Maroko 2
2
O Piadah ni Yis to Ma'piay a Adadaay
(Matay 9.1-8; Luka 5.17-26)
1I ikor no pinapina a romi'ad, yo patiko a tayra i Kapirnaum ci Yis i, matngil ko lihaf to nika ira ni Yis i loma'. 2Saka, sopsop sato ko 'alomanay a tamdaw i fawahan. Awaayto ko pakayraan a micomod. Pakimaden ni Yis cangra to sowal no Kawas. 3Ira ko saspatay a mililiday to ccay a ma'piay a tamdaw a patayra i ci Yisan. 4Nikawrira, tona 'aloman ko tamdaw saka, awaay ko pakayraan nangra a patayra toya adadaay i ka'ayaw ni Yis. Saka, toplak han nangra a miofang ko fadahong i tatodong ni Yis, ta halokafoti'an ningra a mi^pod koya adadaay. 5Mahapinang ni Yis ko paso'lin no faloco' nangra saka, sowal sa Cingra toya ma'piay, <<Wawaaw, mahpolayto ko raraw iso,>> han Ningra.
6Ira itira a maro' ko papinapina a pasifana'ay to Rikec. 7<<Nawiro matini ko sowal nonini a tamdaw a milokes to Kawas? Cima ko pakahpolay to raraw? Caay hakiya ko Kawas a ccay ko pakahpolay?>> saan ko nika ngaliwngiw no faloco' nangra.
8Tangsol a mahapinang ni Yis ko nika saroma no harateng nangra. Sowal sa ci Yis, <<Nawiro ira ko hatiniay a harateng namo saw? 9I cowaay ko rahodayay a sowal to nika <Mahpolto ko raraw iso,> sanay atoya <Kalomowad, alaen ko sikal iso a romakat,> sanay a pasowal tonini a adadaay a tamdaw saw? 10O papahapinangen Ako kamo to nika o cisakowanay ko Wawa no Tamdaw i tini i hkal a mihpol to raraw,>> han ni Yis. Ta pasowal sa ci Yis toya ma'piay a tamdaw, 11<<Pasowalen Ako kiso, kalomowad. Alaento ko kafoti'an iso a minokay i loma' iso,>> han Ningra.
12Tangsol sa koya ma'piay a lomowad i ka'ayaw no tamdamdaw a miala to kafoti'an a masadak. Saka, safahka' sa cangra a ma^min. Pahmek sato cangra to Kawas. Sowal sa, <<Awaayho a ma'araw niyam ko matiniay a dmak,>> saan cangra.
O Pitahidang ni Yis ci Lifian
(Matay 9.9-13; Luka 5.27-32)
13Tayra haca ci Yis i Kalili a fanaw. Itiya i, raoden no finawlan Cingra saka, pasifana'en Ningra cangra. 14Yo tala 'a'ayawho Cingra a romakat i, ma'araw Ningra ko ccay a milisataay, ci Lifi o wawa ni Alfayus, maro' cingra i pilisataan. <<Katayni a mitoor i Takowanan,>> han ni Yis cingra a somowal. Saka, lowad sato ci Lifi a mitoor i ci Yisan.
15Ikor to i, mitahka ci Yis i loma' ni Lifi, ira a mitoor haca ko 'alomanay a milisataay ato tatiihay a tamdaw i Cingraan. Ira itira ko 'alomanay a tamdaw mikapot ci Yisan ato nisawawaan Ningra a mitahka. 16Ma'araw no papinapina a pasifana'ay to Rikec ato Farisay a tamdaw ko nipikapot ni Yis to tatiihay ato milisataay a tamdaw a komaen. Ta milicay to nisawawaan Ningra, <<Nawiro mikapot Cingra to milisataay ato tatiihay a tamdaw a komaen saw?>> han nangra.
17Matngil ni Yis konini i, sowal sa, <<O tanoktokay a tamdaw i, caay ko papaisingen, deng o adadaay ko papaisingen. O patosokan Ako a tayni i, caay ko mitahidangay to mo^celay a tamdaw, o mitahidangay Kako to ciraraway a tamdaw,>> han ni Yis.
O Pakayniay i Pisaliway a Licay
(Matay 9.14-17; Luka 5.33-39)
18Itiya i, misaliway ko nisawawaan no paino'ay a Yohani ato Farisay a tamdaw. Ira ko tayraay i ci Yisan a milicay, <<Misaliwayay ko nisawawaan no paino'ay a Yohani ato nisawawaan no Farisay a tamdaw. Nawiro caay pisaliway ko nisawawaan Iso?>> han nangra.
19Paca'of sa ci Yis, <<Yo iraho i pitahkaan ko papararamoden a fa'inay i, manga'ay hakiya a misaliway ko widang ningra? Ano malaccayho ko papararamoden a fa'inay ato cangra i, caay ka pisaliway cangra. 20Nikawrira, ano maraodto ko romi'ad to pialaan toya papararamoden a fa'inayan i, itiyato cangra a misaliway.
21<<O romasato, awaay ko mitapiday i matlangay a riko' to fa^lohay a kiradom. Nawhani ano haenen i, macicih no fa^lohay a satapid ko matlangay a riko'. Satata'ang sato ko nika cicih noya riko'. 22O romasato, awaay ko miparoay i matlangay a falako a lofoc to fa^lohay a ^pah. Nawhani ano haenen i, maftas noya ^pah koya falako a lofoc. Awaayto ko ^poc toya ^pah atoya falako a lofoc. Orasaka, o fa^lohay a ^pah i, o fa^lohay a falako a lofoc ko piparoan,>> han ni Yis.
O Pakayniay i Pasla'an a Romi'ad a Licay
(Matay 12.1-8; Luka 6.1-5)
23Yo ccay a Pasla'an a Romi'ad pakayra i ci^miay a omah ca Yis a romakat. Itiya i, kalanipihapric han no nisawawaan ningra to minaro'an no ^mi ko nika lahaklong nangra a romakat. 24Itiyasato, pasowal ko Farisay a tamdaw i ci Yisan, <<Nengnengen, midmak ko nisawawaan Iso to caay ko dadmaken i Pasla'an a Romi'ad,>> saan.
25Paca'of sa ci Yis, <<Caho ka asip namo saw ko pakayniay i nano dmak na Tafiti ato kapot ningra yo macahiw cangra? 26Yo ci Apiatarho ko sakakaay a citodongay to ta'ong i, micomod ca Tafiti i Pita'ongan to Kawas a Loma' a komaen to nipacakatan i Kawas a ^pang. Komaen ci Tafiti tonini, pakaenen ningra ko kapot ningra tonini. Pakayni i Rikec no mita i, deng o citodongay to ta'ong a tamdaw ko kakomaen tonini a ^pang.
27<<O saki tamdaw ko sakaira no Pasla'an a Romi'ad. Caay ko saki Pasla'an a Romi'ad ko sakaira no tamdaw. 28Orasaka, o Tapang haca no Pasla'an a Romi'ad ko Wawa no Tamdaw,>> saan.
Dewis Presennol:
Maroko 2: AMIS2019
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2019