐅᑎᓛᕆᕗᖅ ᑍᒫᑦᓮᓐᓇᖅ ᑕᑯᓐᓇᕋᑖᕋᑦᓯᐅᒃ ᖁᒻᒧᐊᒃᑎᓪᓗᒍ ᕿᓚᖕᒧᑦ.”
ᔫᑕᓯᐅᑉ ᐃᓇᖏᕐᑎᖓ
12ᑕᕝᕙ ᐋᐴᓯᑕᓖᑦ ᔨᕉᓴᓕᒻᒧᑦ ᐅᑎᕐᐳᑦ ᖃᖅᑲᒥᑦ ᐸᐅᕐᒐᖃᕐᑐᒥᑦ ᐅᕐᓱᒃᓴᐅᓕᕈᓐᓇᕐᑐᓂᒃ ᓇᐹᕐᑐᓕᖕᒥᑦ, ᔨᕉᓴᓕᐅᑉ ᖃᓂᒋᔭᖓᓃᑦᑐᒥᑦ 1ᒤᓕᐅᑉ ᕿᑎᖅᑲᖓᓂᒃ ᐅᖓᓯᖕᓂᖃᕐᑐᒥᑦ. 13#ᒫᑎᐅᓯ 10:2-4; ᒫᑯᓯ 3:16-19; ᓘᑲᓯ 6:14-16.ᐃᒡᓗᒐᓴᒡᔪᐊᓄᑦ ᐃᑎᕋᒥᒃ, ᐃᒡᓘᑉ ᖁᓛᓃᑦᑐᒧᑦ ᓇᔪᒐᕐᒥᖕᓄᑦ ᐃᑎᕐᐳᑦ, ᐲᑦᑐᕉᓯ ᔪᐊᓇᓯ ᔧᒥᓯ ᐋᓐᑐᕉᓗ, ᐱᓕᑉᐴᓯ ᑑᒪᓯᓗ, ᐸᑎᐅᓗᒥᐅ ᒫᑎᐅᓯᓗ, ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ ᓮᒨᓂᓗ ᕉᒪᒥᐅᓂᒃ ᐊᑭᓂᐊᕐᑎᒥᒃ ᑍᔭᐅᔪᖅ, ᔫᑕᓯᓗ ᔧᒥᓯᐅᑉ ᐃᕐᓂᖓ. 14ᐊᑕᖏᕐᓗᑎᒃ ᐊᑕᐅᓯᐅᓕᖅᑲᖓᑦᓯᐊᕐᓗᑎᒃ ᑲᑦᓱᖕᒊᕐᓯᒪᑦᓯᐊᕐᓗᑎᒃ ᑐᒃᓯᐊᖃᑦᑕᓚᐅᕐᐳᑦ, ᐊᕐᓁᑦ ᐃᓚᒋᓪᓗᒋᑦ ᒥᐊᕆᓗ ᔩᓱᓯᐅᑉ ᐊᓈᓇᖓ, ᖃᑕᓐᖑᑎᖏᓪᓗ.
15ᐅᒃᐱᕐᑐᑦ ᐊᑕᖏᕐᓗᑎᒃ 120 ᖃᓂᒋᔭᖓᓃᓚᐅᕐᐳᑦ, ᐅᓪᓗᐃᑦ ᐃᓚᖓᓐᓂ ᑲᑎᒪᑎᓪᓗᒋᑦ ᐲᑦᑐᕉᓯ ᓂᑯᕕᑉᐳᖅ ᐅᖃᕐᓗᓂ, 16“ᐃᓅᖃᑎᒃᑲ, ᐊᒡᓔᑦ ᓇᓚᐅᑦᓯᔭᕆᐊᖃᓚᐅᕐᒪᑕ, ᐊᓂᕐᓂᐅᑉ ᐃᑦᔪᕐᓁᑦᑑᑉ ᐅᖃᐅᓯᕆᓯᒪᔭᖏᑦ ᑍᕕᑎᒃᑯᑦ, ᓇᓚᐅᑦᑍᑦᔪᑕᐅᓯᒪᔪᑦ ᔫᑕᓯᒥᒃ, ᑖᓐᓇ ᑕᓯᐅᕐᑎᐅᓚᐅᕐᒪᑦ ᔩᓱᓯᒥᒃ ᑎᒍᓯᓚᐅᕐᑐᓄᑦ. 17ᑖᓐᓇ ᐃᓚᒋᓚᐅᕐᐸᕗᑦ, ᓂᕈᐊᕐᑕᐅᖃᑎᒋᓚᐅᕐᐸᕗᓪᓗ ᐱᓇᓱᐊᕐᓂᑦᑎᓐᓂᒃ ᐱᓇᓱᐊᖃᑎᒋᓪᓗᑎᒍ.”
18 #
ᒫᑎᐅᓯ 27:3-8. (ᑖᑦᓱᒪ ᔫᑕᓯᐅᑉ ᐊᔪᕐᑐᓕᓂᕆᓚᐅᕐᑕᒥ ᐊᑭᖓᓄᑦ ᐱᕈᕐᓰᕕᖕᒥᒃ ᓂᐅᕕᓚᐅᕐᐳᖅ; ᑕᕝᕙᓂ ᐃᔪᒃᑲᕋᒥ ᑐᖁᓚᐅᕐᐳᖅ, ᖄᕐᓗᓂ ᐃᕐᕋᕕᓕᒫᖏᓪᓗ ᐊᓂᓚᐅᕐᐳᑦ. 19ᔨᕉᓴᓕᒻᒥᐅᓕᒫᑦ ᑕᒪᑐᒥᖓ ᖃᐅᔨᒪᓕᕐᐳᑦ, ᐅᖃᐅᓯᕐᒥᒃᑎᒍᑦ ᐊᑎᖃᕐᑎᓕᕐᐹᑦ ᐊᑭᓪᑕᒪᒥᒃ, ᑐᑭᖃᕐᑐᖅ ᐱᕈᕐᓰᕕᒃ ᐊᐅᒃᑕᓕᒃ.)
20 #
ᐃᓐᖏᕈᑦ 69:25;
ᐃᓐᖏᕈᑦ 109:8. “ᑍᕕᑎᐅᑉ ᐃᓐᖏᕈᑎᖏᓐᓂ ᑎᑎᕋᕐᓯᒪᖕᒪᑦ,
‘ᑖᑦᓱᒪ ᐃᒡᓗᖓ ᐃᓄᖃᕈᓐᓃᕐᓕ,
ᑕᕝᕙᓂ ᐃᒡᓗᖃᕐᑐᖃᕈᓐᓃᕐᓕ;’
ᐊᒻᒪᓗ ᐅᖃᕐᓯᒪᔪᖃᒃᑲᓐᓂᕆᕗᖅ,
‘ᐱᓇᓱᐊᕐᓂᖓ ᐊᓯᐊᓄᑦ ᐃᓇᖏᕐᑕᐅᓕᕐᓕ.’
21 #
ᒫᑎᐅᓯ 3:16; ᒫᑯᓯ 1:9; ᓘᑲᓯ 3:21;
ᒫᑯᓯ 16:19; ᓘᑲᓯ 24:51. “ᑍᒤᒻᒪᑦ ᐊᑲᐅᓈᕋᔭᕐᐳᖅ ᓂᕈᐊᕈᑦᑕ ᐊᖑᑏᑦ ᐃᓚᖓᓐᓂᒃ ᑍᒪᓐᖓᑦ ᐃᓚᒋᖃᑦᑕᕐᓯᒪᔭᑦᑎᓐᓂᒃ ᐊᑕᓂᖅ ᔩᓱᓯ ᐃᖏᕐᕋᖃᑎᒋᓪᓗᑎᒍ ᑎᑭᑉᐸᒃᓗᑕ ᐊᐅᓪᓚᕐᐸᒃᓗᑕᓗ, 22ᐱᒋᐊᖃᑕᐅᓯᒪᔪᒥᒃ ᔪᐊᓇᓯᐅᑉ ᐹᑦᑎᑦᓯᖃᑦᑕᓕᕐᓂᖓᓂᑦ ᔩᓱᓯᐅᑉ ᕿᓚᓕᐊᕐᑎᑕᐅᓂᖓ ᑎᑭᓪᓗᒍ, ᑍᒤᑦᑐᒥᒃ ᐃᓚᑖᕆᐊᖃᕐᐳᒍᑦ ᖃᐅᔨᓯᒪᔭᑦᑎᓐᓂᒃ ᓇᓗᓁᕐᓯᔨᐅᖃᑕᐅᖁᓪᓗᒍ ᔩᓱᓯᐅᑉ ᒪᑭᓯᒪᓂᖓᓂᒃ.”
23ᑖᒃᑯᐊ ᓂᕈᐊᒐᒃᓴᓕᐅᕐᐳᑦ ᒪᕐᕉᖕᓂᒃ, ᔫᓯᐱᒥᒃ ᐹᕐᓴᐸᓯᒥᒃ ᑍᔭᐅᔪᒥᒃ ᐊᑎᖃᒃᑲᓐᓂᕐᑐᒥᒃ ᔭᔅᑕᓯᒥᒃ, ᐊᒻᒪᓗ ᒪᑍᐊᓯᒥᒃ. 24ᑖᒃᑯᐊ ᑐᒃᓯᐊᓕᕋᒥᒃ ᐅᖃᕐᐳᑦ, “ᐊᑕᓃᖅ, ᐃᓄᓕᒫᑦ ᐆᒻᒪᑎᖏᓐᓂᒃ ᖃᐅᔨᒪᔪᑎᑦ, ᓇᓗᓁᕐᓯᕕᒋᓚᐅᕐᑎᒍᑦ ᐅᑯᐊᒃ ᓇᓪᓕᐊᓐᓂᒃ ᓂᕈᐊᕐᒪᖔᕐᐱᑦ. 25ᐃᓇᖏᐅᑎᓂᐊᕐᑐᒥᒃ ᑕᒪᑐᒧᖓ ᐱᓇᓱᐊᕐᓂᕐᒧᑦ ᐋᐴᓯᑕᓕᐅᓂᕐᒧᑦ ᔫᑕᓯᐅᑉ ᕿᒪᓚᐅᕐᑕᖓᓄᑦ, ᑖᓐᓇ ᓇᖕᒥᓂᖅ ᐂᕕᒋᓂᐊᕐᑕᒥᓄᑦ ᐂᓯᒪᓕᕐᒪᑦ.” 26ᓇᓚᐅᑦᓵᓕᕋᒥᒃ, ᒪᑍᐊᓯ ᓇᓚᐅᑕᐅᕗᖅ; ᐃᓚᓕᐅᑎᔭᐅᓪᓗᓂᓗ ᐋᐴᓯᑕᓕᖕᓄᑦ 11ᓄᑦ.
Dewis Presennol:
ᐋᐴᓯᑕᓖᑦ ᐱᓂᐊᕐᓂᖏᑦ 1: EAIB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible © Canadian Bible Society, 2012, 2021-2023.