約翰福音 17
17
耶穌為著門徒祈禱
1耶穌講諸個話了後，攑目向天講：「父啊，時已經到，願你榮耀你的子，互子通榮耀你。 2你有將統治萬民的權柄賜互子，互伊通將永遠的活命賜互一切你交代伊的人。 3永遠的活命就是：認識你是獨一真神，閣認識你差來的耶穌基督。 4我已經佇地上有完成你交代我的工作來榮耀你。 5父啊，現在求你互我佇你面前得著榮光，就是創世以前我及你已經有的榮光。
6「你對此世間揀出來互我的人，我已經有將你對𪜶顯明。𪜶是你的，你有將𪜶互我；𪜶已經有遵守你的話。 7現在𪜶知，你互我的逐項攏是對你來的。 8因為我有將你互我的信息互𪜶；𪜶已經接受閣真正知我對你遐來，閣有信你差我。
9「我為著𪜶祈求，毋是為著世間人，是為著你互我的人祈求，因為𪜶是你的。 10我所有的一切攏是你的，你所有的嘛是我的；我有通過𪜶得著榮光。 11我無閣𫢶此世間；不過𪜶猶𫢶佇此世間。聖的父啊，求你用你互我的名保守𪜶，通互𪜶成做一個，親像咱是一個。 12我及𪜶做夥的時，我有用你互我的名保守𪜶。我有保護𪜶，除去註定滅亡彼個人以外，一個嘛𣍐滅亡，通互聖經的話應驗。 13現在我啲欲去你遐；我猶佇此世間講諸個話，是欲互𪜶心內充滿我的歡喜。 14我有將你的話互𪜶；世間人怨恨𪜶，因為𪜶毋是屬此世間，親像我毋是屬此世間。 15我毋是求你導𪜶離開此世間，是求你保守𪜶脫離彼個邪惡者。 16𪜶毋是屬此世間，親像我毋是屬此世間。 17求你用真理給𪜶聖化。你的話就是真理。 18親像你有差我入世間，我嘛差𪜶入世間。 19為著𪜶的緣故，我家己分別作聖互你用，互𪜶嘛通通過真理分別作聖互你用。
20「我毋若為著你對世間揀出來互我許個人祈求，嘛為著對𪜶所講的話來信我許個人祈求， 21通互𪜶攏總成做一個。父啊，親像你佇我內面，我嘛佇你內面，求你互𪜶佇咱內面，通互世間人信是你差我來。 22你互我的榮光，我嘛有互𪜶，通互𪜶成做一個，親像咱是一個。 23我佇𪜶內面，你佇我內面，是欲互𪜶完全成做一個，通互世間人知是你差我來，嘛知你疼𪜶，親像你有疼我。
24「父啊，你所互我許個人，我佇叨位，我嘛愛𪜶及我做夥佇遐，通互𪜶看見你賜互我的榮光，因為你佇創世以前已經疼我。 25公義的父啊，世間人毋識你，毋拘我識你；諸個人知你已經有差遣我。 26我已經有互𪜶識你的名，嘛欲繼續互𪜶識，通互你對我的疼佇𪜶內面，我嘛佇𪜶內面。」
Dewis Presennol:
約翰福音 17: TTVH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society in Taiwan, 2021