Maroko 3
3
O Piadah to Mapikingay ko Kamay a Tamdaw
(Matay 12.9-14; Luka 6.6-11)
1Yo micomod haca ci Yis i kasa'opoan a loma' i, ira ko ccay a mapikingay ko tatihi a kamay a tamdaw. 2Misa'imer ko papinapina a tamdaw a minengneng to dmak ni Yis. <<Miadah ci Yis tora mapikingay hakini i Pasla'an a Romi'ad?>> saan cangra a minengneng. Onini i, o sapipakokotaw nangra to dmak ni Yis. 3Pasowal sa ci Yis toya mapikingay ko kamay a tamdaw, <<Kalomowad, katayni i sifo',>> han Ningra. 4Licay han Ningra cangra, <<Pakayniay i Pasla'an a Romi'ad i, maan sa ko lkakawa no Rikec ita saw? Pidmak to nga'ayay, ano ^ca pidmak to tatiihay saw? Pipa'orip ano ^ca pipatay hakiya?>> han Ningra.
Trep sa cangra. 5Makter ci Yis a minengneng to i taliyokay a tamdaw. Mararom Cingra to nika 'atkak no faloco' nangra. Saka, <<Fiyacen ko kamay iso,>> han ni Yis koya mapikingay ko kamay a tamdaw. Fiyac han ningra ko kamay ningra i, tatiko sato a manga'ay ko kamay ningra. 6Saka, tangsol sa a masadak koya Farisay a tamdaw nai kasa'opoan a loma', ta tayra i masakapotay ni Hiroti a masasowasowal to samaanen ita ko pipatay ci Yisan saan.
'Alomanay a Finawlan i Lawac no Fanaw
7Nanoya, miliyas ci Yis ato nisawawaan Ningra a tayra i Kalili a fanaw. Tayra a mitoor ko nai Kaliliay a 'alomanay a finawlan ato nai Yutayaay, 8ato nai Yirusalimay ato nai Itumiyaay ato nai tira:way no Yortan ato nai tatihiay no Tiri ato Siton a niyaro'. Pakatngil cangra to nano dmak ni Yis saka, tayra cangra o 'alomanay a finawlan i ci Yisan. 9Tona 'aloman ko tamdaw saka, papipatalaen ni Yis ko nisawawaan Ningra to mamangay a tamina, onini i, o saka^caaw pico^co no finawlan Cingraan. 10Nawhani 'alomanto ko niadahan ni Yis a tamdaw. Saka, caco^co^co sa ko mapadesay a tamdaw to masamaamaanay a adada to sapitfingaw ci Yisan. 11O romasato, yo paka'araw ci Yisan ko maaro'ay no kaackan a 'adingo i, hinokop saan i ka'ayaw ni Yis. Cli' saan caira a somowal, <<O Wawa no Kawas Kiso,>> saan. 12Kakter han ni Yis caira a somowal, <<Aka pakafana'en ko tao to pakayniay i Takowanan,>> han Ningra.
O Pipili' ni Yis to Tosa ko Safaw a Tarokos
(Matay 10.1-4; Luka 6.12-16)
13Nanoya, macokacok ci Yis a tayra i lotok. Tahidangen Ningra ko matatodongay i faloco' Ningra a tamdaw. Tayra sato cangra i ci Yisan. 14Patirengen ni Yis ko tosa ko safaw a tamdaw a palatarokos. Sowal sa ci Yis i cangraan, <<O nipili'an Ako kamo a mamararid a mikapot i Takowanan, o a ocoren haca Ako kamo a papipatnak. 15O caci'icel kamo a mifahfah to palafoay,>> han Ningra.
16Onini a nipili'an ni Yis a tosaay ko safaw a tamdaw i, ci Simon (mapangangan haca ni Yis cingra to Pitiro), 17o wawa ni Cipitay ci Yakop ato safa ni Yakop ci Yohani (mapangangan haca ni Yis cangra to Poanirkis, o tatodong nonini i, <<O karafirangay a tamdaw>>), 18o romasato, ci Antiri, ci Filip, ci Partolomay, ci Matay, ci Tomas ato wawa ni Alfayus ci Yakop, ci Tatayus, o malalokay to no kitakit a sa'opo ci Simon, 19ato ci Yuta no Iskariyot, onini a tamdaw ko pacakayay ci Yisan i ikor.
Ci Yis aci Pilcipul
(Matay 12.22-32; Luka 11.14-23; 12.10)
20Yo minokay ci Yis i loma' i, tayra haca ko finawlan a mitihlom Cingraan. Saka, awaay ko limaw na Yis a komaen. 21Yo pakatngil ko malininaay ni Yis tonini i, pakomaapaay cangra i ci Yisan. Saka, tayra sato cangra a sapialaan Cingraan.
22O romasato, ira a maloklon nai Yirusalim ko papinapina a pasifana'ay to Rikec, sowal sa, <<O maaro'ay ni Pilcipul#3.22 Pilcipul -- o ccay a ngangan ni Satan. Cingra! O nano 'icel no kakridan no palafoay ko sapifahfah Ningra a pasadak to palafoay,>> saan cangra.
23Tahidang han ni Yis cangra a patinako a somowal, <<Samaanen ni Satan ko nipifahfah ci Satanan a pasadak hakiya? 24Ano macacoli a malacinowas ko paro no kitakit i, caay ko tatomireng koya kitakit. 25Ano macacoli a malacinowas ko paro no loma' i, caay ko tatomireng koya loma'. 26Ano colien ni Satan ko tirengto nira i, caayto ko tatomireng ciira. O sakapleng nira kora dmak.
27<<Ano sapicomodan ko cima a tamdaw to loma' no ci'icelay a tamdaw a mi'afas to dafong ningra i, i 'ayawenho ningra ko nipipalit toya ci'icelay a tamdaw. Ta nga'ay ko nipi'afas noya tamdaw to dafong noya ci'icelay a tamdaw.>>
28So'linen Ako a somowal kamo, <<Ma^dengho a mahpol ko masamaamaanay a raraw ato milokesay a sowal no tamdaw. 29Nikawrira, o milokesay to Fangcalay 'Adingo a tamdaw i, caay ko mamahpol a tahada'oc ko raraw ningra. Mapastek cingra i raraw a tahada'oc,>> han Ningra. 30(O sakasaan ni Yis a somowal tonini i, <<O maaro'ay no kaackan a 'adingo Cingra,>> saan cangra a somowal.)
O Ina ato Salikaka ni Yis
(Matay 12.46-50; Luka 8.19-21)
31Itiya i, ira ko ina ato salikaka ni Yis a tayra a tomireng i papotal. Ocoren nangra ko tamdaw a papitahidang ci Yisan to sapinengnengaw nangra i Cingraan. 32Itiya i, maro' i taliyok ni Yis ko finawlan. Paratohen nangra Cingra, <<Ira ko ina ato salikaka Iso i papotal a mikilim i Tisowanan,>> saan.
33Paca'of sa ci Yis, <<Cima ko ina Ako saw? Cima ko salikaka Ako saw?>> han Ningra. 34Nengneng sa ci Yis toya maro'ay i taliyok Ningra a tamdamdaw a somowal, <<Nengnengen, onini a tamdamdaw ko ina ato salikaka Ako. 35Ano cima ko mido^doay to nafaloco'an no Kawas i, orira ko salikaka Ako ato ina Ako,>> han Ningra.
Dewis Presennol:
Maroko 3: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019