Juan 1
1
Utzij i Dios x-on winaq
1Chuxeb'al ij saq, i Tzij o chik, i jun chi are i Tzij o chik ru' i Dios xaq lik are i Dios. 2I Tzij le, lik ax o wi ru' i Dios chuxeb'al loq. 3Are Ire x-anaw ronojel ni'pa i olik junam ru' i Dios; nti jun b'iroxik olik we are ti Ire anawnaq. 4Are Ire uxeb'al i k'aslemal; i k'aslemal le are i saq ke i winaq. 5I saq le lik kwalch'in pa taq equm; i equm tikinaq ti chuchupik i saq le. 6Xuk'ulmaj jun ij i Dios xutaq li jun achi, ma Wan ub'i, 7re kusaqij chke i winaq chi i tzij le lik qatzij, man keje ile konojel i winaq kkikojo wach taq i tzij chi kub'ij chke. 8Xwiri i ma Wan le are ti ire i saq, ire xwi xtaq li chub'ixkil pachin i saq le. 9I saq le chi ktzun pkik'aslemal i winaq kk'un ni chwach i jyub' ta'aj.
10I Jun chi are i Tzij, o chi chwach i jyub' ta'aj, tupu are Ire x-anaw i jyub' ta'aj, xwiri, i winaq chi je o chwach i jyub' ta'aj xketamaj ti uwach. 11Ire xk'un ku' utinimit, xwiri ike xkik'ulaj ti ku'. 12Xwiri ni'pa i xkik'ulaj ku' xaq xekojon che; lik xya' chke chi xeu'on rak'al i Dios. 13Ike le, lik xeu'on rak'al i Dios, keje taj pacha kak'al i winaq chi rumal urayijb'al kich'akul kealaxik, ike lik rumal urayijb'al i Dios xeu'on rak'al Ire.
14I Jun chi are i Tzij xu'an winaq che rib' xaq xjeqi chqaxol, lik nim i k'axnab'al uk'ux xaq lik saq laj tzij, xaq qilom u'ij uchomal chi xya' che rumal Uqajaw man lik xa jun chrij. 15I ma Wan xusaqij pachin i Tzij le: Kub'ij “Iri are i Jun chi xinb'ij chiwe chi kk'un chwijil yin, xwiri lik nim u'ij chinwach man ire ax o wi chinwach yin.”
16Rumal i nim laj rutzil uk'ux i Dios, qonojel qariqom i utzil chomal chi lik nti uk'isik. 17I atb'al tzij re i Dios che i mam Moisés xyaw wi ub'ixkil; xwiri i k'axnab'al k'uxij xaq i saq laj tzij are i Jesucristo xk'amaw loq. 18Lik mijun ilawnaq uwach i Dios;#1.18 Éxodo 33.18-20. xwi i rak'al chi xa jun olik chi lik Dios. Man Ire lik o ru' uqajaw, are Ire xolusaqij chqe.
I ma Wan chi Ajqajsanel Ya klapan chrij i Jesucristo
19I aj Judío chi je o pa tinimit Jerusalén, je o jub'an i rajpatan i Dios xaq i jub'an aj Leví xekitaq b'i ru' ma Wan chutz'onoxik che pachin taq ire. 20Ire lik xusaqij chke: Yin in are ti i Cristo.
21Te'uri xkitz'onoj chik che:
—¿At pachin ut? ¿Yet at ma Elías chi profeta?
I ma Wan xub'ij:
—Yin taj.
Are uri xkib'ij chik che:
—¿Are b'awa yet at profeta chi kk'unik?
Ire xula' chik uwach:
—Yin taj.
22Are uri ike xkib'ij chik che ma Wan:
—¿At pachin ut? Man yoj keqab'ij chke i xojtaqaw loq, chab'ij uri chqe at pachin yet —xecha.
23Are uri ma Wan xula' uwach chke:
—Yin in are i jun ch'awb'al chi ksik'in chub'ixkil i tziji pa tz'inilik jyub' chaqij: ¡Chiyijb'a i b'e chwach i Ajwal! Pacha xub'ij mam Isaías ujer chi profeta.
24I achiyab' chi je taqtal b'i kumal aj fariseo che i lapanik ru' ma Wan, 25xkitz'onoj chik che:
—We yet ti at Cristo, yet ti mam Elías xaq we yet ti at profeta, ¿B'uchak ut kaqajsaj ya pkiwi i winaq? —Xecha che.
26I ma Wan xula' uwach chke:
—Yin, qatzij kinqajsaj ya pkiwi i winaq, xwiri chixol yix o jun chi iweta'am ti uwach. 27Ire kk'un chwijil yin. Chi lik kmajaw ti chwe chi kinchaki qaj chutorik uwach uxajab' che, man lik nim u'ij —xcha.
28Ronojel ile xuk'ulmaj chila che jun k'ijib'al chi Betábara ub'i, ch'aqa ya che i raqana Jordán, chila ipa ktijin wi ma Wan chuqajsaxik ya pkiwi i winaq.
I Jesús are i Ral Chij re i Dios
29Chukab' ij, i ma Wan xril uwach i Jesús chi ktijin utejeb'ik ru', are uri xub'ij chke i winaq: “¡Chiwila pe', ile are Ral Chij re i Dios chi kresaj kimak konojel i winaq chwach i jyub' ta'aj! 30Are ire le xinlap chiwe are xinb'ij: Chwijil yin kk'un jun chi lik mas nim u'ij chinwach, man ire ax o wi chinwach yin. 31Yin xaq weta'am ti te'eq pachin ire le, xwi xink'un waral chuqajsaxik ya pkiwi i winaq man keje ile i aj Israel kketamaj ni uwach.”
32I ma Wan xaq xusaqij i tziji: “Xwil i Lo'laj Utewal i Dios chi xqaj li chikaj pacha jun palomax, kanajb'al re puwi i Jesús. 33Yin weta'am taj pachin taq Ire le, xwiri i Dios chi xinutaq li chuqajsaxik ya pkiwi i winaq, xub'ij: Are i jun chi kqaj Lo'laj Utewal i Dios puwi, are Ire le, kuqajsaj i Lo'laj Utewal i Dios pkiwi i winaq; xcha. 34Yin wilom chik uwach; rumali lik kinb'ij chiwe chi are ire le Rak'al i Dios.”
I nab'e taq utijoxelab' i Jesús
35Chukab' ij i ma Wan o tan chik chila junam ku' i keb' chke utijoxelab'. 36Are xril uwach i Jesús chi ktijin rik'awik, xub'ij:
—Chiwila pe', are Ral Chij ile re i Dios —xcha.
37I keb' utijoxelab' ma Wan le are xkita wach taq xub'ij, xeterej b'i chrij i Jesús. 38I Jesús xtzun chrij, are xerilo chi je teren b'i chrij, xutz'onoj chke:
—¿Wach kitzukuj?
Ike xkib'ij:
—Tijonel ¿Ipa at jeqel wi yet?
39I Jesús xula' uwach chke:
—Chixpetoq, choliwila.
Are uri xe'e chrilik ipa jeqel wi i Jesús, xwiri moq kolo kajib' or chik re uqajb'al ij are xeuponik, rumali xeqajsan ij ru'.
40Jun chke i keb' le chi xkita wach xub'ij i ma Wan chi xterej b'i chrij i Jesús, are ma Andrés chi katz kicha' kib' ru' ma Simón Pedro. 41I ma Andrés le, x-e la chutzukuxik ma Simón Pedro, xub'ij che:
—Qariqom i Mesías chi taqtal li rumal i Dios, chi ke'eloq Cristo —xcha.
42Are uri ma Andrés xuk'am b'i ma Simón chila ipa o wi i Jesús. I Jesús are xril uwach ma Simón, xub'ij che:
—Yet at ma Simón chi at uk'ojol ma Wan, xwiri wo'or, yin kinya pab'i ma Cefas (chi ke'eloq ma Pedro).
I Jesús xusik'ij ma Felipe xaq i ma Natanael
43Chukab' ij, i Jesús xuch'ob' enam pa Galilea; are xuk'ulaj chwach ma Felipe, xub'ij che:
—Chatterej chwij, ma Felipe.
44I ma Felipe le, aj chila pa tinimit Betsaida, ipa kpe wi ma Andrés xaq i ma Pedro. 45I ma Felipe x-e chutzukuxik ma Natanael, xub'ij che:
—Xqariq i Jun chi utz'ib'am kan mam Moisés chupam i wuj re i atb'al tzij. Chi xaq kitz'ib'am kan je profeta. Are i Jesús aj Nazaret, chi uk'ojol ma José.
46Are uri ma Natanael xub'ij:
—¿O nawi jun utz kel chila che i tinimit Nazaret le?
Are uri ma Felipe xub'ij che:
—Chatpetoq, cholawila.
47I Jesús are xrilo chi ktijin utejeb'ik ma Natanael, xub'ij:
—Ley xk'un i jun le chi aj Israel, chi lik kt'oron taj.
48Are uri ma Natanael xutz'onoj che:
—¿Wach retamaxik inwach a'anom?
I Jesús xub'ij che:
—Yin xwil awach are k'amaja katusik'ij ma Felipe, are at o chuxe' i che' higuera.
49I ma Natanael xub'ij che:
—Tijonel ¡Lik qatzij yet at Uk'ojol i Dios! Yet at Ajawinel pa tinimit Israel.
50I Jesús xub'ij che:
—¿Yet xinakojo xa rumal xinb'ij chawe chi xwil awach chuxe' uche'lal higuera? Xwiri k'a o ni nimaq taq il kawil chwach i xinb'ij chawe le.
51Xaq xub'ij chik i Jesús chke:
—Lik kinsaqij chiwe chi kiwil ni i kaj jaqalik xaq i ángel re i Dios chi ke'el b'ik xaq keqaj li puwi i pacha Winaq chi Xolalaxoq chwach Ulew —xcha.
Dewis Presennol:
Juan 1: ACHICUB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Biblia Achí de Cubulco, Derechos reservados de Sociedad Bíblica de Guatemala