Maatiusiup Aglangit 13
13
Ajjiujuq Piruqtuksanik Kanngaqsuiji
Maakusi 4:1-9; Luukasi 8:4-8
1Ullumi tavvanitsainnaq Jiisusiup iglu taanna qimaglugu tasiup sinaanuaqpuq. 2Inugiakturjuat tavvani katimajut Jiisusiup avataani, unuqtummarialuulirmata umiamuaqpuq, tavvanilu iksivaarluni, inugasagjuat tasiup sinaani nangiqtillugit. 3Ajjiujunik aturluni amisunik uqallagvigivait, imaak uqarluni:
“Taissumani angutitaqalauqpuq niaquujaksanik kanngasuijaqtuqtumik. 4Piruqsiivingmut kanngaqsuiliqpuq piruqtuksanik, ilangit aqqusinirmut katakput, tingmiat tamaunngaramik tamakkua pukuliqpait. 5Ilangilli ijjukittumut qaiqsumut katakput, tamanna ijjukittuungmat; piruqtuksait tavvainna pirukautigivut, tamatuma ijjuup saattuuninganut. 6Siqiniq nuingmat, piruliqtuugaluat uutauvut; amaaqannginnamik akuniunngittuq paniqput. 7Ilangilli piruqtuksait katakput uqpingnut kakillautilingnut, taakkua piruramik, ipititauvut uqpingnut kakillautilingnut. 8Ilangilli piruqtuksait katakput nunamut ijjutsiariktumut, piruqtuit piruramik niaquujaksaqaliqput: ilangit 100-nik, ilangit 60-nik, ilangillu 30-nik.”
9Jiisusilu uqaqpuq, “Tusaajunik siutilit, tusarlit!”
Ajjiujuup Taassuma Uqausirijaujjutigijanga
Maakusi 4:10-12; Luukasi 8:9-10
10Tavva ilinniaqtit Jiisusimuarlutik apirivaat, “Sungmat ajjiujutigut inuit ajuriqtuqpigit?”
11Jiisusiup kiuvait, “Guutiup Ataniuvingata nalunarninganik qaujititauvusi, taakkuali qaujititaunngilat. 12Piqaqtuq tunisiviukkannirajaqpuq piqaluakkanniqullugu, piqanngitturli aqsaaqtaugajaqpuq mikijumigluunniit piqaraluaqpat. 13Taakkununga ajjiujunik uqausiqaqattaqpunga imainninganut, takunnaraluarlutik takujunnanngimmata, tusaagaluarlutik tusarunnanngilat, tukisijunnaratiglu. 14Aisaiasiup uqausirilauqtangit nalautsivut imailijut:
‘Tusaatsiarniaqpusi tukisinianngilasili;
Takutsiarniaqpusi, suqquiqsinianngilasilu.
15Isumangit kigliqatsiaqtitsijunniirmata,
Siutingillu tusaatsiarunniirlutik.
Sikunngingallutiglu, sikunngingikkutik takutuinnariaqaramik,
Siutimingnullu tusaatuinnariaqaramik,
Uummatimigullu tukisituinnariaqaramik,
Uvannullu saagiatuinnariaqaramik uvangalu aaqqikkajaqpakka.’
16“Ilissili, quviasuktuksauvusi! Ijisi takunnarmata, siutisilu tusaallutik. 17Sulijumik uqautivassi, nalauttaijut amisut, Guutiullu inuqutingit amisut, takujumalauqput takujassinnik, takulaunngilallu, tusarumammarilauqput tusaajassinnik, tusalauratiglu.”
Jiisusiup Nalunaiqsininga Kanngaqsuijuup Ajjiujuuninganik
Maakusi 4:13-20; Luukasi 8:11-15
18“Naalalaurissi, kanngaqsuijuup ajjiutitauningata tukinganik. 19Taakkua uqausirnik tusaqtut Guutiup Ataniuvinganik tukisinatiglu, ajjiqaqput piruqtuksanik taikkununga aqqusinirmut kataktunik, piunngittuq tikinnami piijaivuq kanngaqsuutigijaujunik taakkununga. 20Piruqtuksait nunakittumut qaiqtumut kataktut imaittumik tukiqaqput, uqausirnik tusaqtunut quviasulirlutiglu tusaramik. 21Kisianili itijumik tunngaviktaaqtitsinginnamik akuniunngittuq nuqqaqput, quviananngittunut uvvalu akiraqtuqtaunirmut tikitauliramik, taakkua uqausit pillugit, tavvainnaq sapilikautigivut. 22Piruqtuksailli kataktut uqpit kakillautilit akurngannut imaittumik tukiqaqput, uqausirnik tusaqtunut; tamatumali inuusiup isumajaarnarninganut ajuqsanngittuujumanirmullu uqausit ipititauvut, pirurviunatiglu. 23Piruqtuksailli nunamut ijjuriktumut kataktut imaittumik tukiqaqput; uqausirnik tusaqtunut tukisillutiglu; piruqtitsiliqtunut, ilangit 100-nik, ilangilli 60-nik, ilangillu 30-nik.”
Pirurnirluktut Ajjiutitauningat
24Jiisusiullu uqautikkanniqpait ajjiujumik asianik: “Guutiup Ataniuvinga imaittumik ajjiqaqpuq; angut kanngaqsuivuq kanngaqsuutiksanik piujunik piruqsiiviqutiminut. 25Unnuakkulli sinilirmata, akiraq piruqsiivingmuaqpuq kanngaqsuillunilu pirurnirluktuksanik niaquujaksait akurngannut, aullarluni. 26Piruqtulli pirulirmata nuvungit niaquujaksait aaqqikpallialirmata, tavva pirurnirluktut saqqikkivut. 27Piruqsiiviqutiliup pijingit angajuqqaamingnuaqput uqarlutiglu, ‘Angajuqqaak, kanngaqsuutiksanik piujunik kanngaqsuilauravit piruqsiiviqutingnut; makuali? Pirurnirluktut nakit pijuvini?’ 28Taassuma kiuvait, ‘Akiraup tamanna pinasuaqtavinia,’ taakkua apirivut, ‘Pirurnirluktunik amusijaqtuquvitigut?’ 29Taanna kiuvuq, ‘Aakka, tamakkuninga pirurnirluktunik katitsiliqtillusi, niaquujaksait ilangit amuqasiutituinnariaqarassiuk.’ 30Taimaimmat niaquujaksait, pirurnirluktullu, piruqatigiituinnalaurlit katiqsuiviksaq nalliutilaunnginningani, katiqsuivigli nalliutikpat nakatirijit uqautijumaaqpakka: pirurnirluktut nakatiqqaarlugit, qilaksuqsigit katillugit ikuallagaksauqullugit, kinguningagulli niaquujaksait katisigik katiqsivinnuarlugit!”
Ajjiujuq Piruqsiaksaq Mikittukuluk
Maakusi 4:30-32; Luukasi 13:18-19
31Jiisusiup uqarvigikkanniqpait ajjiujumik asianik: uqarluni, “Guutiup Ataniuvinga piruqsiaksatut mustarttut taimaippuq angutiup piruqsiaksaq tigugamiuk piruqsiiviqutiminut kanngaqsuutigivaa. 32Taanna piruqsiaksalimaanit mikinniqpauvuq, pirurami piruqtulimaanit anginiqpauliqpuq napaaqtuulirluni, tavva tingmiat tavvani ulluliuliqput napaaqtuup avalangajunginni.”#13:32 Akirunginni
Puvallaqqutiup Ajjiutitauninga
Luukasi 13:20-21
33Jiisusiup suli ajjiujumik asianik uqautikkanniqpait: “Guutiup Ataniuvinga imaittumik ajjiqaqpuq, arnaq puvallaqqummik tigusivuq, niaquujaksaliaminut angijumut akuppaa,#13:33 Akuppaa uvvalu inguppaa uvvalu uluqpaa uvvalu uarussiutivaa taannalimaarlu puvallaqtippaa.”
Jiisusiup Ajjiujunik Aturninga
Maakusi 4:33-34
34Jiisusi ajjiujunik kisiani uqausiqarluni tamakkuninga uqallakpuq inugasagjuanut; ajjiujut asinginnik aturluni ajuriqtuinngilaq. 35Tavva nalauttaijuup uqausingit nalautsiliqput imailijut:
“Ajjiujunik aturlunga uqarviginiaqpakka;
Uqautiniaqpakka ijiqsimalauqtunik silarjuap pinnguqtitauninganit.”
Jiisusiup Nalunaiqsininga Pirurnirluktuup Ajjiujurijauninganik
36Jiisusi inugasagjuanit qimaruutigami iglumut itirmat, ilinniaqtingita upakpaat uqarlutik, “Uqautilauqtigut ajjiujuq pirurnirluktuq piruqsiivingmiittuq qanuq tukiqarmangaat.”
37Jiisusiup kiuvait, “Angut piruqtuksanik piujunik kanngaqsuijuq, taannauvuq Inuup Irninga; 38piruqsiivik, tavva silarjuaq, piruqtuksait piujut tavva inuit Ataniuviup pingit; pirurnirluktut tavva inuit Saataanasiup pingit; 39akiraqtuqti pirurnirluktuksanik kanngaqsuijuq taannauvuq Saataanasi; nakatirivvik tavva silarjuup isua, katiqsuijit tavva aingilit. 40Taakkua pirurnirluktut katitaullutik ikitaungmata ikumamut, taimaatsainnaqtauq pijuqarumaaqpuq silarjuup isuani: 41Inuup Irninga aingiliqutiminik tilisijumaaqpuq, katiqsuijaqtuqullugit tavvanngat Ataniuvingminit, inungnik ajuqtulititsijunik tamainnik, asinginniglu ajuqtulinirmik pinasuaqtunik, 42taakkua igittumaaqpait ikumarjuarmut; tavvani qiajumaaqput aglirularlutiglu aannianirmut. 43Iluaqtulijulli qaumaniqarumaaqput siqiniqtut Ataatangatta Ataniuvingani. Tusaajunik siutilik tusarli!”
Ajjiujuq Piquti Illirnaqtuq Ijiqsimajuq
44“Guutiup Ataniuvinga ajjiqaqpuq piqutimik illirnaqtumik ijiqsimajumik piruqsiivingmi, angutiup nanigamiuk ijikkannirivaa; aksualuk quviasulirami piqutilimaani niurrutigivait utirami taanna piruqsiivik niuviarivaa.”
Ajjiujuq Sapangaq Pijuminaqtuq
45“Ammattauq, Guutiup Ataniuvinga ajjiqaqpuq niuviqtimik qiniqtumik sapangarmik pijuminaqtumik. 46Nanisigamilu akitujuksajammariungmat angirraqpuq, piqutilimaani tamarmik niurrutigivait utirami sapangaq pijuminaqtuq niuviarivaa.”
Iqalugasuktuup Ajjiujurijauninga
47“Ammattauq, Guutiup Ataniuvinga iqalungniutititut nuluatitut taimaippuq imaanut ningititaujutitut qanuittutuinnaalungnik nuluaqtitsijutitut. 48Nuluat tatammata, iqalugasuktinit nunamuarujjauvut nunamuaramik iksivaalirlutik iqalungnik pijailiqput iqalutsiavait katillugit qattaujanut piunngittulli igippait. 49Taimaittumaarivuq silarjuup naggataani. Aingilit tikittumaaqput piijaijaqturlutik piunngittunik taakkunanga iluaqtulijunit, 50piunngittut igittumaaqpait ikumarjuarmut; tavvani qiajumaaqput aglirularlutiglu aannianirmut.”
Ajuriqtuusituqaq Ajuriqtuusirlu Nutaaq
51Jiisusiup apirivait, “Uqausirijakka tukisivisiuk?”
Taakkua kiuvaat, “Tukisivavut.”
52Jiisusiup uqautivait, “Taimaimmat piqujanik ilisaijit Guutiup Ataniuvinganik ilinniaqtitausimajut ajjiqaqput iglumik nangminiqaqtutut sirluarmingnit saqqititsijutitut nutaanik nutaunngittuniglu.”
Naasariitimiut Jiisusimik Narruningat
Maakusi 6:1-6; Luukasi 4:16-30
53Jiisusiup tamakkua ajjiujut uqausirijariiramigit, tavvanngat najuqtaminit aullaqpuq. 54Nunatuqaminut utirami Juutit ukpirnirmut katimavinganni ajuriqtuiliqpuq, tusaajulimaat kamaniammarikput, uqarlutik, “Nakinuna silatuniqtaaqtuviniq kamanaqtulijunnaqsillunilu? 55Qijulirijiumuna irnirinngila? Una Miarimik anaanaqanngilaq? Qatanngutingillu ukuangunngilaat Jaimisi, Juusipi Saimuuni, Juutasilu? 56Najangillu uvattinnimiutaunngilaat? Nakilliuna tamakkuninga pitaaqtuviniq?” 57Taimaimmat narrugiliqpaat.
Jiisusiup uqautivait, “Nalauttaijuq nanituinnaq upigijautsiasuunguvuq nunatuqaminili nangminirijaminilu ilamini, upigijautsiasuungunngilaq.” 58Tavvanili kamanaqtulinirnik amisunik pinasualaunngilaq, ukpirusunginningit pijjutigillugit.
Dewis Presennol:
Maatiusiup Aglangit 13: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.