Juan 2
2
Jun k'ulankil pa Caná re i tinimit Galilea
1Che urox ij x-an jun k'ulankil pa Caná re i tinimit Galilea. I uchuch i Jesús o chila. 2I Jesús junam ku' utijoxelab' xaq xb'ix chke chi kekila i k'ulankil le. 3Xuk'ulmaj uri chi xk'is i uwa'al uva muqb'am, are uri i uchuch i Jesús xub'ij che i ralab':
—Xk'is i uwa'al uva muqb'am —xcha.
4I Jesús xula' uwach che uchuch:
—Chata pe', ixoq: ¿Wach taq we yin che ile? Man yin k'amaja kuriq i or chinwach.
5Are uri i uchuch i Jesús xub'ij chke i kejachaw i tijawik re:
—Chi'ana ronojel ni'pa kub'ij ire chiwe.
6Chila che i nima'ij le o waqib' kukub' chi antal che ab'aj, yab'al kiya' aj Judío re ch'ajb'al ki'ab' pacha ax kki'an wi aj Judío chwach i Dios. I jujun chke i kukub' le, kuch'ij kolo jo'winaq (100) nimaq taq k'ox ya. 7Are uri i Jesús xub'ij chke i kejachaw i tijawik re:
—Chinojsaj i kukub' le che i ya.
Are uri ike xkinojsaj ronojel i kukub' che i ya. 8Te'uri xub'ij chke:
—Wo'or chilika jub'i', chik'ama b'i che i ok'awnaq utzam i nima'ij —xcha.
Ike keje ile xki'ano. 9I aj-ok'al utzam i nima'ij xutu' jub'i' che i ya chi xyiji che uwa'al uva muqb'am. Ire reta'am taj ipa xk'am wi loq, xwi i je k'amawnaq b'ik keta'am ipa petnaq wi. Man je are ike xkilik li i ya, rumali i aj-ok'al utzam i nima'ij xusik'ij i ala chi ya kk'uli'ik, 10xub'ij che:
—Konojel i winaq nab'e kkiya chutu'ik i uwa'al uva muqb'am chi lik paqalik, are k'i chik kitu'um te'uri kkiya chutu'ik i uwa'al uva muqb'am chi paqal ti rajil, xwiri yet keje ti ile xa'an che, xa xaya kan i uwa'al uva muqb'am chi paqalik pa k'isb'al re —xcha.
11Lik are nab'e i nim laj il ile xu'an i Jesús chila pa Caná re i tinimit Galilea, lik chila xuk'utb'ej u'ij uchomal. Are uri i utijoxelab' xkikoj i Jesús.
12Chrijil chik ile x-e pa tinimit Capernaum rachi'ilam b'i uchuch, ucha' xaq i utijoxelab', chila xekanaj wi kanoq, keb' oxib' ij.
I Jesús xeresaj b'i ajk'ay prachoch i Dios
13Man ya kjeqan i nima'ij Pascua ke aj Judío, rumali i Jesús x-e pa tinimit Jerusalén. 14Are xuponik xeuriq i jalajuj taq ajk'ay chupam rachoch i Dios, chi kkik'ayij kichikop, kichij, kipalomax; xaq xril kiwach i achiyab' chi taq mexa chi je ajjalwachil uwach kipwaq i winaq. 15I Jesús are xril ronojel ile xpe jun nim laj roywal, are uri xuk'am pan keb' oxib' rab'aj tz'um, xu'an jun asial che, xeresaj b'i konojel ni'pa je o chila prachoch i Dios junam ku' kichikop xaq i kichij. Xaq i kejalwachiw i pwaq, xukichij b'i kipwaq pa taq ulew xaq xupak'ij b'i kimexa. 16Konojel ni'pa kek'ayiw i palomax xub'ij chke:
—¡Chiwesaj b'i ronojel iri waral, mi'an jun k'eb'al che rachoch Inqajaw! —Xcha.
17Are uri utijoxelab' xk'un chkik'ux uwuj i Dios chi tz'ib'talik: “Rumal i nim laj k'axnab'al ink'ux che awachoch kinkam rumal i woywal.”
18Are uri i winaq aj Judío xkitz'onoj che:
—¿Wach k'utb'al re kaya chqe chi o i atb'al tzij pa'ab'?
19I Jesús xub'ij chke:
—Chiwulijsaj i rachoch i Diosi pulew, yin xa che oxib' ij kinyak tan chik —xcha.
20I winaq aj Judío xkib'ij chik che:
—Waqib' kawinaq (46) junab' xyaktaj wi rachoch i Diosi, ¿I yet kab'ij chi xa oxib' ij kattiki chuyakik?
21Xwiri i Jesús are ti rachoch i Dios xulapo, xa are uch'akul ire. 22Rumali, are xwalij i Jesús chkixol i kamnaq, i utijoxelab' xk'un i tzij le chkik'ux chi ub'im, are uri xkikojo wach i tz'ib'tal kan chupam uwuj i Dios xaq che utzij i Jesús.
I Jesús reta'am wach taq o pkik'ux i winaq
23Tz'aqat o i Jesús pa Jerusalén pa nima'ij re Pascua, lik je k'i i winaq xkikojo are xkil i nimaq taq il chi xu'ano. 24Xwiri i Jesús xukoj ti retalil wach taq xki'an i winaq, man ire reta'am wach taq o pkik'ux. 25Lik reta'am wach o pkanima i winaq, rumali nti uchak we o jun kub'ij che wach o pkik'ux i winaq.
Dewis Presennol:
Juan 2: ACHICUB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Biblia Achí de Cubulco, Derechos reservados de Sociedad Bíblica de Guatemala