PALABURU 21
21
Pampoana i Saki
21:1-8
1I Pue mangadonco i Sara, silulu pai anu roo ndajanji. 2#Ib. 11:11 Ri tempo anu roo ndapakanoto i mPue Ala, sindara i Burahima matuʼamo, maneemo koro i Sara nepa napoana sambaʼa ana tuama. 3Napapotoʼo i Burahima ananggodi setu i Saki; 4#Pal. 17:12, Pwn. 7:8 kagananya tinuwu uayu ndeme nasuna i Burahima silulu pai songka i mPue Ala. 5I Burahima tinuwu saatu ntaʼu ri tempo pampoana i Saki. 6Natoʼo i Sara, “Ndapapogele i mPue Ala yaku nakeni ngkawongko ndayaku. Pura-pura tau anu mangadonge pewalinya seʼi da mogele mawongko rayanya sangkani-ngkani pai yaku.” 7Nasumparaka woʼu paunya natoʼo, “Isema anu mangkoto da mangantoʼoka langkaiku kayakunya da mampasusu ananggodi? Paikanya yaku moanamo mau langkaiku maʼaimo katuʼanya.”
8Kako bangke-bangkemo ananggodi setu, pai ieo montepuʼu mangauwe ananggodi seʼe, napareʼe i Burahima posusa anu madoro.
I Hagari pai Sumaila ndairi
21:9-21
9Ri anu sandeme, i Sumaila ana i Burahima pai Hagari weʼa to Masiri setu, ntongo molega-lega pai i Saki ana i Sara. 10#Gal. 4:29-30 Ri pangkita i Sara polega-lega ananggodi setu, natoʼoka i Burahima, “Irimo anamayunu weʼa setu sangkani pai ananya. Bareʼe maya ana mbeʼa setu da mojuyu panta pai anaku i Saki.” 11Bareʼe liu-liu napokono i Burahima madonge pau setu, maka i Sumaila seʼe ananya woʼu. 12#Rom. 9:7, Ib. 11:18 Paikanya ndatoʼo i mPue Ala ri Burahima, “Neʼemo nupoʼipu ndaya kono anamayunumu i Hagari pai ananya setu. Lulukamo pepokono i Sara maka lawi mampoliu i Saki da mampomulika anu roo kujanji setu. 13Ewanceʼe ri ana i Hagari da maria ananya pai makumpunya da naka tau seʼe mewali sambaʼa banca. Maka siʼa seʼe anamu woʼu.”
14Bangke reme mowuro-wuro, napapoiwomo i Burahima i Hagari, nawaika pangkoni pai watutu pela kalau ue ndainu anu da napobaeli ri jaya. Napapaubaka i Hagari ananya, nepa napokau weʼa setu malai. Malaimo kojo i Hagari teyoro-yoro ri pada bone Beriseba. 15Butu puramo ue anu nakeni, naulimo i Hagari ananya ri raya yopo nciwu, 16nepa malai siʼa motunda-tunda tempo-temponya saatu meteri ungka njairia. Natoʼo ri rayanya, “Bareʼe loʼu rayaku da mangkita kamate anaku.” Nepa motumangi siʼa.
17Ndadonge i mPue Ala oni nganga i Sumaila, painaka mompau malaeka mPue Ala ungka ri yangi ri Hagari, natoʼo, “Nunjaa anu nupomasusa Hagari? Neʼemo maeka rayamu. Ndadongemo i mPue Ala oni nganga anamu. 18Njoʼumo dadu anamu, tima pai kanarasimo siʼa. Waʼa mulinya da kupapewali sambaʼa banca anu bangke.” 19Ndapapenaa mpodago i mPue Ala mata i Hagari painaka yosamo napangkita sambaʼa tibubu. Nepa njoʼu siʼa nabangani watutu pela kareʼe uenya, mewalili napapainuka ananya ue.
20I Pue Ala mawawanaka i Sumaila. Kako bangke-bangke ananggodi setu; siʼa maroo-roo ri pada bone Para, njairia siʼa mewali topangela anu makaliki. 21Napaporongo inenya siʼa pai anaweʼa nto Masiri.
Pojanji i Burahima pai Abimele
21:22-34
22 #
Pal. 26:26
Ri anu sangkani ratamo i Mokole Abimele sangkani pai i Piko tadulako ncurodadonya, mampomberataka i Burahima, nepa natoʼo, “I Pue Ala mantulungi siko ri mpengaya-ngaya anu nuwianaka. 23Inceʼe painaka pontandokoromo ireʼi ri suara mPue Ala, kasikonya bareʼe da mampowia jaʼa ri yaku, ewanceʼe seʼe ri waʼa anaku pai ri waʼa muliku. Ewa yaku woʼu mantujumo kabuya ndayaku ri siko, pai da ewanceʼe woʼu powiamu ri yaku pai ri tana anu nupeari seʼi.”
24Natoʼo i Burahima, “Montandokoro yaku.”
25Paikanya ri purinya nasosoi i Burahima i Abimele, kakononya sambaʼa tibubu anu narampa waʼa anamayunu mokole setu. 26Natoʼo i Abimele, “Yaku bareʼe kuincani bara isema anu mowia setu. Bareʼepa reʼe nupantoʼoka yaku, pai nepa seʼi kupadonge kono inceʼe setu.” 27Nepa nawai i Burahima waʼa bimba pai japi ri Abimele, nepa napareʼe ntau radua pojanji. 28Napatani i Burahima papitu ana bimba ungka waʼa yununya, 29napeoasi i Abimele ri siʼa natoʼo, “Wenu painaka nupowia ewanceʼe?”
30Mesono i Burahima natoʼo, “Tarimamo ana bimba papitu seʼi mewali tanda nupangaʼaku kayakunya anu mangkae tibubu seʼi.” 31Ewanceʼe tampa setu ndapapotoʼoka Beriseba, maka njairiamo kareʼe mpontandokoro ntau radua setu.
32Ri karoonya napareʼe ntau seʼe pojanji ri Beriseba setu, mewalilimo i Abimele pai Piko ri tana nto Pelisiti. 33Nepa napomuya i Burahima sampuʼu kaju tamarisika ri Beriseba, pai montepuʼu ungka ri tempo setu njairiamo napawianaka i Burahima panyombanya ri Pue Ala. 34Ungka lairia masae sakodi karoo-roo i Burahima ri tana nto Pelisiti.
Dewis Presennol:
PALABURU 21: LAIPMF
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda