PALABURU 20
20
I Burahima pai Abimele
20:1-18
1Ungka lairia melimba woʼu i Burahima ungka ri Mamire njoʼu ri tondo selata ntana Kanaʼa, maroo-roo siʼa ri Gera ri paraoyo ngKadesi pai Suri. Bareʼepa masae karoo-roonya ri Gera, 2#Pal. 12:13, 26:7 natoʼo rongonya i Sara setu tuaʼinya. Inceʼe painaka napokau i Mokole Abimele mokole nto Gera njoʼu mantima i Sara. 3Ri anu sambengi i Pue Ala mampapamara koroa ri mokole setu ri raya mpangipi, ndatoʼo, “Siko da mate, ua nupangantima weʼa setu; maka siʼa molangkaimo.”
4Paikanya bareʼepa najama i Abimele i Sara, inceʼe pai napantoʼo mokole setu, “Pue yaku bareʼe masala! Ara da ndiʼopisaka yaku pai bancaku? 5I Burahima ngkalionya anu mangantoʼo weʼa setu tuaʼinya, pai weʼa setu woʼu mantoʼo ewanceʼe. Mewali pantimaku weʼa setu ri kabuya ndayaku, mewali yaku bareʼe masala.”
6Ndasono i mPue Ala ri raya mpangipi setu, “Lawi monco, kuincani pantimamu weʼa setu ri kaliogu ndayamu pai ri kabuya ndayamu. Inceʼe painaka bareʼe kupapaliu siko da mowia salaa ri yaku, pai bareʼe kupapaliu siko da majama weʼa setu. 7Mewali seʼi-seʼi, papewalili siʼa ri langkainya. Langkainya setu sambaʼa nabi, pai siʼa da mampekakaika siko naka neʼe mate. Paikanya ane bareʼe nupapewalili, endomo, siko sangkani pai waʼa mpalilimu da mate!”
8Ri kabangke ndemenya, mowuro-wuro, napeboo i Abimele waʼa mpegawainya, nepa napauka tau seʼe pura-pura anu mewali setu. Inceʼe painaka maeka raya ntau seʼe. 9Roo setu napeboo i Abimele i Burahima, natoʼoka, “Nunjaa anu roo nupowiaka kami? Nunjaa salaku ri siko, painaka da nupareʼeka yaku rugi seʼi ri woto ngkoroku pai ri waʼa mpaliliku? Manoto bareʼe singkana siko da mowia ewanceʼe ri yaku. 10Wenu painaka ewanceʼe powiamu?” 11Mesono i Burahima natoʼo, “Malulu kupanawa-nawa ireʼi bareʼe reʼe tau anu mampokaeka i Pue Ala, inceʼe painaka yaku da napepate ntau anu mampodaraya rongoku. 12Sangaya woʼu siʼa setu lawi tuaʼiku. Kami mojuyu papa, podo ine anu patesambaʼaka, paikanya ri purinya kami morongo. 13Ri tempo pampokau i mPue Ala yaku mampalaika banua mpapaku, kami melimba-limba ri tana ntau, kutoʼoka rongoku, “Da naka tongawa kojo nupampotowe yaku da nutoʼoka waʼa ntau yaku seʼi tukakamu.’ ”
14Roo setu napapewalili i Abimele i Sara ri Burahima, pai simpoyunu pai nceʼe nawai woʼu waʼa anamayunu, bimba pai japi. 15Natoʼo mokole setu ri Burahima, “Inceʼimo samalele ntanaku; pearimo rimbeʼi pepokonomu.” 16Nepa natoʼoka i Sara, “Roomo kuwaika tukakamu sancowu doi salaka da mewali petondoni ri tau pura-pura kasikonya monco-monco kojo bareʼe masala.
17-18I Pue mampapewali tamana pura-pura waʼa mbeʼa anu lau ri langkanae i Abimele, ua ndapangantima i Sara rongo i Burahima setu. Nepa mekakai i Burahima ri Pue Ala, inceʼe painaka ndapakaʼosa i Pue Ala i Abimele, rongonya sangkani pai waʼa anamayununya anu weʼa, da naka moana muni tau seʼe.
Dewis Presennol:
PALABURU 20: LAIPMF
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda