約翰福音 18
18
耶穌受出賣，受掠
(太 26.47-56；可 14.43-50；路 22.47-53)
1耶穌祈禱煞，就及伊的門徒出去，過去汲淪溪的彼旁。佇遐有一坵園，耶穌及伊的門徒入去。 2出賣耶穌的猶大嘛知彼所在，因為耶穌及伊的門徒常常佇遐聚集。 3所以猶大就導一隊羅馬兵，以及祭司長及法利賽派的人所派聖殿的警衛去到遐，手攑燈、火把，及武器。 4耶穌知伊所欲抵著一切的代誌，就行進前，對𪜶講：「恁啲尋什麼人？」
5𪜶應講：「拿撒勒人耶穌。」
耶穌講：「我就是。」
出賣耶穌的猶大嘛及𪜶徛做夥。 6耶穌一下給𪜶講「我就是」，𪜶就倒退，倒落去土腳。 7耶穌閣一遍問𪜶：「恁啲尋什麼人？」
𪜶應講：「拿撒勒人耶穌。」
8耶穌講：「我已經給恁講我就是。恁若是啲尋我，諸個人著放𪜶去。」 9此個話是欲應驗伊以前所講的：「你所互我的人，一個都𣍐滅亡。」
10 西門‧彼得有帶一支刀，就拔出來，對大祭司的僕人刜落去，給伊正旁的耳仔削起來；彼個僕人的名叫做馬勒古。 11耶穌給彼得講：「刀收入鞘！父所互我的苦杯，我豈會當無飲？」
耶穌互人押去大祭司面前
12後來，彼隊羅馬兵及隊長，以及猶太人的警衛掠耶穌，給伊縛起來。 13𪜶先給伊押去互亞那，因為亞那是彼年的大祭司該亞法的丈人。 14此個該亞法以前曾對猶太教當局建議，講「寧可互一個人替眾人死是較好」。
彼得毋認耶穌
(太 26.69-70；可 14.66-68；路 22.55-57)
15 西門‧彼得及另外一個門徒隨耶穌去；彼個門徒及大祭司有熟似，所以隨耶穌入去大祭司公館的內面埕， 16毋拘彼得徛佇門口。及大祭司熟似彼個門徒出來，給顧門的女婢講一下，就導彼得入去。 17顧門的女婢對彼得講：「你嘛是彼個人的門徒乎？」
伊講：「我毋是！」
18因為天氣冷，許個僕人及警衛燒火炭，徛啲烘燒；彼得嘛及𪜶做夥徛啲烘。
大祭司審問耶穌
(太 26.59-66；可 14.55-64；路 22.66-71)
19大祭司審問耶穌關係伊的門徒及伊的教訓的代誌。 20耶穌應講：「我攏公開對世間人講話。我常常佇猶太人聚集的會堂及聖殿內教示人；我毋曾祕密講。 21你是按怎審問我？你去問曾聽我講話的人，看我對𪜶講什麼，𪜶知我所講的。」
22耶穌講了，徛佇邊仔的一個警衛給伊搧嘴䩃，講：「你敢按呢應大祭司？」
23耶穌應伊講：「我若講毋著，你著指出錯誤；若講著，是按怎給我拍？」
24然後亞那將互人縛啲的耶穌押去互大祭司該亞法。
彼得閣再毋認耶穌
(太 26.71-75；可 14.69-72；路 22.58-62)
25 西門‧彼得猶徛啲烘火。有人問伊：「你嘛是彼個人的門徒乎？」
彼得毋認，講：「我毋是！」
26大祭司的一個僕人，是耳仔互彼得削起來彼個人的親成，對伊講：「我豈毋是有看著你及伊佇園內？」
27 彼得閣再毋認；彼時，雞隨時啼。
耶穌佇彼拉多面前受審判
(太 27.1-2, 11-14；可 15.1-5；路 23.1-5)
28透早，猶太人的領袖將耶穌對該亞法遐押去總督府；𪜶家己無入去，因為驚沐著垃墋煞𣍐當食𨃟過節的晚餐。 29所以，彼拉多出來見𪜶，問𪜶講：「恁告此個人什麼罪？」
30𪜶應講：「此個人若無做歹代誌，阮𣍐給伊交互你。」
31 彼拉多給𪜶講：「恁家己去辦，照恁的律法給伊審判。」
𪜶對伊講：「阮無權給人判死刑。」 32這是欲應驗耶穌以前所講的話，表示伊啲欲按怎死。
33 彼拉多閣入去總督府，召耶穌來，問伊講：「你是猶太人的王是無？」
34耶穌應講：「你按呢問我是你家己的意思，抑是聽著別人給你講我的代誌？」
35 彼拉多講：「我豈是猶太人？你本族的人及祭司長將你交互我。你有做什麼代誌？」
36耶穌應講：「我的國度毋是屬此世間。我的國度若屬此世間，我的部下會為我爭戰，免致到我受出賣互猶太人的領袖。其實，我的國度毋是屬此世間。」
37 彼拉多就問伊講：「按呢你是王囉？」
耶穌應講：「你講我是王。我為著此個出世，為著此個來世間，是欲為真理作證。屬真理的人攏會聽我的聲。」
38 彼拉多問伊講：「什麼是真理？」
耶穌受判死刑
(太 27.15-31；可 15.6-20；路 23.13-25)
講煞，彼拉多就閣出去外面對𪜶講：「我查𣍐出伊有什麼罪。 39恁有一個慣例，佇𨃟過節我著放一個犯人互恁。按呢，恁愛我放猶太人的王互恁無？」
40𪜶閣大聲喝：「毋是此個人，阮愛巴拉巴！」巴拉巴是一個暴徒。
Dewis Presennol:
約翰福音 18: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021